.jpg)
ប្រជាពលរដ្ឋមកចូលរួមមើលពិធីបុណ្យអុំទូកនៅភ្នំពេញកាលពីឆ្នាំ ២០១៨។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវឲ្យប្រជាពលរដ្ឋ និងភ្ញៀវអន្តរជាតិចូលរួមកម្សាន្តសប្បាយក្នុងពិធីបុណ្យអុំទូក ដោយហេតុកងកម្លាំងជិត ២ ម៉ឺននាក់ នឹងត្រូវដាក់ពង្រាយ ដើម្បីរក្សាសន្តិសុខ ខណៈមន្ត្រីរដ្ឋាភិបាលប្រាប់ពលរដ្ឋកុំឲ្យមានការបារម្ភអំពីសុវត្ថិភាពថ្ងៃបុណ្យអុំទូក។
មុនពេលដែលបុណ្យអុំទូកនឹងចូលមកដល់នៅសប្ដាហ៍ក្រោយនេះលោក ហ៊ុន សែន បានប្រាប់ឲ្យពលរដ្ឋចូលរួមសប្បាយក្នុងពិធីបុណ្យជាតិនេះដោយក្តីរីករាយដោយមុនពេលត្រឡប់ពីកិច្ចប្រជុំកំពូលអាស៊ាននៅប្រទេសថៃកាលពីម្សិលមិញ លោកសរសេរនៅលើទំព័រហ្វេសប៊ុកថា៖ «ទន្ទឹមនឹងនេះដែរ នៅសល់តែ ៤ ថ្ងៃទៀតប៉ុណ្ណោះ បុណ្យឯករាជ្យជាតិ ៩ វិច្ឆិកា នឹងចូលមកដល់ ហើយនឹងបន្តដល់បុណ្យអុំទូក អកអំបុក និងសំពះព្រះខែចាប់ពីថ្ងៃទី ១០ ដល់ ១២ វិច្ឆិកា» ។
លោកបន្តថា៖ «សូមអញ្ជើញបងប្អូនជនរួមជាតិ និងភ្ញៀវទេសចរជាតិ និងអន្តរជាតិ ចូលរួមកម្សាន្តសប្បាយទាំងនៅក្នុងរាជធានីភ្នំពេញ និងនៅតាមបណ្តាខេត្តនានា ហើយសូមត្រៀមអំបុក ចេកទុំ ដូងខ្ចី..ដើម្បីយើងទទួលទានអំបុកទាំងអស់គ្នានៅថ្ងៃទី ៩ វិច្ឆិកា ក្នុងបរិយាកាសសប្បាយរីករាយ «អំបុកថែជាតិ សាសនា និងព្រះមហាក្សត្រ»។
ពិធីបុណ្យអុំទូកឆ្នាំនេះប្រព្រឹត្តទៅរយៈពេល ៣ ថ្ងៃពីថ្ងៃទី ១០ ដល់ទី ១២ គឺមួយថ្ងៃបន្ទាប់ពីទិវាឯករាជ្យជាតិ ៩ វិច្ឆិកា។ ខណៈដែលលោក សម រង្ស៊ី ប្រធានស្ដីទីអតីតគណបក្សសង្គ្រោះជាតិដែលមានមូលដ្ឋាននៅក្រៅប្រទេសបានប្រកាសយកថ្ងៃទី ៩ វិច្ឆិកា សម្រាប់ធ្វើការវិលត្រឡប់មកកម្ពុជាវិញ ហើយធ្លាប់បានអំពាវនាវឲ្យពលរដ្ឋមកគាំទ្រលោកនៅថ្ងៃទី ៩ និងក្នុងពិធីបុណ្យអុំទូកផងដែរ។
ប៉ុន្តែការប្រកាសរបស់លោកក្នុងការផ្ដល់ថវិកាដល់កងទ័ព និងអំពាវនាវឲ្យពលរដ្ឋងើបឡើងដើម្បីចាប់លោកនាយករដ្ឋមន្ត្រី ហ៊ុន សែន ក៏ដូចជាការអត្ថាធិប្បាយប៉ះពាល់ដល់ព្រះមហាក្សត្រត្រូវបានរដ្ឋាភិបាលចាត់ទុកថា ការវិលត្រឡប់របស់លោកគឺដើម្បីធ្វើរដ្ឋប្រហារផ្ដួលរំលំរដ្ឋាភិបាល និងព្រះមហាក្សត្រ។ រដ្ឋាភិបាលក៏បានដាក់ពង្រាយកងទ័ពនៅតាមព្រំដែន និងពង្រឹងសន្តិសុខនៅគ្រប់ខេត្តក្រុងសម្រាប់រង់ចាំចាប់លោក សម រង្ស៊ី ផង និងការពារសន្តិសុខពេលបុណ្យអុំទូកផង។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងប្រាប់វិទ្យុជាតិថា អគ្គស្នងការនគរបាលជាតិត្រៀមកម្លាំងជិត ២ ម៉ឺននាក់សម្រាប់រក្សាសន្តិសុខសណ្ដាប់ធ្នាប់នៅថ្ងៃបុណ្យអុំទូក។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងថា សភាពការណ៍នៅថ្ងៃបុណ្យអុំទូកមានលក្ខណៈធម្មតាដូចឆ្នាំមុនៗគឺប្រជាពលរដ្ឋនឹងមានការសប្បាយរីករាយ ខណៈដែលទូក និងកីឡាករអុំទូកចាប់ផ្ដើមដឹកមកទម្លាក់ និងមកដល់បណ្ដើរៗហើយដោយគ្មានអ្វីជាការរំខានទេ។
លោកថ្លែងថា៖ «សូមបងប្អូនកុំមានការភ្ញាក់ផ្អើលដូចសម្ដេចពិជ័យសេនា ទៀ បាញ់ បានលើកឡើងហើយ គឺថាយើងត្រៀមលក្ខណៈក្នុងការបង្ហាញសមត្ថភាពគ្រប់គ្រងសភាពការណ៍ជូនដល់សាធារណជន។ ដូច្នេះការចល័តទ័ពអីហ្នឹងវាជារឿងសាមញ្ញធម្មតាទេ។ សូមសាធារណជនសប្បាយរីករាយ កុំមានការបារម្ភ ព្រោះសមត្ថកិច្ចរៀបចំសណ្ដាប់ធ្នាប់»។
លោកបានបន្តថា៖ «ខ្ញុំជឿថា ប្រជាពលរដ្ឋនឹងចូលរួមកុះករ មិនមែននៅតែរាជធានីភ្នំពេញទេ គឺនៅតាមវត្តតាមវ៉ា។ ដូច្នេះហើយយើងឃើញសម្ដេចតេជោលោកអំពាវនាវត្រៀមលក្ខណៈដើម្បីនាំគ្នាអបអរសាទរពិធីនេះ»។
លោក ប៊ុន វាសនា មន្ត្រីនៅគណៈកម្មាធិការជាតិរៀបចំបុណ្យជាតិអន្តរជាតិបានថ្លែងកាលពីម្សិលមិញថា លោកនាយករដ្ឋមន្ត្រីបានប្រាប់ដល់កងកម្លាំងសមត្ថកិច្ចឲ្យយកចិត្តទុកដាក់ ត្រៀមលក្ខណៈដើម្បីធានាការពារសុវត្ថិភាពមិនឲ្យប្រជាពលរដ្ឋមានរឿងអ្វីកើតឡើងទេ គឺចូលមកសប្បាយរីករាយតែប៉ុណ្ណោះ។
លោក វាសនា ថ្លែងថា៖ «ខ្ញុំសូមជម្រាបដល់មហាជនទាំងអស់ ជាពិសេសប្រជាពលរដ្ឋទាំងក្នុងព្រះរាជាណាចក្រកម្ពុជា ទាំងនៅក្រៅប្រទេសកុំមានការភិតភ័យអ្វីឡើយព្រោះកាលណាមានពិធីធំយ៉ាងនេះ គឺធានាថាមិនឲ្យមានបញ្ហាអ្វីកើតឡើងទេ សូមបងប្អូនមហាជន ប្រជារាស្ត្រទាំងអស់កុំមានការភិតភ័យចំពោះសម្ដីផ្សេងៗមកពីខាងក្រៅ។ សូមអញ្ជើញមកទស្សនាសប្បាយដូចរាល់ឆ្នាំអ៊ីចឹង»។
លោកថា ចំនួនអ្នកមកទស្សនាពិធីបុណ្យអុំទូកនឹងមានចំនួនច្រើនដូចមុន ព្រោះបើគិតត្រឹមកីឡាករអុំទូក និងអ្នកដែលមកជាមួយពួកគាត់មានប្រមាណ ៥ ម៉ឺននាក់រួចទៅហើយ។
ទោះយ៉ាងណាអ្នកវិភាគយល់ថាការដាក់កម្លាំងការពារច្រើន រួមជាមួយការចល័តកងទ័ពធ្វើឲ្យពលរដ្ឋមានការភ័យខ្លាចទៅវិញទេ ហើយចំនួនអ្នកចូលរួមទស្សនាបុណ្យអុំទូកអាចមានតិចជាងឆ្នាំមុន។
លោក មាស នី អ្នកវិភាគសង្គមថ្លែងថា៖ «បរិយាកាសក្នុងពេលបុណ្យអុំទូកនេះជាអារម្មណ៍របស់ប្រជាពលរដ្ឋអាចនឹងមានអារម្មណ៍ថា មិនមានសុវត្ថិភាពគ្រប់គ្រាន់ទេដោយសារតែការប្រឈមថ្ងៃកំណត់នៃការវិលត្រឡប់មកវិញរបស់គណបក្សប្រឆាំងផង ហើយមានវត្តមានរបស់កងកម្លាំងប្រដាប់អាវុធរាប់ពាន់នាក់ទៀតនឹងពង្រាយ»។
