ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវឱ្យប្រជាជនរួមគ្នាទប់ស្កាត់គ្រោះមហន្តរាយដែលបណ្តាលពីគ្រោះធម្មជាតិក្នុងថ្ងៃប្រារព្ធទិវាជាតិគ្រប់គ្រងគ្រោះមហន្តរាយ ១៣ តុលា ក្រោមប្រធានបទ «ការរស់នៅដោយសុវត្ថិភាព និងភាពធន់គ្រោះមហន្តរាយ»។
ការបង្កើតឱ្យមានទិវាជាតិគ្រប់គ្រងគ្រោះមហន្តរាយ គឺជាការបំផុសស្មារតីយកចិត្តទុកដាក់ពីប្រជាជនកម្ពុជារួមជាមួយប្រជាជនក្នុងតំបន់អាស៊ាន ក៏ដូចជានៅលើពិភពលោកក្នុងការប្រុងប្រយ័ត្នទប់ស្កាត់ផលវិបាកនៃគ្រោះមហន្តរាយនៅលើសង្គមសេដ្ឋកិច្ច និងលើកកម្ពស់ការយល់ដឹងអំពីការកាត់បន្ថយហានិភ័យគ្រោះមហន្តរាយ។
លោកនាយករដ្ឋមន្ត្រី ហ៊ុន សែន បានថ្លែងក្នុងសារលិខិតក្នុងថ្ងៃទិវានេះថា៖ «ជោគជ័យត្រចះត្រចង់ដែលរដ្ឋាភិបាលសម្រេចបានកន្លងមកគឺអាស្រ័យដោយមូលដ្ឋានគ្រឹះសន្តិភាពដែលជាគុណតម្លៃសម្រាប់ប្រជាជនកម្ពុជា។ «អរគុណសន្តិភាព» បើគ្មានសន្តិភាពនោះការប្រឈមទៅនឹងមហន្តរាយកាន់តែខ្លាំង ប៉ះពាល់កាន់តែធ្ងន់ធ្ងរដល់ជីវិតមនុស្ស និងការអភិវឌ្ឍ។ ហេតុនេះហើយយើងត្រូវបន្តថែរក្សាសន្តិភាព ទោះជាស្ថិតក្នុងកាលៈទេសៈណាក៏ដោយ»។
លោក ហ៊ុន សែន បានលើកឡើងថា ជាក់ស្តែងតាមរយៈព្រឹត្តិការណ៍មិនប្រក្រតីនៃគ្រោះមហន្តរាយបង្កដោយខុសសញ្ញាគ្រោះថ្នាក់ធម្មជាតិ ដូចជាទឹកជំនន់ រាំងស្ងួត ខ្យល់កន្ត្រាក់ ជំងឺរាតត្បាតដែលកើតមានស្ទើរតែរាល់ឆ្នាំ ធ្វើឱ្យមានការខូចខាតជារូបវន្ត ខាតបង់ថវិកា ប៉ះពាល់លើសេដ្ឋកិច្ច សង្គម និងជីវភាពប្រជាជន។
លោកថា ការចូលរួមការពារអាយុជីវិតមនុស្សពីគ្រោះមហន្តរាយចាំបាច់មនុស្សម្នាក់ៗមានការត្រៀមបង្ការ និងចូលរួមអនុវត្ត វិធានការទាំងឡាយ ដែលស្ថាប័នមានសមត្ថកិច្ចដាក់ចេញក្នុងការទប់ស្កាត់គ្រោះមហន្តរាយដែលបង្កឡើងដោយមុខសញ្ញាគ្រោះធម្មជាតិ និងមនុស្ស។
លោកបានបន្ថែមថា៖ «ភាពមិនប្រាកដប្រជានៃការប្រែប្រួលអាកាសធាតុនៅពេលអនាគត និងការមិនអាចព្យាករបានគឺមានតែការរួមគំនិតគ្នាខិតខំប្រឹងប្រែងក្នុងការគ្រប់គ្រងគ្រោះមហន្តរាយដោយផ្តើមចេញពីប្រជាពលរដ្ឋម្នាក់ៗ និងគ្រួសារនីមួយៗចូលរួមក្នុងភាពជាម្ចាស់របស់មូលដ្ឋានសហគមន៍ ដើម្បីការរស់នៅដោយសុវត្ថិភាព និងភាពធនគ្រោះមហន្តរាយ»។
ក្នុងនោះលោក ហ៊ុន សែន ក៏បានណែនាំដល់អាជ្ញាធរមូលដ្ឋានគ្រប់លំដាប់ថ្នាក់ត្រូវបន្តអនុវត្តចែករំលែកចំណេះដឹងរវាងគ្នា និងគ្នាក្នុងការជំរុញសកម្មភាពការពារសុខភាព អនាម័យផ្ទាល់ខ្លួនរស់នៅស្អាត បរិស្ថានល្អនៅតាមមូលដ្ឋានផងដែរ។ បន្ថែមពីនេះ ចំពោះកម្លាំងគ្រប់ជាន់ថ្នាក់ត្រូវត្រៀមលក្ខណៈឱ្យបានរួចជាស្រេច ដើម្បីឆ្លើយតបគ្រោះមហន្តរាយដែលកើតមានឡើង។
លោក ហែម ឧត្តម អ្នកជំនាញផ្នែកបរិស្ថានបានឱ្យដឹងថា ការកាត់បន្ថយគ្រោះមហន្តរាយដែលកំពុងកើតមានត្រូវការការចូលរួមពីគ្រប់ភាគី។ រដ្ឋាភិបាលគួរតែមានការសិក្សាឱ្យបានស៊ីជម្រៅ និងការពារគម្របធម្មជាតិ ដូចជាព្រៃឈើ ទន្លេ បឹង និងធនធានដទៃទៀតឱ្យបានគង់វង្ស ហើយត្រូវស្តារឡើងវិញ ដើម្បីធ្វើយ៉ាងណាឱ្យកម្ពុជាចៀសផុសពីគ្រោះមហន្តរាយ ក្នុងពេលខាងមុខ។
លោកថ្លែងថា៖ «បើជាគ្រោះមហន្តរាយនេះគឺជាធម្មជាតិហើយ ប៉ុន្តែបើសិនជាកើតឡើងដោយសារតែមនុស្សដែរនោះជាអ្វីដែលយើងត្រូវជជែកគ្នាឱ្យបានដិតដល់ទៀត ពីព្រោះនៅក្នុងនេះថ្នាក់ដឹកនាំបានលើកឡើងពីការចូលរួមពីស្ថាប័នពាក់ព័ន្ធ»៕