ភ្នំពេញៈ លោក អ៊ុំ សំអាន តំណាងរាស្ត្រគណបក្សសង្គ្រោះជាតិបានបន្ទន់ឥរិយាបថស្នើសុំការអធ្យាស្រ័យពីប្រធានរដ្ឋសភា លោក ហេង សំរិន ចំពោះការប្រើពាក្យសម្តីមិនសមរម្យ និងបញ្ចប់គម្រោងប្តឹងប្ដល់គ្នា ប៉ុន្តែលោកនៅតែរក្សាជំហរមិនខ្លាចក្នុងការបន្តរិះគន់បញ្ហាព្រំដែនកម្ពុជា-វៀតណាម។
ក្នុងលិខិតស្នើការអធ្យាស្រ័យចុះថ្ងៃ ២៤ កក្កដារបស់តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ផ្ញើទៅកាន់ប្រធានរដ្ឋសភា លោក ហេង សំរិន បានលើកឡើងថាលោកបានប្រើពាក្យសម្តីមិនសមរម្យទៅលើ លោក ហេង សំរិន តាមរយៈបណ្តាញព័ត៌មានសង្គម។
លិខិតបន្តថារាល់អាកប្បកិរិយា និងពាក្យសម្តីខុសឆ្គងរបស់លោកកន្លងមកលោកថាពិតជាធ្វើឲ្យប៉ះពាល់ដល់កិត្យានុភាពរបស់រដ្ឋសភា និងកិត្តិយសរបស់លោក ហេង សំរិន។ ជាការឆ្លើយតបប្រធានរដ្ឋសភា លោក ហេង សំរិន បានចារក្នុងលិខិតនោះផ្តល់នូវការអធ្យាស្រ័យដោយបញ្ចប់ត្រឹមការដាក់ទណ្ឌកម្មខាងវិន័យដូចមានចែងក្នុងសេចក្តីសម្រេចចុះថ្ងៃ ២៤ កក្កដាដូចគ្នានោះ។
ការស្នើក្តីអធ្យាស្រ័យរបស់លោក អ៊ុំ សំអាន ធ្វើឡើងបន្ទាប់ពីតំណាងរាស្ត្ររូបនេះត្រូវបានគណៈកម្មាធិការអចិន្រៃ្តយ៍រដ្ឋសភាដាក់ពិន័យដោយព្យួរការងារហាមមិនឲ្យចូលរួមប្រជុំសភាចំនួន ១៥ លើក និងកាត់ប្រាក់ខែ ៥០ ភាគរយរយៈពេល ២ ខែដោយចោទថា លោក អ៊ុំ សំអាន ប្រព្រឹត្តខុសបទបញ្ជាផ្ទៃក្នុងពាក់ព័ន្ធនឹងការរិះគន់ប្រធានរដ្ឋសភា។
លោក អ៊ុំ សំអាន បានឲ្យដឹងពីម្សិលមិញថាការស្នើក្តីអធ្យាស្រ័យនេះគឺផ្អែកលើវប្បធម៌សន្ទនាដែលថ្នាក់ដឹកនាំបក្សទាំងពីរកំពុងប្រកាន់យកក្នុងគោលបំណងបន្ថយកម្ដៅនយោបាយបន្ទាប់ពីសកម្មជនគណបក្សប្រឆាំង ១១ នាក់ត្រូវបានផ្តន្ទាទោសទៅតុលាការប៉ុន្តែលិខិតនេះមិនមែនមានន័យថា លោក បាននិយាយ ឬរិះគន់ខុសនោះទេមានតែការប្រើពាក្យសម្តី មិនសូវសមរម្យតែប៉ុណ្ណោះ។
