.jpg)
លោក ហ៊ុន សែន ថ្លែងសុន្ទរកថាទៅកាន់អង្គសន្និសីទកំពូលសារព័ត៌មានម្សិលមិញ។ SPM
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីម្សិលមិញបានផ្ដល់គំនិតផ្ដួចផ្ដើមនូវចំណុចអាទិភាពមួយចំនួនដល់អង្គសន្និសីទកំពូលសារព័ត៌មានអាស៊ីឲ្យបង្កើនកិច្ចសហប្រតិបត្តិការក្នុងតំបន់ និងសកលលោកដើម្បីប្រយុទ្ធប្រឆាំងទប់ស្កាត់ព័ត៌មានក្លែងបន្លំ និងឧក្រិដ្ឋកម្មព័ត៌មានវិទ្យាតាមប្រព័ន្ធផ្សព្វផ្សាយព័ត៌មាន ដែលកំពុងគំរាមកំហែងនិងបង្កហានិភ័យយ៉ាងធ្ងន់ធ្ងរ។
ក្នុងសុន្ទរកថាក្នុងពិធីបើកសន្និសីទកំពូលនៅខេត្តសៀមរាបកាលពីម្សិលមិញ លោក ហ៊ុន សែន ថ្លែងថា៖ «ខ្ញុំសូមបញ្ជាក់ថា នៅក្នុងកិច្ចប្រជុំកំពូលអាស៊ី-អឺរ៉ុប នៅទីក្រុងប្រ៊ុចសែល នាពេលកន្លងទៅថ្មីៗនេះបណ្ដាប្រទេសនៅអឺរ៉ុបទាំងអស់ដែលឡើងថ្លែងយោបល់នៅក្នុងកិច្ចប្រជុំពេញអង្គ សុទ្ធតែបានលើកឡើងពីការព្រួយបារម្ភអំពីព័ត៌មានក្លែងបន្លំនិងឧក្រិដ្ឋកម្មព័ត៌មានវិទ្យា ហើយប្រទេសដែលគេចាត់ទុកថាជាបិតាប្រជាធិបតេយ្យក៏មានច្បាប់ដើម្បីរារាំងនិងដាក់ទណ្ឌកម្មទៅលើបទល្មើសព័ត៌មានក្លែងបន្លំនិងឧក្រិដ្ឋកម្មព័ត៌មានវិទ្យានេះផងដែរ»។
លោកនាយករដ្ឋមន្ត្រីក៏បានឲ្យដឹងផងដែរថា៖ «បច្ចេកវិទ្យាឌីជីថលនៃប្រព័ន្ធផ្សព្វផ្សាយព័ត៌មាន បានផ្ដល់គុណវិបត្តិផ្សេងៗ ដែលធ្វើឲ្យសកលលោកកំពុងប្រឈមទៅនឹងព័ត៌មានក្លែងបន្លំ ការញុះញង់បញ្ឆេះកំហឹង ការជេរប្រមាថដោយក្ដីស្អប់ខ្ពើម និងឧក្រិដ្ឋកម្មព័ត៌មានវិទ្យា ដូចជា ការហ៊ែកចូលបំផ្លាញឯកសារសាធារណៈ ការជំរិតទារប្រាក់តាមអនឡាញ ការរំលោភលើសិទ្ធិឯកជនជាដើម បាននិងកំពុងគំរាមកំហែងដល់សន្តិសុខនៅក្នុងតំបន់ និងសកលលោកទាំងមូល។ ដូចនេះ តម្រូវឲ្យភាគីពាក់ព័ន្ធបង្កើននូវកិច្ចសហប្រតិបត្តិការឲ្យកាន់តែជិតស្និទ្ធថែមទៀតទាំងក្នុងក្របខ័ណ្ឌទ្វេភាគី ក្របខ័ណ្ឌក្នុងតំបន់និងសកលលោកដើម្បីប្រយុទ្ធប្រឆាំងទៅនឹងព័ត៌មានក្លែងបន្លំ និងឧក្រិដ្ឋកម្មព័ត៌មានវិទ្យានេះ»។
លោកបន្តថា បន្ថែមពីនេះ ប្រព័ន្ធផ្សព្វផ្សាយប្រពៃណី ត្រូវមានភាពវៃឆ្លាត និងចេះបត់បែនទៅតាមស្ថានភាពជាក់ស្ដែង និងការវិវត្តបច្ចេកវិទ្យាទំនើប ដើម្បីប្រកួតប្រជែងក្នុងសម័យឌីជីថល និងការកសាងគោលនយោបាយក្របខ័ណ្ឌយុទ្ធសាស្ដ្រ បទប្បញ្ញត្តិច្បាប់សម្រាប់ប្រព័ន្ធផ្សព្វផ្សាយ និងស្ដង់ដារសុវត្ថិភាពឌីជីថល ដើម្បីគ្រប់គ្រងសុវត្ថិភាពទិន្នន័យ ការធ្វើពាណិជ្ជកម្ម និងដើម្បីប្រឆាំងព័ត៌មានក្លែងក្លាយ និងឧក្រិដ្ឋកម្មព័ត៌មានវិទ្យា។
