.jpg)
លោកហ៊ុន សែន ថ្លែងទៅកាន់កម្មកររោងចក្រម្សិលមិញនៅខេត្តតាកែវ។ SPM
តាកែវៈ លោកនាយករដ្ឋមន្ត្រី ហ៊ុន សែន កាលពីម្សិលមិញបានថ្លែងសារអំពាវនាវចំពោះសហជីពដែលដឹកនាំ កម្មករ-កម្មការិនី ធ្វើបាតុកម្ម និងកូដកម្មទាមទារប្រាក់អត្ថប្រយោជន៍ (ប្រាក់អតីតភាព) ពីថៅកែរោងចក្រដោយខុសច្បាប់ ត្រូវបញ្ឈប់ជាបន្ទាន់ ព្រោះស្ថានភាពបែបនេះអាចនឹងឈានចូលទៅដល់ស្ថានភាពជ្រុលនិយម ហើយបណ្ដាលឲ្យរោងចក្រប្រមាណ ២ ភាគ ៣ ដែលតាមការប៉ាន់ស្មានរោងចក្រ ៨០០ ក្នុងចំណោម ១១៥៩ រោងចក្រនឹងត្រូវបិទទ្វារ ដោយសារតែការបង្វិលទុនរកដំណោះស្រាយឲ្យកម្មករ-កម្មការិនី។
សេចក្ដីអំពាវនាវរបស់លោកហ៊ុន សែន បានធ្វើឡើង ក្នុងពិធីជួបសំណេះសំណាលជាមួយកម្មករ កម្មការិនីប្រមាណជិត ២ ម៉ឺននាក់ នៅក្នុងខេត្តតាកែវនាដើមឆ្នាំថ្មីនេះ ដោយលោកបានឲ្យដឹងថា មានសហជីពខ្លះកំពុងធ្វើចលនាឲ្យកម្មករទាមទារបើកប្រាក់អតីតភាពផ្ដាច់ត្រឹមឆ្នាំ ២០១៨ ក្រោយពីច្បាប់ត្រូវបានកែសម្រួលឲ្យសង ៦ ខែម្ដង ចាប់ពីឆ្នាំ ២០១៩។
លោកហ៊ុន សែន ថ្លែងថា៖ «ដើម្បីដោះស្រាយបញ្ហានេះ យើងបានធ្វើវិសោធនកម្មច្បាប់ការងាររបស់យើង ដែលពីមុនអូសបន្លាយពេលនៃការផ្ដល់ប្រាក់អត្ថប្រយោជន៍ (ពីមុនទាល់ដល់ពេលបញ្ឈប់) ទៅឲ្យកម្មករ-កម្មការិនីឲ្យធ្វើការទូទាត់ ៦ ខែម្ដង ប៉ុន្តែ (ខ្ញុំ) មិននឹកស្មានដល់ថាស្រាប់តែមានរោងចក្រប្រហែលជា ៦ រោងចក្រ នៅទីក្រុងភ្នំពេញ ៣ នៅខេត្តតាកែវ ២ កំពង់ស្ពឺ ១ បែរជាសុំទូទាត់នៅខែមករាហ្នឹងផ្ដាច់តែម្ដង។ ពីមុននេះ ៣-៤ ឆ្នាំមិនទាន់នឹងទូទាត់ផង ៣-៤ ឆ្នាំ ទាល់តែគេបញ្ឈប់បានគេទូទាត់ឱ្យឥឡូវនេះ តើមានក្រុមញុះញង់មកពីណាទៅដែលបង្កើតឱ្យមានស្ថានភាព បើកផ្តាច់នៅក្នុងខែមករា ឆ្នាំ ២០១៩»។
លោកថ្លែងបន្តថា៖ «អ៊ីចឹងទេសុំអំពាវ-នាវចំពោះសហជីពដែលដឹកនាំកម្មករធ្វើកូដកម្ម បាតុកម្មទៅលើបញ្ហានេះបញ្ឈប់ជាបន្ទាន់នូវសកម្មភាព ដែលជាភាពដែលចូលដល់ស្ថានភាពជ្រុលនិយម»។
លោកនាយករដ្ឋមន្ត្រី ហ៊ុន សែន បានចោទជាសំណួរសួរត្រឡប់ទៅកាន់កម្មករ-កម្មការិនីវិញថា តើទុកឱ្យរោងចក្រនេះក្ស័យធនតាមរយៈការប្រមូលទុនទាំងអស់យកមកបើកឱ្យកម្មករ កម្មការិនី តែក្នុងមួយពេលរួចហើយបិទរោងចក្រ ឬយ៉ាងណា? សូមកម្មករ-កម្មការិនីទាំងអស់ពិចារណាមើលទៅ ព្រោះរោងចក្រទាំងអស់នោះនឹងចូលដល់កម្រិតក្ស័យធន ដូច្នេះអ្នកដែលខាតបង់ គឺកម្មករ-កម្មការិនីទាំងអស់គ្នាតែប៉ុណ្ណោះ។