លោកថា នៅពេលមានពិធីបុណ្យនានាតែងមានការដាក់ពង្រាយកម្លាំង ហើយសម្រាប់បុណ្យអុំទូកនេះ កម្លាំងនឹងមានកាន់តែច្រើន ហើយធ្វើបែបនេះអាចកាត់បន្ថយចំនួនមនុស្សដែលមានបំណងមកមើលបុណ្យអុំទូកដោយសារតែពួកគេខ្លាច។
លោកនិយាយថា៖ «បើសិនជាមានការដាក់កម្លាំងច្រើនធ្វើឲ្យមនុស្សម្នាអាចប្រាប់កូនចៅថា កុំឲ្យទៅមើលខ្លាចមានរឿងអ្វីមួយកើតឡើង។ ដូចកាលប៉ុន្មានឆ្នាំមុនមានព្រឹត្តិការណ៍រត់ជាន់គ្នា តែពេលនោះមិនមានរឿងនយោបាយធំទេ។ ប៉ុន្តែក្នុងស្ថានភាពនេះចំនួនអាចមានការថយចុះ ជាពិសេសអ្នកភ្នំពេញប្រហែលមិនហ៊ានបណ្ដោយកូនចៅឲ្យទៅលេងបុណ្យអុំទូកទេ»។
ស្រដៀងគ្នានេះលោក ឯម សុវណ្ណារ៉ា បានថ្លែងថា ពលរដ្ឋកម្ពុជាមិនទាន់មានភាពស្ងប់ស្ងាត់ទាំងស្រុងទេ គឺពួកគាត់នៅមានការភ័យខ្លាច ការបារម្ភ និងការបាក់ស្បាតពីឥទ្ធិពលសង្គ្រាមដែលគាត់ឆ្លងកាត់កាលពីអតីតកាល។ ដូច្នេះនៅពេលមានការចល័តកងទ័ពបែបនេះ ធ្វើឲ្យគាត់បាត់ភាពស្ងប់ស្ងាត់ និងបារម្ភនៅថ្ងៃអុំទូក។
លោកថា ភ្ញៀវអន្តរជាតិ និងពលរដ្ឋនៅតាមខេត្តក៏ប្រហែលជាមានការរារែកដែរក្នុងការមកលេងបុណ្យអុំទូកនៅភ្នំពេញ។
លោកនិយាយថា៖ «បើតាមខ្ញុំគិត វាអត់ដូចឆ្នាំមុនៗទេ នៅតែមានការបារម្ភ ភ័យខ្លាចឥទ្ធិពលនៃការចល័តកងទ័ព ការដាក់បារ៉ាស់ ការយាមកាម និងការសាកសួរ ដែលធ្វើឲ្យគាត់បាត់ស្ថិរភាព និងសន្តិភាពផ្លូវចិត្ត គាត់អាចសំងំនៅផ្ទះ ដូចនេះចំនួនមនុស្សក៏មិនច្រើនដូចឆ្នាំមុនៗដែរ»។
ស្របពេលជាមួយគ្នានេះសមត្ថកិច្ចខេត្តបន្ទាយមានជ័យបានបិទផ្ទាំងរូបថតអ្នកដែលរងការចាប់ខ្លួនចំនួន ១៨ នាក់។ ផ្ទាំងរូបថតនេះមានរូបថតលោក សម រង្ស៊ី, ជូ ឡុង សូមួរ៉ា, អេង ឆៃអ៊ាង, មូរ សុខហួរ, តុ វ៉ាន់ចាន់, ម៉ែន សុថាវរិន្ទ្រ, យក់ នាង, ឡុង រី, ម៉ន ផល្លា, អ៊ុំ សំអាន, ហៃ វណ្ណា, ម៉ោញ សារ៉ាត់, លី រតនារស្មី, អ៊ីសា ឧស្មាន, អ៊ូ ច័ន្ទឫទ្ធិ, នុត រំដួល, ហូរ វ៉ាន់ និង តាក់ កុម្ភារ។
ស្នងការនគរបាលជាតិបានសរសេរនៅលើផ្ទាំងបដានោះថា ឈ្មោះខាងលើនេះជា «ក្រុមឧទ្ទាមក្បត់ជាតិ» ហើយស្នើឲ្យពលរដ្ឋដែលឃើញឈ្មោះទាំងនេះរាយការណ៍ទៅសមត្ថកិច្ច។ គណបក្សសង្គ្រោះជាតិត្រូវបានតុលាការកំពូលរំលាយចោលកាលពីខែវិច្ឆិកា ឆ្នាំ ២០១៧ ដោយជាប់ចោទពីរឿងក្បត់ជាតិ។ អ្នកនយោបាយរបស់គណបក្សប្រឆាំងមួយនេះប្រមាណជាង ១០០ នាក់ ត្រូវបានហាមឃាត់មិនឲ្យធ្វើនយោបាយ ហើយបាននិរទេសដោយខ្លួនឯងទៅនៅក្រៅប្រទេស ៕
