ភ្នំពេញៈ អតីតតំណាងរាស្ត្រនៃអតីតបក្សប្រឆាំងលោក អ៊ូ ច័ន្ទរ័ត្ន អះអាងថា គណបក្ស «កែទម្រង់កម្ពុជា» របស់លោកដែលបានស្នើចុះបញ្ជីនៅក្រសួងមហាផ្ទៃកាលពីថ្ងៃទី ១ មីនា មិនមែនជាផ្កាលម្អសួនប្រជាធិបតេយ្យដូចការរិះគន់មួយចំនួនទេ។ គណបក្សរបស់លោកមានជំហររឹងមាំ មានបាវចនា សង្គ្រោះ បម្រើ ការពារ ដូច ពាក្យស្លោកអតីតគណបក្សសង្គ្រោះជាតិ។
លោក អ៊ូ ច័ន្ទរ័ត្ន អតីតតំណាងរាស្ត្រខេត្តតាកែវនៃគណបក្សសង្គ្រោះជាតិ បានដាក់ពាក្យជាផ្លូវការទៅក្រសួងមហាផ្ទៃ ដើម្បីបង្កើតគណបក្សនយោបាយថ្មី ឈ្មោះថា គណបក្សកែទម្រង់កម្ពុជា។ ប៉ុន្តែមិនទាន់ទទួលបានការចុះបញ្ជីនៅឡើយទេ ដោយបក្សនេះត្រូវបំពេញលក្ខខណ្ឌមួយចំនួនដូចដែលច្បាប់ស្ដីពីគណបក្សនយោបាយបានកំណត់។
លោកប្រាប់ភ្នំពេញប៉ុស្តិ៍ពីម្សិលមិញថា លោកបានដាក់ឯកសារឈ្មោះគណបក្ស និងនិមិត្តសញ្ញាបក្ស និងឯកសារពាក់ព័ន្ធដែលច្បាប់តម្រូវ ហើយក្រសួងមហាផ្ទៃពិនិត្យឃើញថា ឈ្មោះ និងនិមិត្តសញ្ញាគណបក្សមិនមានបញ្ហាអ្វីទេ។ ប៉ុន្តែលោកកំពុងប្រមូលឯកសារពាក់ព័ន្ធមួយចំនួនទៀតទៅតាមដំណាក់កាលនៃនីតិវិធី ដូចជាស្នាមមេដៃ និងអត្តសញ្ញាណប័ណ្ណសមាជិក។
លោកថ្លែងថា៖ «យើងនៅមានកិច្ចការមួយចំនួនទៀតដែលរួមមានទាំងគោលការណ៍ និងគោលនយោបាយរបស់គណបក្ស។ យើងបានព្រាងវារួចហើយ យើងនៅតែសម្រេចនៅពេលដែលសមាសភាពថ្នាក់ដឹកនាំបានចូលជុំគ្នានិងសម្រេចជាផ្លូវការ។ ខ្ញុំគិតថា បន្ទាប់ពីកូវីដបានស្រាកស្រាន្ត ខ្ញុំនឹងធ្វើសន្និសីទកាសែតមួយដើម្បីសាធារណជនបានដឹង»។
គណបក្សថ្មីនេះមានបាវចនាដូចគ្នានឹងបាវចនារបស់អតីតគណបក្សសង្គ្រោះជាតិដែរ គឺសង្គ្រោះ បម្រើ ការពារ។ លោក ច័ន្ទរ័ត្ន ថ្លែងថា ការជ្រើសរើសយកបាវចនានេះ ដោយសារវាជាបាវចនារបស់អតីតអ្នកតស៊ូ គឺលោក សឺន សាន ហើយសមាជិកចាស់ៗនៃបក្សរបស់លោកពេញចិត្តនឹងបាវចនាមួយនេះ។
សមាជិកមួយចំនួននៃគណបក្សនេះកំពុងស្ថិតនៅក្រៅប្រទេសដូចជានៅសហរដ្ឋអាមេរិកជាដើម ហើយពួកគេមិនទាន់អាចចូលមកកម្ពុជាបានទេ ដោយសារតែបញ្ហាជំងឺកូវីដ ១៩។ លោកធ្លាប់បានជជែកជាមួយលោក សុន ឆ័យ អតីតសមាជិកសំខាន់ ១ រូប របស់គណបក្សសង្គ្រោះជាតិដែលទទួលបានសិទ្ធិធ្វើនយោបាយឡើងវិញកាលពីខែកញ្ញា ២០២០។ ប៉ុន្តែការសម្រេចចិត្តយ៉ាងណានោះ លោក សុន ឆ័យ នឹងប្រកាសដោយខ្លួនឯងថាតើលោកចូលរួមជាមួយគណបក្សនេះឬអត់? នេះជាការលើកឡើងរបស់លោក អ៊ូ ច័ន្ទរ័ត្ន។
