ភ្នំពេញៈ លោកនាយករដ្ឋមន្ត្រី ហ៊ុន សែន ស្នើដល់ប្រមុខរដ្ឋាភិបាលអាស៊ានឲ្យជំរុញការធ្វើពាណិជ្ជកម្មបន្ថែមទៀតនៅក្នុងតំបន់អាស៊ាន ដើម្បីការអភិវឌ្ឍ និងភាពរីកចម្រើនរបស់អាស៊ានទាំងមូល ខណៈរដ្ឋមន្ត្រីការបរទេសកម្ពុជាថ្លែងថា អាស៊ានកំពុងខិតខំដើម្បីធានាឲ្យបានថា សមុទ្រចិនខាងត្បូងនៅតែជា «សមុទ្រនៃសន្តិភាព»។
លោក ហ៊ុន សែន បានទៅចូលរួមក្នុងកិច្ចប្រជុំកំពូលអាស៊ានលើកទី៣៤ នៅទីក្រុងបាងកក ប្រទេស ថៃ ដែលត្រូវបានរៀបចំឡើងនៅចាប់ពីថ្ងៃទី ២២ ដល់ ២៣ ខែ មិថុនា។ លោកបានថ្លែងថា កន្លងមកនេះ កម្ពុជាបានគោរពទៅតាមគោលការណ៍ និងកាតព្វកិច្ចរបស់ខ្លួន ក្នុងការចូលរួមជាសមាជិកអាស៊ាននេះ ពិសេសការចូលរួមថែរក្សាសន្តិសុខ ស្ថិរភាព ការអភិវឌ្ឍ និងវិបុលភាព។
យោងតាមទំព័រហ្វេសប៊ុករបស់លោកនាយករដ្ឋមន្ត្រី បញ្ជាក់ថា ក្នុងកិច្ចប្រជុំ ២ ថ្ងៃ ថ្នាក់ដឹកនាំអាស៊ានបានផ្តោតការយកចិត្តទុកដាក់ទៅលើបញ្ហាស្នូលរបស់អាស៊ាន ការពង្រឹងកសាងសមត្ថភាពរបស់អាស៊ាន ជាពិសេសការចូលរួមកាត់បន្ថយគម្លាតនៃការអភិវឌ្ឍអាស៊ាន ក្នុងការពង្រឹងនៃការធ្វើពាណិជ្ជកម្មផ្ទៃក្នុងអាស៊ាន ដើម្បីធ្វើយ៉ាងណា ជំរុញឲ្យអាស៊ានឆ្លើយតបទៅនឹងការប្រឈមនៃគ្រោះមហន្តរាយដោយការប្រែប្រួលអាកាសធាតុ ជាពិសេសពាក់ព័ន្ធទៅនឹងការគ្រប់គ្រងសំរាមដែលបច្ចុប្បន្ននេះកំពុងតែរាតត្បាតនៅតាមឆ្នេរកោះនៃប្រទេសសមាជិកអាស៊ាន។
ហ្វេសប៊ុកលោក ហ៊ុន សែន បន្តថា មេដឹកនាំនៃបណ្ដាប្រទេសអាស៊ាន ក៏បានផ្លាស់ប្ដូរមតិយោបល់ពិភាក្សាលើបញ្ហាប្រឈមលើការគ្រប់គ្រងបញ្ហាប្រែប្រួលអាកាសធាតុ និងជំរុញធ្វើយ៉ាងណាឲ្យអាស៊ានដើរតួនាទីសំខាន់ក្នុងយន្តការសាមគ្គីភាព ការ តភ្ជាប់អាស៊ាន ជាពិសេសកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ ក្នុងគោលបំណងធ្វើយ៉ាងណាឱ្យអាស៊ាននេះ ឆ្លើយតបនឹងអ្វីដែលអាស៊ានកំពុងតែកសាងសហគមន៍នេះ។ កម្ពុជាក៏បានគោរពទៅតាមគោលការណ៍ពាក់ព័ន្ធទៅនឹងមជ្ឈមណ្ឌលកម្ចាត់មីនតំបន់អាស៊ានដែលអាណត្តិនេះនឹងមានទីតាំងនៅក្នុងប្រទេសកម្ពុជា។
លោក ហ៊ុន សែន ក៏បានជួបសំណេះសំណាលជាមួយនាយករដ្ឋមន្ត្រី សិង្ហបុរី លោក លី ស៊ានឡុង នៅក្នុងជំនួបទ្វេភាគីដាច់ ដោយឡែក។ នាយករដ្ឋមន្ត្រីទាំង ២ បានឯកភាពក្នុងការបន្តកិច្ចសហប្រតិបត្តិការកាន់តែខ្លាំង និងដោយភាតរភាពរវាងប្រទេសទាំង ២។
