បន្ទាយមានជ័យៈ លោកនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋឱ្យប្រុងប្រយ័ត្នចំពោះខ្យល់កន្ត្រាក់ មួយថ្ងៃបន្ទាប់ពីប្រជាពលរដ្ឋ ២ នាក់ បានបាត់បង់ជីវិតដោយសាររន្ទះបាញ់ ហើយផ្ទះសាលារៀន និងកុដិព្រះសង្ឃជាច្រើនខ្នងបានរងការខូចខាត ដោយសារខ្យល់កន្ត្រាក់ នៅក្នុងខេត្តបន្ទាយមានជ័យ។
ការអំពាវនាវរបស់លោក ហ៊ុន សែន បានធ្វើឡើងនៅក្នុងពិធី បើកការដ្ឋានសាងសង់អគារច្រកទ្វារព្រំដែនអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ ៥ នៅក្រុងប៉ោយប៉ែត ខេត្តបន្ទាយមានជ័យ កាលពីម្សិលមិញ។
លោកថ្លែងថា៖ «យប់មិញនេះ គឺមានការស្លាប់បាត់បង់ជីវិតប្រជាពលរដ្ឋរបស់យើង រហូតទៅដល់ ២ នាក់ ដែលបណ្តាលមកអំពីភ្លៀង និងខ្យល់ខ្លាំង។ មានស្លាប់ដល់ ២ នាក់ ប៉ុន្តែម្សិលមិញនេះ គឺផ្ទះរលំទៅដល់ ១៥៦ ខ្នងនៅទូទាំងខេត្ត ស្លាប់ ២ នាក់ដោយសាររន្ទះ ហើយបើគិតតាំងពីចូលឆ្នាំរហូតមកដល់ពេលនេះ គឺខូចខាតផ្ទះរហូតទៅដល់ ៥៩៣ ខ្នង សាលារៀន ៣ ខ្នង កុដិលោក ២ និងមានកន្លែងមួយចំនួនផ្សេងទៀត។ នេះក៏សូមសម្ដែងនូវការសោកស្តាយ និងចូលរួមមរណទុក្ខចំពោះគ្រួសារសព»។
លោក ហ៊ុន សែន ក៏បានឱ្យលោក កែ គឹមយ៉ាន ឧបនាយករដ្ឋមន្ត្រី និងជាប្រធានក្រុមការងារចុះជួយខេត្តបន្ទាយមានជ័យ បន្តខិតខំប្រើប្រាស់កងកម្លាំងប្រដាប់អាវុធដែលមានទាំងកងទ័ព នគរបាល និងកងរាជអាវុធហត្ថ ចូលរួមដោះស្រាយបញ្ហាជូនប្រជាពលរដ្ឋដែលរងគ្រោះពីគ្រោះ ធម្មជាតិទាំងនេះ និងបានអំពាវនាវដល់ប្រជាពលរដ្ឋឱ្យប្រុងប្រយ័ត្នចំពោះខ្យល់កន្ត្រាក់។
លោក អ៊ុំ រាត្រី បញ្ជាក់ថា៖ «ហើយឯកឧត្តមឧប (ឧបនាយករដ្ឋមន្ត្រី) កែ គឹមយ៉ាន បានផ្តល់ស័ង្កសីជាប់ជាប្រចាំ។ សម្រាប់ដោះស្រាយបញ្ហាហ្នឹងគឺគាត់ដាក់ប្រចាំម្តង ២ ០០០ សន្លឹក ៣ ០០០ សន្លឹក។ ប៉ុន្តែដោយមានការរួមគ្នារវាងក្រុមការងារគ្រប់ថ្នាក់ អាជ្ញាធរគ្រប់ថ្នាក់ហ្នឹង ប្រជាពលរដ្ឋថ្វីដ្បិតតែគាត់មានកើតហេតុពាក់ព័ន្ធនឹងខ្យល់កន្ត្រាក់មែន ប៉ុន្តែយើងបានដោះស្រាយជួយសម្របសម្រួលពួកគាត់ទាន់ពេលវេលា អត់ឱ្យមានការលំបាកទេ»។
លោក អ៊ុំ រាត្រី បញ្ជាក់ថា៖ «ហើយឯកឧត្តមឧប (ឧបនាយករដ្ឋមន្ត្រី) កែ គឹមយ៉ាន បានផ្តល់ស័ង្កសីជាប់ជាប្រចាំ។ សម្រាប់ដោះស្រាយបញ្ហាហ្នឹងគឺគាត់ដាក់ប្រចាំម្តង ២ ០០០ សន្លឹក ៣ ០០០ សន្លឹក។ ប៉ុន្តែដោយមានការរួមគ្នារវាងក្រុមការងារគ្រប់ថ្នាក់ អាជ្ញាធរគ្រប់ថ្នាក់ហ្នឹង ប្រជាពលរដ្ឋថ្វីដ្បិតតែគាត់មានកើតហេតុពាក់ព័ន្ធនឹងខ្យល់កន្ត្រាក់មែន ប៉ុន្តែយើងបានដោះស្រាយជួយសម្របសម្រួលពួកគាត់ទាន់ពេលវេលា អត់ឱ្យមានការលំបាកទេ»។
