.jpg)
ក្រុមមេធាវីស្ម័គ្រចិត្តរបស់លោកនាយករដ្ឋមន្ត្រី ថតរូបជុំគ្នា កាលពីថ្ងៃម្សិលមិញ។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាឱ្យក្រសួងយុត្តិធម៌និងក្រសួងកិច្ចការនារី ពិនិត្យលទ្ធភាពលើការលើកលែងទោស ឬសម្រាលទោសចំពោះទណ្ឌិតជាស្ត្រី ដោយពុំចាំបាច់រង់ចាំថ្ងៃបុណ្យជាតិនោះទេ ដោយលោកថា លោកមានបុព្វសិទ្ធិពិសេស ស្នើទៅព្រះមហាក្សត្រ ខណៈលោកណែនាំឲ្យក្រុមមេធាវីដែលទើបតែបង្កើតថ្មី ចេញធ្វើសកម្មភាពព្រមគ្នា ជួយដល់ស្ត្រីក្រីក្រ ជាពិសេសពិរុទ្ធជនស្ត្រី។
លោក ហ៊ុន សែន បានថ្លែងក្នុងពិធីអបអរសាទរទិវាសិទ្ធិនារីអន្តរជាតិ ៨ មីនា ដែលជាខួបលើកទី ១០៨ ធ្វើឡើងនៅមជ្ឈមណ្ឌលកោះពេជ្រ កាលពីថ្ងៃម្សិលមិញថា៖ «ឥឡូវនេះ មេធាវី គី តិច ដែលជាមេធាវីរបស់រដ្ឋាភិបាល និងមេធាវីនៃគ្រួសារខ្ញុំផ្ទាល់តែម្តង គាត់កាន់កាប់ជាប្រធាននៃមេធាវីរបស់ខ្ញុំ រៀបចំកម្លាំងរួចរាល់អស់ហើយ។ សូមឲ្យមានការសហការពីសំណាក់ក្រសួងកិច្ចការនារី មន្ទីរកិច្ចការនារីតាមខេត្តជាមួយក្រុមមេធាវីរបស់តេជោសែន»។
លោកបន្តថា៖ «ឥឡូវនេះ ពិនិត្យមើលជំហានដំបូង ត្រូវដោះស្រាយមុខសញ្ញាណា? គឺមុខសញ្ញាស្ត្រីដែលជាពិរុទ្ធជន នៅជាប់ឃុំឃាំងមិនទាន់ទទួលបានការកាត់ទោសហើយដែលនៅខ្វះមេធាវីត្រូវចូលទៅក្នុងចំណុចនោះជាមុន។ យើងផ្តល់ការយកចិត្តទុកដាក់ ទៅលើការដោះស្រាយសំណុំបញ្ហា ជួនកាលយកទៅឃុំ គ្មានមេធាវីកាត់ក្តីមិនចេញ គឺខុសយើង មិនមែនខុសមកពីពួកគាត់ទេ។កាត់ក្តីយូរ ហើយកាត់ក្តីមិនបាន ដោយសារគាត់អត់មានលុយជួលមេធាវី អ៊ីចឹងឥឡូវនេះ ខ្ញុំជួយចេញថ្លៃមេធាវី»។
ជាមួយគ្នានេះ លោក ហ៊ុន សែន ក៏បានបញ្ជាឲ្យក្រសួងយុត្តិធម៌ និងក្រសួងកិច្ចការនារី ធ្វើការរួមគ្នា ដោយធ្វើយ៉ាងណា សម្រួលដល់ទណ្ឌិតជាស្ត្រី ឲ្យទទួលបានការលើកលែងទោស ឬសម្រាលទោសផងដែរ។
