ភ្នំពេញៈ លោកនាយករដ្ឋមន្ត្រី ហ៊ុន សែន ស្នើឲ្យពន្លឿនការកាត់ក្ដី ដើម្បីកុំឲ្យពន្ធនាគារចង្អៀតណែន ខណៈដែលបច្ចុប្បន្ន មានអ្នកកំពុងជាប់ឃុំក្នុងពន្ធនាគាររហូតដល់ ៣១ ៤០០ នាក់ ក្នុងនោះមាន ២ ភាគ ៣ គឺជាជនដែលមិនទាន់ត្រូវបានតុលាការកាត់ទោស។
លោក ហ៊ុន សែន ថ្លែងដូច្នេះក្នុងពិធីចែកសញ្ញាបត្រដល់និស្សិតនៃវិទ្យាស្ថានខ្មែរជំនាន់ថ្មីជាង ១ ៧០០ នាក់ កាលពីថ្ងៃចន្ទម្សិលមិញ។ លោកបានថ្លែងថា ទណ្ឌិតពិតប្រាកដ ឬអ្នកដែលត្រូវបានកាត់ទោសរួចហើយនៅតាមបណ្ដាពន្ធនាគារទូទាំងប្រទេស មានតែ ១ ភាគ ៣ ទេចំណែកពិរុទ្ធជនឬជនដែលមិនទាន់ត្រូវបានកាត់ទោសមានរហូតដល់ទៅ ២ ភាគ ៣។
លោកថ្លែងថា៖ «អ៊ីចឹងបញ្ហានេះ តុលាការគ្រប់ជាន់ថ្នាក់រដ្ឋមន្ត្រីយុតិ្តធម៌ ត្រូវធ្វើការងារ នេះឲ្យលឿនបើមិនអ៊ីចឹង មានតែចាប់គេយកទៅឃុំខុស។កាលប៉ុន្មានឆ្នាំមុន (ខ្ញុំ) នៅចាំ ចំណោទកើតឡើងថា ខ្វះកន្លែងសវនាការ។ កាលហ្នឹងខ្ញុំបានឲ្យជួលកន្លែងនានា ធ្វើកន្លែងសវនាការកុំឲ្យនិយាយ ពីរឿងខ្វះកន្លែងសវនាការ»។
លោកបានថ្លែងបន្តថា៖ «អ៊ីចឹងបានថា ចុះមន្ទីរឃុំឃាំងអីក៏វាណែនម្ល៉េះ? ដល់ទៅមើលស្លាប់ហើយ! ថ្ងៃមុនគេទៅទាំងគណៈកម្មការសិទ្ធិមនុស្សរបស់ កែវ រ៉េមី ទៅជាមួយនឹងក្រសួងកិច្ចការនារី ទៅទាំងជាមួយនឹងមេធាវី។ ទៅ ដល់បានឃើញ។ ចំណុចដែលមិនទាន់កាត់ក្តី គឺវារឿងច្រើនពេក។
ប៉ុន្តែខ្ញុំឲ្យអាទិភាពជាមួយ នឹងស្ត្រីក្រីក្រ»។ លោកថា ការឃុំខ្លួនពិរុទ្ធជនហួសកំណត់ គឺ «យើងជាអ្នកខុស»។ លោកស្នើឲ្យរដ្ឋមន្ត្រីក្រសួងយុត្តិធម៌ បន្តកិច្ចការងារនេះតទៅទៀត ជាមួយនឹងស្ថាប័នពាក់ព័ន្ធ។
លោកនាយករដ្ឋមន្ត្រី ក៏បានរំឭកថា លោកធ្លាប់បានរុញមេធាវីទៅជួយដល់ស្ត្រីតាមរយៈគណៈមេធាវីកម្ពុជា និងតាមរយៈ ក្រសួងកិច្ចការនារី ប៉ុន្តែនាពេល ថ្មីៗនេះ លោកបានបង្កើតក្រុមមេធាវីរបស់លោកផ្ទាល់ ដោយមានវត្តមាន ២ រូបក្នុង ១ ខេត្ត ដើម្បីពន្លឿនការកាត់ក្ដី ដោយផ្ដល់អាទិភាពលើស្ត្រីក្រីក្រ។
លោកបានបញ្ជាក់ថា នៅពេល នេះ ថវិកាសម្រាប់ក្រុមមេធាវីរបស់លោក បានកើនដល់ជាង ៦ ពាន់លានរៀល ឬស្មើនឹងជាង ១,៥ លានដុល្លារ។
លោកបន្តថា ៖ «មានពេលខ្លះពរកូនឲ្យខ្វង់ៗ នៅក្នុងពន្ធនាគារ។ មានពេលខ្លះមាន ផ្ទៃពោះនៅក្នុងពន្ធនាគារ។ ប៉ុន្តែ យើងមិនលើកលែងជាមួយនឹងអ្នក ខ្លះចូលរួមក្នុងការធ្វើឃាតកម្ម»។
ចំពោះអ្នកទោសស្ត្រី ដែលកាត់ទោសរួចហើយ លោកស្នើឲ្យរៀបចំជាបញ្ជីដោយឡែក ដើម្បីស្នើសុំការលើកលែងទោស តាម កាលកំណត់ ដូចជាបុណ្យអុំទូក ជាដើម។
