ស្វាយរៀង: អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី នៅថ្ងៃទី ១១ ខែឧសភា នេះ បានច្រានចោលការផ្សាយព័ត៌មានមួយដែលចោទប្រកាន់ទៅលើមន្ត្រីកងរាជអាវុធហត្ថខេត្តស្វាយរៀងជំរិតទារប្រាក់ ពីការបង្ក្រាបរថយន្តដឹកជញ្ជូនធ្យូងខុសច្បាប់ចំនួន ៧ គ្រឿង នៅភូមិបុស្សមន ឃុំបុស្សមន ស្រុករំដួល កាលពីថ្ងៃទី ១៣ ខែមេសា ខណៈរថយន្តទាំងនេះបម្រុងឆ្លងដែនទៅលក់នៅវៀតណាម។
លោក អេង ហ៊ី បានឲ្យដឹងនៅថ្ងៃទី ១១ ខែឧសភា ថា មន្ត្រីកងរាជអាវុធហត្ថខេត្តស្វាយរៀងកាលពីថ្ងៃទី ១៣ ខែមេសា កន្លងទៅនេះ បានឃាត់រថយន្តចំនួន ៧ គ្រឿង ដែលមានដឹកធ្យូងសរុបចំនួន ១ ៣៨៩ បាវ ដែលមានទម្ងន់សរុបចំនួន ជាង ៥៦ តោន ពិតប្រាកដមែន ដោយសារដឹកជញ្ជូនផល អនុផលព្រៃឈើ ដោយគ្មានលិខិតអនុញ្ញាតពីរដ្ឋបាលព្រៃឈើដែលជាអំពើល្មើសនឹងមាត្រា ៦៩ កថាខណ្ឌ ១ និងកថាខណ្ឌ ៤ នៃច្បាប់ស្តីពីព្រៃឈើ។
ដោយអនុលោមតាមមាត្រា ៧៨ នៃច្បាប់ស្តីពីព្រៃឈើ កងរាជអាវុធហត្ថខេត្តស្វាយរៀង ក៏អាចឃាត់ខ្លួនជនប្រព្រឹត្តល្មើស និងចាប់ឃាត់វត្ថុតាងបទល្មើសជាបណ្តោះអាសន្ន រួចបញ្ជូនទៅមន្ត្រីរដ្ឋបាលព្រៃឈើ ដើម្បីចាត់ការតាមនីតិវិធីបានដែរ។
លោកបន្តថា មន្ត្រីកងរាជអាវុធហត្ថខេត្តស្វាយរៀង បានប្រគល់វត្ថុតាង និងសំណុំរឿងជូនលោក នេត គក នាយផ្នែករដ្ឋបាលព្រៃឈើរមាសហែក នៅថ្ងៃទី ១៣ ខែ មេសា ឆ្នាំ ២០២០ ប៉ុន្តែដោយសារនៅផ្នែករដ្ឋបាលព្រៃឈើរមាសហែក ទីតាំងចង្អៀតមិនមានកន្លែងរក្សាទុក ក៏សុំរក្សាទុកបណ្តោះអាសន្ននៅបញ្ជាការដ្ឋានកងរាជអាវុធហត្ថខេត្តស្វាយរៀង។
លោកបន្ថែមថា ធ្យូងទាំងអស់សរុបចំនួនជាង ៥៦តោនដែលបម្រុងដឹកជញ្ជូនយកទៅលក់នៅប្រទេសវៀតណាមនោះ មិនមែនជាករណីតូចតាចដូចការផ្សាយរបស់សារព័ត៌មានអនឡាញ «LSN.TV នាទីកំសាន្ត»ផ្សាយនោះទេ។ លើសពីនេះសារព័ត៌មានបានផ្សាយថា «មន្ត្រីកងរាជអាវុធហត្ថខេត្តស្វាយរៀងឃាត់រថយន្តដឹកធ្យូង និងចោទពីបទល្មើសខុសច្បាប់ និងផាកពិន័យម្នាក់ជាង ១០ លានរៀល ហើយមិនឲ្យយកឡានទៅផ្ទះទេ សូមបងប្អូនជួយស៊ែរផង»។
ដោយការលើកឡើងនេះ លោក អេង ហ៊ី ឲ្យដឹងថា កងរាជអាវុធហត្ថខេត្តស្វាយរៀង មិនមានសមត្ថកិច្ចចោទ ឬប្រមូលប្រាក់ពិន័យ ឬប្រគល់វត្ថុតាងជូនម្ចាស់ដើមវិញទេ គឺជាសមត្ថកិច្ចរបស់រដ្ឋបាលព្រៃឈើ និងតុលាការ។
