ភ្នំពេញៈ លោកនាយករដ្ឋមន្ត្រី ហ៊ុន សែន អំពាវនាវឱ្យពលរដ្ឋចូលរួមថែរក្សាសន្ដិភាពឱ្យបានគង់វង្ស ដើម្បីការពារកុំឱ្យរបបប្រល័យពូជសាសន៍ វិលត្រឡប់មកកម្ពុជាសាជាថ្មី ដែលការអំពាវនាវជាថ្មីទៀតនេះធ្វើឡើងនៅចំថ្ងៃប្រារព្ធទិវាជាតិនៃការចងចាំ ២០ ឧសភា ដើម្បីរំឭកដល់វិញ្ញាណក្ខន្ធអ្នកដែលស្លាប់ជាង ៣ លាននាក់ ក្នុងរបបខ្មែរក្រហមចាប់ពីឆ្នាំ ១៩៧៥ ដល់ឆ្នាំ ១៩៧៩។
ទំព័រហ្វេសប៊ុករបស់លោក ហ៊ុន សែន កាលពីថ្ងៃម្សិលមិញបានរំឭកដល់ពលរដ្ឋគ្រប់រូប មិនត្រូវបំភ្លេចចោលទិវាជាតិនៃការចងចាំ ២០ ឧសភា ឡើយ ព្រោះជាថ្ងៃដែលត្រូវចងចាំអំពីអំពើឃោរឃៅ និងខ្មៅងងឹតដែលបានកើតឡើងនៅក្នុងរបបកម្ពុជាប្រជាធិបតេយ្យចាប់ពីថ្ងៃទី ១៧ ខែមេសា ឆ្នាំ ១៩៧៥ ដល់ថ្ងៃទី ៦ ខែ មករា ឆ្នាំ ១៩៧៩ ដែលបានសម្លាប់មនុស្សអស់ជាង ៣ លាននាក់។
ទំព័រហ្វេសប៊ុកបន្តថា៖ «ដើម្បីកុំឲ្យរបបនេះវិលត្រឡប់មកវិញ (ពលរដ្ឋត្រូវ) ចូលរួមថែរក្សាការពារសន្តិភាពឱ្យបានគង់វង្សពីព្រោះសន្តិភាពបានផ្តល់ឱកាសគ្រប់យ៉ាងក្នុងការកសាងសង្គមគ្រួសារ សហគមន៍ និងប្រទេសជាតិឱ្យកាន់តែរីកចម្រើនទៅមុខទៀត»។
រដ្ឋាភិបាលបានប្រកាសផ្អាករៀបចំការប្រារព្ធទិវាចងចាំថ្ងៃ ២០ ឧសភា នៅក្នុងឆ្នាំ ២០២០ នេះដោយសារមានការផ្ទុះឡើងនៃជំងឺកូវីដ ១៩។
ក្រៅពីការសរសេរសាររំឭកទៅដល់ពលរដ្ឋទំព័រហ្វេសប៊ុករបស់លោក ហ៊ុន សែន ក៏បានបង្ហោះឡើងវិញនូវខ្សែវីដេអូដែលមានរយៈពេលជិត ១ ម៉ោង រៀបរាប់អំពីប្រវត្តិតស៊ូរបស់លោក ហ៊ុន សែន ដែលបានសម្រេចចិត្តចាកចេញពីប្រទេសកម្ពុជាកាលពីថ្ងៃទី ២០ ខែ មិថុនា ឆ្នាំ ១៩៧៧ ចូលទៅកាន់ប្រទេសវៀតណាម ដើម្បីស្វែងរកការគាំទ្រពីកងទ័ពវៀតណាម ដើម្បីចូលរួមក្នុងចលនារំដោះប្រទេសកម្ពុជាចេញពីរបបប្រល័យពូជសាសន៍របស់ក្រុមប៉ុលពត។
