.jpg)
លោក អោ អាន អតីតមេខ្មែរក្រហមកាលនៅមានជីវិត។ រូបថត DC-CAM
ភ្នំពេញៈ លោក អោ អាន ដែលជាជនសង្ស័យក្នុងសំណុំរឿង ០០៤/០២ នៃសាលាក្ដីកាត់ទោសមេដឹកនាំខ្មែរក្រហមបានទទួលមរណភាពហើយកាលពីថ្ងៃទី ៦ ខែវិច្ឆិកា នៅខេត្តបាត់ដំបង។ នេះបើតាមការបញ្ជាក់របស់លោក នេត្រ ភត្រា អ្នកនាំពាក្យសាលាក្ដីខ្មែរ-ក្រហម។
លោក ភក្ត្រា ថ្លែងថា សំណុំរឿង ០០៤/០២ ប្រឆាំងនឹង អោ អាន បានបិទបញ្ចប់នៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដែលគេហៅថា សាលាក្ដីកាត់ទោសអតីតមេដឹកនាំខ្មែរ-ក្រហមតាំងពីថ្ងៃទី ១០ ខែសីហា ឆ្នាំ ២០២០។ ចាប់តាំងពីពេលនោះមក អង្គជំនុំជម្រះវិសាមញ្ញក្នុងតុលាការកម្ពុជាលែងមានយុត្តាធិការលើលោក អោ អាន ទៀតហើយ។
លោក អោ អាន ត្រូវបានសហព្រះរាជអាជ្ញាអន្តរជាតិនៃសាលាក្ដីខ្មែរ-ក្រហម ចោទប្រកាន់ពីបទអំពើប្រល័យពូជសាសន៍លើជនជាតិចាមនៅក្នុងខេត្តកំពង់ចាម ឧក្រិដ្ឋកម្មប្រឆាំងមនុស្សជាតិ និងការរំលោភបំពានលើក្រមព្រហ្មទណ្ឌឆ្នាំ ១៩៥៦ គឺអំពើមនុស្សឃាតដោយចេតនា។
លោក នេត្រ ភក្ត្រា បានបញ្ជាក់ថា សាលាក្ដីខ្មែរ-ក្រហមបានបញ្ចប់សំណុំរឿងនេះហើយពីថ្ងៃទី ១០ ខែសីហា។ អង្គជំនុំជម្រះតុលាការកំពូលបានសម្រេចថា ក្នុងករណីដែលពុំមានដីកាបញ្ជូនរឿងទៅជំនុំជម្រះដែលជាក់លាក់ និងអាចអនុវត្តបាននោះ ដូចនេះរឿងក្តីប្រឆាំងនឹង អោ អាន ត្រូវបញ្ចប់នៅចំពោះមុខ អ.វ.ត.ក»។
លោក ឡោ ជុនធី មេធាវី ១ រូប ដែលការពារជនរងគ្រោះបានថ្លែងថា តាមផ្លូវច្បាប់ ប្រសិនបើតុលាការមិនបន្តនីតិវិធីលើជនសង្ស័យទេ ហើយព្រះរាជអាជ្ញាមិនមានការប្ដឹងអ្វីបន្តទៀតទេ រឿងក្ដីត្រូវបានបញ្ចប់។
លោក ឆាង យុ ប្រធានមជ្ឈមណ្ឌលឯកសារកម្ពុជាដែលស្រាវជ្រាវប្រវត្តិសាស្ត្រខ្មែរក្រហមបានថ្លែងថា៖ «មរណភាពរបស់គាត់គួរតែជំរុញឱ្យយើងរួមគ្នា និងបន្តដំណើររបស់យើងតទៅទៀត ដើម្បីរក្សានូវគោលការណ៍សិទ្ធិមនុស្ស និងទប់ស្កាត់អំពើឃោរឃៅដ៏ធំនេះដូចជាឧក្រិដ្ឋកម្មប្រល័យពូជសាសន៍មិនឱ្យត្រឡប់មកវិញ។ វាជាភាពទទួលខុសត្រូវនៃមនុស្សគ្រប់រូប ទាំងរដ្ឋាភិបាលទាំងប្រជាពលរដ្ឋ»។
សូមរំឭកផងដែរថាកាលពី ២ ខែមុន មនុស្សដំបូងដែលត្រូវបានសាលាក្ដីកាត់ទោសមេដឹកនាំខ្មែរ-ក្រហមផ្តន្ទាទោសមុនគេ គឺ កាំង ហ្កេកអ៊ាវ ហៅ ឌុច ក៏បានទទួលមរណភាពដែរ។
ដូច្នេះបច្ចុប្បន្ននេះ អតីតមេដឹកនាំជាន់ខ្ពស់នៃរបបខ្មែរ-ក្រហម អ្នកដែលរស់រានមានជីវិត មានតែ ខៀវ សំផន ដែលជាប្រមុខរដ្ឋសម័យខ្មែរក្រហម តែម្នាក់ប៉ុណ្ណោះដែលកំពុងត្រូវបានឃុំខ្លួននៅមន្ទីរឃុំឃាំងនៃសាលាក្ដីខ្មែរក្រហម៕
