The Phnom Penh Post Search

Search form




Logo of Phnom Penh Post newspaper Phnom Penh Post - លោក​ ហ៊ុន សែន​ ឲ្យ​ត្រៀម​រៀបចំ​ព្រឹត្តិការណ៍​ធំ​សម្រាប់​ទិវា​ពលកម្ម​អន្តរជាតិ​

លោក​ ហ៊ុន សែន​ ឲ្យ​ត្រៀម​រៀបចំ​ព្រឹត្តិការណ៍​ធំ​សម្រាប់​ទិវា​ពលកម្ម​អន្តរជាតិ​

Content image - Phnom Penh Post
លោក​នាយក​រដ្ឋ​មន្ត្រី​ ហ៊ុន សែន ​ថ្លែង​សុន្ទរកថា នៅ​ក្នុង​ពិធី​មួយ ​កាល​ពី​ថ្ងៃ​ទី ២៦ ខែ​មីនា។ SPM

លោក​ ហ៊ុន សែន​ ឲ្យ​ត្រៀម​រៀបចំ​ព្រឹត្តិការណ៍​ធំ​សម្រាប់​ទិវា​ពលកម្ម​អន្តរជាតិ​

ភ្នំពេញៈ លោកនាយក​រដ្ឋម​ន្ត្រី ហ៊ុន សែន បាន​បង្ហាញ​ពី​សមិទ្ធផល​រួមគ្នា​ជាច្រើន ​ជាមួយនឹង​​អង្គការ​អន្តរជាតិ​ខាង​ការងារ ILO ដែល​បាន​ផ្តល់ការ​ងារ​ ដល់​កម្មករ​សម្រាប់​សហគ្រាស​ក្នុង​ប្រព័ន្ធ​ប្រមាណ​ ១ លាន ​៥​ សែន​នាក់ និង​បាន​ប្រកាស​ឲ្យ​ត្រៀម​​រៀបចំ​ព្រឹត្តិការណ៍​ធំ​សម្រាប់​​ទិវា​ពលកម្ម​អន្តរជាតិ​ថ្ងៃទី ១ ខែ ​ឧសភា ក្រោម​ប្រធាន​បទ «កិច្ច​គាំពារ​សង្គម​ដើម្បី​ផលិតភាព»។

សារាចរ​ណែនាំ​របស់​រដ្ឋា​ភិបា​​ល​ ចុះហត្ថលេខា​ដោយ​លោកនាយក​រដ្ឋមន្ត្រី កាលពី​ថ្ងៃ​ចន្ទ បាន​ណែនាំ​ឲ្យ​ក្រសួង​ការងារ និង​បណ្ដុះបណ្ដាល​វិជ្ជាជីវៈនិង​ស្ថាប័ន​ពាក់ព័ន្ធ​ទាំង​ថ្នាក់ជាតិ និង​ថ្នាក់ក្រោម​ជាតិត្រូវ​រៀបចំ​កម្មវិធី​ខួប ១០​០ ឆ្នាំ របស់​អង្គការ​អន្តរ​ជាតិ​ខាង​ការងារ និង​ខួប ៥០ ឆ្នាំ នៃ​សមាជិកភាព​​របស់​កម្ពុជា​នៅ​អង្គការ​អន្តរជាតិ​ខាង​ការងារ ក្រោម​ប្រធានបទ «បង្កើត​យុត្តិធម៌​​សង្គមលើកកម្ពស់​ការងារ​ស​មរ​ម្យ» និង​ប្រកាស​ឱ្យប្រើប្រាស់​កម្មវិធី​ការងារ​សមរម្យ​ប្រចាំ​ប្រទេស​កម្ពុជា ឆ្នាំ ២០១៩​-​២០២៣ នៅ​ថ្ងៃទី ២៨ ខែ មីនា​ ខាង​មុខ​នេះ។

