ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវគ្រប់គណបក្សនយោបាយឈប់ប្រើពាក្យ «បន្តុះបង្អាប់» គណបក្ស ឬបេក្ខជនគណបក្សនយោបាយផ្សេងទៀតដែលការអំពាវនាវនេះផ្ទុយនឹងអ្វីដែលថ្នាក់ដឹកនាំបក្សនយោបាយមួយចំនួនគាំទ្រឲ្យមាន «ការរិះគន់» ក្នុងន័យស្ថាបនាក្នុងសង្គមប្រជាធិបតេយ្យ។
លោក ហ៊ុន សែន ដែលជាប្រធានគណបក្សប្រជាជនកម្ពុជាបានសរសេរនៅលើទំព័រហ្វេសប៊ុករបស់លោកម្សិលមិញថា៖ «ខ្ញុំគិតថា សូមឲ្យអ្នកនយោបាយនានាតាំងខ្លួនជាអ្នកលក់ទំនិញ។ ឃោសនាតែពីទំនិញរបស់ខ្លួនបានហើយ កុំបង្អាប់ទំនិញអ្នកដទៃ អ្នកនឹងបង្កើតរឿងជាមួយអ្នកដទៃហើយ»។
លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិថ្លែងពីម្សិលមិញថាវាជាសិទ្ធិរបស់បុគ្គលនយោបាយក្នុងការបញ្ចេញទស្សនៈ។
លោកថ្លែងថា៖ «អានេះជាការឃោសនា។ បើឃោសនាបែបអវិជ្ជមាន វាយប្រហារទៅលើគោលនយោបាយបក្សដទៃ ប្រជាពលរដ្ឋគាំទ្រខ្លួន អាហ្នឹងគេធ្វើទៅ វាជាសិទ្ធិរបស់គេ។ ប៉ុន្តែបើគិតថាអាហ្នឹងអាចប៉ះពាល់វាមិនចំណេញនយោបាយទេ ធ្វើរបៀបឃោសនាបែបវិជ្ជមានវិញ»។
ដោយឡែកលោក យ៉ង សាំងកុមារ ជាបេក្ខជននាយករដ្ឋមន្ត្រីមកពីគណបក្សប្រជាធិបតេយ្យមូលដ្ឋានយល់ស្របនឹងលោក ហ៊ុន សែន ប៉ុន្តែថា ទោះយ៉ាងណាវាជារឿងគេចមិនរួចពីការរិះគន់ពីចំណុចខ្វះខាត ដើម្បីរកដំណោះស្រាយបញ្ហា។
លោកបន្តថា៖ «បើកាលណាយើងនិយាយពីគោលនយោបាយ យើងត្រូវនិយាយបញ្ហា និងដំណោះស្រាយ។ អ៊ីចឹងវានឹងមានការប៉ះពាល់គេចមិនរួចទេ តែសំខាន់យើងត្រូវរក្សាក្រមសីលធម៌រៀងៗខ្លួន»។
លោក ពេជ្រ ស្រស់ ប្រធានគណបក្សយុវជនកម្ពុជាបានលើកជាសំណួរថា បង្កើតបក្សនយោបាយមកធ្វើអ្វី បើគ្មានការរិះគន់គណបក្សគ្រប់គ្រងរដ្ឋាភិបាលនោះ៕