កាលពីចុងខែឧសភាកន្លងទៅ លោក លី ស៊ានឡុង បានថ្លែងពាក់ព័ន្ធនឹងប្រវត្តិសាស្ត្រដ៏ចម្រូងចម្រាសអំពីវត្តមានរបស់កងទ័ពវៀតណាមនៅក្នុងការផ្ដួលរំលំរបបប្រល័យពូជសាសន៍ខ្មែរក្រហម។ អត្ថាធិប្បាយរបស់នាយករដ្ឋមន្ត្រី សិង្ហបុរីបានធ្វើឲ្យមានប្រតិកម្មជាច្រើនពីសំណាក់កម្ពុជា។
ប៉ុន្តែក្នុងជំនួបផ្ទាល់ជាមួយលោកនាយករដ្ឋមន្ត្រី ហ៊ុន សែន កាលពីម្សិលមិញ លោក លី ស៊ានឡុង បានថ្លែងថា៖ «វាជាសុបិនអាក្រក់រយៈពេលខ្លីនៅក្នុងទំនាក់ទំនងការទូតរបស់យើង»។ នេះបើតាមការបញ្ជាក់របស់លោក ប្រាក់ សុខុន ប្រាប់ដល់សារព័ត៌មាន CNC។
លោក ប្រាក់ សុខុន បន្តថា ក្នុងជំនួបនោះ ភាគីទាំង ២ បានចាត់ទុកថា បញ្ហាកាលពីអតីតកាលថា ជាទស្សនៈខុសគ្នាហើយភាគីម្ខាងមិនអាចកែប្រែនូវទស្សនៈរបស់ភាគីម្ខាងទៀតបានទេ។ លោក ប្រាក់ សុខុន បន្តថា ទោះយ៉ាងណា ភាគីទាំង ២ បានឯកភាពគ្នាដើរទៅមុខ ចាប់ដៃគ្នាដើម្បីភាពវិជ្ជមានទាំងអស់គ្នា។
ពាក់ព័ន្ធនឹងកិច្ចប្រជុំអាស៊ាន កាលពីថ្ងៃអាទិត្យម្សិលមិញ ក្រសួងការបរទេស និងសហប្រតិបត្តិការអន្តរជាតិ ក៏បានចេញសេចក្តីប្រកាសព័ត៌មានអំពីការចូលរួមប្រជុំចំនួន ៣ របស់លោក ប្រាក់ សុខុន រដ្ឋមន្ត្រីក្រសួងការបរទេសកាលពីថ្ងៃទី ២២ ខែ មិថុនា នៅមុនកិច្ចប្រជុំកំពូលអាស៊ានលើកទី៣៤។
នៅក្នុងកិច្ចប្រជុំថ្នាក់រដ្ឋមន្ត្រីអាស៊ាន ក្រសួងការបរទេសបានថ្លែងថា សម្រាប់ការកសាងសហគមន៍អាស៊ាន លោក ប្រាក់ សុខុន បានសង្កត់ធ្ងន់ពីសារៈសំខាន់នៃចក្ខុវិស័យ «ភាពជាដៃគូសម្រាប់ចីរភាព» និងទស្សនវិស័យអាស៊ាន ស្តីពីឥណ្ឌូប៉ាស៊ីហ្វិក។ លោកបានលើកឡើងពាក់ព័ន្ធនឹងបញ្ហាសមុទ្រចិនខាងត្បូង ដោយលោកបានលើកឡើងថា៖ «អាស៊ានកំពុងខិតខំដើម្បីធានាឲ្យបានថា សមុទ្រចិនខាងត្បូងនៅតែជា «សមុទ្រនៃសន្តិភាព»។
អាស៊ាន និងចិនគួរបន្តធ្វើការជាមួយគ្នាយ៉ាងជិតស្និទ្ធ ដើម្បីធានាបាននូវការកសាងទំនុកចិត្ត សំដៅសម្រេចបាននូវការបញ្ចប់ការចរចាអំពីក្រមសីលធម៌ (COC) ដែលមានប្រសិទ្ធភាព»។
លោក ប្រាក់ សុខុន ថ្លែងថា ចិននិងអាស៊ានគួរតែប្រកាន់ខ្ជាប់នូវ «ស្មារតីទីក្រុងបាលីសៀមរាបដែលសង្កត់ធ្ងន់លើភាពបត់បែន និងការសម្របសម្រួលទៅវិញទៅមក»។
លោក ប្រាក់ សុខុន ប្ដេជ្ញាធ្វើការជាមួយថ្នាក់ដឹកនាំអាស៊ានផ្សេងទៀត ដើម្បីប្រយុទ្ធប្រឆាំងជាមួយអំពើភេរវកម្មនៅក្នុងគ្រប់ទម្រង់ទាំងអស់៕