លោកហ៊ុន សែន ថ្លែងថា៖ «បើរោងចក្រត្រូវបិទតើអ្នកទទួលផលវិបាកមុនគេគឺមិនមែនថៅកែទេ អ្នកទទួលផលវិបាកមុនគេគឺកម្មករដែលធ្លាប់មានការងារធ្វើ និងប្រាក់ចំណូលត្រូវបាត់ទាំងអស់តែក្នុង ១ ថ្ងៃទេ។ ការខាតបង់បែបនេះមិនត្រូវឲ្យកើតមានឡើងទេខ្ញុំយកឱកាសនេះអំពាវនាវ (ឲ្យ) មានការយោគយល់ អ្នកដែលខូចគឺប្រទេសជាតិយើង មុនដំបូងកម្មករ-កម្មការិនីបើសិនរោងចក្រត្រូវបិទ»។
លោកនាយករដ្ឋមន្ត្រីបានឲ្យដឹងផងដែរថា កាលពីមុនមានប្រវត្តិរោងចក្របិទទ្វាររត់ចោល បន្សល់នូវទុក្ខលំបាកដល់កម្មករ-កម្មការិនី ហើយបានតម្រូវឲ្យរាជរដ្ឋាភិបាលចំណាយថវិកា ២២ លានដុល្លារសហរដ្ឋអាមេរិកដើម្បីដោះស្រាយបញ្ហានៃការផ្ដល់ប្រាក់អត្ថប្រយោជន៍។
លោកប៉ាវ ស៊ីណា ប្រធានសហជីពចលនាកម្មករកម្ពុជា បានថ្លែងឲ្យដឺងនាពេលថ្មីៗកន្លងមកនេះថា មានកម្មករប្រមាណ ១២០០ នាក់ក្នុងរោងចក្រ W&D ត្រូវបានបញ្ឈប់ពីការងារ ក្រោយពួកគេទាមទារឲ្យថៅកែរោងចក្រទូទាត់ប្រាក់អតីតភាពការងារនេះ ដែលពួកគេមានមុនឆ្នាំ ២០១៩ មុននឹងអនុវត្តច្បាប់ថ្មីនេះ។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានពន្យល់ថា អតីតភាពការងារចាស់ ដែលមានមុនឆ្នាំ ២០១៩ គឺនិយោជកក្នុងវិស័យកាត់ដេរ និងផលិតស្បែកជើង ត្រូវសងជាដំណាក់ៗ ដល់កម្មករនិយោជិតដោយ ១ ឆ្នាំ ត្រូវសងចំនួន ៣០ ថ្ងៃ នៃប្រាក់ឈ្នួលគោល ក្នុងនោះ ១៥ ថ្ងៃ ត្រូវសងនៅក្នុងខែមិថុនា និង ១៥ ថ្ងៃទៀត ត្រូវសងនៅក្នុងខែធ្នូ នៃឆ្នាំនីមួយៗ រហូតដល់អស់អតីតភាពការងារ ដែលត្រូវសងនោះ។
លោកបន្តថា ដោយឡែកបងប្អូនកម្មករ កម្មការិនី ដែលប្រើប្រាស់កិច្ចសន្យាការងាររយៈពេលខ្លី គឺត្រូវទទួលបានប្រាក់បំណាច់អតីតភាពការងារនៅរៀងរាល់ពេលចប់កិច្ចសន្យានីមួយៗ។
លោកថ្លែងថា៖ «ពោលគឺមិនអនុវត្តដូចអ្នកដែលមានកិច្ចសន្យាការងាររយៈពេលវែងឡើយ។ ហេតុដូច្នេះ សូមបងប្អូនកម្មករនិយោជិត ផ្នែកកាត់ដេរ និងផលិតស្បែកជើងមេត្តាប្រុងប្រយ័ត្ន ចៀសវាងចាញ់បោកការញុះញង់ខុសច្បាប់របស់ជនខិលខូចមួយចំនួន»។
លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ថ្លែងថា បញ្ហានេះ ខាងសហជីពក៏ធ្លាប់បានលើកជាក្តីបារម្ភជាយូរមកហើយ ចំពោះការកែប្រែ និងអនុវត្តនីតិវិធីថ្មី ដែលទាមទារឲ្យមានការបកស្រាយ តែកន្លងទៅភាគីពាក់ព័ន្ធ ហាក់មិនបានបកស្រាយឲ្យបានច្បាស់នោះទេ ទើបជាហេតុនាំឲ្យកម្មករ ផ្ទុះការតវ៉ាបែបនេះ។
លោកថា៖ «ចំពោះយើង គឺមិនពាក់ព័ន្ធនឹងការជំរុញឲ្យកម្មករទាមទារនោះទេ ព្រោះកម្មករដែលជាសមាជិកយើង មិនបានទាមទារនោះទេ ហើយឃើញថា ការទាមទារនេះ គឺកើតចេញពីកម្មករដោយខ្លួនឯង ដែលមិនពាក់ព័ន្ធនឹងសហជីពនោះទេ»៕
