The Phnom Penh Post Search

Search form




Logo of Phnom Penh Post newspaper Phnom Penh Post - លោក ហ៊ុន សែន សុំ​ឲ្យ​យោគ​យល់​ខ្ពស់​ចំពោះ​ទឹក​ជន់​លិច​រាជធានី

លោក ហ៊ុន សែន សុំ​ឲ្យ​យោគ​យល់​ខ្ពស់​ចំពោះ​ទឹក​ជន់​លិច​រាជធានី

ទឹក​ភ្លៀង​លិច​ផ្លូវ​នៅ​ម្តុំ​ផ្សារ​ដេប៉ូ​កាល​ពី​ថ្ងៃ​អាទិត្យ។
ទឹក​ភ្លៀង​លិច​ផ្លូវ​នៅ​ម្តុំ​ផ្សារ​ដេប៉ូ​កាល​ពី​ថ្ងៃ​អាទិត្យ។ ហុង មិនា

លោក ហ៊ុន សែន សុំ​ឲ្យ​យោគ​យល់​ខ្ពស់​ចំពោះ​ទឹក​ជន់​លិច​រាជធានី

ភ្នំពេញៈ ខណៈ​ប្រជា​ពលរដ្ឋ​ជាច្រើន មាន​ការ​ខឹង​សម្បា ហើយ​អ្នក​ខ្លះ បាន​បន្ទោស​ទឹក​ជន់​លិច​រាជធានី ដោយ​សារ​ការ​ចាក់​ដី​លុប​បឹង លោក​នាយក​រដ្ឋ​មន្ត្រី ហ៊ុន សែន កាល​ពី​ម្សិល​មិញ បាន​ស្នើ​សុំ​ឲ្យ​ប្រជា​ពលរដ្ឋ​មាន​ការ​យោគ​យល់ ខ្ពស់​ដោយ​លោក​បាន​សន្យា​ថា នឹង​ចាត់​ចែង​បង្កើត​ប្រព័ន្ធ​លូ​បន្ថែម​ទៀត​ដើម្បី​រំដោះ​ទឹក។

ក្នុង​ពិធី​ចែក​សញ្ញាបត្រ​ដល់​និស្សិត​នៃ​សាកល​វិទ្យាល័យ​បៀលប្រាយ កាល​ពី​ម្សិល​មិញ លោក​នាយក​រដ្ឋ​មន្រ្តី បាន​ថ្លែង​ជុំវិញ​បញ្ហា​ទឹក​លិច​រាជធានី​ថា លោក​បាន​ដឹង​ច្បាស់ ពី​ស្ថានភាព​ទឹក​ជន់​លិច និង​អារម្មណ៍​មួហ្មង​របស់​ប្រជា​ពលរដ្ឋ​ដែល​រង​ផល​ប៉ះ​ពាល់​ពី​គ្រោះ​ធម្មជាតិ​នេះ។

លោក​បាន​ឲ្យ​ដឹង​តាម​ការ​ប៉ាន់​ស្មាន​ថា៖ «ទឹក​ភ្លៀង​កាល​ពី​ម្សិល​មិញ (ថ្ងៃ​អាទិត្យ) គឺ​កម្រិត​កម្ពស់​ពី ៧០ ទៅ​ដល់ ៨០ មិលី្លម៉ែត្រ ទោះ​ជា​មាន​លូ​ធំ​ជាង​ហ្នឹង​ក៏​មិន​អាច​ដោះ (ទឹក) រួច​ដែរ។ ទី​ក្រុង​ប្រទេស​ខ្លះ លិច​លើស​ប្រទេស​យើង​ទៅ​ទៀត»។

លោក​បន្ត​ថា ទឹក​លិច​មិន​ត្រឹម​តែ​រាជធានី​ភ្នំពេញ​ទេ សូម្បី​តែ​កន្លែង​វាយ​កូន​ហ្គោល​ដែល​លោក​បាន​ទៅ​នោះ មាន​ទំហំ​វាល​រាប់​រយ​ហិកតា​ក៏​លិច​ដែរ។

លោក​បាន​ថ្លែង​បន្ត​ថា៖ «យើង​បាន​កំពុង​ចាត់​វិធាន​ការ​ទាញ​យក​ទឹក​ចេញ​តាម​រយៈ​ការ​កសាង​ប្រព័ន្ធ​លូ​ដើម្បី​ទាញ​ទឹក អ៊ីចឹង​ទេ សុំ​ការ​យោគ​យល់​ខ្ពស់​ផង»។

អ្នក​នាំ​ពាក្យ​សាលា​រាជធានី លោក ឡុង ឌីម៉ង់ បាន​ឲ្យ​ដឹង​ថា អាជ្ញាធរ​បាន​កំពុង​ពួត​ដៃ​គ្នា​បង្ការ​បញ្ហា​ទឹក​លិច​ដោយ​រៀបចំ​ប្រព័ន្ធ​លូ​បន្ថែម តែ​លោក​ថា បញ្ហា​ផ្លាស់​ប្តូរ​អាកាស​ធាតុ​នេះ ពិបាក​ក្នុង​ការ​ព្យាករ​ជា​មុន ហើយ​ពិសេស​នោះ គឺ​រាជធានី​ភ្នំពេញ ជា​តំបន់​ទំនាប​ដែល​អាច​ដក់​ទឹក​ច្រើន។

