ភ្នំពេញៈ ប្រធានសហភាពការងារកម្ពុជា (CLC) នឹងដឹកនាំកម្មកររាប់ពាន់នាក់ទាមទារដំឡើងប្រាក់ខែដល់កម្មករ និងលក្ខខណ្ឌការងារនៅថ្ងៃទិវាពលកម្មអន្តរជាតិដោយមានសហព័ន្ធសហជីពមួយចំនួនទៀតចូលរួមជាមួយផង។
លោក អាត់ ធន់ ប្រធានសហភាពការងារកម្ពុជាបានឲ្យដឹងពីម្សិលមិញថា មានមេដឹកនាំសហជីពចំនួនបួននឹងជួបជុំជាមួយកម្មករជិត២ម៉ឺននាក់ នៅថ្ងៃទី១ ខែឧសភាក្នុងទិវាពលកម្មអន្តរជាតិដើម្បីទាមទារឲ្យមានលក្ខខណ្ឌការងារប្រសើរជាងមុន ជាពិសេសពាក់ព័ន្ធនឹងប្រាក់ឈ្នួលតែម្ដង។
លោក ថ្លែងថា៖«យើងនឹងដាក់ញត្តិទៅរាជរដ្ឋាភិបាលជំរុញឲ្យចាត់វិធានការម្ដងទៀតអំពីប្រាក់ឈ្នួលកម្មករ និងអញ្ជើញតំណាងរាស្រ្តឲ្យចូលរួមជាមួយពួកយើងដែរដើម្បីបានដឹងថា តើអ្វីជាការសន្យារបស់ពួកគេចំពោះកម្មករនៅពេលឈ្នះឆ្នោត»។
លោក អាត់ ធន់ លើកឡើងថា សហជីពដែលចូលរួមជាមួយលោកមាន លោក រ៉ុង ឈុន ប្រធានសហភាពសហជីពកម្ពុជា (CCU) អ្នកនាង ម៉ម ញឹម ប្រធានសហព័ន្ធសហជីពជាតិនៃឧស្សាហកម្មវាយនភ័ណ្ឌកាត់ដេរកម្ពុជា (NIFTUC) និងលោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ(CUMW)។
លោក អាត់ ធន់ បញ្ជាក់ថា៖«យើងប្រារព្ធទិវាពលកម្មអន្តរជាតិនៅឆ្នាំនេះ មានលក្ខណៈខុសប្លែកពីឆ្នាំមុនៗព្រោះយើងនឹងជួបប្រជុំគ្នាជាមួយសហព័ន្ធសហជីពផ្សេងទៀតជា«សំឡេង តែមួយ»ដើម្បីដាក់ញត្តិទៅរដ្ឋាភិបាលឲ្យដោះស្រាយប្រាក់ឈ្នួលនិងលក្ខខណ្ឌការងារដល់កម្មករ។ យើងសូមរក្សាការទាមទារចំនួន១០០ដុល្លារដដែល»។
លោក អាត់ ធន់ បន្តថា វាមិនមែនជាកូដកម្មធំដែលលោកបានគំរាមធ្វើនោះទេ តែវាជាការចាប់ផ្ដើមដំបូងនៃការទាមទារ។
លោកបន្តថា៖«នេះគ្រាន់តែជាការកម្តៅសាច់ដុំ តែយើងនឹងធ្វើកូដកម្មធំបើសិនមិនទទួលបានអ្វីសោះទេ»។
សហភាពការងារកម្ពុជា បានដាក់លិខិតទៅសាលារាជធានីដើម្បីជូនដំណឹងនិងសុំការអនុញ្ញាតជួបជុំគ្នានៅពហុកីឡដ្ឋានជាតិអូឡាំពិកមុននឹងហែក្បួនតាមផ្លូវព្រះសីហនុឆ្ពោះមករដ្ឋសភាតែមន្ត្រីសាលារាជធានីមិនទាន់ឆ្លើយតបនៅឡើយទេ។
លោក អាត់ ធន់ អះអាងថា ពួកគេនឹងនៅបន្តធ្វើបើទោះសាលារាជធានីបដិសេធសំណើរបស់ខ្លួនក៏ដោយ។ មន្ត្រីសាលារាជធានី មិនអាចទាក់ទងសុំការអធិប្បាយបានទេកាលពីម្សិលមិញ។
គណៈកម្មការប្រឹក្សាការងារនៃក្រសួងការងារបានចុះហត្ថលេខាដំឡើងប្រាក់ខែអប្បបរមាថ្មីកាលពីខែមុនដល់កម្មករគឺឡើងពី៦១ដុល្លារទៅ៨០ដុល្លារក្នុងមួយខែដែលប្រាក់ឈ្នួលនេះនឹងចូលជាធរមាននៅខែឧសភានេះ៕ PN