ចំណែក​ខួប​អនុស្សាវរីយ៍​លើក​​ទី ១៣៣ នៃ​ទិវា​ពលកម្ម​អន្តរជាតិ ត្រូវ​ប្រព្រឹត្តទៅ​នៅ​ថ្ងៃទី១ខែឧសភាក្រោម​ប្រធា​ន​​​បទ «កិច្ច​គាំពារ​សង្គម​ ដើម្បី​ផលិតភាព» ដោយ​ត្រូវ​រៀបចំ​សិក្ខាសាលា​នានា ដើម្បី​លើកកម្ពស់​វិស័យ​ការងារ​នេះ លើក​បដា​ពាក្យស្លោក និង​ចូលរួម​ការពារ​សន្តិសុខ​ដល់​អ្នកពាក់ព័ន្ធ​ជុំវិ​ញ​ការ​រៀបចំ​អបអរ​ព្រឹត្តិការណ៍​នេះ​ទូទាំង​ប្រទេស។

លោក ហ៊ុន សែន ​សរ​សេរ​​នៅក្នុង​សា​រលិខិតដាច់ដោយ​​ឡែក​មួយទៀត​របស់​លោក​​កាលពី​ថ្ងៃ​ចន្ទថា​ នេះគឺជា​ឱកាស​មួយ​ ដើម្បី​វាយតម្លៃ​ពី​វឌ្ឍនភាព​រវាង​កម្ពុជាជាមួយ​អង្គការ ILO ដែល​បានធ្វើការ​រួមគ្នា​ក្នុងការ​លើក​កម្ពស់​វិស័យ​នេះ​ នាពេល​កន្លង​មក។

លោក​ថា កម្ពុជាគឺជា​ប្រទេ​ស​មួយ ​ក្នុង​តំបន់​អាស៊ាន ដែល​បានផ្តល់​សច្ចាប័ន​លើ​អនុ​សញ្ញាស្នូល​ខាង​ការងារ​ដល់​ទៅ​ចំនួ​ន ៨ សម្រាប់​ដាក់បញ្ចូល​ទៅក្នុង​ច្បាប់​កម្ពុជា​ដែល​ធ្វើ​ឲ្យ​វិស័យ​នេះ មាន​ការ​អភិវឌ្ឍ​ដែល​​ជួយ​ជំរុញ​កំណើន​សេដ្ឋកិច្ច​ជាតិ។

លោក​បន្តថា សមិទ្ធផល​ទាំង​​នោះមានដូចជា ការបង្កើ​ត​​យន្តការ​ត្រីភាគី​សម្រាប់​សំ​វាទ​សង្គ​ម និង​ការដោះស្រាយ​បញ្ហា​ជា​ច្រើន​ ទាក់ទង​ទៅនឹង​សិទ្ធិ និង​ផលប្រយោជន៍​របស់​កម្ម​ករ​និយោជិត និង​និយោជក ការ​​បង្កើត​ក្រុមប្រឹក្សា​អាជ្ញា​កណ្តា​ល ការ​អនុវឌ្ឍ​របប​សន្តិសុខ​សង្គម របប​ហានិភ័យ​សម្រាប់​មន្ត្រី​រាជការ​ ជាដើម។

លោក​បញ្ជាក់ថា៖ «រាជរដ្ឋាភិបាលនឹង​បន្ត​ផ្តល់នូវ​កិច្ច​សហការ​ជាមួយនឹង​អង្គ​ការ​​អន្តរជាតិ​ខាង​ការងារ និង​ដៃគូ​អភិវ​ឌ្ឍ​ន៍​នានា​ ឲ្យ​បាន​ជិតស្និទ្ធ​ថែមទៀត ដើម្បី​រួមគ្នា​សម្រេច​គោលដៅ​អភិវឌ្ឍ​ន៍ប្រកបដោយ​ចីរភាព​របស់ UN និង​ដើម្បី​សម្រេច​មហិច្ឆតា​ប្រែក្លាយ​កម្ពុជា​ទៅ​ជា​​ប្រទេស​មាន​ចំ​ណូល​មធ្យម​កម្រិត​ខ្ពស់ នៅ​ឆ្នាំ ២០៣០ និង​​ទៅជា​ប្រទេស​មាន​ចំណូល​ខ្ពស់​នៅ​ឆ្នាំ ២០៥០​»។

