ភ្នំពេញៈ អតីតអភិបាលខេត្តតាកែវលោក ឡាយ វណ្ណៈ និងបងប្រុសរបស់លោកគឺលោក ឡាយ ណារិទ្ធិ បានបដិសេធនៅចំពោះមុខចៅក្រមសាលាឧទ្ធរណ៍ថា ពួកលោកមិនមានជាប់ពាក់ព័ន្ធនឹងការស្លាប់របស់ស្ត្រីឈ្មោះ ចេវ សុវឌ្ឍនា ដែលជាស្រីកំណាន់របស់លោក វណ្ណៈ នោះទេ ដោយចាត់ទុកការផ្តន្ទាទោសឲ្យជាប់ពន្ធនាគារពី ១០ ទៅ ១៣ ឆ្នាំពីសំណាក់សាលាដំបូងរាជធានីភ្នំពេញថា ជារឿងអយុត្តិធម៌។
នៅក្នុងបន្ទប់សវនាការពីម្សិលមិញដែលមានសមាសភាពចៅក្រម ៣ រូបរួមមានលោកចៅក្រម យន់ ណារ៉ុង ជាប្រធានក្រុមប្រឹក្សាជំនុំជម្រះ និងមានលោកស្រីចៅក្រម យ៉េត ម៉ូលីន រួមនឹងលោកចៅក្រម ញូង ធុល ជាចៅក្រមប្រឹក្សាជំនុំជម្រះលោក វណ្ណៈ ថ្លែងថាការវិនិច្ឆ័យរបស់សាលាដំបូងរាជធានីដែលផ្តន្ទាទោសលោកដាក់ពន្ធនាគារ ១៣ ឆ្នាំ និងបងប្រុសរបស់លោក ១០ ឆ្នាំគឺមានភាពអយុត្តិធម៌ជាទីបំផុត។
លោកអះអាងថា ករណីស្លាប់របស់នាង សុវឌ្ឍនា មិនមែនពួកលោកជាអ្នកសម្លាប់ទេ ប៉ុន្តែនាងធ្វើអត្តឃាត ចងកសម្លាប់ខ្លួនឯងទេ។ ចំពោះបងប្រុសរបស់លោកអតីតស្នងការរងខេត្តតាកែវក៏រឹតតែមិនបានពាក់ព័ន្ធនៅក្នុងរឿងនេះទៅទៀត ពីព្រោះបងប្រុសលោកមិនបានស្គាល់ផ្ទះកើតហេតុទេ ហើយក៏គាត់មិនបានទៅផ្ទះនោះដែរនៅថ្ងៃកើតហេតុ។ លោករៀបរាប់ពីដំណើររឿងថា មុនមានហេតុការណ៍នេះកើតឡើងនៅថ្ងៃទី ២២ ខែមករា ឆ្នាំ ២០១៨ គឺរូបលោកក្នុងនាមជាអភិបាលខេត្តតាកែវបានទៅបិទវគ្គសន្និបាតបូកសរុបការងាររបស់មន្ទីរអប់រំ ខេត្ត ហើយបន្ទាប់ពីចប់លោកបានឡើងរថយន្តដោយមានឈ្មោះ ម៉េង សម៉ៃ ជាអ្នកបើកបរដើម្បីទៅមើលសំណង់សួនច្បារនៅក្បែរវិមានឯករាជ្យក្នុងទីរួមខេត្តតាកែវ។
ប្រហែលជាពេលរសៀល លោកបានឆៀងចូលផ្ទះរបស់នាង សុវឌ្ឍនា ដូច្នេះមានតែរូបលោក និងអ្នកបើកបររថយន្ត សម៉ៃ ប៉ុណ្ណោះដែលបានចូលទៅផ្ទះកើតហេតុគឺគ្មានវត្តមានបងប្រុសលោកទេ។ លោក វណ្ណៈ ប្រាប់ចៅក្រមថា៖ «បងប្រុសខ្ញុំគ្មានជាប់ពាក់ព័ន្ធនឹងរឿងនេះទេ ហើយគាត់ក៏មិននៅទីនោះដែរ»។
លោកបន្តថា រឿងទាំងអស់នេះបានកើតឡើងដូចការរៀបរាប់របស់លោក ប៉ុន្តែក្រោយពីនគរបាលនៅក្រសួងមហាផ្ទៃសួរចម្លើយសាក្សីដែលមានលោក សម៉ៃ ឈ្មោះ ជីម វុធ និង ស្ត្រីឈ្មោះ ចាន់ រី ស្រាប់តែមានចម្លើយដូចៗគ្នាថា ពួកគេបានឃើញបងប្រុសរបស់លោកជិះរថយន្តជាមួយលោកចូលទៅផ្ទះនាង សុវឌ្ឍនា ទៅវិញ។ កុំថាឡើយគាត់សម្លាប់នាងសូម្បីតែប្រើហិង្សាវាយទៅលើប្អូនស្រី សុវឌ្ឍនា ក៏គាត់មិនដែលប្រព្រឹត្តដែរ។
