កណ្ដាលៈ នាយនគរបាល នាយនគរបាលរង និងមន្ត្រីនៃស្នងការដ្ឋាននគរបាលខេត្តកណ្ដាលចំនួន ៥០ នាក់ បានផ្ដិតមេដៃរួមគ្នានៅលើពាក្យបណ្ដឹងមួយចោទប្រកាន់លោក អ៊ាវ ចំរើន ស្នងការនគរបាលខេត្តកណ្ដាលពាក់ព័ន្ធរឿងអំពើពុករលួយក្នុងករណីមួយចំនួន និងគ្រួសារនិយម។
យោងតាមពាក្យបណ្ដឹងរបស់មន្ត្រីនគរបាលទាំងនោះដែលបានផ្ដិតមេដៃនៅថ្ងៃទី ១៩ ខែ មេសា ឆ្នាំ ២០១៩ ហើយបានចែកចាយតាមបណ្ដាញព័ត៌មានសង្គមកាលពីម្សិលមិញបានឲ្យដឹងថា លោក អ៊ាវ ចំរើន ត្រូវបានចោទប្រកាន់ពាក់ព័ន្ធក្នុងអំពើពុករលួយដូចជាយកលុយពីការតែងតាំងតួនាទី និងឋានន្តរស័ក្ដិពី ២,០០០-៣,០០០ ដុល្លារសហរដ្ឋអាមេរិក។
លោក ចំរើន ក៏ត្រូវបានចោទប្រកាន់ផងដែររឿងយកលុយពីល្បែងស៊ីសងដូចជាហ្គេម ជល់មាន់ កន្ទុយលេខ លក់ដីរបស់រដ្ឋកេងប្រវ័ញ្ចថវិកាពីផ្នែកមួយៗយ៉ាងហោច ពី ៨០០-៣,០០០ ដុល្លារក្នុង ១ ខែៗ និងបង្កើតគ្រួសារនិយមនៅក្នុងប៉ុស្ដិ៍ច្រកទ្វារជ្រៃធំ និងខ្នាតាំងយូរ។
យោងតាមពាក្យបណ្ដឹងនេះបានឲ្យដឹងថា៖ «យើងខ្ញុំទាំងអស់គ្នា កើតទុក្ខមិនសុខចិត្តអំពីការដឹកនាំរបស់លោកស្នងការដោយប្រើអំណាចផ្តាច់ការ ធ្វើបាបកូនចៅ និងប្រព្រឹត្តអំពើពុករលួយ»។
ក្នុងពាក្យបណ្ដឹងដដែលនេះបានឲ្យដឹងថា មន្ត្រីនគរបាលទាំងនោះបានស្នើដល់លោក ស ខេង រដ្ឋមន្ត្រីក្រសួងមហាផ្ទៃ ឲ្យដកលោក អ៊ាវ ចំរើន ពីស្នងការដ្ឋាននគរបាល ខេត្តកណ្ដាល។
លិខិតដាច់ដោយឡែកមួយទៀតចុះថ្ងៃទី ២២ មេសា របស់ក្រុមប្រឹក្សាឃុំព្រែកអំបិល ដែលដាក់ជូនរដ្ឋមន្ត្រីក្រសួងមហាផ្ទៃដែរនោះ ក៏ស្នើសុំរក្សាតួនាទីនាយប៉ុស្តិ៍ និងនាយប៉ុស្តិ៍រងព្រែកអំបិល ដូចដើមវិញផងដែរ បន្ទាប់ពីពួកគេត្រូវបានតំណែងនិងបញ្ឈរជើងព្រោះតែរងការចោទប្រកាន់ថាមិនមានភាពប្រក្រតីក្នុងការចុះបង្ក្រាបកន្លែងជល់មាន់នៅក្នុងមូលដ្ឋាន កាលពីបុណ្យចូលឆ្នាំនាថ្ងៃទី ១៤ មេសាថ្មីៗនេះ។
លិខិតបញ្ជាក់ថា៖ «នាយប៉ុស្តិ៍ អនុប៉ុស្តិ៍រូបនេះ កាង ឬបើកកន្លែងជល់មាន់ គឺជារឿងមិនពិតនោះឡើយសូមសម្តេចក្រឡាហោម មេត្តាវិនិច្ឆ័យដ៏ខ្ពង់ខ្ពស់ ដើម្បីផ្តល់ភាពយុត្តិធម៌ដល់ពួកគាត់។ បច្ចុប្បន្ននាយប៉ុស្តិ៍ អនុប៉ុស្តិ៍ទាំងនោះត្រូវបានស្នងការនគរបាលខេត្តកណ្តាលដកតួនាទីទាំង ២ និងបញ្ឈរជើងនៅការិយាល័យបុគ្គលិកនៃស្នងការដ្ឋាននគរបាលខេត្តកណ្តាល»។
ភ្នំពេញប៉ុស្តិ៍មិនអាចទាក់ទងមន្ត្រីនគរបាលដែលមានស្នាមផ្ដិតមេដៃនៅក្នុងពាក្យបណ្ដឹងនោះបានទេកាលពីម្សិលមិញ រួមទាំងនាយប៉ុស្តិ៍ និងអនុប៉ុស្តិ៍ព្រែកអំបិលទាំង ២ រូបនោះផង។
