.jpg)
លោក ហ៊ុន សែន ក្នុងកិច្ចប្រជុំនៅវិមានសន្តិភាពកាលពីថ្ងៃទី ៤ ខែកញ្ញា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវឱ្យបណ្ដាប្រទេសនានាពង្រឹងតម្លៃសន្ដិភាព សេចក្ដីថ្លៃថ្នូរ និងសាមគ្គីភាព និងត្រូវសហការដោយស្មើភាព និងគោរពគ្នាទៅវិញទៅមកក្នុងការដោះស្រាយបញ្ហាប្រឈម និងការភ័យខ្លាចដោយសារការរាតត្បាតនៃជំងឺកូវីដ ១៩ ដែលកំពុងបំបែកបំបាក់ពិភពលោក និងដើម្បីស្ដារវិបុលភាពសម្រាប់តំបន់ និងពិភពលោកឡើងវិញ។
លោក ហ៊ុន សែន លើកឡើងថា ប្រទេសនីមួយៗត្រូវបំពេញតួនាទីរបស់ខ្លួនឱ្យកាន់តែសកម្ម និងអន្តរសកម្មក្នុងអភិបាលកិច្ចសកលប្រកបដោយភាពទន់ភ្លន់ ស្ថាបនា ការទទួលខុសត្រូវ រួមទាំងការរួមចំណែកកសាងសណ្ដាប់ធ្នាប់ពិភពលោក ដើម្បីថែរក្សាឱ្យបាននូវសន្ដិភាព និងសន្តិសុខ ដែលជាបុរេលក្ខខណ្ឌដ៏មានសារៈសំខាន់បំផុតចំពោះពាណិជ្ជកម្ម កំណើនសេដ្ឋកិច្ចប្រកបដោយចីរភាពនិងវិបុលភាពយូរអង្វែងរបស់ពិភពលោក។
លោក ហ៊ុន សែន បានថ្លែងបែបនេះនៅក្នុងការថ្លែងសុន្ទរកថា នៃកិច្ចប្រជុំកំពូលកម្មន្តសាល និងឧស្សាហូបនីយកម្មសកលឆ្នាំ ២០២០ កាលពីថ្ងៃសៅរ៍ដែលរៀបចំដោយអង្គការអភិវឌ្ឍន៍ឧស្សាហកម្មសហប្រជាជាតិ (UNIDO) និងក្រសួងថាមពល និងឧស្សាហកម្មនៃសហភាពអារ៉ាប់រួមស្ដីពី «ការស្ដារឡើងវិញនូវវិបុលភាពក្នុងពិភពលោកក្រោយជំងឺឆ្លងរាតត្បាត»។
លោក ហ៊ុន សែន បន្តថា ប្រទេសទាំងអស់ត្រូវបន្តខិតខំពង្រឹងសកលភាវូពាណិជ្ជកម្មដែលកន្លងមកបានចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ច និងបានបង្កើតលក្ខខណ្ឌមិនធ្លាប់មាន សម្រាប់ការកាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាជនគ្រប់ស្រទាប់វណ្ណៈ។ ប្រាកដណាស់ថា នៅក្នុងចរន្តនៃសកលភាវូបនីយកម្ម អ្វីៗគ្រប់យ៉ាងសុទ្ធតែផ្សារភ្ជាប់គ្នា និងមានអន្តរសកម្មជាមួយគ្នា។
លោកថា៖ «ក្នុងបរិការណ៍នេះ យើងត្រូវធានាឱ្យបាន យន្តការកិច្ចសហប្រតិបត្តិការរបស់យើង នៅតែរក្សាបាននូវស្មារតីបើកចំហ និងការគាំទ្រប្រព័ន្ធពាណិជ្ជកម្មពហុភាគីជាពិសេសពន្លឿនការតភ្ជាប់រវាងសង្គម និងសេដ្ឋកិច្ចដើម្បីជំរុញការអភិវឌ្ឍរបស់ប្រទេសនីមួយៗប្រកបដោយចីរភាព និងបរិយាប័ន្ន»។
