.jpg)
លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន បានអនុញ្ញាតឲ្យអាជ្ញាធរជាតិទទួលបន្ទុកកិច្ចការព្រំដែនចូលទៅបំភ្លឺទៅតាមការអញ្ជើញរបស់ឧត្តមក្រុមប្រឹក្សាពិគ្រោះ និងផ្តល់យោបល់នៅថ្ងៃព្រហស្បតិ៍នេះ អំពីបញ្ហាព្រំដែនរវាងកម្ពុជា និងវៀតណាម បន្ទាប់ពីថ្នាក់ដឹកនាំកំពូលប្រទេសទាំង ២ បានចុះហត្ថលេខាទទួលស្គាល់ការបោះបង្គោលព្រំដែនដែលសម្រេចបាន ៨៤ ភាគរយ។
កាលពីថ្ងៃទី ៥ ខែតុលាលោកនាយករដ្ឋមន្ត្រីបានអញ្ជើញទៅបំពេញទស្សនកិច្ចផ្លូវការនៅប្រទេសវៀតណាម ហើយក្នុងដំណើរទស្សនកិច្ចនោះ លោក ហ៊ុន សែន ចុះហត្ថលេខាទទួលស្គាល់បង្គោលព្រំដែនរវាងប្រទេសទាំង ២ លើកិច្ចព្រមព្រៀងចំនួន ២ ស្តីអំពីសន្ធិសញ្ញាបំពេញបន្ថែមលើការកំណត់ព្រំដែនរដ្ឋឆ្នាំ ១៩៨៥ និងឆ្នាំ ២០០៥ និងពិធីសារខណ្ឌសីមា និងបង្គោលព្រំដែនគោក។ ការចុះហត្ថលេខានេះបានធ្វើឲ្យមានការរិះគន់ពីគណបក្សនយោបាយ និងពីមជ្ឈដ្ឋានមួយចំនួនដោយទាមទារឲ្យរដ្ឋាភិបាលបំភ្លឺ និងបង្ហាញជាសាធារណៈអំពីឯកសារព្រំដែនដែលត្រូវបានចុះហត្ថលេខានេះ។
ដោយឡែកលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្តល់យោបល់បានឲ្យដឹងក្នុងសេចក្តីប្រកាសព័ត៌មានមួយកាលពីម្សិលមិញថា អនុលោមតាមការយល់ព្រមរបស់លោកនាយករដ្ឋមន្ត្រី ហ៊ុន សែន បានអនុញ្ញាតឲ្យលោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន ដឹកនាំគណៈប្រតិភូមកចូលរួមក្នុងកិច្ចប្រជុំផ្តល់ «បទបង្ហាញពិគ្រោះស្វែងយល់» ពីកិច្ចការព្រំដែននេះ ខណៈកិច្ចប្រជុំត្រូវដឹកនាំដោយលោក កែម រិទ្ធិសិត ប្រធានប្តូរវេននៃឧត្តមក្រុមប្រឹក្សាពិគ្រោះ និងផ្តល់យោបល់។
លិខិតដដែលបន្តថា៖ «កិច្ចប្រជុំមានសារៈសំខាន់សម្រាប់ឧត្តមក្រុមប្រឹក្សាពិគ្រោះ និងផ្តល់យោបល់ទទួលបាននូវមូលដ្ឋានជំនួយស្មារតីក្នុងកិច្ចការពន្យល់បកស្រាយដល់ប្រជាពលរដ្ឋទូទៅ និងគ្រប់និន្នាការលើបរិបទនៃការខិតខំប្រឹងប្រែងពុះពាររបស់រាជរដ្ឋាភិបាល ដឹកនាំដោយសម្តេចតេជោក្នុងការកសាងព្រំដែន សន្តិភាព និងអភិវឌ្ឍន៍រវាងកម្ពុជា និងប្រទេសជិតខាង»។
