The Phnom Penh Post Search

Search form

លោក​ ហ៊ុន សែន ឲ្យ​មាន​ការ​ប្រយ័ត្ន​ខ្ពស់​ពី​ជំងឺ​ឆ្លង​ហ្ស៊ីកា

យុទ្ធនាការ​បង្ការ និង​ទប់ស្កាត់​ជំងឺ​ហ្ស៊ីកា​របស់​ក្រសួង​សុខាភិបាល។
យុទ្ធនាការ​បង្ការ និង​ទប់ស្កាត់​ជំងឺ​ហ្ស៊ីកា​របស់​ក្រសួង​សុខាភិបាល។ រូបថត ហ្វេសប៊ុក

លោក​ ហ៊ុន សែន ឲ្យ​មាន​ការ​ប្រយ័ត្ន​ខ្ពស់​ពី​ជំងឺ​ឆ្លង​ហ្ស៊ីកា

ភ្នំពេញៈ លោក ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​កាលពី​ម្សិលមិញ​បាន​អំពាវនាវ​ស្នើ​ដល់​ក្រសួង​សុខាភិបាល និង​ប្រជាពលរដ្ឋ​ឲ្យ​មាន​ការ​យក​ចិត្ត​ទុកដាក់​កម្រិត​ខ្ពស់​កុំ​ឲ្យ​មាន​ជំងឺ​នេះ​ឆ្លង​មក​ទឹកដី​កម្ពុជា​ខណៈ​ជំងឺ​ឆ្លង​នេះ​កំពុង​កើត​មាន​នៅ​ប្រទេស​ថៃ​ និង​សិង្ហបុរី។ ការ​អំពាវនាវ​នេះ​បាន​ធ្វើ​នៅ​ក្នុង​ពិធី​សម្ពោធ​ឲ្យ​ដំណើរការ​មន្ទីរពេទ្យ​ឯកជន​របស់​ជប៉ុន​សាន់រ៉ាយស៍។

លោក​ថ្លែង​ថា៖ «ជំងឺ​រាលដាល​បាន​មក​ដល់​របង​ផ្ទះ​យើង​ហើយ​នោះ​គឺ​ជំងឺ​ឆ្លង​ហ្ស៊ីកា​ដែល​ជំងឺ​នេះ​មិន​ទាន់​ចូល​ដល់​កម្ពុជា​ទេ​ក៏​ប៉ុន្តែ​បាន​មក​នៅ​កៀក​កម្ពុជា​ដូចជា​នៅ​ប្រទេស​ថៃ​នៅ​ប្រទេស​សាំងហ្គាពួរ​មាន​ជំងឺ​នេះ​ច្រើន​ណាស់ ដូច្នេះ​ខ្ញុំ​ស្នើ​ឲ្យ​មាន​ការ​យក​ចិត្ត​ទុកដាក់​កម្រិត​ខ្ពស់​លើ​ការ​ថែទាំ និង​ធ្វើ​យ៉ាងណា​កុំ​ឲ្យ​មាន​ជំងឺ​នេះ​ឆ្លង​មក​ទឹកដី​កម្ពុជា​ដូច្នេះ​ការ​ត្រួត​ពិនិត្យ​ទាំង​ឡាយ​ដែល​រៀបចំ​ដោយ​ក្រសួង​សុខាភិបាល​បូក​នឹង​ការ​ខិតខំ​ប្រឹងប្រែង​របស់​ប្រជាជន​ការពារ​អនាម័យ និង​ថែទាំ​រយៈពេល​ធ្វើ​ដំណើរ​ឆ្លង​កាត់​ពី​ប្រទេស​មួយ​ទៅ​កាន់​ប្រទេស​មួយ»។

លោក លី សូវ៉ាន់ អ្នក​នាំ​ពាក្យ​របស់​ក្រសួង​សុខាភិបាល​បាន​ថ្លែង​ថា​រហូត​មក​ដល់​ពេល​នេះ​មិន​ទាន់​មាន​ព័ត៌មាន​ពី​ជំងឺ​ហ្ស៊ីកា​កើតឡើង​នៅ​ក្នុង​ប្រទេស​កម្ពុជា​នោះ​ទេ។

