ភ្នំពេញៈ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈជំរុញឲ្យយុវជនងាកមករៀនជំនាញបច្ចេកទេស ដើម្បីបំពេញតម្រូវការទីផ្សារដោយលោកស្នើឲ្យវិទ្យាស្ថាន CDRI ជួយស្រាវជ្រាវរកយន្តការក្នុងការជំរុញលើកទឹកចិត្តឱ្យវិស័យឯកជនងាកមកបើកគ្រឹះស្ថានបច្ចេកទេស (TVET ) ឱ្យបានច្រើន។
ការលើកឡើងនេះបានធ្វើឡើងក្នុងជំនួបរវាងលោក អ៊ិត សំហេង ជាមួយលោក ប៉ិច សុខេម នាយកប្រតិបត្តិវិទ្យាស្ថានបណ្តុះបណ្តាល និងស្រាវជ្រាវ ដើម្បីអភិវឌ្ឍន៍កម្ពុជា (CDRI) កាលពីថ្ងៃទី ៥ ខែឧសភាឆ្នាំ ២០២០ នៅទីស្ដីការក្រសួង។
លោក អ៊ិត សំហេង បានថ្លែងថា CDRI ត្រូវជួយសិក្សាស្រាវជ្រាវរកឱ្យឃើញនូវចំណុចខ្វះខាតក៏ដូចជាការធ្វើយ៉ាងណាឱ្យការអនុវត្តគោលនយោបាយ និងផែនការយុទ្ធសាស្ត្រនានារបស់រាជរដ្ឋាភិបាលដែលបានដាក់ចេញពាក់ព័ន្ធការអភិវឌ្ឍធនធានមនុស្ស។
លោកថា ជាពិសេសនោះក្នុងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈដើម្បីឲ្យកាន់តែឆ្លើយតបបានទៅនឹងតម្រូវការទីផ្សារការងារនាពេលបច្ចុប្បន្ន និងអនាគត។
លោកបន្តថា៖ «ក្រសួងក៏បានខិតខំជំរុញវិស័យនេះ តាមរយៈការពង្រឹងយន្តការរបស់គណៈកម្មាធិការជាតិបណ្តុះបណ្តាល ការពង្រីក និងពង្រឹងយន្តការក្រុមការងារចម្រុះរដ្ឋ ឯកជន និងដៃគូនានា ការបន្តជំរុញការអនុវត្តផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលបច្ចេកទេសវិជ្ជាជីវៈដោយរៀបចំឲ្យមានជាផែនការមេ សំដៅធានាពង្រឹងសមត្ថភាព និងប្រសិទ្ធភាពដល់ការប្រតិបត្តិរបស់វិទ្យាស្ថានទាំង ៣៨ នៅក្រោមឱវាទក្រសួង»។
ជាមួយគ្នានេះផងដែរលោកសង្កត់ធ្ងន់ថា គួរមានយន្តការជំរុញលើកទឹកចិត្តដល់វិស័យឯកជនដែលចង់វិនិយោគលើវិស័យសិក្សាធិការឱ្យងាកមកបើកគ្រឹះស្ថានសិក្សាបណ្ដុះបណ្ដាលបច្ចេកទេស និងវិជ្ជាជីវៈ (TVET) ឱ្យមានចំនួនកាន់តែច្រើនដើម្បីបណ្ដុះបណ្ដាលកម្លាំងពលកម្មជំនាញយកមកបំពេញតម្រូវការទីផ្សារការងារ។
លោកបន្តថា៖ «លើកទឹកចិត្តសិស្សដែលចប់មធ្យមសិក្សាអាចងាកមករៀនចាប់យកជំនាញវិជ្ជាជីវៈណាមួយសិនដើម្បីបានការងារធ្វើហើយបើចង់រៀនបន្តដល់ថ្នាក់បរិញ្ញាបត្រ បរិញ្ញាបត្រជាន់ខ្ពស់ ឬបណ្ឌិតអាចរៀនបន្តបាន»។ លោកបន្តថា បច្ចុប្បន្នទីផ្សារកម្ពុជាមានតម្រូវការកម្លាំងពលកម្មក្នុងវិស័យ TVET យ៉ាងច្រើន ប៉ុន្តែយុវជនបែរជាមិនសូវងាកមកសិក្សាក្នុងវិស័យនេះទៅវិញ។
លោក ប៉ិច សុខេម នាយកប្រតិបត្តិវិទ្យាស្ថាន CDRI បានថ្លែងថាលោកប្រមូលធាតុចូលទាំងអស់ដើម្បីឲ្យវិទ្យាស្ថាន CDRI ដាក់បញ្ចូលក្នុងគម្រោងស្រាវជ្រាវ ដែលក្រសួងការងារ និងបណ្តុះបណ្តាលវិជ្ជាជីវៈយល់ថា មានសារៈសំខាន់ និងជាអាទិភាព។
លោកបន្តថា CDRI ប្ដេជ្ញាចិត្តបន្តកិច្ចសហប្រតិបត្តិការជាមួយក្រសួងការងារ និងបណ្ដុះបណ្ដាលវិជ្ជាជីវៈដើម្បីសម្រេចបានលទ្ធផលនៃការសិក្សាស្រាវជ្រាវខាងមុខទៀត ដើម្បីគាំទ្រលើកម្មវិធីនយោបាយរបស់រាជរដ្ឋាភិបាលក្នុងការលើកកម្ពស់វិស័យ TVET ។
ក្រសួងការងារបានសរសេរបង្ហោះនៅលើហ្វេសប៊ុកកាលពីថ្ងៃអង្គារថា ក្រសួងនេះបានគាំទ្រសកម្មភាពស្រាវជ្រាវរបស់វិទ្យាស្ថាន CDRI នាពេលកន្លងមក ដែលកំពុងបន្តការសិក្សាលើគម្រោងមួយចំនួនពាក់ព័ន្ធការអប់រំ និងបណ្តុះបណ្តាលសម្រាប់ ២ ឆ្នាំខាងមុខដោយក្នុងនោះមានដូចជាការលើកកម្ពស់នវានុវត្តន៍នៃវិស័យអប់រំថ្នាក់ឧត្តមសិក្សានៅកម្ពុជា និងការស្រាវជ្រាវកិច្ចសន្ទនាគោលនយោបាយ និងកម្មវិធីអភិវឌ្ឍន៍សមត្ថភាពក្នុងការអប់រំ និងបណ្តុះបណ្តាលបច្ចេកទេស និងវិជ្ជាជីវៈ៕