The Phnom Penh Post Search

Search form

Logo of Phnom Penh Post newspaper Phnom Penh Post - លោក អាំង មាលតី ជាប់​ទោស​ត្រឹម​រយៈពេល ២ ឆ្នាំ




លោក អាំង មាលតី ជាប់​ទោស​ត្រឹម​រយៈពេល ២ ឆ្នាំ

លោក អាំង មាលតី នៅ​សាលា​ដំបូង​ខេត្ដ​កណ្ដាល​កន្លង​មក។
លោក អាំង មាលតី នៅ​សាលា​ដំបូង​ខេត្ដ​កណ្ដាល​កន្លង​មក។ ហេង ជីវ័ន

លោក អាំង មាលតី ជាប់​ទោស​ត្រឹម​រយៈពេល ២ ឆ្នាំ

កណ្ដាលៈ សាលា​ដំបូង​ខេត្ត​កណ្តាល​កាលពី​ថ្ងៃ​សុក្រ​បាន​កាត់​ទោស​​​អតីត​ប្រធាន​សាលា​ដំបូង​រាជធានី​ភ្នំពេញ​លោក អាំង មាលតី ឲ្យ​ជាប់​ពន្ធនាគារ​​រយៈពេល​បី​ឆ្នាំ​ដោយ​ព្យួរ​​ទោស​មួយ​ឆ្នាំ​​​ចំពោះ​ការ​ប្រើ​ប្រាស់​ផ្ទាល់​ខ្លួន​នូវ​រថយន្ត Audi SUV ដែល​រឹបអូស​ពី​ឈ្មួញ​ជួញដូរ​គ្រឿងញៀន​។

អនុប្រធាន​​ចៅក្រម​សាលា​ដំបូង​ខេត្ត​​កណ្តាល​លោក ងួន វុទ្ធី បាន​កាត់​ទោស​អតីត​ចៅក្រម​រូប​នេះ​បន្ទាប់​ពី​ផ្លាស់ប្តូរ​ពី​បទ​កិបកេង​ទៅ​ជា​​បទ​ «​កេង​ប្រវ័ញ្ច​ខុស​ច្បាប់​​» តាម​ការ​ស្នើសុំ​របស់​​ព្រះរាជ​អាជ្ញា​ក្នុង​សំណុំ​រឿង​នេះ​នា​អំឡុង​សវនាការ​កាលពី​ខែ​មុន​។

លោក វុទ្ធី បាន​ព្យួរ​ទោស​លោក អាំង មាលតី មួយ​ឆ្នាំ និង​ពិន័យ​ជា​ប្រាក់​ប្រមាណ​​ ១២៥០ ​ដុល្លារ​ដោយសារ​កត់សម្គាល់​នូវ​ការ​ «សារភាព» របស់​គាត់​ហើយ​រថយន្ត​​ Audi ស្ថិត​នៅក្នុង​ស្ថានភាព​ល្អ​ដដែល​។

លោក វុទ្ធី បាន​ថ្លែង​បន្ត​ថា​៖ «​ក្នុង​អំឡុង​ការ​ស៊ើបអង្កេត​ចុង​ចោទ​បាន​សារភាព​ថា​គាត់​បាន​ប្រើប្រាស់​រថយន្ត​ Audi សម្រាប់​សុវត្ថិភាព​ផ្ទាល់​របស់​គាត់​ហើយ​ទទួល​ស្គាល់​ថា​វា​ជា​កំហុស​​ដែល​ប្រើប្រាស់​រថយន្ត​នោះ​ប៉ុន្តែ​គាត់​បាន​ប្រគល់​រថយន្ត​នោះ​ទៅ​សាលា​ដំបូង​រាជធានី​ភ្នំពេញ​វិញ​ហើយ​រថយន្ត​ Audi ​មិន​ខូច​អ្វី​ទេ​»។

លោក វុទ្ធី បាន​ថ្លែង​បន្ត​ថា​លោក មាលតី ដែល​បាន​អះអាង​អំឡុង​ផ្តល់​សក្ខីកម្ម​ថា​គាត់​បាន​បើក​រថយន្ត​ Audi ដោយសារ​គាត់​ត្រូវ​ការ​ផ្លាស់ប្តូរ​រថយន្ត​ជា​ទៀងទាត់​ដើម្បី​ការពារ​សុវត្ថិភាព​ផ្ទាល់​ខ្លួន​ហើយ​ក៏​បាន​ទទួល​ស្គាល់​ផង​ដែរ​​ថា​រថយន្ត​​​រឹបអូស​ពី​ឈ្មួញ​ជួញដូរ​គ្រឿងញៀន​ដែល​ធ្លាប់​ជា​មន្រ្តី​នគរបាល​ឈ្មោះ ថាវ ថាវី មិន​ត្រូវ​បាន​ចុះ​បញ្ជី​សមស្រប​នៅក្នុង​សៀវភៅ​ភ័ស្តុតាង​​របស់​តុលាការ​ទេ។