លោកបន្ថែមទៀតថា ការរាតត្បាតនៃជំងឺកូវីដ ១៩ អស់រយៈពេលជាង ៩ ខែមកនេះបានធ្វើឱ្យមានវិបត្តិធ្ងន់ធ្ងរមិនធ្លាប់មានទៅលើសង្គម និងសេដ្ឋកិច្ចដែលត្រូវបានគេរំពឹងថានឹងធ្វើឱ្យសកលលោក ធ្លាក់ចុះនៃចង្វាក់តម្លៃ និងចង្វាក់ផលិតកម្ម ការថមថយលំហូរមូលធនដោយសារការធ្លាក់ចុះនូវតម្រូវការវិនិយោគ និងលំហូរមនុស្ស និងការកើនឡើងវិសមភាពសង្គម រួមទាំងការប៉ះពាល់ធ្ងន់ធ្ងរការអភិវឌ្ឍ និងការអនុវត្តគោលនយោបាយឧស្សាហកម្ម និងសេដ្ឋកិច្ចឌីជីថលក្នុងបរិបទបដិវត្តន៍ឧស្សាហកម្មទី ៤ របស់ប្រទេសកំពុងអភិវឌ្ឍន៍ ជាពិសេសប្រទេសកំពុងអភិវឌ្ឍន៍តិចតួច។
ជំងឺកូវីដ ១៩ ត្រូវបានគេប្រកាសថា បានផ្ទុះឡើងដំបូងនៅទីក្រុងវូហានប្រទេសចិនកាលពីខែធ្នូ ឆ្នាំ ២០១៩ និងបានរាលដាលទៅទូទាំងពិភពលោក ដែលបានឆ្លងមនុស្សរាប់លាននាក់ និងស្លាប់រាប់សែននាក់។ កម្ពុជាដែលបានរកឃើញករណីជំងឺដំបូងកាលពីថ្ងៃទី ២៧ មករា គឺមកដល់ពេលនេះមានករណីឆ្លងសរុបទាំងអស់ចំនួន ២៧៤ នាក់ ក្នុងនោះព្យាបាលជាសះស្បើយចំនួន ២៧២ នាក់ និងនៅសល់អ្នកឈឺសម្រាកព្យាបាលចំនួន ២ នាក់។ គិតចាប់តាំងពីថ្ងៃទី ១៥ ខែសីហា កម្ពុជាបានរកឃើញករណីកូវីដថ្មីតែម្នាក់គត់ដែលជាករណីនាំចូលពីប្រទេសបារាំង ក្រោយពីបានប្រកាសបិទជើងហោះហើរមកពីប្រទេសឥណ្ឌូនេស៊ី ម៉ាឡេស៊ី និងហ្វីលីពីនដែលជាប្រទេសនាំចូលជំងឺច្រើនបំផុតមកប្រទេសកម្ពុជា។
នៅក្នុងសុន្ទរកថារបស់លោក ហ៊ុន សែន បានបញ្ជាក់ទៀតថា រដ្ឋាភិបាលបានគ្រប់គ្រងយ៉ាងមានប្រសិទ្ធភាពចំពោះសភាពការណ៍ជំងឺឆ្លងកូវីដ១៩ ដោយមិនមានករណីឆ្លងចូលទៅក្នុងសហគមន៍ និងមិនបានបិទប្រទេសដូចបណ្ដាប្រទេសមួយចំនួន។ ប៉ុន្តែលោកថា ជំងឺនេះបានបង្កឱ្យមានបញ្ហាស្រួចស្រាល់មួយចំនួន ចំពោះវិស័យវាយនភណ្ឌ ទេសចរណ៍ អាកាសចរណ៍ និងវិស័យផ្សេងៗទៀត។
លោកបន្តថា កម្ពុជាគឺបានចេញវិធានការមួយចំនួន ដើម្បីជួយរក្សាលំនឹងផលិតកម្ម អាជីវកម្ម និងលំនឹងជីវភាពរបស់ប្រជាពលរដ្ឋដូចជាតាមរយៈការអនុគ្រោះពន្ធ ការផ្ដល់ប្រាក់ឧបត្ថម្ភជូនកម្មករក្នុងវិស័យកាត់ដេរ និងទេសចរណ៍ ការរៀបចំហិរញ្ញប្បទានពិសេសដើម្បីស្ដារ និងលើកកម្ពស់សហគ្រាសធុនតូច និងមធ្យម និងការឧបត្ថម្ភសាច់ប្រាក់សម្រាប់ពលរដ្ឋក្រីក្រជាដើម។
រដ្ឋាភិបាលបានប្រកាសបន្ធូរវិធានការមួយចំនួនជាបន្តបន្ទាប់ ដូចជាឱ្យពលរដ្ឋឈប់សម្រាកសងចូលឆ្នាំ ៥ ថ្ងៃកាលពីខែសីហា បន្ទាប់មកបានឱ្យសាលារៀនបើកដំណើរការជាដំណាក់កាលៗ បើកសារមន្ទីរ កាស៊ីណូ ក្លិបកម្សាន្តឱ្យទៅជាភោជនីយដ្ឋាន រោងកុន និងរោងសម្ដែងសិល្បៈ និងអនុញ្ញាតឱ្យពលរដ្ឋប្រារព្ធពិធីបុណ្យភ្ជុំបិណ្ឌ និងឱ្យសាសនិកអ៊ិស្លាមអាចប្រមូលផ្ដុំគ្នានៅតាមព្រះវិហារឡើងវិញជាដើម៕
