.jpg)
ស្ត្រីចូលរួមថ្ងៃប្រារព្ធទិវានារីអន្តរជាតិ ៨ មីនាដែលរៀបចំឡើងដោយអង្គការសង្គមស៊ីវិលនៅទីលានប្រជាធិបតេយ្យម្សិលមិញ។ ហុង មិនា
ភ្នំពេញៈ ក្នុងឱកាសទិវានារីអន្តរជាតិ ៨ មីនាលើកទី ១០៩ នេះលោកនាយករដ្ឋមន្ដ្រី ហ៊ុន សែន បានអំពាវនាវដល់គ្រប់ក្រសួងស្ថាប័នពាក់ព័ន្ធដៃគូអភិវឌ្ឍន៍ សង្គមស៊ីវិល វិស័យឯកជនទាំងអស់ត្រូវរួមគ្នាយកចិត្តទុកដាក់ ចំពោះការបង្កើនចំនួនស្ត្រីឲ្យមានតួនាទីជាថ្នាក់ដឹកនាំនៅតាមវិស័យផ្សេងៗ និងគ្រប់កម្រិតខណៈដែលសង្គមស៊ីវិលបានអំពាវនាវឱ្យរដ្ឋាភិបាលផ្ដល់អាទិភាពលើសិទ្ធិស្ដ្រី។
លោកនាយករដ្ឋមន្ដ្រីបានថ្លែងតាមរយៈហ្វេសប៊ុករបស់លោកនៅថ្ងៃទី ៨ ខែមីនាថា ទិវានារីអន្តរជាតិ ៨ មីនាត្រូវបានពិភពលោកប្រារព្ធធ្វើឡើងជារៀងរាល់ឆ្នាំ ដើម្បីរំឭកនូវការតស៊ូ និងគំរូវីរភាពរបស់នារីៗក្នុងការទាមទារសិទ្ធិសេរីភាព និងគេចផុតពីទង្វើជិះជាន់នានា។ សិទ្ធិសេរីភាពរបស់ប្រជាពលរដ្ឋខ្មែរព្រមទាំងស្ត្រីផងបានកើតមានជាថ្មី ក្រោយរបបដ៏យង់ឃ្នងរបស់ ប៉ុល ពត ត្រូវបានវាយផ្តួលរំលំនៅថ្ងៃទី ៧ ខែមករា ឆ្នាំ ១៩៧៩។
ចាប់តាំងពីថ្ងៃរំដោះរហូតដល់ពេលបច្ចុប្បន្នរាជរដ្ឋាភិបាលកម្ពុជាតែងបានយកចិត្តទុកដាក់ជានិច្ចក្នុងការលើកកម្ពស់ស្ត្រីរហូតបង្កើតបានជាពាក្យស្លោកថា «ស្ត្រីជាឆ្អឹងខ្នងសេដ្ឋកិច្ចជាតិ»។
លោកថ្លែងថា៖ «មានសន្តិភាពមានការលើកកម្ពស់ មានសមភាពយេនឌ័រ គឺជាប្រធានបទដ៏មានអត្ថន័យនៃទិវាអន្តរជាតិនារី ៨ មីនាលើកទី ១០៩ ដែលជាការបង្ហាញឱ្យឃើញពីការដើរតួនាទីយ៉ាងសំខាន់របស់សុខសន្តិភាពនៅក្នុងសង្គមជាតិ ជាពិសេសសុខសន្តិភាពដែលកម្ពុជារកបានយ៉ាងលំបាកក្នុងរយៈពេលជាង ២០ ឆ្នាំមកនេះជាបុព្វលក្ខខណ្ឌមិនអាចប្រកែកបានឡើយក្នុងការរួមចំណែកជួយដល់ការលើកកម្ពស់សិទ្ធិសេរីភាពរបស់ស្ត្រី និងជួយឱ្យស្ត្រីមានតម្លៃកាន់តែខ្ពស់ឡើងនៅក្នុងសង្គម»។
