ភ្នំពេញៈ លោក អេង ហ៊ី ស្នងការនៃស្នងការដ្ឋានទំនាក់ទំនងកិច្ចការសាធារណៈ និងជាអ្នកនាំពាក្យកងរាជអាវុធហត្ថលើផ្ទៃប្រទេសបានអះអាងថា ការផ្សព្វផ្សាយអប់រំចិត្តសាស្ត្រដល់កងរាជអាវុធហត្ថជាប្រចាំគឺជាការដាស់តឿនកម្លាំងស្មារតីក្នុងការបំពេញការងារប្រកបដោយគុណតម្លៃ និងប្រសិទ្ធភាព។
កាលពីព្រឹកថ្ងៃទី ២៩ ខែកក្កដាឆ្នាំនេះ លោក អេង ហ៊ី បានដឹកនាំប្រជុំមួយតាម Video Conference ស្តីពីការផ្សព្វផ្សាយការងារអប់រំចិត្តសាស្ត្ររបស់កងរាជអាវុធហត្ថ ដោយមានការចូលរួមពីស្នងការរង នាយ នាយរងការិយាល័យ និងមេបញ្ជាការរងមូលដ្ឋានកងរាជអាវុធហត្ថមកពីខណ្ឌទាំង ១៤ ក្នុងរាជធានីភ្នំពេញ។
លោក អេង ហ៊ី បានប្រាប់ភ្នំពេញប៉ុស្តិ៍ពីថ្ងៃម្សិលមិញថា ក្នុង ១ ឆ្នាំៗ កងរាជអាវុធហត្ថតែងអប់រំចិត្តសាស្ត្រដល់កងរាជអាវុធហត្ថជាបន្តបន្ទាប់ដូចជាប្រចាំខែ ត្រីមាស និងឆមាស ពិសេសពេលកើតហេតុការណ៍ថ្មីៗ ដូចជា ករណីផ្ទុះជំងឺកូវីដ១៩នេះជាដើម គឺត្រូវតែរៀបចំវគ្គអប់រំចិត្តសាស្ត្រនេះបន្ថែម។
លោកបន្តថា ការអប់រំចិត្តសាស្ត្រនេះគឺសំដៅពង្រឹងឆន្ទៈ ការទទួលខុសត្រូវឲ្យមានស្មារតីហ្នឹងនរ និងបង្កើតការបម្រើការពារពលរដ្ឋ ដោយបញ្ជ្រាបនូវចំណេះដឹងថ្មីៗពាក់ព័ន្ធនឹងការវិវត្តរបស់ពិភពលោកក៏ដូចជាក្នុងប្រទេស។
លោកថា៖ «យើងឃើញថា ក្រោយពីយើងបានផ្សព្វផ្សាយជាប្រចាំគឺពួកគាត់ មានការយល់ដឹង និងធ្វើការងារមិនសូវខុស។ គាត់យល់អំពីច្បាប់យល់អំពីក្រមសីលធម៌វិជ្ជាជីវៈរបស់គាត់។ យើងឃើញថា ទោះបីមានការអប់រំយ៉ាងណា ក៏ឃើញមានបុគ្គលមួយចំនួនតូច គាត់នៅតែបន្តធ្វើខុស។ ប៉ុន្តែកងរាជអាវុធហត្ថ គឺមិនបណ្តែតបណ្តាយឲ្យបុគ្គលនោះធ្វើខុស ដោយយថាហេតុ ឬចេតនានោះទេគឺត្រូវមានការត្រួតពិនិត្យជាប់ជានិច្ច»។
លោក អេង ហ៊ី បានបន្តថា ក្នុងដំណាក់កាលនេះកម្លាំងកងរាជអាវុធហត្ថមិនត្រឹមតែការពារសុខសុវត្ថិភាពរបស់ពលរដ្ឋទេ តែក៏ត្រូវយកចិត្តទុកដាក់ពីសុខភាពផ្ទាល់ខ្លួនតាមការណែនាំរបស់ក្រសួងសុខាភិបាលដើម្បីចៀសវាងការឆ្លងជំងឺកូវីដ១៩ ផងដែរ។