លោកថា៖ «ការរិះគន់កន្លងមកនេះខ្ញុំគិតថាមិនខុសទេព្រោះខ្ញុំប្រើប្រាស់តួនាទីជាតំណាងរាស្ត្រដែលមានចែងក្នុងរដ្ឋធម្មនុញ្ញ និងបទបញ្ជាផ្ទៃក្នុងរបស់រដ្ឋសភាតែប៉ុណ្ណោះគ្រាន់តែថាខ្ញុំប្រើពាក្យមិនសមរម្យចំពោះគាត់ ខ្ញុំខុសមែន ខ្ញុំចាត់ទុកគាត់ប្រៀបដូចជាលោកតាខ្ញុំអ៊ីចឹង។ បើខ្មែរយើងបន្តឈ្លោះគ្នាច្បាស់ជាខាតបង់ដូចប្រវត្តិសាស្ត្រមុនពឹងវៀតណាមជួយហើយកាត់ដីឲ្យគេទៀតអ៊ីចឹងយើងមានតែចរចាយោគយល់គ្នាហើយខ្ញុំក៏មិនរួញរាក្នុងការបន្តអន្តរាគមន៍ដោះស្រាយបញ្ហាព្រំដែនដីធ្លីអំពើពុករលួយជាដើម»។
ក្រៅពីការផ្ញើលិខិតនេះ លោក អ៊ុំ សំអាន ក៏បានបន្ថែមថាគម្រោងដែលប្តឹងប្ដល់គ្នាដែលលោកគ្រោងប្តឹងលោក ហេង សំរិន ទៅក្រុមប្រឹក្សាធម្មនុញ្ញចំណែកលោក ហេង សំរិន ប្តឹងលោកទៅតុលាការវិញនោះគឺនឹងត្រូវបញ្ចប់ដោយសន្តិវិធីដោយការយោគយល់គ្នា។
លោក ឈាង វុន អ្នកនាំពាក្យរដ្ឋសភា និងជាតំណាងរាស្ត្រគណបក្សប្រជាជនកម្ពុជាបានឲ្យដឹងថា លោក អ៊ុំ សំអាន បានស្នើកិច្ចសម្របសម្រួលពីលោកពីល្ងាចថ្ងៃសុក្រដើម្បីដោះស្រាយបញ្ហានេះសម្រាលភាពតានតឹងព្រោះបើពុំនោះទេក្រៅពីទណ្ឌកម្មវិន័យ លោក អ៊ុំ សំអាន អាចនឹងប្រឈមពីបទបរិហារកេរ្តិ៍វាយប្រហារប្រធានរដ្ឋសភាទៀតផង។
លោកថា៖ «គណៈកម្មាធិការអចិន្រៃ្តយ៍យល់ថាគាត់ខុសគ្រាន់តែថាគណបក្សប្រជាជនលើកដៃគាំទ្របើទោះខាងគណបក្សសង្គ្រោះជាតិមិនបានលើកដៃតែក្នុងអារម្មណ៍គេយល់ឃើញអ៊ីចឹងខ្ញុំបានជួយសម្របសម្រួលឲ្យគេយកលិខិតទៅដល់ (ខេត្ត) ត្បូងឃ្មុំ ដើម្បីអធ្យាស្រ័យរឿងនេះ។ ខ្ញុំគ្រាន់តែចង់ប្រាប់គាត់ថាឲ្យប្រើប្រាស់ពាក្យសម្តីប្រយ័ត្នប្រយែងបន្តិចកាលណាលើសលស់អីមានការលំបាក»។
កន្លងទៅ លោក អ៊ុំ សំអាន បានសរសេរនៅលើហ្វេសប៊ុករបស់លោកថា៖ «...យួននិយាយថាភូមិកំណើតរបស់សម្តេច (ហេង សំរិន) ស្ថិតក្នុងដីយួនអត់ហ៊ានក្អកជាមួយយួនកុំចង់យកភូមិខ្មែរពីរទៅឲ្យយួនដូរជាមួយភូមិកំណើតសម្តេចវិញ»។
លោក បានសរសេរបែបនេះក្រោយពីប្រធានរដ្ឋសភា លោក ហេង សំរិន សម្រេចមិនបញ្ជូនលិខិតរបស់លោកទៅនាយករដ្ឋមន្ត្រី ហ៊ុន សែន ករណីស្នើសុំផ្អាកការបោះបង្គោលព្រំដែនជាមួយវៀតណាមក្រោយពីតំណាងរាស្ត្ររូបនេះបានចុះពិនិត្យបង្គោលព្រំដែន និងរកឃើញថាវៀតណាមបានកំពុងឈ្លានពានចូលទឹកដីកម្ពុជា៕
