The Phnom Penh Post Search

Search form




Logo of Phnom Penh Post newspaper Phnom Penh Post - លោក ​ហ៊ុន សែន ​ស្នើ​រុស្ស៊ី​ជួយ​ផ្តល់​វ៉ាក់សាំង​ប្រឆាំង​ជំងឺ​កូវីដ​មក​កម្ពុជា​




លោក ​ហ៊ុន សែន ​ស្នើ​រុស្ស៊ី​ជួយ​ផ្តល់​វ៉ាក់សាំង​ប្រឆាំង​ជំងឺ​កូវីដ​មក​កម្ពុជា​

Content image - Phnom Penh Post
លោក ​ហ៊ុន សែន ក្នុង​ជំនួប​ជា​មួយ​ឯក​អគ្គ​រដ្ឋ​ទូតរុស្ស៊ី ពីម្សិល​មិញ​។ រូបថត SPM

លោក ​ហ៊ុន សែន ​ស្នើ​រុស្ស៊ី​ជួយ​ផ្តល់​វ៉ាក់សាំង​ប្រឆាំង​ជំងឺ​កូវីដ​មក​កម្ពុជា​

ភ្នំពេញ៖ លោក​នាយក​រដ្ឋមន្រ្តី ហ៊ុន សែន បាន​ស្នើ​សុំ​ឱ្យ​ប្រទេស​រុស្ស៊ី​ ជួយ​ផ្ដល់​ជំនួយ​ជា​វ៉ាក់សាំង​ការពារ​ជំងឺ​កូវីដ ​១៩​ មក​កម្ពុជា ខណៈ​ដែល​ប្រទេស​​​រុស្ស៊ី​ គ្រោង​នឹង​ចាប់​ផ្ដើម​ចាក់​វ៉ាក់សាំង​នេះ​ទ្រង់ទ្រាយ​ធំ​លើ​ពលរដ្ឋ​​​របស់​ខ្លួន​នៅ​ក្នុង​ខែ​តុលា ​​ខាង​មុខ។

ការ​ស្នើ​របស់​លោក ហ៊ុន សែន ​នេះ​ បាន​ធ្វើ​ឡើង​កាល​ពី​ម្សិលមិញ ខណៈ​ដែល​លោក​បាន​ជួប​​ស្វាគមន៍​ និង​ពិភាក្សា​ជាមួយ​លោក ANATOLY BOROVIK ដែល​ទើប​ត្រូវ​បាន​តែងតាំង​ជា​ឯកអគ្គ​រដ្ឋទូត​រស្ស៊ី​ថ្មី​ប្រចាំ​កម្ពុជា​។

ទំព័រ​ហ្វេសប៊ុក​របស់​លោក ហ៊ុន សែន បាន​សរសេរ​ថា លោក​បាន​អបអរ​សាទរ​ប្រទេស​រុស្ស៊ី ដែល​បាន​រក​ឃើញ​វ៉ាក់សាំង​ប្រឆាំង​ជំងឺ​ឆ្លង​កូវីដ ​១៩ ដែល​លោក​យល់​ឃើញ​ថា ការ​រក​ឃើញ​វ៉ាក់សាំង​នេះ នឹង​អាច​ជួយ​ពិភព​លោក​ប្រយុទ្ធ​ប្រឆាំង​ជំងឺ ដែល​កំពុង​ធ្វើ​ឱ្យ​មាន​បញ្ហា​ប្រឈម​ជា​ច្រើន ដូចជា​បញ្ហា​សេដ្ឋកិច្ច សង្គម និង​ទំនាក់ទំនង​រវាង​ប្រទេស​ជាច្រើន​នៅ​ក្នុង​ពិភព​លោក​។ ទំព័រ​ហ្វេសប៊ុក​​នេះ​បន្ត​ថា​៖ ​«​ទន្ទឹម​នឹង​នោះ​ដែរ សម្តេច​តេជោ​ ក៏​បាន​ស្នើសុំ​ដល់​រុស្ស៊ី ផ្តល់​នូវ​ជំនួយ​ថ្នាំ​វ៉ាក់សាំង​កូវីដ ​១៩ ​ដល់​កម្ពុជា ក្នុង​ការ​ទប់ស្កាត់​ការ​ឆ្លង​រាលដាល​ជំងឺ​កូវីដ ​១៩ ​នៅ​ក្នុង​ប្រទេស​»​។

