.jpg)
លោក Joe Biden និងលោក ហ៊ុន សែន។ រូបថត AFP ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន បានអបអរសាទរលោក Joe Biden ដែលបានជាប់ឆ្នោតជាប្រធានាធិបតីទី ៤៦ របស់សហរដ្ឋអាមេរិក ដោយលោកបញ្ជាក់ថា រដ្ឋាភិបាលកម្ពុជានឹងប្ដេជ្ញាធ្វើការជាមួយរដ្ឋបាលរបស់លោក Biden ដើម្បីជំរុញទំនាក់ទំនងទ្វេភាគីឱ្យដល់កម្រិតកាន់តែប្រសើរ។
តាមរយៈលិខិតរបស់លោកចុះថ្ងៃទី ១៥ ធ្នូ ដែល ភ្នំពេញ ប៉ុស្តិ៍ ទើបទទួលបានពីម្សិលមិញលោក ហ៊ុន សែន បញ្ជាក់ថា បទពិសោធដ៏ច្រើន និងការដឹកនាំដោយឈ្លាសវៃរបស់លោក Biden គឺជាកត្តាកំណត់ក្នុងការទទួលបានការជឿទុកចិត្តពីប្រជាជនអាមេរិកាំង។ លោកជឿជាក់យ៉ាងមុតមាំថា ក្រោមការដឹកនាំក្នុងនាមប្រធានាធិបតីរបស់លោក Biden សហរដ្ឋអាមេរិកនឹងរីកចម្រើនជឿនលឿន និងចូលរួមឱ្យមានស្ថិរភាពកាន់តែប្រសើរ និងមានវិបុលភាពសម្រាប់ពិភពលោក។
លោក ហ៊ុន សែន សរសេរថា៖ «ប្រជាជន និងរដ្ឋាភិបាលកម្ពុជាតែងតែភ្ជាប់សារៈសំខាន់ទៅនឹងការពង្រឹង និងធ្វើឱ្យស៊ីជម្រៅទំនាក់ទំនងមិត្តភាពដ៏យូរអង្វែង រវាងប្រទេសទាំង ២ ដែលពេលនេះយើងកំពុងស្ថិតក្នុងការប្រារព្ធខួប ៧០ ឆ្នាំនៃទំនាក់ទំនងរបស់យើង។ សូមលោក [Biden] ជឿជាក់ថា រដ្ឋាភិបាលរបស់ខ្ញុំ ប្ដេជ្ញាចិត្តមុតមាំក្នុងការធ្វើការជាមួយរដ្ឋបាលរបស់លោក ដើម្បីជំរុញទំនាក់ទំនងទ្វេភាគីរបស់យើងឱ្យដល់កម្រិតកាន់តែប្រសើរ»។
លោក ហ៊ុន សែន បន្តថា៖ «ក្នុងឱកាសដ៏ល្អនេះខ្ញុំសូមជូនពរដល់លោកប្រធានាធិបតីជាប់ឆ្នោត និងរដ្ឋបាលរបស់លោកទទួលបានជោគជ័យក្នុងការបំពេញភារកិច្ចដ៏ប្រវត្តិសាស្ត្រនេះក្នុងការដឹកនាំសហរដ្ឋអាមេរិក»។
លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិបញ្ជាក់ថា លិខិតនេះពិតជាលិខិតរបស់លោកនាយករដ្ឋមន្ត្រីមែន។
លោក Chad Roedemeier អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជាកាលពីម្សិលមិញបដិសេធធ្វើអត្ថាធិប្បាយ ហើយបង្វែរសំណួរទៅក្រុមការងារបណ្តោះអាសន្នរបស់ប្រធានាធិបតីនៅក្រុងវ៉ាស៊ីនតោន។
លោក ឡៅ ម៉ុងហៃ អ្នកវិភាគនយោបាយយល់ឃើញថា ដរាបណាកម្ពុជានៅតែមានទំនោរទៅរកចិន ហើយមិនស្ដារលទ្ធិប្រជាធិបតេយ្យ និងសិទ្ធិមនុស្សទេនោះ វានៅតែជាចម្ងល់ថាតើទំនាក់ទំនងរវាងប្រទេសទាំង ២ នឹងអាចប្រសើរឡើងដែរឬយ៉ាងណា?។
ប៉ុន្តែលោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា ការផ្ញើលិខិតអបអរសាទរនៅពេលនេះ គឺជារឿងត្រឹមត្រូវ ព្រោះការប្រកាសលទ្ធផលបោះឆ្នោតសហរដ្ឋអាមេរិកទើបតែចូលជាផ្លូវការនៅថ្ងៃទី ១៤ ធ្នូ។ ចំពោះខ្លឹមសារលិខិតនេះលោកយល់ថា កម្ពុជាតែងតែត្រៀមខ្លួនធ្វើការជាមួយសហរដ្ឋអាមេរិក ដើម្បីពង្រឹងទំនាក់ទំនង និងការកសាងទំនុកចិត្ត និងការជឿជាក់គ្នាទៅវិញទៅមក។ វាអាស្រ័យលើសហរដ្ឋអាមេរិកទេ ថាតើគេនឹងមានភាពស្មោះត្រង់ជាមួយកម្ពុជា ហើយគោរពគ្នាទៅវិញទៅមកឬអត់?។
លោកថ្លែងថា៖ «សម្រាប់កម្ពុជា យើងចង់ឃើញទំនាក់ទំនងរវាងប្រទេសទាំង ២ រីកចម្រើន រឹងមាំ ហើយឈរលើគោលការណ៍គោរពផលប្រយោជន៍ អធិបតេយ្យភាព ឯករាជភាពរបស់គ្នាទៅវិញទៅមក»។
ដោយឡែកលោក អ៊ូ ច័ន្ទរ័ត្ន អតីតតំណាងរាស្ត្រគណបក្សប្រឆាំង យល់ឃើញថា នៅពេលប្រធានាធិបតីសហរដ្ឋកើតចេញពីគណបក្សប្រជាធិបតេយ្យ នយោបាយការបរទេសរបស់សហរដ្ឋអាមេរិកមិនសូវជាតឹងរ៉ឹងដូចពីខាងសាធារណរដ្ឋទេ។ នៅតំបន់អាស៊ីហាក់ដូចជាពឹងអាស្រ័យខ្ពស់ លើកិច្ចសហប្រតិបត្តិការជាមួយគណបក្សប្រជាធិបតេយ្យ។
លោកថ្លែងថា៖ «កម្ពុជាក៏មិនខុសគ្នាដែរ គឺដូចប្រទេសផ្សេងៗក្នុងតំបន់អាស៊ី។ ខ្ញុំជឿថា ទំនាក់ទំនងនឹងល្អជាងមុន ប៉ុន្តែគ្រាន់តែថា ទំនាក់ទំនងទន់ភ្លន់នោះវាមានប្រយោជន៍សម្រាប់កម្ពុជាឬអត់?។ ជាទូទៅប្រទេសអាមេរិក ទោះបីគណបក្សណាជាប់ឆ្នោតក៏ដោយ គោលនយោបាយរបស់គេ គឺអត់មានអីប្រែប្រួលទេ រឿងប្រជាធិបតេយ្យ ការគោរពសិទ្ធិមនុស្ស វានៅដដែលហ្នឹង។ កិច្ចការបរទេសក៏នៅដដែល គ្រាន់តែទំនាក់ទំនងវាទន់ភ្លន់ជាងមុន»៕