លោក ទុន សុភ័​ណ អ្នក​សម្រ​ប​​សម្រួល​ជាតិ​នៃ​អង្គការ ILO ប្រចាំ​កម្ពុជា បាន​លើកឡើងថា សមិទ្ធផល​ទាំងនេះគឺជា​ជោគជ័យ​ធំ ដែល​រដ្ឋាភិបាល​បានធ្វើ​រួមគ្នា ដើម្បី​លើកកម្ពស់​វិស័យ​ការងារ​នៅ​កម្ពុជា។ ជាមួយនឹង​សមិទ្ធផល​ទាំងនេះ លោក​រំពឹង​ថា រដ្ឋាភិបាល​នឹង​បន្ត​រួមគ្នា​ថែមទៀត ដោយ​អនុវត្ត​ច្បាប់​ដែលមាន​ស្រាប់​ និង​គោល​នយោ​បាយ ក្នុងការ​លើកកម្ពស់​វិស័យ​ការងារ ដោយ​ផ្តោតលើ​ផ្នែក​សេដ្ឋកិច្ច​ក្រៅ​ប្រព័ន្ធ ដើម្បី​ឲ្យ​ពួកគាត់​ទទួលបាន​នូវ​អត្ថ​​ប្រយោជន៍​នានា ដែល​ពួកគាត់​ មិនទាន់​បាន​ទទួល​នា​ពេល​កន្លង​មក។

លោក​បញ្ជាក់ថា៖ «គឺ​ការ​ពង្រីក​កិច្ច​គាំពារ​សង្គម របប​សន្តិសុខ​សង្គម និង​ផលប្រយោជន៍​ផ្សេង​ទៀត ​ទៅ​កាន់​អ្នក​ធ្វើការ​ក្រៅ​ប្រព័ន្ធ ព្រោះ​ពួក​​គេ​មិនទាន់​បាន​ទទួល​អ្វី​នោះ​ទេ ។ ម្យ៉ាង​ទៀត​ ត្រូវ​យក​ចិត្ត​ទុកដាក់​បន្ត​ទៀត​ចំពោះ​បញ្ហា​ប្រាក់​​ឈ្នួល​អប្បបរ​មា​ក្រៅពី​វិស័យ​កាត់​ដេរ ដោយ​ពង្រីក​ទៅ​វិស័យ​ផ្សេង​ទៀត»។

តាម​សារលិខិត​របស់​លោក ហ៊ុន សែន កម្ពុជាបាន​បង្កើត​ការ​ងារ​ធ្វើ ក្នុង​អត្រា ៩៩,៣ % នៃ​កម្លាំង​ពលកម្ម​សរុប ១០ លាន​នាក់ ក្នុង​នោះ​គ្រឹះ​ស្ថានសហ​គ្រាស​ក្នុង​ប្រព័ន្ធ​ មាន​ចំនួន​ជិត ១ ម៉ឺន ៣ ពាន់ ដែល​មាន​កម្មករ​ប្រមាណ​ ១ លាន ៥ សែន​នាក់ និង​សេដ្ឋ​កិច្ច​ក្រៅ​ប្រព័ន្ធ​ មាន​ប្រមាណ​ជិត ៦ សែន ដែល​មាន​កម្មករ​ជិត ២​ លាន ៤ សែន​នាក់ ។ ចំណែក​វិស័យ​កសិកម្ម​ ប្រមាណ​ជាង​ ៤ លាន​នាក់ និង​ពលករ​ទៅ​ធ្វើការនៅក្រៅ​ប្រទេស​មាន​ប្រមាណ ១ លាន ២ សែន​នាក់ បូក​រួម​នឹងម​ន្ត្រី​សាធា​រណៈ​ប្រមាណ ៥ សែន​នាក់៕

អត្ថបទគួរចាប់អារម្មណ៍