កាល​ពី​ពាក់​កណ្ដាល​​ខែ​សីហា គឺ​មិន​ដល់ ​២ ​ខែ​បន្ទាប់​ពី​ការ​សាកល្បង​វ៉ាក់សាំង​លើ​មនុស្ស​ លោក វ៉្លាឌីមៀរ ពូទីន ប្រធានាធិបតី​រុស្ស៊ី​បាន​ប្រកាស​ថា ប្រទេស​របស់​លោក​បង្កើត​បាន​វ៉ាក់សាំង​ឈ្មោះ Sputnik-V សម្រាប់​ការពារ​ជំងឺ​ឆ្លង​កូវីដ ​១៩ និង​បាន​អនុម័ត​ឱ្យ​ប្រើប្រាស់​នៅ​ក្នុង​ប្រទេស ហើយ​រុស្ស៊ី​គ្រោង​នឹង​ចាប់​ផ្ដើម​ចាក់​វ៉ាក់សាំង​នេះ ​ទ្រង់ទ្រាយ​ធំ​លើ​ពលរដ្ឋ​នៅ​ក្នុង​ខែ​តុលា​ ខាង​មុខ​។

ទោះ​យ៉ាង​ណា អ្នក​ជំនាញ​មួយ​ចំនួន​ព្រួយ​បារម្ភ​អំពី​សុវត្ថិភាព​នៃ​វ៉ាក់សាំង​ដែល​បង្កើត​ឡើង ​និង​ដាក់​ឱ្យ​ប្រើប្រាស់​ដោយ​ប្រទេស​រុស្ស៊ី ​យ៉ាង​ឆាប់​រហ័ស​ បន្ទាប់​ពី​សាកល្បង​ក្នុង​រយៈ​ពេល​ខ្លី​នេះ ហើយ​អង្គការ​សហប្រជាជាតិ​ក៏​បាន​ទទូច​ដល់​ប្រទេស​នេះ​ឱ្យ​គោរព​តាម​គោលការណ៍​អន្តរជាតិ​ក្នុង​ការ​បង្កើត​វ៉ាក់សាំង​ប្រឆាំង​ជំងឺ​កូវីដ ​១៩​។

លោក​ស្រី ឱ វណ្ណ​ឌីន អ្នក​​នាំ​ពាក្យ​ក្រសួង​សុខាភិបាល​ធ្លាប់​បាន​បញ្ជាក់​ថា កម្ពុជា​នឹង​ទទួល​យក​វ៉ាក់សាំង​ប្រឆាំង​កូវីដ ​១៩ ​ពី​ប្រទេស​ណា​មួយ ដែល​បាន​ការ​ទទួល​ស្គាល់ ​និង​ប្រកាស​អនុញ្ញាត​ឱ្យ​ប្រើប្រាស់​ដោយ​អង្គការ​សុខភាព​ពិភព​លោក​​តែ​ប៉ុណ្ណោះ​។

នៅ​ក្នុង​ជំនួប​កាល​ពី​ម្សិលមិញ​ លោក ហ៊ុន សែន ក៏​បាន​លើក​ឡើង​អំពី​ជំនួយ​របស់​រដ្ឋាភិបាល​ និង​ប្រជាជន​រុស្ស៊ី ដែល​បាន​ផ្ដល់​មក​កម្ពុជា​នា​ពេល​កន្លង​មក ជា​ពិសេស​នៅ​ក្នុង​ទសវត្សរ៍​ឆ្នាំ ​១៩៨០ គឺ​អំឡុង​ពេល​កម្ពុជា​កំពុង​ជួប​វិបត្តិ​ជា​ច្រើន​ក្រោយ​ពី​រំដោះ​​​ចេញ​ពី​របប​ប្រល័យ​ពូជ​សាសន៍​ប៉ុល​ពត និង​ស្រប​ពេល​មាន​ប្រទេស​តិច​តួច​ណាស់​ដែល​ទទួល​ស្គាល់​កម្ពុជា​ក្នុង​សម័យ​នោះ​។