លោកស្បថចំពោះមុខចៅក្រមថា៖ «បើខ្ញុំបានប្រព្រឹត្តមែន សូមឲ្យប្រពន្ធ និងកូនខ្ញុំ ៣ នាក់ស្លាប់ចុះ ហើយបើខ្ញុំទៅបូកគោ សុំឲ្យបារមីលោកយាយម៉ៅ ទាញចង្កូតឡានឲ្យធ្លាក់ជ្រោះស្លាប់។ តែបើខ្ញុំមិនប្រព្រឹត្តសូមឲ្យអ្នកផ្តល់សក្ខីកម្មក្លែងក្លាយទទួលសម្បថជំនួសខ្ញុំទៅ»។
ចំណែកលោក ឡាយ ណារិទ្ធិ បានឆ្លើយប្រាប់ចៅក្រមដែរថា ចំពោះការលើកឡើងដែលថា នៅមុនថ្ងៃកើតហេតុមានវត្តមានរបស់លោកជិះរថយន្តជាមួយ វណ្ណៈនោះគឺមិនពិតទេព្រោះលោកមិនដែលស្គាល់ផ្ទះ នាង សុវឌ្ឍនា ទេ។ នៅក្រោយថ្ងៃកើតហេតុទម្រាំតែលោករកផ្ទះ ចេវ សុវឌ្ឍនា ឃើញលោកបានសួរគេសួរឯងទើបទៅដល់ផ្ទះនោះ។
បន្ទាប់ពីចៅក្រមសួរដេញដោលមនុស្ស ២ នាក់ហើយបានបន្តសួរ ឈ្មោះ ជឹម វុធ បន្តទៀតដែលឈ្មោះនេះជាប្តីរបស់ស្ត្រីឈ្មោះ ចាន់ រី ដែលពួកគេជាអ្នកបម្រើផ្ទាល់ស្ត្រីរងគ្រោះ សុវឌ្ឍនា។
លោក ជឹម វុធ និយាយថានៅថ្ងៃទី ២២ ខែមករា ឆ្នាំ ២០១៨ លោកបានឃើញលោក វណ្ណៈ និង សម៉ៃ ជិះរថយន្តចូលផ្ទះកើតហេតុហើយក្រោយពីអ្នកទាំង ២ ជិះរថយន្តចេញមកវិញលោកឃើញនាង សុវឌ្ឍនា កាន់កាំបិតបម្រុងអារដៃ តែលោក និងប្រពន្ធរបស់លោកបានទៅឃាត់ហើយនាងបានប្រគល់កាំបិតឲ្យទៅប្រពន្ធរបស់លោក។ តែបន្តិចក្រោយមកលោកបានមើលទៅក្នុងបន្ទប់ដែលស្ត្រីរងគ្រោះគំរាមអារដៃនោះមិនឃើញនាង លោកក៏ឡើងទៅលើផ្ទះសំដៅទៅបន្ទប់ដេករបស់នាងតែទ្វារបន្ទប់បិទជាប់។
លោក ជឹម វុធ បន្តថា ពេលនោះលោកសង្ស័យថា ស្ត្រីរងគ្រោះបានសម្លាប់ខ្លួន ហើយលោកបានព្យាយាមឡើងតាមវេរ៉ង់ដានៅខាងមុខបន្ទប់ហើយក៏យកដៃបើកកញ្ចក់បង្អួច ក៏ស្រាប់តែឃើញនាងចងកសម្លាប់ខ្លួនបាត់ទៅហើយ។ ពេលនោះលោកបានឲ្យប្រពន្ធលោកទូរស័ព្ទប្រាប់លោក ឡាយ វណ្ណៈ ហើយបន្ទាប់មកមានមន្ត្រីនគរបាលម្នាក់ជិះម៉ូតូមកជាមួយឈ្មោះ សម៉ៃ ឡើងទៅធាក់ទ្វារបន្ទប់របើក ប៉ុន្តែសមត្ថកិច្ចមិនឲ្យលោកចូលទៅជិតសាកសពនាងទេ។
ការជំនុំជម្រះនេះក៏មានវត្តមានមន្ត្រីនគរបាលនៃនាយកដ្ឋានព្រហ្មទណ្ឌក្រសួងមហាផ្ទៃ និងមន្ត្រីនៃការិយាល័យព្រហ្មទណ្ឌកម្រិតធ្ងន់ខេត្តតាកែវចូលបង្ហាញខ្លួនក្នុងនាមជាសាក្សីផងដែរ ហើយសវនាការសួរដេញដោលនេះបានបន្តរហូតដល់ពេលរសៀលទៀត។
គួររំឭកថា លោក ឡាយ វណ្ណៈ ត្រូវសាលាដំបូងរាជធានីភ្នំពេញប្រកាសសាលក្រមនៅថ្ងៃទី ២ ខែ កញ្ញា ឆ្នាំ ២០១៩ ផ្តន្ទាទោសដាក់ពន្ធនាគារ ១៣ ឆ្នាំ និងលោក ឡាយ ណារិទ្ធិ ដាក់ពន្ធនាគារ ១០ ឆ្នាំពីបទឃាតកម្មតាមមាត្រា ១៩៩។ ចំណែកអ្នកបើកឡានឲ្យលោក ឡាយ វណ្ណៈ ឈ្មោះ សម៉ៃ និងអ្នកបម្រើម្នាក់ ឈ្មោះ ជឹម វុធ ត្រូវចៅក្រមសម្រេចផ្ដន្ទាទោសដាក់ពន្ធនាគារម្នាក់ ២ ឆ្នាំ ពីបទលាក់បាំងតម្រុយតាមមាត្រា ៥៣២ នៃក្រមព្រហ្មទណ្ឌ៕