លោក​និយាយ​ថា៖ «យើង​មិន​អាច​ទស្សន៍​ទាយ​មុន​បាន​ទេ​ថា ក្នុង​រយៈ​ពេល​ប៉ុន្មាន​ឆ្នាំ​ទៀត​ទើប​ភ្លៀង​ហ្នឹង​លែង​លិច​នោះ ព្រោះ​បើ​ភ្លៀង​មួយ​មេៗ​មក​អ៊ីចឹង​យើង​ពិបាក​គ្រប់​គ្រង​ណាស់»។

ក្រោយ​ភ្លៀង​ខ្លាំង​ម្តងៗ​ក្នុង​រាជធានី​ភ្នំពេញ ស្ទើរ​គ្រប់​តំបន់ ត្រូវ​ទឹក​ជន់​លិច​ពិសេស​បរិវេណ​ជុំវិញ​ផ្សារ​កណ្តាល​គឺ​ទឹក​លិច​ទាំង​ផ្លូវ ផ្ទះ​ប្រជា​ពលរដ្ឋ​និង​ផ្សារ​កណ្តាល។

អ្នក​ស្រី ម៉ៅ ចិន្តា អាជីវករ​លក់​គ្រឿង​កំប៉ុង​នៅ​ផ្សារ​កណ្តាល បាន​ថ្លែង​ថា ការ​ថ្លែង​របស់​លោក​នាយក​រដ្ឋ​មន្ត្រី នឹង​មិន​អាច​បញ្ឈប់​ទឹក​មិន​ឲ្យ​ជន់​លិច​រាជធានី​បាន​នោះ​ទេ។

អ្នក​ស្រី​បញ្ជាក់​ថា៖ «ប្រហែល​មិន​អាច​ជួយ​អី​ទេ ឃើញ​លូ​ធ្វើ​តែ​រហូត ឯ​ចំណែក​ទឹក​នៅ​តែ​លិច ឥត​ប្រយោជន៍»។

សម្រាប់​អ្នក​តាម​ដាន​សង្គម និង​ពលរដ្ឋ​ក៏​ដូច​ជា​អ្នក​ប្រើ​ប្រាស់​បណ្តាញ​សង្គម​ហ្វេសប៊ុក បាន​បន្ទោស​ការ​ជន់​លិច​រាជធានី​នៅ​ពេល​ដែល​មាន​ភ្លៀង​ម្តងៗ ដែល​ហាក់​បី​ដូច​ជា​មាន​សន្ទុះ​លិច​លង់​កាន់​តែ​ខ្លាំង​ឡើងៗ​ពី​មួយ​ឆ្នាំ​ទៅ​មួយ​ឆ្នាំ​នោះ ថា​ដើម​ចម​សំខាន់​គឺ​បណ្តាល​មក​ពី​ការ​អភិវឌ្ឍ​ដោយ​ចាក់​ដី​លុប​បឹង​ស្ទើរ​តែ​ទាំង​អស់​ក្នុង​រាជធានី។

ជាមួយ​គ្នា​នេះ លោក វណ្ណ មូលីវណ្ណ វ័យ ៨៨ ឆ្នាំ​ជា​កំពូល​ស្ថាបត្យករ​ខ្មែរ​ដ៏​ល្បី​ល្បាញ ដែល​ធ្លាប់​ទទួល​បាន​ពាន​រង្វាន់​ជាច្រើន និង​ការ​កោត​សរសើរ ជុំវិញ​ការ​សាង​សង់​សំណង់​ស្តាត​អូឡាំពិក វិមាន​ឯករាជ្យ វិមាន​រដ្ឋាភិបាល និង​សាល​មហោស្រព​ជាច្រើន​នោះ បាន​បន្ទោស​ទៅ​លើ​រាជ​រដ្ឋាភិបាល​ជុំវិញ​បញ្ហា​ទឹក​ជន់​លិច​នៅ​ពេល​ដែល​មាន​ភ្លៀង​ម្តងៗ​នេះ ថា ដោយ​សារ​ការ​ចាក់​ដី​លុប​បឹង និង​ការ​លុប​ទំនប់​ទឹក​នានា នៅ​ក្នុង​រាជធានី។

លោក វណ្ណ មូលីវណ្ណ បាន​ថ្លែង​កាល​ពី​ម្សិល​មិញ​ថា៖ «បើ​ចង់​ដោះ​ស្រាយ​បញ្ហា​នេះ​ទាល់​តែ​អ្នក​ទទួល​ខុស​ត្រូវ​ទាំង​អស់ ប្រើ​ប្រាស់​ថវិកា​ឲ្យ​បាន​ត្រឹម​ត្រូវ ស្តារ​ឡើង​វិញ​នូវ​ហេដ្ឋា​រចនា​សម្ព័ន្ធ (ដែល​ធ្វើ​ឲ្យ​រាំង​ស្ទះ​ផ្លូវ​ទឹក)»។

បើ​តាម​ការ​ព្យាករ​របស់​ក្រសួង​ធនធាន​ទឹក និង​ឧតុ​និយម ភ្លៀង​នឹង​បន្ត​ធា្លក់​ពី​ពេល​នេះ រហូត​ដល់​ដើម ខែ​វិច្ឆិកា ក្នុង​កម្រិត​តិច​ឬ​ច្រើន​នៅ​តាម​បណ្តា​ខេត្ត-ក្រុង ដោយ​សារ​តែ​ប្រទេស​កម្ពុជា កំពុង​ទទួល​រង​នូវ​ប្រព័ន្ធ​សម្ពាធ​ទាប​ក្នុង​រដូវ​វស្សា​ឆ្នាំ​នេះ៕

អត្ថបទគួរចាប់អារម្មណ៍