លោក ហ៊ុន សែន បញ្ជាក់យ៉ាងដូច្នេះថា៖ «មុខសញ្ញាដែលយើងត្រូវដោះស្រាយ ដែលយើងប្រជុំថ្ងៃមុន គឺមាន ២ ដែលត្រូវយកចិត្តទុកដាក់ ទី១ គឺជាទណ្ឌិតជាស្ត្រី យើងត្រូវពិនិត្យនៅក្នុងក្រុមហ្នឹងគប្បីត្រូវមានការយកចិត្តទុកដាក់ពិនិត្យសម្រាលទោសឬលើកលែងទោសជាបន្ត ដោយមិនចាំបាច់រង់ចាំដល់មានពេលបុណ្យទានទេ។ បើយើងឃើញថា ស្ថានភាពវាលំបាក យើងអាចផ្តល់នូវការលើកលែងទោស ដោយមិនចាំពេលវេលា ព្រោះច្បាប់ពន្ធនាគារអនុញ្ញាតឲ្យនាយករដ្ឋមន្ត្រីចុះហត្ថលេខាសុំព្រះរាជានុញ្ញាត ព្រះរាជទានទោស ពេលណាក៏បានដែរ»។
លោកបន្តថា៖ «គោលដៅទី២ សម្រាប់ស្ត្រី ដែលជាពិរុទ្ធជនមិនទាន់ទទួលបានការកាត់ទោស ដោយសារតែខ្វះមេធាវី ដូច្នេះយើងត្រូវជំរុញប្រើប្រាស់ឲ្យអស់សក្តានុពលនូវមេធាវី ដែលមួយភាគពីក្រសួងកិច្ចការនារី មានតាមរយៈប្រាក់ឧបត្ថម្ភពីរាជរដ្ឋាភិបាលក្រសួងយុត្តិធម៌មាន តាមរយៈប្រាក់ឧបត្ថម្ភពីរាជរដ្ឋាភិបាល។ ឥឡូវកម្លាំងថ្មីបានបំពេញបន្ថែម គឺមេធាវីរបស់ខ្ញុំតែម្តង ដើម្បីទៅជួយការពារក្តីសម្រាប់ស្ត្រីក្រីក្រ ហើយសំណុំរឿងផ្សេងទៀត ក៏យើងត្រូវតែទទួល»។
ជាមួយគ្នានេះ លោកនាយករដ្ឋមន្ត្រីក៏បានណែនាំឲ្យកម្មការិនីនៅតាមរោងចក្រនានា គួរស្វែងរកក្រុមមេធាវីដែលលោកបង្កើតឡើងជាង ៦០ រូបនេះ បើសិនជាមានបញ្ហា ហើយក្នុងករណីមានការខ្វះខាត លោកនឹងពង្រីកសមាជិកបន្ថែមទៀតហើយមេធាវីទាំងអស់ត្រូវចេញធ្វើសកម្មភាពព្រមៗគ្នា ដើម្បីឲ្យមានវឌ្ឍនភាពក្នុងដំណាក់កាលថ្មីនេះ។
លោក ជិន ម៉ាលីន អ្នកនាំពាក្យក្រសួងយុត្តិធម៌បានប្រាប់ភ្នំពេញប៉ុស្តិ៍ពីម្សិលមិញថាជាទូទៅការលើកលែងទោស ឬសម្រាលទោសចំពោះទណ្ឌិត មាន ២ គឺទី១ ធ្វើនៅក្នុងពិធីបុណ្យជាតិ ធំៗចំនួន ៣ ដង ក្នុង ១ ឆ្នាំ ចំណែក មួយទៀត គឺការស្នើរបស់លោកនាយករដ្ឋមន្ត្រី ដែលមានបុព្វសិទ្ធិពិសេស ក្នុងការស្នើឲ្យលើកលែងទោសពីព្រះមហាក្សត្រ។
លោក ម៉ាលីន បានថ្លែងថា ក្រសួងកំពុងសហការជាមួយក្រសួងកិច្ចការនារីក្នុងការពិនិត្យមើលទណ្ឌិតជាស្ត្រី ដែលអាចនឹងទទួលបានសិទ្ធិសម្រាលទោស ឬលើកលែងទោសនេះ ស្របពេលក្រសួងក៏កំពុងពន្លឿននីតិវិធីនៃដំណើរការក្តីនៅតុលាការ សម្រាប់ពិរុទ្ធជនជាស្ត្រី ឲ្យពួកគាត់ទទួលបាននូវការសម្រេចក្តី ឆាប់រហ័សផងដែរ។