នៅក្នុងវីដេអូនោះបានបញ្ជាក់ថា លោក ហ៊ុន សែន បានចាកចេញពីកម្ពុជាជាមួយសមមិត្ត ឬកម្មាភិបាលចំនួន ៤ នាក់ទៀត ដែលមានកាំភ្លើងចំនួន ៣ ដើម និងគ្រាប់បែក ២ គ្រាប់បាននាំគ្នាដើរឆ្លងកាត់ព្រំដែនពីខេត្តកំពង់ចាមចូលទៅកាន់ខេត្តសុងប៊ែរបស់ប្រទេសវៀតណាម ដោយផ្សងព្រេងនៅក្នុងព្រៃ រួមទាំងការប្រឈមនឹងការបាញ់សម្លាប់ពីក្រុមប៉ុលពត ការជាន់មីន និងការបាញ់សម្លាប់ពីកងទ័ពវៀតណាម។ ការចាកចេញនៅពេលនោះគឺខណៈដែលភរិយារបស់លោកគឺលោកស្រី ប៊ុន រ៉ានី កំពុងមានផ្ទៃពោះ ៥ ខែ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងថា ទិវាចងកំហឹង និងក្រោយមកហៅថា ជាទិវាជាតិនៃការចងចាំគឺត្រូវបានប្រារព្ធធ្វើឡើងជារៀងរាល់ឆ្នាំតាំងពីក្រោយឆ្នាំ ១៩៧៩ ដើម្បីរំឭកអំពីទុក្ខលំបាករបស់ប្រជាជន ដែលស្ថិតនៅក្នុងរបបប្រល័យពូជសាសន៍របស់ក្រុមប៉ុលពត។
លោកថ្លែងថា៖ «ការចងចាំនេះមិនមែនសម្រាប់តែអ្នកដែលធ្លាប់ឆ្លងកាត់របប ៣ ឆ្នាំ ៨ ខែ ២០ ថ្ងៃនេះទេ គឺថាវាឆ្លងមកដល់ក្មួយៗ និងចៅៗជំនាន់ក្រោយ ពីព្រោះថាបើគ្មានថ្ងៃ ៧ មករា ក្មួយៗ និងចៅៗទាំងអស់ហ្នឹង ក៏មិនអាចសល់ជីតាជីដូន និងឪពុកម្ដាយដែរ ហើយក៏គ្មានកំណើតយើងមកដល់សព្វថ្ងៃនេះដែរ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា ទិវាជាតិនៃការចងចាំគឺមានអត្ថន័យ ២ សំខាន់គឺទី ១ ជាសារនយោបាយ ដើម្បីឲ្យពលរដ្ឋ និងថ្នាក់ដឹកនាំរបស់ខ្មែរទាំងអស់ត្រូវតែរៀនសូត្រនូវប្រវត្តិសាស្ដ្រដែលកន្លងផុតអំពីការបែកបាក់សង្គម និងការហែកហួរគ្នារវាងខ្មែរ ដែលនាំឱ្យមានសោកនាដកម្ម និងវិនាសកម្មសម្រាប់ប្រទេសជាតិទាំងមូល និងទី ២ ជាសារ ១ ដើម្បីនាំគ្នាឱ្យតម្លៃចំពោះសន្ដិភាព។
លោកបញ្ជាក់ថា៖ «យើងឃើញថាទិវាជាតិនៃការចងចាំគឺមានភាពចម្រូងចម្រាសគ្នារវាងគណបក្សកាន់អំណាចបច្ចុប្បន្ន និងគណបក្សប្រឆាំងដែលគេ (គណបក្សប្រឆាំង) ហៅថា ទិវានេះគឺជាការរំឭកអំពីជ័យជម្នះរបស់គណបក្សប្រជាជន ដែលមានប្រៀបលើខ្មែរក្រហម និងទៅជាឧបករណ៍ឃោសនាឱ្យគណបក្សប្រជាជនទៅវិញ។ ប៉ុន្តែខ្ញុំយល់ថា យើងមិនគួរបំភ្លេចចោល និងជជែកបញ្ហាលើថ្ងៃនេះទេ ពីព្រោះបទពិសោធនៃសង្គ្រាមមិនមែនសម្រាប់តែគណបក្សប្រជាជនកម្ពុជាទេ គឺសម្រាប់ប្រជាជនខ្មែរទាំងមូល។ ប្រសិនបើយើងមិនយកការចងចាំមួយ ដើម្បីរំឭកយើងទេគឺយើងអាចនឹងបំភ្លេច និងអាចធ្វើឱ្យប្រទេសយើងធ្លាក់ក្នុងភ្នក់ភ្លើងសង្គ្រាមសាជាថ្មី»៕