ភ្នំពេញៈ អតីតអភិបាលខេត្តតាកែវ លោក ឡាយ វណ្ណៈ និងលោក ឡាយ ណារិទ្ធ អតីតស្នងការរងនគរបាលខេត្តតាកែវ កាលពីម្សិលមិញបានសុំឲ្យតុលាការដោះលែងពួកខ្លួន រួមទាំងអ្នកបើករថយន្ត និងអ្នកថែផ្ទះម្នាក់ទៀតពាក់ព័ន្ធករណីឃាតកម្មលើស្ត្រី ឈ្មោះ ចេវ សុវឌ្ឍនា កាលពីឆ្នាំ ២០១៨ ប៉ុន្តែសាលក្រមនៃសំណុំរឿងនេះនឹងប្រកាសនៅខែក្រោយឯណោះ។
លោក ប្លង់ សុផល តំណាងអយ្យការសន្និដ្ឋានថា តាមចម្លើយរបស់ជនត្រូវចោទទាំង ៤ នាក់ និងស្តាប់ការបំភ្លឺពីនគរបាលខេត្តតាកែវ និងពីនគរបាលក្រសួងមហាផ្ទៃកាលពីជំនុំជម្រះលើកមុន លោកថា លោក ឡាយ វណ្ណៈ និង លោក ឡាយ ណារិទ្ធ ត្រូវចៅក្រមស៊ើបសួរចោទពីបទឃាតកម្ម។ រីឯឈ្មោះ ជុំ វុធ អ្នកមើលផ្ទះនិងឈ្មោះ មេន សម៉ៃ អ្នកបើកបររថយន្តលោក ឡាយ វណ្ណៈ ចោទពីបទលាក់កំបាំងតម្រុយ។តាមចម្លើយ ជុំ វុធ និង មេន សម៉ៃ ថា លោក ឡាយ វណ្ណៈនិង លោក ឡាយ ណារិទ្ធ បានសម្លាប់នាង ចេវ សុវឌ្ឍនា។
លោកបន្តថា ចំពោះ សាក្សី ឈ្មោះ ជុំ វុធ, មេន សម៉ៃ ថា ចម្លើយពួកគេនៅក្រសួងមហាផ្ទៃជាចម្លើយបង្ខិតបង្ខំ ប៉ុន្តែពេលឆ្លើយនៅចៅក្រមស៊ើបសួរគឺពួកគេសុទ្ធតែមានមេធាវីនៅ ជាមួយនិងបានបញ្ជាក់ថា រក្សាចម្លើយនៅក្រសួងមហាផ្ទៃដែលថា ឡាយ វណ្ណៈ និង ឡាយ ណារិទ្ធ សម្លាប់នាង ចេវ សុវឌ្ឍនា ហើយឲ្យពួកគេទៅសែងសពធ្វើជាចង ក ជាមួយឈ្មោះ ចាន់រី ជាប្រពន្ធលោក ជុំ វុធ ផង។
លោកបន្តថា តាមការពន្យល់ពីលោកវេជ្ជបណ្ឌិត នង សុវណ្ណរ័ត្ន អំពីសភាពសព ចង ក និងសព ត្រូវគេខ្ទប់ដង្ហើមដែលមានលក្ខណៈខុសគ្នានោះគឺគ្រាន់តែជាទ្រឹស្តីប៉ុណ្ណោះ។
លោកថា៖ «ប៉ុន្តែ តាមរូបថត ដែលគេថតសាកសពបង្ហាញថា ដៃរបស់នាងមិនក្តាប់ទេ។ ខ្ញុំសូមក្រុមប្រឹក្សាពិចារណាលើបទចោទ តាមច្បាប់»។
ក្នុងសវនាការពីម្សិលមិញ លោក នី ចាន់ឌី មេធាវីការពារសិទ្ធិឲ្យលោក ឡាយ វណ្ណៈ បានលើកឡើងថា ការចោទមកលើកូនក្តីលោក ដោយសារកូនក្តីលោកមានទំនាក់ទំនងស្នេហាជាមួយអ្នកនាង ចេវ សុវឌ្ឍនា ហើយមុនពេលកើតហេតុថ្ងៃទី ២៦ មករា ឆ្នាំ ២០១៨ នោះ នាង ចេវ សុវឌ្ឍនា បានណាត់ជាមួយលោក ឡាយ វណ្ណៈ ដើម្បីហូបអាហារពេលល្ងាចនៅផ្ទះជួលរបស់នាង។ តែពួកគេបានឈ្លោះគ្នា ហើយលោក វណ្ណៈ បានឡើងរថយន្ត តែត្រូវនាង ចេវ សុវឌ្ឍនា ទាញកអាវចុះពីរថយន្តជជែកគ្នារហូតដល់ម៉ោងជាង ៦ ល្ងាចទើប ឡាយ វណ្ណៈ ចេញពីផ្ទះ ចេវ សុវឌ្ឍនា។