លោកបានបញ្ជាក់ថា៖ «យើងបណ្តុះបណ្តាលពួកគាត់ឲ្យយកចំណេះដឹងទាំងនេះបន្តទៅមន្ត្រីថ្នាក់ក្រោមរហូតទូទាំងប្រទេស»។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាពីម្សិលមិញបានសាទរចំពោះកម្មវិធីអប់រំចិត្តដល់កម្លាំងកងរាជអាវុធហត្ថដោយលោកលើកទឹកចិត្តធ្វើឲ្យបានញឹកញាប់កាន់តែល្អ ព្រោះថាកម្លាំងកងរាជអាវុធហត្ថ គឺជាផ្នែកមួយចូលរួមការពារសន្តិសុខសុវត្ថិភាព សម្រាប់សង្គមជាតិទាំងមូល។
លោកបន្តថាមួយវិញទៀតកងរាជអាវុធហត្ថក៏ជាបុគ្គលដែលធ្វើការជាមួយមនុស្សទូទៅដែរ ដែលចាំបាច់ត្រូវមានការយល់ដឹងអំពីផ្នែកចិត្តសាស្ត្រ ការអប់រំចិត្តរបស់ពួកគាត់។ កម្លាំងសមត្ថកិច្ចដែលមានក្រមសីលធម៌ខ្ពស់ទើបអាចបំពេញភារកិច្ចមានប្រសិទ្ធភាពខ្ពស់។
លោកបញ្ជាក់ថា៖ «ខ្ញុំលើកទឹកចិត្តឲ្យកម្លាំងសមត្ថកិច្ចរបស់យើងហ្នឹងរៀនសូត្រអំពីការអប់រំពីសមាធិ និងអំពីការគោរពសិទ្ធិមនុស្ស លទ្ធិប្រជាធិបតេយ្យហ្នឹងឲ្យបានជ្រៅជ្រះ ដើម្បីពួកគាត់ក្លាយជាកងកម្លាំងមួយដែលជួយប្រជាជនចៀសវាងអំពើទាំងឡាយណាដែលបង្កនូវចរិត ឃោរឃៅ ឬក៏ជ្រុលនិយមក្នុងការបំពេញភារកិច្ច»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា បានលើកឡើងដែរថា ដើម្បីបានមន្ត្រីកងរាជអាវុធហត្ថម្នាក់ដែលល្អគឺត្រូវឆ្លងកាត់ការអប់រំលក្ខណសម្បត្តិ និងដំណើរការនៃការជ្រើសរើសជាច្រើនដំណាក់កាល។ ការបណ្តុះបណ្តាលនេះគឺដើម្បីពង្រឹងចិត្តគំនិតរបស់កងកម្លាំងឲ្យមានភាពរឹងមាំ ទាំងកម្លាំងចិត្ត និងកម្លាំងកាយជាងជនទូទៅ។
ជាគំនិតត្រូវគិតពិចារណាលោក សន ជ័យ ចង់ឲ្យមានការបំបួសកងកម្លាំងប្រដាប់អាវុធរយៈពេលខ្លីមុនចូលធ្វើការដើម្បីអប់រំចិត្តគំនិតរបស់ពួកគេឲ្យក្លាយខ្លួនជាអ្នកការពារសង្គមជាតិ និងប្រណិប័តន៍តាមផ្លូវមួយដែលល្អ។
លោកថា៖ «ការធ្វើបែបនេះគឺជាគំរូដ៏ល្អសម្រាប់គ្រួសាររហូតដល់ទៅសង្គម ការទទួលស្គាល់របស់មហាជននូវតម្លៃរបស់កងកម្លាំងប្រដាប់អាវុធដែលរួមមាន កងរាជអាវុធហត្ថជាដើមនេះគឺជាតម្លៃមួយដែលសង្គមកម្ពុជាចង់បាន។ យើងចង់ឃើញតាំងពីឥរិយាបថ និយាយស្តី ការអនុវត្តតួនាទីនៅទីសាធារណៈក៏ដូចជាទំនាក់ទំនងក្នុងសង្គមផងដែរ»៕