នៅក្នុងពិធីអបអរសាទរ ទិវានារីអន្តរជាតិ ៨ មីនាកាលពីថ្ងៃសុក្រទី ៦ ខែមីនា លោកនាយករដ្ឋមន្ត្រីបានអំពាវនាវដល់គ្រប់ក្រសួង ស្ថាប័នពាក់ព័ន្ធ ដៃគូអភិវឌ្ឍន៍ សង្គមស៊ីវិល វិស័យឯកជន និងជនរួមជាតិទាំងអស់ អនុវត្តនូវចំណុចសំខាន់ៗដូចជា ត្រូវរួមគ្នាយកចិត្តទុកដាក់តាមរយៈការផ្តល់អាទិភាព ចំពោះការបង្កើនចំនួនស្ត្រីដែលមានតួនាទីជាថ្នាក់ដឹកនាំនៅតាមវិស័យផ្សេងៗ និងគ្រប់កម្រិត។
អ្នកចូលរួមប្រារព្ធទិវាសិទ្ធិនារីអន្តរជាតិនៅទីលានប្រជាធិបតេយ្យកាលពីម្សិលមិញ។ហុង មិនា
លោកបន្តថា ត្រូវរួមគ្នាពង្រឹងការអនុវត្តច្បាប់ និងត្រូវពន្លឿនដំណើរការកាត់ក្តីស្រី្តដែលជាប់ទោសឱ្យទាន់ពេលវេលា។ គ្រប់គ្រងការប្រើប្រាស់ប្រព័ន្ធ Internet នៅទូទាំងប្រទេសឱ្យមានប្រសិទ្ធភាពដើម្បីទប់ស្កាត់បញ្ហាជាច្រើនដែលពាក់ព័ន្ធទៅនឹងអំពើហិង្សា ការកេងប្រវ័ញ្ចលើស្ត្រី និងក្មេងស្រីតាមប្រព័ន្ធ Internet និងបណ្ដាញផ្សព្វផ្សាយជាច្រើនដែលធ្វើឱ្យបាត់សណ្ដាប់ធ្នាប់សង្គម។
លោកថ្លែងថា ក្រសួងអប់រំយុវជន និងកីឡាត្រូវធ្វើការណែនាំដល់គ្រប់ក្រសួងស្ថាប័នទាំងអស់ឱ្យអនុវត្តវិន័យ ផ្ដល់ឱកាសដល់ក្មេងស្រីនៅគ្រប់កម្រិត ជាពិសេសឪពុកម្តាយត្រូវអប់រំកូនចៅឱ្យមានសីលធម៌ល្អនៅក្នុងសង្គម។ ត្រូវបន្តការវិនិយោគលើការសិក្សារបស់ក្មេងស្រីនៅគ្រប់កម្រិតសិក្សា ជាពិសេសក្នុងជំនាញវិទ្យាសាស្ត្រ បច្ចេកវិទ្យា ដើម្បីធ្វើឱ្យដើរទាន់សម័យបច្ចេកវិទ្យាជឿនលឿននៃសង្គមជាតិ។
លោកនាយករដ្ឋមន្ដ្រីថ្លែងថា៖ «ក្រសួងវប្បធម៌ ក្រសួងព័ត៌មាន និងបណ្តាញផ្សព្វផ្សាយទាំងអស់ត្រូវបន្តពង្រឹង និងលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរយើងតាមរយៈការបង្កើតកម្មវិធីអប់រំ ដែលបង្ហាញអំពីអត្តសញ្ញាណស្ត្រីខ្មែរ ជាពិសេសតាមរយៈការស្លៀកពាក់ប្រកបដោយភាពថ្លៃថ្នូរ និងមានលក្ខណៈជាស្ត្រីខ្មែរ។ រួមគ្នាទប់ស្កាត់ការចម្លងមេរោគអេដស៍ថ្មី និងកុំឱ្យមានការរើសអើងស្ត្រីផ្សព្វផ្សាយស្រាបៀររួមទាំងអ្នកស្រឡាញ់ភេទដូចគ្នា»។