លោក ​ហ៊ុន សែន បាន​ចាត់​ទុក​ជំនួយ​របស់​ប្រទេស​រុស្ស៊ី ​មក​កម្ពុជា គឺ​ជា​មូលដ្ឋាន​គ្រឹះ​ដ៏​សំខាន់​សម្រាប់​ស្វែងរក​សុខ​សន្តិភាព ស្ថិរភាព និង​ការ​អភិវឌ្ឍ​ជា​ពិសេស​ការ​ផ្ដល់​ជំនួយ​លើ​វិស័យ​អប់រំ ដែល​បាន​បណ្តុះ​បណ្តាល​នូវ​ធនធាន​មនុស្ស​ល្អ​ៗ សម្រាប់​បម្រើ​ការងារ​នៅ​ក្នុង​ប្រទេស​កម្ពុជា ហើយ​បាន​ជួយ​ជំរុញ​ឱ្យ​កម្ពុជា​រីក​ចម្រើន​រហូត​មក​ដល់​ពេល​នេះ​។

ចំណែក ANATOLY BOROVIK បាន​ប្រាប់​លោក ហ៊ុន សែន ថា ទំនាក់ទំនង​រវាង​កម្ពុជា ​និង​រុស្ស៊ី ​គឺ​ជា​ទំនាក់ទំនង​ដ៏​ល្អ​ ដែល​មាន​ជា​មួយ​គ្នា​អស់​រយៈពេល ​៦៤ ​ឆ្នាំ​មក​ហើយ​ ហើយ​នៅ​ឆ្នាំ​ក្រោយ​នេះ គឺ​ជា​ខួប ​៦៥ ​ឆ្នាំ​នៃ​ទំនាក់ទំនង​ការ​ទូត​រវាង​ប្រទេស​ទាំង ​២។ លោក​​បញ្ជាក់​​ថា នៅ​ក្នុង​បេសកកម្ម​ការ​ទូត​នៅ​កម្ពុជា​នេះ លោក​នឹង​ខិតខំ​ប្រឹងប្រែង​ឱ្យ​អស់​ពី​សមត្ថភាព​ធ្វើ​យ៉ាង​ណា​ដើម្បី​ពង្រឹង​ចំណង​មិត្តភាព និង​កិច្ច​សហប្រតិបត្តិការ​ដែល​មាន​ស្រាប់​ឱ្យ​កាន់​តែ​រីក​ចម្រើន​ខ្លាំង​ថែម​ទៀត ជា​ពិសេស​លើ​វិស័យ​អភិវឌ្ឍន៍​ធនធាន​មនុស្ស សេដ្ឋកិច្ច ពាណិជ្ជកម្ម វប្បធម៌ ការទូត និង​វិស័យ​ដទៃ​ទៀត ​ដែល​នាំ​មក​នូវ​ការ​រីក​ចម្រើន​សម្រាប់​ប្រទេស​ទាំង ​២​។​

លោក ANATOLY BOROVIK ក៏​បាន​អបអរ​សាទរ​ការ​ប្រារព្ធខួប​ទី​២៧ ​ឆ្នាំ​នៃ​ថ្ងៃ​បង្កើត ​និង​ការ​ប្រើប្រាស់​រដ្ឋធម្មនុញ្ញ​របស់​ប្រទេស​កម្ពុជា ​​ផង​ដែរ​៕

វីដេអូ៖

អត្ថបទគួរចាប់អារម្មណ៍