លោក ហ៊ុន សែន ថ្លែងថា៖ «ខ្ញុំសង្ឃឹមថា សន្និសីទនេះនឹងពិភាក្សាយ៉ាងផុសផុលអំពីកាលានុវត្តភាពនៃបច្ចេកវិទ្យាឌីជីថល បញ្ហាប្រឈមនានា កិច្ចសហប្រតិបត្តិការជាដៃគូ ការប្រយុទ្ធប្រឆាំងទៅនឹងព័ត៌មានក្លែងបន្លំ ព្រមទាំងវិធីសាស្ត្រសម្រាប់ដោះស្រាយបញ្ហាដែលកើតចេញពីបដិវត្តន៍ឧស្សាហកម្មជំនាន់ទី៤ ក្នុងស្មារតីរួមចំណែកអភិវឌ្ឍសង្គម សេដ្ឋកិច្ច នៅក្នុងតំបន់ និងសកលលោកប្រកបដោយចីរភាព និងសន្តិភាពយូរអង្វែង»។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានកម្ពុជាបានលើកឡើងដែរថា គណៈប្រតិភូចូលរួមសន្និសីទកំពូលនេះ គឺមានចំនួន ៦០០ នាក់ មកពី ៤២ ប្រទេស ហើយអ្នកដែលត្រូវធ្វើបទបង្ហាញនិងចែករំលែកបទពិសោធចំនួន ៧០ នាក់ លើប្រធានបទមួយចំនួន ដូចជា ការសម្របខ្លួន ទៅនឹងបដិវត្តន៍ឌីជីថល ការប្រមើលមើលប្រព័ន្ធផ្សព្វផ្សាយនៅក្នុងបដិវត្តន៍ឧស្សាហកម្មទី៤ ប្រព័ន្ធផ្សព្វផ្សាយសង្គម និងព័ត៌មានមិនពិត និងរកប្រាក់របស់ប្រព័ន្ធផ្សព្វផ្សាយប្រពៃណី និងប្រព័ន្ធផ្សព្វផ្សាយថ្មី រួមទាំងកិច្ចពិភាក្សាតុមូលស្ដីពីឌីជីថលភាវូបនីយកម្ម និងភាពជឿជាក់លើប្រព័ន្ធផ្សព្វផ្សាយ។
លោក កាញារីទ្ធ ថ្លែងថា៖ «សន្និសីទកំពូលនេះ ក៏ជាទីកន្លែងសម្រាប់កិច្ចប្រជុំផ្សេងៗ ដូចជា កិច្ចប្រជុំថ្នាក់រដ្ឋមន្ត្រីអំពីកិច្ចសហប្រតិបត្តិការលើវិស័យប្រព័ន្ធផ្សព្វផ្សាយ កិច្ចប្រជុំទ្វេភាគីរបស់គណៈប្រតិភូដែលមានវត្តមាន និងកិច្ចប្រជុំរបស់នាយកប្រតិបត្តិស្ដីពីព័ត៌មានមិនពិតក្នុងចំណោមកិច្ចប្រជុំដទៃទៀត»។
លោក Sardar Umar Alam តំណាងអង្គការយូណេស្កូប្រចាំប្រទេសកម្ពុជា បានលើកឡើងនៅក្នុងពិធីនេះដែរថា ស្របពេលពិភពលោកកាន់តែមានការតភ្ជាប់គ្នាកាន់តែច្រើនតាមបណ្ដាញទំនាក់ទំនងសង្គម គឺព័ត៌មានមិនពិត ត្រូវបានគេផ្សព្វផ្សាយចែកចាយឱ្យគ្នាលឿនជាងព័ត៌មានពិតរហូតទៅដល់ ៦ ដង។
ទោះជាយ៉ាងណាលោក បានថ្លែងបន្តថា ក្នុងរយៈប៉ុន្មានខែកន្លងមកនេះ រដ្ឋាភិបាលនៅក្នុងតំបន់ បានបិទឬបន្ថយល្បឿនទំនាក់ទំនងនៅក្នុងបណ្ដាញផ្សព្វផ្សាយសង្គមដើម្បីការពារការផ្សព្វផ្សាយព័ត៌មានមិនពិត បន្ទាប់ពីនាំឱ្យមានភេរវកម្ម និងការតវ៉ាទ្រង់ទ្រាយធំ ប៉ុន្តែលោកថា សកម្មភាពការពារទាំងនេះមិនទាន់ច្បាស់លាស់នៅឡើយ ដោយសារមានការព្រួយបារម្ភអំពីការបិទទាំងអ្នកប្រើប្រាស់បណ្ដាញសង្គមស្របច្បាប់ ដែលមានទាំងអ្នកកាសែតផងដែរ។
លោក Sardar ថា៖ «ការសិក្សាមួយដោយ MIT ក្នុងឆ្នាំ ២០១៨ បានរកឃើញថា ព័ត៌មានមិនពិតនៅក្នុងបណ្ដាញទំនាក់ទំនងសង្គមគឺរីករាលដាលលឿនជាងព័ត៌មានពិតរហូត ៦ ដង»។
យ៉ាងណា លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា បានថ្លែងនៅក្នុងបណ្ដាញចែកចាយតេឡេក្រាមថា៖ «(សន្និសីទនេះ) គឺជាសារ:សំខាន់ទៅកាន់ពិភពលោកថា ថ្ងៃនេះបង្ហាញថាកម្ពុជាយើងមិនមែនជាប្រទេសឯកោ ហើយកម្ពុជាបានបើកលម្ហ សេរីភាពការបញ្ចេញមតិ លទ្ធិប្រជាធិបតេយ្យ និងផ្ដល់តម្លៃដល់សារព័ត៌មាន»៕