លោក បេ ទាឡេង អគ្គនាយករង នៃអគ្គនាយកដ្ឋានពន្ធនាគារ បានឲ្យដឹងកាលពីម្សិលមិញថា បច្ចុប្បន្ននេះ អ្នកជាប់ពន្ធនាគារសរុបមាន ៣១ ៤០០ នាក់ដែលក្នុងនោះមានស្ត្រី ២ ៤៤០ នាក់។ ក្នុងចំនួននេះ ជនត្រូវចោទមាន ៧ ៧៦៧ នាក់ ជនជាប់ចោទមាន ៣ ៦៤៣ នាក់។ ចំណែកពិរុទ្ធជនមាន ១០ ៨៩០ នាក់ ហើយទណ្ឌិតមានចំនួន ៩ ១៣៧ នាក់។
លោក ជិន ម៉ាលីន អ្នកនាំពាក្យក្រសួងយុត្តិធម៌ ក៏បានឲ្យដឹងកាលពីម្សិលមិញដែរថា ក្រសួងយុត្តិធម៌បានសហការជាមួយតុលាការគ្រប់រាជធានី ខេត្ត ដើម្បីពន្លឿននីតិវិធីកាត់ក្ដី។ លោកថា ក្រោយពេលមានការស្នើឲ្យពន្លឿនរបស់លោក ហ៊ុន សែន ក្រសួងយុត្តិធម៌ នឹងបើកកិច្ចប្រជុំមួយ ជាមួយតុលាការនិងព្រះរាជអាជ្ញានៅតុលាការទូទាំងប្រទេស នៅក្នុងសប្ដាហ៍នេះ ដើម្បីពិនិត្យរកវិធីពន្លឿនការកាត់ក្ដីហើយចេញសាលក្រមស្ថាពរដោយផ្អែកលើគោលការណ៍មនុស្សធម៌។
ចំពោះពិរុទ្ធជន ដែលជាស្ត្រីដែលមិនទាន់ទទួលបានសាលក្រមស្ថាពរ ហើយជាប់ក្នុងបទល្មើសស្រាលនោះ ក្រសួងនឹងពិនិត្យរកវិធីស្នើសុំឲ្យទទួលបាន ការនៅក្រៅឃុំបណ្ដោះអាសន្ន ទៅតាមលក្ខខណ្ឌដែលច្បាប់បាន ចែង។
លោកថ្លែងពន្យល់ថា៖ «ភាពយឺតយ៉ាវនៃការអនុវត្តនីតិវិធីនេះ ដែលនាំឲ្យមានពិរុទ្ធជនច្រើនស្ថិតនៅក្នុងការឃុំខ្លួនគឺមួយផ្នែកដោយសារតែការកើនឡើងអ្នកជាប់ឃុំដោយសារបញ្ហាគ្រឿងញៀន។ ២ ភាគ ៣ គឺដោយសារគ្រឿងញៀនហើយ ដោយសារយុទ្ធនាការទ្រង់ទ្រាយធំដំណាក់កាលទី ១ ដំណាក់កាលទី ២ កន្លងមក»។
លោកបន្តថា កត្តាទី ២ ដែលរួមចំណែកដល់ការកើនឡើងអ្នកជាប់ឃុំ គឺដោយសារធនធាន មានកំណត់ ដូចសាលាឧទ្ធរណ៍សព្វថ្ងៃមានតែ ១ ចំនួនចៅក្រម ព្រះរាជអាជ្ញាមានកំណត់ ការផ្លាស់ប្ដូរចៅក្រម និងព្រះរាជអាជ្ញារៀងរាល់ ៤ ឆ្នាំម្ដងពីខេត្តមួយទៅខេត្តមួយ ដែលតម្រូវឲ្យចៅក្រម និងព្រះរាជអាជ្ញាសិក្សាលើសំណុំរឿងដែលនៅតុលាការនោះ។
បើទោះបីជាស្ត្រីត្រូវបានផ្ដល់អាទិភាពក៏ដោយ លោក ជិន ម៉ាលីនបញ្ជាក់ថា ក្រសួងនិងតុលាការគ្រប់ខេត្តក្រុងនឹងធ្វើការយ៉ាងហ្មត់ចត់ ដើម្បីចៀសវាងភាពមិនប្រក្រតីដែលនាំឲ្យមានការរត់ការដោះលែងស្ត្រីដែលជាពិរុទ្ធជន។
លោក គី តិច ដែលដឹកនាំក្រុមមេធាវីរបស់លោកនាយករដ្ឋមន្ត្រី បានថ្លែងថា៖ «នៅក្នុងក្របខ័ណ្ឌទូទាំងប្រទេស មានបងប្អូននារី ដែលជាស្ត្រីក្រីក្រ នៅតាមខេត្ត តំបន់ដាច់ស្រយាល និងកម្មការិនីរោងចក្រ សរុបជារួមគឺ ៥០ ករណីហើយ (ដែលបានទទួលសេវា)»។
លោក គី តិច បានពន្យល់បន្ថែមថា ការជួយផ្នែកច្បាប់ ទៅដល់ស្ត្រីក្រីក្រនេះមិនសំដៅទៅលើតែការការពារក្នុងរឿងក្តីតែមួយមុខនោះទេ ប៉ុន្តែក្រុមមេធាវី ក៏បានផ្ដល់ការពិគ្រោះយោបល់ដល់ពួកគាត់ក្នុងករណីដែលពួកគាត់មិនយល់អំពីនីតិវិធី ឬអំពីច្បាប់ ឬសិទ្ធិការពារខ្លួន នៅក្រៅប្រព័ន្ធតុលាការទៀតផង៕