លោក អ៊ាវ ចំរើន កាលពីម្សិលមិញបានប្រាប់ភ្នំពេញប៉ុស្តិ៍ថា ការចោទប្រកាន់របស់ក្រុមមន្ត្រីនគរបាលទាំងនោះគ្រាន់តែជាចេតនាបង្ខូចកេរ្តិ៍គេតែប៉ុណ្ណោះ។
លោក ចំរើន បានច្រានចោលផងដែរថា ឈ្មោះដែលផ្តិតមេដៃក្នុងពាក្យបណ្ដឹងនោះ ថាពួកគេមិនមែនជាមន្ត្រីនគរបាល ដូចការអះអាងនោះទេ ហើយតាមដែលលោកដឹង គឺស្នាមមេដៃដែលមានការប្រមូលពីប្រជាពលរដ្ឋមួយចំនួនប៉ុណ្ណោះ។
លោក ចំរើន ថ្លែងថា៖ «ខ្ញុំយល់ថា ពួកគេអាចមានការខឹងសម្បាចំពោះរូបខ្ញុំ បន្ទាប់ពីខ្ញុំបញ្ឈរជើងមន្ត្រី ២ រូបនោះ ក្រោយបើកដៃឲ្យមានភាពអនាធិបតេយ្យនៅក្នុងមូលដ្ឋានរបស់ពួកគេ។ អំពើបែបហ្នឹង (បទល្មើសទាំង ១៦ ករណី) គ្មានអ្នកណាហ៊ានថ្លើមធំហ៊ានធ្វើទង្វើទាំងអស់ហ្នឹងដូចការចោទប្រកាន់នោះទេ ហើយវាមានរឿងមិនប្រក្រតីហើយ»។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់ភ្នំពេញប៉ុស្តិ៍ពីម្សិលមិញថា ខុទ្ទកាល័យរដ្ឋមន្ត្រី មិនទាន់ទទួលបានពាក្យបណ្តឹងទាំងនេះទេ ប៉ុន្តែលោកអះអាងថា ក្រសួងនឹងបើកការស៊ើបអង្កេតជុំវិញពាក្យបណ្តឹងនេះ ដើម្បីចាត់វិធានការតាមផ្លូវច្បាប់។
លោកបញ្ជាក់ថា៖ «ជាធម្មតាឲ្យតែមានពាក្យបណ្តឹងបែបហ្នឹង ហើយមានការទទួលខុសត្រូវច្បាស់លាស់ពីអ្នកប្តឹងអីហ្នឹង សម្តេចក្រឡាហោម គាត់នឹងមិនព្រងើយកន្តើយទេ គាត់តែងតែយកចិត្តទុកដាក់ ដើម្បីចាត់វិធានការស៊ើបអង្កេតជុំវិញពាក្យបណ្តឹងហ្នឹងយ៉ាងណា ដើម្បីចាត់វិធានការ»។
លោក ម៉ែន ប៊ុនរិទ្ធ អគ្គលេខាធិការរង និងជាប្រធាននាយកដ្ឋានកិច្ចការរដ្ឋបាលនៃក្រសួងមហាផ្ទៃ បានបញ្ជាក់ប្រាប់ភ្នំពេញប៉ុស្តិ៍ដែរថា រហូតមកដល់ពេលនេះផ្នែករដ្ឋបាល មិនទាន់ទទួលលិខិតជាផ្លូវការណា ជុំវិញពាក្យបណ្តឹងទាំងនោះទេ។
លោកបន្ថែមថា៖ «ខាងខ្ញុំមិនបានឃើញទេ ខ្ញុំបានសួរ (រដ្ឋបាល) ព្រឹកមិញហើយ មិនមានលិខិតហ្នឹងទេ។ បើឃើញ អ្នកណាទៅហ៊ានទុក គឺនឹងបញ្ជូនទៅលើហើយ រឿងអ៊ីចឹងៗ»។
លោក ព្រាប កុល នាយកប្រតិបត្តិអង្គការតម្លាភាពកម្ពុជា ស្នើឲ្យមានការស៊ើបអង្កេតឲ្យបានហ្មត់ចត់ជុំវិញករណីនេះ ចៀសវាងមានមន្ទិលសង្ស័យ និងដើម្បីរក្សាសុក្រឹតភាព។
លោក ព្រាប កុល បញ្ជាក់ថា៖ «ករណីនេះ គួរតែមានការស៊ើបអង្កេតឱ្យបានហ្មត់ចត់ត្រឹមត្រូវ ដោយស្នងការខេត្តផង និងដោយអង្គភាពប្រឆាំងអំពើពុករលួយផង ដើម្បីធានាភាពសុក្រឹតនៃការពិត»៕