ក្នុងឱកាសនៃទិវានារីអន្តរជាតិនេះដែរ អង្គការសង្គមស៊ីវិលរួមមាន មជ្ឈមណ្ឌលសិទ្ធិមនុស្សកម្ពុជា (CCHR) NGO-CEDAW មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) និង DanChurchAid (DCA) បានចេញសេចក្ដីថ្លែងការណ៍រួមដោយបានអំពាវនាវឱ្យរដ្ឋាភិបាលផ្ដល់អាទិភាពលើសិទ្ធិស្ដ្រី។
សេចក្ដីថ្លែងការណ៍រួមនេះលើកឡើងថា៖ «យើងខ្ញុំជាអង្គការសង្គមស៊ីវិល សូមទទូចឱ្យរដ្ឋាភិបាលកម្ពុជាផ្ដល់អាទិភាពលើសិទ្ធិស្ដ្រី តាមរយៈការចាត់វិធានការបន្ទាន់ និងជាក់លាក់ក្នុងការអនុវត្ដអនុសាសន៍ដែលប្រទេសកម្ពុជាបានទទួលយកក្នុងអំឡុងពេលកិច្ចប្រជុំនៃការពិនិត្យជាសកលតាមកាលកំណត់ (UPR) ជុំទី ៣ របស់កម្ពុជា និងអនុសាសន៍ដែលមានលើកឡើងក្នុងសេចក្ដីសង្កេតសន្និដ្ឋានរបស់គណៈកម្មាធិការនៃអង្គការសហប្រជាជាតិទទួលបន្ទុកលើអនុសញ្ញាលុបបំបាត់រាល់ទម្រង់នៃការរើសអើងប្រឆាំងនឹងស្ដ្រីភេទ (ស៊ីដ) ដែលបានចេញបន្ទាប់ពីការពិនិត្យជាទៀងទាត់លើប្រទេសកម្ពុជាក្នុងឆ្នាំ ២០១៩»។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជាបានសរសេរបង្ហោះនៅលើហ្វេសប៊ុករបស់លោកស្រីកាលពីម្សិលមិញថា ការលើកកម្ពស់សិទ្ធិ និងសេចក្តីថ្លៃថ្នូរគុណតម្លៃសម្រាប់ស្ត្រីមិនអាចមានប្រសិទ្ធភាពត្រឹមតែការថ្លែងសារតាមមាត់ប៉ុណ្ណោះទេហើយក៏មិនអាស្រ័យតែលើការវិនិច្ឆ័យរបស់សង្គមក្នុងការដាក់គំនាប ឬបន្តុះបង្អាប់បន្ថែម លើស្ត្រីដែលជាជនរងគ្រោះពីការរំលោភបំពាននោះដែរ ប៉ុន្តែទាមទារនូវការគោរព និងគាំពារជាក់ស្តែង ដោយធានាថាសិទ្ធិពលរដ្ឋ សិទ្ធិស្ត្រីគ្រប់រូបអាចចូលរួមដោយសកម្មក្នុងជីវភាពសង្គម វប្បធម៌ សេដ្ឋកិច្ច និងនយោបាយ។
លោកស្រីបញ្ជាក់ថា៖ «ការធានានូវសិទ្ធិពលរដ្ឋក្នុងការជួបជុំ ប្រមូលផ្តុំ និងបញ្ចេញមតិ គឺជាការធានាដោយច្បាប់ជាតិ និងអន្តរជាតិដែលរដ្ឋាភិបាលមានកាតព្វកិច្ចត្រូវធានាការពារមិនមែនរារាំង និងរំលោភបំពាននោះដែរ។ ខ្ញុំសូមឧទ្ទិសទិវានេះជូនដល់ស្ត្រីគ្រប់រូបដែលបានពលីកម្លាំងកាយ ស្មារតី និងបេះដូង ដើម្បីបុព្វហេតុសិទ្ធិមនុស្សសម្រាប់សហគមន៍ និងមនុស្សជាតិទាំងអស់លើពិភពលោក និងជាពិសេសប្រទេសកម្ពុជានៃមាតុភូមិរបស់យើងទាំងអស់គ្នា»៕