លោកថា សមត្ថកិច្ចបានចោទនិងដាក់បន្ទុកដោយសារលោក ឡាយ វណ្ណៈ ប្រើ ឈ្មោះ មេន សម៉ៃ និងឈ្មោះ ជុំ វុធ ឲ្យយកទូស័ព្ទរបស់នាង ចេវ សុវឌ្ឍនា ២ គ្រឿង ទៅបោះចោលក្នុងទឹកបឹង តែនោះមិនមែនថា កូនក្តីលោកចង់បំបិទភ័ស្តុតាងទេ តែដោយក្នុងទូរស័ព្ទដៃនោះ មានផ្ទុករូបភាព លោក វណ្ណៈ និង នាង ចេវ សុវឌ្ឍនា ហើយកូនក្តី លោកមិនចង់ឲ្យបែកធ្លាយ។ ព័ត៌មានពីការស្លាប់របស់នាង ចេវ សុវឌ្ឍនា កើតឡើងនៅប្រហែលជាម៉ោង ៧ យប់ ប៉ុន្តែ កូនក្តីរបស់លោកបានបើករថយន្តចេញពីទីនោះតាំងពីម៉ោងជិត ៦ ល្ងាចម្ល៉េះ។
លោកបន្តថា ចំពោះរបាយការណ៍ក្រសួងមហាផ្ទៃដែលធ្វើកោសល្យវិច័យក្រោយការស្លាប់របស់នាង ចេវ សុវឌ្ឍនា វិញ ទទួលស្គាល់របាយការណ៍ កោសល្យវិច័យរបស់នគរបាលខេត្តតាកែវ ប៉ុន្តែថា មានការសង្ស័យអំពីការស្លាប់របស់ជនរងគ្រោះ។
ព្រោះអាចត្រូវកូនក្តីលោកសម្លាប់ហើយយកទៅចងកដោយសារដៃជនរងគ្រោះកាន់ចំណងខ្សែចងក។ ប៉ុន្តែ លោកវេជ្ជបណ្ឌិត នង សុវណ្ណរ័ត្ន ដែលជាគ្រូពេទ្យឯករាជ្យបានពន្យល់តាមបច្ចេកទេសថាសពចងកគឺមានដៃក្តាប់ ហើយមានហៀរសំបោរផង ដូចសពរបស់នាង ចេវ សុវឌ្ឍនា។
លោកថា៖ «ដូច្នេះ ខ្ញុំសូមតុលាការពិចារណា និងដោះលែងកូនក្តីខ្ញុំ»។
លោក ទេព មុនីជាតិ មេធាវីការពារសិទ្ធិឲ្យលោក ឡាយ ណារិទ្ធ សន្និដ្ឋានថា នៅថ្ងៃកើតហេតុនោះ កូនក្តីលោកមិនបាននៅកន្លែងកើតហេតុទេ ហើយក្រោយកើតហេតុទើបកូនក្តីលោកទៅដល់ ដោយសារមិនស្គាល់ផ្ទះជនរងគ្រោះ។ ពាក់ព័ន្ធនឹងជន ៣ នាក់ទៀតពួកគេសុទ្ធតែថា ត្រូវបានសមត្ថកិច្ចសួរចម្លើយបង្ខិតបង្ខំ។ រីឯតំណាងអយ្យការលើកយកតែភ័ស្តុតាងដាក់បន្ទុក ឯភ័ស្តុតាងដោះបន្ទុកមិនបានលើកយកមកទេ។
លោកថា៖ «ដូច្នេះ សូមក្រុមប្រឹក្សាជំនុំចម្រះលើកលែងកូនក្តីខ្ញុំ ឲ្យមានសេរីភាពវិញ»។
លោក ឡាយ វណ្ណៈ និងលោក ឡាយ ណារិទ្ធ បានប្រាប់ចៅក្រមថា ពួកគាត់មិនបានសម្លាប់នាង ចេវ សុវឌ្ឍនាទេ និងសូមឲ្យតុលាការដោះលែង ខណៈជន មេន សម៉ៃ និង ជុំ វុធ ក៏សុំចៅក្រមជំនុំជម្រះឲ្យដោះលែងពួកគេផងដែរដោយថា ពួកគេមិនបានប្រព្រឹត្តដូចការចោទទេ។
ក្រោយបញ្ចប់ការជំនុំជម្រះ លោក ចៅក្រម ហម ម៉េងសែ ប្រធានក្រុមប្រឹក្សាជំនុំជម្រះបានថ្លែងថា សាលក្រមនៃសំណុំរឿងនេះនឹងប្រកាសនៅថ្ងៃទី ២២ សីហាខាងមុខ៕