លោក ឈឹម ផលវរុណ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្តល់យោបល់បានប្រាប់ភ្នំពេញប៉ុស្តិ៍បន្ថែមថា៖ «ជាការល្អណាស់ចំពោះកិច្ចប្រជុំនេះ ព្រោះរដ្ឋាភិបាលមានភារកិច្ចក្នុងការធ្វើកិច្ចការទាំងអស់របស់ជាតិ ជាពិសេសការកំណត់ព្រំដែនហើយការធ្វើបទបង្ហាញគឺជាកិច្ចការតម្លាភាពមួយដ៏ល្អក្នុងការប្រមូលឯកសារគ្រប់ជ្រុងជ្រោយបង្ហាញទៅប្រធានគណបក្សទាំង ១៦ ដើម្បីឲ្យយើងយល់គ្នា»។
លោក ពេជ្រ ស្រស់ ប្រធានគណបក្សយុវជនកម្ពុជាដែលបានដាក់លិខិតស្នើឲ្យមានការបំភ្លឺពីបញ្ហាព្រំដែននេះបានប្រាប់ភ្នំពេញប៉ុស្តិ៍ថា អាជ្ញាធរជាតិទទួលបន្ទុកកិច្ចការព្រំដែន ត្រូវតែបំភ្លឺឲ្យបានច្បាស់អំពីបញ្ហាព្រំដែនរវាងកម្ពុជា និងវៀតណាមរួមទាំងប្រទេសជិតខាងមួយចំនួនទៀត។
លោកបន្តថា សន្ធិសញ្ញាបំពេញបន្ថែមលើការកំណត់ព្រំដែនរដ្ឋឆ្នាំ ១៩៨៥ និងឆ្នាំ ២០០៥ និងពិធីសារខណ្ឌសីមា និងបង្គោលព្រំដែនគោកប្រទេសទាំង ២ នៅមានចំណុចងឿងឆ្ងល់ជាច្រើន ដូច្នេះថ្នាក់ដឹកនាំរដ្ឋាភិបាលដែលធ្វើការលើកិច្ចការព្រំដែននេះត្រូវតែចូលរួមបង្ហាញឲ្យមានតម្លាភាពក្នុងបំណងស្វែងរកចំណុចវិជ្ជមាន និងអវិជ្ជមានអំពីកិច្ចព្រមព្រៀងទាំងនេះ។
លោកអះអាងថាការបំភ្លឺនេះនឹងធ្វើឲ្យសាធារណជនបានដឹង និងយល់ឲ្យបានច្បាស់ ព្រោះបញ្ហានេះគឺជាបញ្ហារបស់ជាតិទាំងមូលដោយមិនមែនជាកិច្ចការរបស់រដ្ឋាភិបាលតែម្នាក់នោះទេ ហើយបើមិនបង្ហាញឲ្យបានច្បាស់លាស់ អាចជាហេតុបង្កឲ្យមានភាពអសន្តិសុខក្នុងសង្គមជាតិ។
លោក ស្រស់ បញ្ជាក់ថា៖ «យើងក៏ចង់ដឹងពីបញ្ហាព្រំដែនមួយចំនួនទៀត ដើម្បីចូលរួមឃ្លាំមើលទាំងអស់គ្នា ព្រោះថាមិនមែនតែរដ្ឋាភិបាល ឬបក្សក្រៅរដ្ឋាភិបាលទេគឺត្រូវការការពារបូរណភាពទឹកដីកម្ពុជាយើង មិនគួរឲ្យតែមន្ត្រីរដ្ឋាភិបាលដឹងតែម្នាក់ឯងទេ។ គួរណាស់តែឲ្យទាំងអស់គ្នាដឹងដែរថា តើការវាស់បង្គោលព្រំដែនមានតម្លាភាព ឬមិនមានតម្លាភាព»។
លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែនបានថ្លែងកាលពីម្សិលមិញថា បញ្ហាកិច្ចការព្រំដែនមិនមែនជារឿងសម្ងាត់នោះទេ ដូច្នេះក្រុមការងារជាច្រើនផ្នែកនឹងចូលរួមបង្ហាញពីបញ្ហានេះឲ្យអស់ពីលទ្ធភាព និងគ្មានការលាក់លៀម។ ពិសេសជាងនេះទៅទៀតលោក គឹមហុង បានអះអាងថា ការឯកភាពក្នុងការបោះបង្គោលព្រំដែនកន្លងមកមិនបានធ្វើឲ្យកម្ពុជាខាតបង់ ឬបាត់បង់ទឹកដីទៅប្រទេសវៀតណាមដូចការចោទប្រកាន់នោះទេ។
លោកបញ្ជាក់ថា៖ «គ្មានអ្នកណាទៅធ្វើ (បោះបង្គោលព្រំដែន) ឲ្យពិបាកទៀតទេ បើធ្វើទៅមិនច្បាស់លាស់ដដែល យើងទៅធ្វើអ្វី? យើងធ្វើមានការទទួលខុសត្រូវទាំងយើងទាំងគេ គ្មានឲ្យបាត់បង់ទឹកដីទេ បើធ្វើឲ្យបាត់ ទុកវាឲ្យនៅដដែលទៅ»។
លោក គឹមហុង បន្តថា ការដែលមានការរិះគន់ និងបង្ហាញពីការព្រួយបារម្ភនានាកន្លងមកគឺគ្រាន់តែជាក្រុមស្រែកឲ្យតែបានៗ និងដើម្បីទាញយកប្រជាប្រិយភាពតែប៉ុណ្ណោះដោយលោកបានអំពាវនាវឲ្យបញ្ឈប់ការរិះគន់ និងចូលរួមកសាងប្រទេសទាំងអស់គ្នា។
លោក សុខ ទូច ប្រធានរាជបណ្ឌិត្យសភាកម្ពុជាដែលធ្លាប់ចុះស្រាវជ្រាវពីបញ្ហាព្រំដែនបាននិយាយថា លោកមិនដឹងថា តើជំនួបនៅថ្ងៃនេះអាជ្ញាធរជាតិទទួលបន្ទុកកិច្ចការព្រំដែននឹងលើកឡើងពីបញ្ហាអ្វីខ្លះនោះទេ។ ប៉ុន្តែលោកគ្រាន់តែមានចម្ងល់ថា៖ «តើឧត្តមក្រុមប្រឹក្សាហ្នឹងមានជំនាញផ្នែកកិច្ចការព្រំដែនហ្នឹងដែរឬទេ ដើម្បីឲ្យគេ (អស់ចម្ងល់) ឲ្យជ្រះចង្រៃ និងឲ្យចំចម្ងល់»។
ប្រទេស កម្ពុជា និងវៀតណាម បានបោះបង្គោលព្រំដែនគោករួចរាល់ចំនួន ៣១៥ បង្គោល ឬស្មើនឹង ៨៤ ភាគរយ ហើយក្នុងចំណោមបង្គោលព្រំដែនសរុបចំនួន ៣៧១ បង្គោល ដែលលាតសន្ធឹងតាមបណ្តាយព្រំដែនប្រមាណ ១ ២៤៥ គីឡូម៉ែត្រ។
បើតាមលោក វ៉ា គឹមហុង បង្គោលព្រំដែនដែលមិនទាន់មានការឯកភាពគ្នាប្រមាណជា ១៦ ភាគរយរវាងប្រទេសទាំង ២ និងបានឯកភាពគ្នាស្នើទៅប្រទេសបារាំងឲ្យជួយសម្របសម្រួលក្នុងការបោះបង្គោល ខណៈដែលបង្គោលនៅសល់ទាំងនោះមានចំនួន ៥៦ បង្គោល គឺមាននៅខេត្តរតនគិរី មណ្ឌលគិរី ខេត្តត្បូងឃ្មុំ ខេត្តស្វាយរៀង ខេត្តកណ្ដាល និងនៅក្នុងខេត្តតាកែវ៕