កាលពីល្ងាចថៃ្ងទី ២១ ខែ មេសា ឆ្នាំ ២០១៩ នៅភូមិឈូក ឃុំចង្ហា ស្រុកអូរជ្រៅ ខេត្តបន្ទាយមានជ័យ ប្រជាពលរដ្ឋ ២ នាក់បានស្លាប់ និងម្នាក់រងរបួសដោយសាររន្ទះបាញ់។ ក្នុងនោះដែរ ផ្ទះ ២៣ ខ្នង នៅភូមិពង្រ និងភូមិកណ្តាល ឃុំសិង្ហក៏រងការខូចខាត ដោយសារខ្យល់កន្ត្រាក់លាយឡំនឹងភ្លៀងនេះផងដែរ។ នេះបើយោងតាមទំព័រ Facebook របស់ក្រសួងធនធានទឹក និងឧតុនិយម។
យោងតាមគេហទំព័ររបស់នគរបាលជាតិ បានឱ្យដឹងថា ផ្ទះ ២២២ ខ្នង បានរងការខូចខាត (ធ្ងន់ធ្ងរ ២២ ខ្នង) ដោយសារខ្យល់កន្ត្រាក់ ហើយមនុស្ស ២ នាក់ បានស្លាប់ដោយសាររន្ទះបាញ់នៅក្នុងក្រុង ស្រុកទាំង ៧ របស់ខេត្តបន្ទាយមានជ័យ នៅថ្ងៃទី ២១ ខែ មេសា។
កម្តៅនៅកម្ពុជា អាចឡើងដល់ចាប់ពី ៤០ ទៅ ៤១ អង្សាសេក្នុងសប្តាហ៍នេះ។ នេះបើតាមការព្យាករអាកាសធាតុរបស់ក្រសួងធនធានទឹក និងឧតុនិយម កាលពីថ្ងៃទី ២២ ខែ មេសា។ ភ្លៀងធ្លាក់កាន់តែខ្សោយ ហើយរន្ទះ និងខ្យល់កន្ត្រាក់កើតឡើងញឹកញាប់ និងមានកម្លាំងខ្លាំង។ ក្រសួងក៏អំពាវនាវដល់ប្រជាពលរដ្ឋឱ្យមានការប្រុងប្រយ័ត្នចំពោះបាតុភូតទាំង ២ នេះ និងយកចិត្តទុកដាក់ចំពោះ សុខភាពដោយសារការកើនឡើងនៃកម្តៅនេះផងដែរ។
លោក អ៊ុំ រាត្រី បានបញ្ជាក់ថា ក្រុមការងារមូលដ្ឋាន នៃខេត្តបន្ទាយមានជ័យ បានចុះអប់រំផ្សព្វផ្សាយដល់ប្រជាពលរដ្ឋឱ្យត្រៀមទឹកទុកសម្រាប់ការពារ និង ថែរក្សាអនាម័យនៅតាម ផ្ទះដើម្បីការពារកុំឱ្យមានបញ្ហាសុខភាពចំពោះការកើនឡើងកម្តៅនេះ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់ភ្នំពេញប៉ុស្តិ៍ ថា ក្នុងរយៈពេល ៤ ខែដើមឆ្នាំ ២០១៩ នេះ (ដើមខែមករា ដល់ ២២ ខែមេសា) ករណីខ្យល់ព្យុះ និងរន្ទះបានកើតមានឡើងចំនួន ៨៣ លើក នៅរាជធានី ខេត្តចំនួន ២៣ លើកលែងតែខេត្តកំពត និងខេត្តត្បូងឃ្មុំ។
ការខូចខាតមានផ្ទះរលំ និងខូចខាតធ្ងន់ធ្ងរចំនួន ៣៨៩ ខ្នង។ ផ្ទះដែលរបើកដំបូល និងខូចខាតមធ្យមមាន ១ ៩០២ ខ្នង។ ខូចតូបលក់ដូរ តាមឆ្នេរសមុទ្រមាន ៩៥ តូប។ របើកដំបូលសាលារៀន ២០ អគារ។ របើកដំបូលរោងស្តុកកសិផល រោងម៉ាស៊ីនកិនស្រូវ សាលាឆទាន សាលាស្រុក និងមន្ទីរបក្សមាន ៧ កន្លែង។
លោក កែវ វី បន្តថា ការរងគ្រោះដោយសាររន្ទះបាញ់មានស្លាប់ ១២ នាក់ (ស្រី ២ នាក់ ក្មេង ៣ នាក់) របួស ១៧ នាក់។ ងាប់គោក្របី ១៦ ក្បាល៕