លោក​ថ្លែង​ថា​ជំងឺ​ហ្ស៊ីកា​អាច​បំផ្លាញ​ប្រព័ន្ធ​ប្រសាទ​កុមារ​ឲ្យ​ខុស​ប្រក្រតី​ជំងឺ​ហ្ស៊ីកា​ស្រាល​ជាង​គ្រុនឈាម​ប៉ុន្តែ​ស្រ្តី​មាន​គភ៌​ដែល​មាន​ផ្ទុក​មេរោគ​ហ្ស៊ីកា ឬ​កើត​ជំងឺ​ហ្ស៊ីកា​គឺ​អាច​បណ្តោល​ឱ្យ​ទារក​កើត​មក​មាន​ក្បាល​តូច​ខុស​ធម្មតា និង​មាន​ប្រព័ន្ធ​សរសៃ​ប្រសាទ​ខុស​ប្រក្រតី​ហើយ​បាន​ជំរុញ​ឲ្យ​ស្ដ្រី​មាន​ផ្ទៃពោះ​ទាំងអស់​ត្រូវ​យក​ចិត្ត​ទុកដាក់​ថែទាំ​គភ៌​ឲ្យ​បាន​ត្រឹមត្រូវ​តាម​ក្បួន​វេជ្ជសាស្ដ្រ​ដើម្បី​គេច​ផុត​ពី​ជំងឺ​ហ្ស៊ីកា។

លោក សូវ៉ាន់ ថ្លែង​ថា៖ «ក្រសួង​សុខាភិបាល​កំពុង​បើក​យុទ្ធនាការ​អប់រំ​សុខភាព​ទូទាំង​ប្រទេស​ដើម្បី​បង្ការ និង​ទប់ស្កាត់​ជំងឺ​ហ្ស៊ីកា​ទាំង​តាម​ព្រំដែន និង​ក្នុង​ប្រទេស។ ក្នុង​ពេល​ជាមួយ​គ្នា​នោះ​ដែរ​ក្រុម​មន្រ្តី​ជំនាញ​កំពុង​ពង្រឹង​ប្រព័ន្ធ​តាមដាន​ជំងឺ​ហ្ស៊ីកា​លើ​មនុស្ស និង​រុករក​មេរោគ​ហ្ស៊ីកា​ដែល​អាច​ផ្ទុក​លើ​មូសខ្លា និង​ទប់ស្កាត់​ការ​រាតត្បាត​ឲ្យ​ទាន់​ពេលវេលា»។

លោក​បញ្ជាក់​ថា​នៅ​ប្រទេស​កម្ពុជា​ចាប់​ពី​ឆ្នាំ ២០០៧ ដល់​ឆ្នាំ ២០១០ រកឃើញ​ជំងឺ​ហ្ស៊ីកា​ចំនួន ៧ ករណី​សុទ្ធ​តែ​ជាសះស្បើយ​ និង​ពុំ​រកឃើញ​មាន​ករណី​កុមារ​មាន​ក្បាល​តូច​ហើយ​ចាប់ពី​ពេល​នោះ​មក​ដល់​បច្ចុប្បន្ន​ពុំ​ទាន់​រកឃើញ​មាន​ករណី​ហ្ស៊ីកា​នៅ​ឡើយ​ទេ។ វីរុស​ហ្ស៊ីកា​ទាំង ៧ ករណី​នេះ​ជា​ប្រភេទ​វីរុស​ក្នុង​ស្រុក​មិនមែន​នាំ​ចូល​ពី​ប្រទេស​ទ្វីប​អាមេរិក និង​អាហ្វ្រិក​ទេ។

នាយកដ្ឋាន​ប្រយុទ្ធ​នឹង​ជំងឺ​ឆ្លង​បាន​ឲ្យ​ដឹង​ថា​ជំងឺ​ហ្ស៊ីកា​នេះ​ឆ្លង​តាមរយៈ​មូសខ្លា​ខាំ​ដែល​ប្រភេទ​មូស​បង្ក​ឲ្យ​មាន​ជំងឺ​គ្រុនឈាម​មិនមែន​ឆ្លង​តាម​មូស​អង្កាម​ទេ​ និង​អាច​ឆ្លង​តាម​ការ​រួមភេទ​ជាមួយ​អ្នក​ដែល​មាន​ផ្ទុក​វីរុស​ហ្ស៊ីកា​ពីព្រោះ​វីរុស​នេះ​មាន​នៅ​ក្នុង​ទឹកកាម ឈាម ទឹកនោម ទឹកភ្លោះ ទឹកមាត់​ព្រម​ទាំង​សារធាតុ​រាវ​រាង​កាយ​នៅ​ក្នុង​ខួរក្បាល និង​ខួរឆ្អឹង។ វីរុស​ហ្ស៊ីកា​នេះ​ឆ្លង​ពី​ម្ដាយ​ទៅ​កូន​ក្នុង​អំឡុង​មាន​ផ្ទៃពោះ និង​នៅ​ពេល​សម្រាល៕

អត្ថបទគួរចាប់អារម្មណ៍