លោកបានស្នើឲ្យសារព័ត៌មានអនឡាញ “LSN.TV នាទីកំសាន្ត” ធ្វើការកែតម្រូវ ដោយយកសេចក្តីប្រកាសព័ត៌មាននេះទៅធ្វើការផ្សព្វផ្សាយលើព័ត៌មានអនឡាញ “LSN.TV នាទីកំសាន្ត” ឡើងវិញ ប៉ុន្ដែក្នុងករណីមិនមានការកែតម្រូវនោះមន្ត្រីនឹងធ្វើពាក្យបណ្តឹងប្តឹងទៅក្រសួងព័ត៌មាន និងតុលាការតាមនីតិវិធីដូចមានចែងក្នុងច្បាប់ស្តីពីសារព័ត៌មាន។
លោក ថាច់ រតនា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀងពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទលោកគ្មានអ្នកទទួល។
លោក គល់ សុវណ្ណ នាយខណ្ឌរដ្ឋបាលព្រៃឈើខេត្តស្វាយរៀងពីម្សិលមិញបានបដិសេធការធ្វើអត្ថាធិប្បាយជុំវិញករណីនេះ ដោយលោកបានចុចផ្ដាច់ទូរស័ព្ទវិញ។
លោក លួស សេង ចាងហ្វាងសារព័ត៌មានអនឡាញ LSN.TV នាទីកំសាន្ត ពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយលោកបានបិទទូរស័ព្ទ។
ប៉ុន្ដែអ្នកសារព័ត៌មានរបស់គេហៈទំព័រ LSN.TV នាទីកំសាន្ត កាលពីថ្ងៃទី ១១ ខែឧសភា នេះ បានធ្វើការសម្ភាសជាមួយម្ចាស់រថយន្តដឹកធ្យូងដែលត្រូវបានសមត្ថកិច្ចឃាត់ម្នាក់ក្នុងចំណោម ៧ នាក់ថា រថយន្តដឹកធ្យូងរបស់ពួកលោកចំនួន ៧ គ្រឿង ត្រូវបានកងរាជអាវុធហត្ថខេត្តស្វាយរៀងឃាត់ ក្នុងអំឡុងពេលដឹកធ្យូងយកទៅលក់នៅវៀតណាម។
លោកបន្តថា សមត្ថកិច្ចបានឃាត់រថយន្តទាំង ៧ គ្រឿង ដោយបានសួររកលិខិតអនុញ្ញាត ឬលិខិតអាជីវកម្មធ្យូង ប៉ុន្ដែពួកលោកមិនបានដឹងថា ការដឹកជញ្ជូនធ្យូងត្រូវមានលិខិតនោះទេ។ លោកបានព្យាយាមសម្របសម្រួលជាមួយសមត្ថកិច្ច ប៉ុន្ដែសមត្ថកិច្ចបានបញ្ជូនសមណុំរឿងទៅរដ្ឋបាលព្រៃឈើ និងតុលាការ តុលាការបានតម្រូវឲ្យពួកលោកបង់ប្រាក់ពិន័យជាង ១០ លានរៀល ហើយនៅតែមិនទាន់ប្រគល់រថយន្តឲ្យពួកលោកវិញដែរ។
លោកបញ្ជាក់ថា៖ «ពួកខ្ញុំជាប្រជាពលរដ្ឋក្រីក្រ រកស៊ីលក់ធ្យូងតិចតួច ហើយឡាននេះ ពួកខ្ញុំបានខ្ចីលុយពីធនាគារមកទិញដើម្បីរកស៊ី ប៉ុន្ដែលោកសត្ថកិច្ចចាប់ឡានខ្ញុំបែបនេះ តើខ្ញុំបានលុយពីណា បង់សង់ធនាគារវិញ។ ទោះពួកខ្ញុំខំនិយាយសម្របសម្រួលយ៉ាងណា ក៏មន្ត្រីមិនព្រមអនុគ្រោះឲ្យពួកខ្ញុំដែរ»៕