ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋឲ្យបង្កើនការប្រុងប្រយ័ត្នអំពីគ្រោះអគ្គិភ័យដែលបង្កឡើងពីភ្លើងទៀនធូបក្នុងអំឡុងពេលបុណ្យចូលឆ្នាំប្រពៃណីជាតិខ្មែរនាពេលខាងមុខ ខណៈអាជ្ញាធរខេត្តក្រុងនានាពិសេសអាជ្ញាធររាជធានីភ្នំពេញបានព្រមានចាត់វិធានការច្បាប់ ប្រឆាំងជនទាំងឡាយណាដែលលេងកាំភ្លើងបាញ់ទឹក ឬ គប់ទឹក ប៉ាតធ្យូង ឬម្សៅ និងលេងវាយដោយរំពាត់ ទៅលើអ្នកដំណើរតាមដងផ្លូវ ដែលបង្កគ្រោះថ្នាក់ ឬនាំឲ្យប៉ះពាល់ដល់សេចក្ដីថ្លៃថ្នូររបស់អ្នកដទៃ។
ក្នុងពិធីចែកសញ្ញាបត្រដល់និស្សិតសាកលវិទ្យាល័យជាតិគ្រប់គ្រងនាព្រឹកថ្ងៃអង្គារម្សិលមិញនៅឯមជ្ឈមណ្ដលកម្សាន្តកោះពេជ្រលោក ហ៊ុន សែន បានអំពាវនាវដល់ប្រជាពលរដ្ឋឲ្យបង្កើនការប្រុងប្រយ័ត្នខ្ពស់អំពីសុវត្ថិភាពផ្ទាល់ខ្លួនទាំងការធ្វើដំណើរទៅកាន់ទីជិតឆ្ងាយ និងការជួបជុំក្រុមគ្រួសារសាច់ញាតិនៅក្នុងផ្ទះក្នុងអំឡុងពេលបុណ្យចូលឆ្នាំថ្មីជាពិសេសត្រូវប្រុងប្រយ័ត្នអំពីភ្លើងធូប ទៀន ដែលអាចបង្កជាអគ្គិភ័យ អន្តរាយដល់ទ្រព្យសម្បត្តិផ្ទាល់ខ្លួន និងអ្នកដទៃ។
លោកបានថ្លែងទៀតថា៖ «ទន្ទឹមនឹងនេះសូមអាជ្ញាធរ និងសមត្ថកិច្ចគ្រប់ជាន់ថ្នាក់ត្រូវរក្សាការពារ សណ្តាប់ធ្នាប់សាធារណៈ និងសុវត្ថិភាព ជូនប្រជាពលរដ្ឋ និងទេសចរជាតិ និងអន្តរជាតិនៅតាមតំបន់រមណីយដ្ឋានទេសចរណ៍ទូទាំងប្រទេសឲ្យបានសប្បាយរីករាយនៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរយើងនេះ» ។
ជុំវិញការអំពាវនាវនេះលោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិបានថ្លែងថាអគ្គស្នងការនគរបាលជាតិជំរុញដល់គ្រប់នាយកដ្ឋានអង្គភាព និងស្នងការរាជធានី-ខេត្តទាំងអស់រួចរាល់ហើយ និងបានត្រៀមកម្លាំងគ្រប់គ្រាន់ ដើម្បីបំពេញភារកិច្ច រក្សាការពារសន្តិសុខ សុវត្ថិភាព ជូនដល់ភ្ញៀវជាតិ និងអន្តរជាតិឲ្យបានទាន់ពេលវេលានៅពេលបុណ្យចូលឆ្នាំខាងមុខនេះ ទាំងសន្តិសុខសង្គម និងចរាចរណ៍។
លោកថ្លែងថា៖ «យើងក៏សូមឲ្យប្រជាពលរដ្ឋក៏ដូចជាទេសចរជាតិ និងអន្តរជាតិ មេត្តាចូលរួមសហការឲ្យបានល្អជាមួយសមត្ថកិច្ចដោយរាយការណ៍ឲ្យបានទាន់ពេលវេលាក្នុងករណីមានបទល្មើសកើតឡើង ដើម្បីឈានដល់ការចាត់វិធានការឲ្យបានឆាប់រហ័សចំពោះជនល្មើសរួមទាំងជួយសហការធ្វើចរាចរណ៍ដើម្បីកុំឲ្យមានការកកស្ទះផងដែរ»។
ចំណែកលោក ឃួង ស្រេង អភិបាលរាជធានីភ្នំពេញនាពេលថ្មីៗនេះបានចេញសេចក្ដីជូនដំណឹងមួយ ដោយហាមប្រាមប្រជាពលរដ្ឋ លេងល្បែងស៊ីសងគ្រប់ប្រភេទក្នុងអំឡុងពេលបុណ្យចូលឆ្នាំថ្មី និងបានហាមឃាត់ការលេងបាញ់ទឹក ដោយប្រើ (កាំភ្លើងបាញ់ទឹក ឬ ទុយោទឹក) គប់ស្បោងទឹក ប៉ាតធ្យូង ឬម្សៅ ការវាយដោយរំពាត់លើអ្នកដំណើរដែលអាចនាំឲ្យមានគ្រោះថ្នាក់ជាយថាហេតុ ប៉ះពាល់ដល់អាយុជីវិត និង សេចក្ដីថ្លៃថ្នូររបស់អ្នកដទៃ។
លោក ស្រេង បញ្ជាក់ថា៖ «អាជ្ញាធរនឹងចាត់វិធានការតាមផ្លូវច្បាប់យ៉ាងតឹងរ៉ឹងបំផុត ចំពោះពលរដ្ឋទាំងឡាយណាដែលបានប្រព្រឹត្តផ្ទុយទៅនឹងបម្រាមខាងលើនេះដោយបានបង្កឲ្យគ្រោះថ្នាក់ដល់អ្នកដទៃ និងប៉ះពាល់ដល់ប្រពៃណី សេចក្ដីថ្លៃថ្នូររបស់ជាតិក៏ដូចជាសុវត្ថិភាព សន្តិសុខជាតិ»៕