លោក អាំង មាលតី ដែល​ស្លៀក​សម្លៀកបំពាក់​ពន្ធនាគារ​​​ពណ៌​ទឹកក្រូច​​ និង​ពាក់​ម៉ាស់​ពណ៌​ស​អម​​ដោយ​​ឆ្មាំ​សន្តិសុខ​ចូល​តុលាការ​មាន​លក្ខណៈ​ស្ងៀមស្ងាត់​។

ចំណែក​មេធាវី​ការពារ​ក្តី​របស់​គាត់ ទេព បញ្ញា បាន​ឆ្លើយតប​តែ​បន្តិច​បន្តួច​ប៉ុណ្ណោះ​។

បញ្ញា បាន​ថ្លែង​ថា​៖ «​​ក្នុង​នាម​ជា​មេធាវី​ការពារ​ក្តី​ខ្ញុំ​មិន​អាច​និយាយ​ជំនួស​គាត់​លើ​បញ្ហា​នេះ​បាន​ទេ​។ ​ខ្ញុំ​នឹង​ពិភាក្សា​ជាមួយ​គាត់​នៅ​ពេល​ក្រោយ​​ថា​តើ​គាត់​នឹង​ចង់​ប្តឹង​ឧទ្ធរណ៍​ឬ​អត់​»។

នៅក្នុង​របាយការណ៍​ដែល​អាន​នៅ​ក្នុង​អំឡុង​សវនាការ​ ថាវី បាន​សារភាព​ថា​បាន​ផ្តល់​រថយន្ត​ Audi ទៅ​លោក មាលតី ដើម្បី​នៅ​ក្រៅ​ឃុំ​។

ករណី​ប្រឆាំង​នឹង​លោក មាលតី ​និង​​រឿង​សូកប៉ាន់​របស់​គាត់​ជាមួយ​លោក អាំង មាលតី ត្រូវ​បាន​ធ្វើ​ឡើង​បន្ទាប់​ពី​លោក អាំង មាលតី ត្រូវ​បាន​ដក​ពី​តំណែង​​កាលពី​ខែ​កុម្ភៈ​ឆ្នាំ​ ២០១៥ ខណៈ​ពេល​មាន​ការ​លើក​ឡើង​ដោយ​លោក ហ៊ុន សែន ថា​អតីត​ចៅក្រម​រូប​នេះ​បាន​ទទួល​យក​សំណូក​យ៉ាង​​ច្រើន​ដើម្បី​ដោះលែង​ឪពុក​ម្តាយ​ ថោង សារ៉ាត់ ជា​ឧកញ៉ា​ម្នាក់​ដែល​ត្រូវ​បាន​ចោទប្រកាន់​ពី​បទ​ឃាតកម្ម​។

វា​ទំនង​ជា​ថា​លោក មាលតី នឹង​មិន​​ប្រឈម​មុខ​​ចំណាត់ការ​អ្វី​លើ​ករណី​ដោះ​លែង​ឪពុក​ម្តាយ ថោង សារ៉ាត់ ទេ​ខណៈ​ប្រធាន​អង្គភាព​ប្រឆាំង​អំពើ​ពុករលួយ​លោក ឱម យ៉ិនទៀង បាន​ថ្លែង​ថា​បើ​ទោះបី​ជា​លោក មាលតី បញ្ជា​ឲ្យ​មាន​ការ​ដោះលែង​អ្នក​ទាំង​ពីរ​​នាក់​នោះ​ក៏ដោយ​ក៏​កំហុស​ភាគច្រើន​បំផុត​ដោយ​សារ​ជំនួយការ​របស់​លោក មាលតី ដែល​ជា​អ្នក​ផ្តើម​​ឲ្យ​មាន​រឿង​នេះ​។ ​ប្តី​ប្រពន្ធ​ពីរ​នាក់​នេះ​ត្រូវ​បាន​ចាប់​ខ្លួន​ឡើង​វិញ​នៅ​ពេល​កំពុង​ព្យាយាម​រត់​គេច​ខ្លួន​ទៅ​បរទេស​។

លោក ឱម យ៉ិនទៀង ដែល​បដិសេធ​ថា​មិន​​មាន​ទំនាក់​ទំនង​ជិតស្និទ្ធ​ជាមួយ​លោក មាលតី បាន​បដិសេធ​ធ្វើ​អត្ថាធិប្បាយ​កាលពី​​ថ្ងៃ​សុក្រ​៕ PS

អត្ថបទគួរចាប់អារម្មណ៍