លោកបន្តថា៖ «យើងកំពុងតែពិនិត្យមើលលើគោលការណ៍ច្បាប់ផង និងមនុស្សធម៌ផង ហើយពិនិត្យមើលលើសំណុំរឿងឡើងវិញទាំងអស់ដើម្បីឲ្យឈានទៅដល់ដំណាក់កាល ដែលពួកគេអាចទទួលបានការបន្ធូរបន្ថយទោសឬលើកលែងទោសនេះ»។
ក្រុមមេធាវីស្ម័គ្រចិត្ត របស់លោកនាយករដ្ឋមន្ត្រីចំនួន ៦៧ រូបបានជួបជុំគ្នាជាលើកដំបូង កាលពីម្សិលមិញដើម្បីប្រកាសពីសុពលភាពរបស់ខ្លួនក្នុងការបំពេញវិជ្ជាជីវៈសម្រាប់ជួយស្ដ្រីក្រីក្រដែលទទួលរងការរំលោភបំពាន ហើយខ្វះលទ្ធភាពចំណាយប្រាក់ពឹងពាក់រកមេធាវី។
កាលពីថ្ងៃទី ១៨ ខែកុម្ភៈក្នុងកិច្ចប្រជុំបូកសរុបលទ្ធផលការងាររបស់ «ក្រុមប្រឹក្សាជាតិកម្ពុជា ដើម្បីស្ត្រី» លោក ហ៊ុន សែន បានប្រកាសបង្កើត «ក្រុមមេធាវីការពារក្តី» ដែលស្ថិតក្រោមការគ្រប់គ្រងដោយផ្ទាល់របស់លោក។ បន្ទាប់ពីប្រកាសនោះលោក ហ៊ុន សែន ក៏បានចាត់តាំងលោក គី តិច ប្រធានក្រុមមេធាវីរាជរដ្ឋាភិបាលកម្ពុជា ឲ្យរៀបចំបង្កើតក្រុមមេធាវីនេះ ដោយលោកផ្តល់កញ្ចប់ថវិកាប្រមាណ ៥០ ម៉ឺនដុល្លារ។
លោក គី តិច ប្រាប់ភ្នំពេញប៉ុស្ដិ៍កាលពីថ្ងៃចន្ទថា តាមការឯកភាពនិងចំណារពីលោកនាយករដ្ឋមន្ត្រី រហូតដល់ពេលនេះ ក្រុមមេធាវី គឺសម្រេចជ្រើសរើសសមាជិកចំនួន ៦៧ រូបក្នុងនោះសម្រាប់ខេត្តនីមួយៗគឺមានមេធាវី ២ រូប ចំណែកក្នុងរាជធានីភ្នំពេញដែលមានសំណុំរឿងច្រើន សម្រាប់ដោះស្រាយនោះ គឺមាន ៦ រូប ហើយចំនួន ៦ រូបទៀត គឺជាក្រុមអន្តរាគមន៍ពិសេស សម្រាប់ចូលរួមជួយដល់មេធាវីទូទាំងប្រទេស ដែលត្រូវការជាចាំបាច់។
លោកបន្តថា៖ «ឥឡូវនេះ ដោយសារសម្តេចតេជោ គាត់ឲ្យយើងរៀបចំយ៉ាងហោចណាស់ក្នុង ១ ខេត្ត មានមេធាវី ២ រូប ហើយអ្វីទាំងអស់នេះខ្ញុំបានរាយការណ៍ជូនសម្តេចហើយគាត់បានឯកភាពអស់ហើយ។ នៅពេលប្រកាសជាលើកដំបូង នៅទីស្តីការគណៈរដ្ឋមន្ត្រីរសៀលថ្ងៃអង្គារហ្នឹង គឺយើងចាប់ផ្តើមប្រតិបត្តិការធ្វើការងារតែម្តង»។
លោក គី តិច បញ្ជាក់ថា៖ «យើងនឹងរៀបចំប្រព័ន្ធទំនាក់ទំនងឲ្យបានទូលំទូលាយ និងឲ្យបានងាយស្រួលទូទាំងប្រទេសតែម្តង។ ចំណែកអ្នកខេត្ត គឺគាត់អាចទាក់ទងទៅមេធាវី ២ រូប ដែលប្រចាំការនៅខេត្តនីមួយៗនោះហើយបើអាច សូមទាក់ទងមកកាន់ការិយាល័យមេធាវីផ្ទាល់នៅភ្នំពេញ។ មកដល់ពេលនេះគឺមានជាង ១០ ករណីហើយ ដែលយើងបានទទួលសុំឲ្យយើងជួយការពារក្តីក្នុងនោះភាគច្រើនគឺកម្មការិនីនៅតាមបណ្តារោងចក្រក្នុងរាជធានីភ្នំពេញ»។
បើតាមលោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ គិតត្រឹមថ្ងៃទី ២ ខែមីនា គឺមានស្ត្រីដែលកំពុងស្ថិតក្នុងពន្ធនាគារទូទាំងប្រទេសប្រមាណ ២ ៥១១ នាក់ ក្នុងនោះមានទាំងស្ត្រីដែលតុលាការសម្រេចដាក់ទោសទណ្ឌជាផ្លូវការ និងស្ត្រីដែលឃុំខ្លួនបណ្ដោះអាសន្ន រង់ចាំនីតិវិធីរបស់តុលាការ។
លោកបញ្ជាក់ថា ចំនួនស្ត្រីកំពុងស្ថិតក្នុងពន្ធនាគារបច្ចុប្បន្ន មានការថយចុះជាងមុនតែពិបាកធ្វើការប្រៀបធៀបណាស់ ព្រោះចំនួននេះប្រែប្រួលជារៀងរាល់សប្តាហ៍។
លោកបញ្ជាក់ថា៖ «មានការពិនិត្យជនជាប់ឃុំជាស្ត្រីហ្នឹង ដើម្បីធ្វើម៉េចឲ្យពួកគាត់មានការងាយស្រួលក្នុងការទទួលការលើកលែង និងបន្ធូរបន្ថយទោសឲ្យបានប្រសើរជាងមុនតាមរយៈការពន្លឿននីតិវិធីតុលាការដែលវាស្របទៅតាមច្បាប់រដ្ឋ»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្ស អាដហុក យល់ថា ករណីនេះទាមទារឲ្យស្ថាប័នពាក់ព័ន្ធ គួរធ្វើការងាររបស់ខ្លួន ឲ្យបានត្រឹមត្រូវ ចៀសវាងមានការរិះគន់ពីមជ្ឈដ្ឋានមួយចំនួន ហើយចំពោះស្ត្រី ដែលទទួលរងភាពអយុត្តិធម៌ពិតប្រាកដ គួរតែត្រូវបានគិតគូរ។
ម្យ៉ាងវិញទៀតចំពោះក្រុមមេធាវីដែលបង្កើតដោយប្រមុខរដ្ឋាភិបាលនេះ លោកបារម្ភថា អាចនឹងជះឥទ្ធិពលមិនល្អដែលធ្វើឲ្យប៉ះពាល់ដល់ឯករាជភាពរបស់តុលាការ បើពួកគេអនុវត្តការងារមិនបានត្រឹមត្រូវទៅតាមច្បាប់។
លោក ករុណា បញ្ជាក់ថា៖ «យើងខ្លាចក្រុមចៅក្រម ឬតុលាការ ប្រើប្រាស់តួនាទីរបស់ខ្លួន មិនបានល្អ ព្រោះតែមានឥទិ្ធពលពីក្រុមមេធាវីនេះ ដោយយើងខ្លាចថា ពួកគាត់អាចបាត់ឯករាជភាព និងពិបាកក្នុងការសម្រេចសេចក្តី។ អាចថា រឿងមួយចំនួន មិនប្រាកដថាស្ត្រីគ្រប់រូបហ្នឹងដែលពឹងពាក់ក្រុមមេធាវីនេះ សុទ្ធតែជាអ្នករងគ្រោះទេ ព្រោះពួកគាត់អាចជាជនល្មើសអីជាដើមអ៊ីចឹងដែរ តែនៅពេលដែលមានវត្តមានក្រុមមេធាវីមួយដែលមានឥទ្ធិពលចេញពីប្រមុខរដ្ឋាភិបាលនេះ ពួកគាត់នឹងពិបាក»៕
