The Phnom Penh Post Search

Search form

Logo of Phnom Penh Post newspaper Phnom Penh Post - លោក អាត់ ធន់ ប្តឹង​ថា​បាន​រង​ការ​គំរាម​សម្លាប់

លោក អាត់ ធន់ ប្តឹង​ថា​បាន​រង​ការ​គំរាម​សម្លាប់

លោក អាត់ ធន់ ប្តឹង​ថា​បាន​រង​ការ​គំរាម​សម្លាប់

131106_06b
លោក អាត់ ធន់ ប្រធានស៊ីខៅឌូ ហុង មិនា

ភ្នំពេញៈ ប្រធាន​សហជីព ស៊ីខៅឌូ ដែល​តំណាង​ឲ្យ​កម្មករ​ភាគ​ច្រើន​នៅ​រោងចក្រ SL បាន​ដាក់​បណ្តឹង​កាល​ពី​ម្សិលមិញ ដោយ​សារ​ថា បាន​រង​ការ​គំរាម​ធ្វើ​ឃាត​ជាច្រើន​លើក។

នៅ​ក្នុង​បណ្តឹង ដែល​ដាក់​ទៅ​រដ្ឋ​មន្រ្តី​ក្រសួង មហាផ្ទៃ លោក ស ខេង ពី​ម្សិលមិញ លោក អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា ហៅ​កាត់ ស៊ីខៅឌូ បាន​ឲ្យ​ដឹង​ថា បុរស​មិន​ស្គាល់​អត្ត​សញ្ញាណ ម្នាក់​បាន​ទូរស័ព្ទ​មក​គាត់​ជាច្រើន​លើក ហើយ​ព្រមាន​ថា មន្រ្តី​ពី​រោងចក្រ អេសអិល នឹង​សម្លាប់​លោក និង​មន្រ្តី​សហជីព ស៊ីខៅឌូ ដទៃៗ​ទៀត។

នៅ​ក្នុង​បណ្តឹង​នោះ​ឲ្យ​ដឹង​ថា៖ «បន្ទាប់​ពី​គាត់​ទូរស័ព្ទ​មក​ខ្ញុំ គាត់​បាន​ទូរស័ព្ទ​ទៅ​គំរាម​សហការី​ពីរ​នាក់​ទៀត​ដែល​នេះ​បាន​បណ្តាល​ឲ្យ​ពួក​គេ​បារម្ភ​អំពី​សន្តិសុខ​របស់​ខ្លួន។ ខ្ញុំ​មាន​ការ​បារម្ភ អំពី​សន្តិសុខ និង​សុវត្ថិភាព​របស់​ខ្ញុំ​ណាស់ ខ្ញុំ​ចង់​ឲ្យ​មាន​ការ​ចាត់​វិធានការ​ការពារ​សន្តិសុខ​ដល់​យើង និង​ធ្វើ​ការ​ស៊ើប​អង្កេត​ចាប់​ខ្លួន​ជន​សង្ស័យ»។

នៅ​ពេល​ទាក់​ទង​តាម​ទូរស័ព្ទ កាល​ពី​ម្សិលមិញ លោក អាត់ ធន់ លោក​មិន​ចង់​និយាយ​ជា​សាធារណៈ​អំពី​ការ​គំរាម​ធ្វើ​ឃាត​នេះ​ទេ ពីព្រោះ​លោក​កំពុង​រង់ចាំ​ភ័ស្តុតាង​រឹងមាំ​ពី​ការ​ស៊ើប​អង្កេត​របស់​នគរបាល។

ទោះ​យ៉ាង​ណា​ក្តី លោក អាត់ ធន់ បាន​អះអាង​ឲ្យ​ដឹង​ទៀត​ថា លោក​ពិត​ជា​បាន​ទទួល​រង​ការ​គំរាម​ធ្វើ​ឃាត​ជាច្រើន​លើក​មក​ហើយ ហើយ​លោក​សង្ស័យ​ថា វា​ពាក់​ព័ន្ធ​នឹង​បញ្ហា​កូដកម្ម​កម្មករ​រោងចក្រ SL ដែល​ដឹក​នាំ​ដោយ សហជីព ស៊ីខៅឌូ អស់​រយៈ​ពេល​ជិត ៣ខែ។

ក្នុង​បទ​សម្ភាស​កាល​ពី​យប់​មិញ​លោក អាត់ ធន់ ថ្លែង​ថា៖ «កាល​ពី​មុន​ការ​ធ្វើ​កូដកម្ម យើង​មិន​ដែល​ប្តឹង​អំពី​បញ្ហា​នេះ​ទេ»។

កម្មករ​រោងចក្រ អេសអិល បាន​ចាប់​ផ្តើម​ដើរ​ចេញ​ពី​ការងារ​កាល​ពី​ខែ សីហា បន្ទាប់​ពី​ម្ចាស់​ភាគ​ហ៊ុន​រោងចក្រ អេសអិល លោក មាស សុថា បាន​ជួល​មន្រ្តី​កង​រាជ​អាវុធហត្ថ​ឈរ​យាម​នៅ​ក្នុង​រោងចក្រ។ ការ​ជជែក​គ្នា​រវាង​សហជីព ស៊ីខៅឌូ និង​រោងចក្រ អេសអិល រួម​ជាមួយ​មន្រ្តី​រដ្ឋាភិបាល​រហូត​មក​ដល់​ពេល​នេះ​មិន​ទទួល​បាន​ផ្លែ​ផ្កា​នៅ​ឡើយ៕ PS

អត្ថបទគួរចាប់អារម្មណ៍