ចាប់តាំងពីលោកផ្ដើមគំនិតបង្កើតគណបក្សនេះមកលោកជួបប្រទះឧបសគ្គខ្លះ ជាពិសេសការខ្វែងគំនិតគ្នាក្នុងចំណោមសមាជិកអតីតគណបក្សសង្គ្រោះជាតិដោយអ្នកខ្លះរង់ចាំក្រែងលោមានដំណោះស្រាយនយោបាយ។ លោកយល់ថា បន្ទាប់ពីរង់ចាំអស់រយៈពេល ៣ ឆ្នាំហើយនោះ គ្មានទេដំណោះស្រាយនយោបាយដែលអាចឱ្យគណបក្សសង្គ្រោះជាតិត្រឡប់មកវិញ។
លោកថ្លែងដូច្នេះថា៖ «ដូច្នេះខ្ញុំយល់ថា ឧបសគ្គដែលធ្វើឱ្យមានការខ្វែងគំនិតគ្នាខ្លះនោះអាចនឹងបញ្ចប់នៅពេលបន្តិចទៀតនេះ កាលណាយើងដឹងច្បាស់ថាមិនមានអីជាដំណោះស្រាយធំដុំ ក្រៅពីច្រកចេញតែ ១ គត់គឺចាប់ផ្ដើមឡើងវិញ។ ប្រមូលគ្នាដែលជា អតីតមាននិន្នាការក្រៅរដ្ឋាភិបាល ដើម្បីប្រកួតប្រជែងម្ដងទៀត»។
ការបង្កើតគណបក្សនយោបាយថ្មីក្នុងចំណោមសមាជិកអតីតគណបក្សសង្គ្រោះជាតិដែលជាគណបក្សប្រឆាំងធំជាងគេកាលពីមុនត្រូវបានរំលាយនៅឆ្នាំ ២០១៧ នោះបានរងការរិះគន់ពីអ្នកគាំទ្រអតីតបក្សប្រឆាំង ដោយរិះគន់ថា គណបក្សថ្មីទាំងនេះគឺជាផ្កាលម្អសួនប្រជាធិបតេយ្យ។ ប៉ុន្តែលោក អ៊ូ ច័ន្ទរ័ត្ន ច្រានចោលការលើកឡើងនេះ ដើម្បីការពារការបង្កើតគណបក្សរបស់លោក។
លោកថ្លែងថា៖ «ការវាយប្រហារមួយចំនួនលើការបង្កើតគណបក្សថ្មីនេះយើងបានដឹងទាំងអស់គ្នាហើយ គឺដោយសារអ្នកគាំទ្រខ្លះ និងសកម្មជនខ្លះលោកមិនទុកចិត្ត ចំពោះការប្រកួតប្រជែងហ្នឹង។ បើការប្រកួតប្រជែងមានសក្ដានុពល និងប្រសិទ្ធភាពខ្ញុំជឿថា ការបង្កើតគណបក្សដើម្បីជាផ្កាលម្អសួនប្រជាធិបតេយ្យអាចសាបរលាបទៅវិញ»។
លោកបន្តថា បក្សនយោបាយមួយត្រូវមានទិសដៅច្បាស់លាស់មិនត្រូវពាក់ព័ន្ធនឹងអំពើទុច្ចរិតចំពោះប្រទេសជាតិមិនយកលុយយកកាក់ពីគណបក្សកាន់អំណាច ឬមិនធ្វើក្រោមសម្ពាធ ឬដើម្បីប្រយោជន៍គណបក្សកាន់អំណាច។
លោក ឈឹម កាន ប្រធាននាយកដ្ឋានកិច្ចការសមាគម និងគណបក្សនយោបាយនៃក្រសួងមហាផ្ទៃបានឱ្យដឹងពីម្សិលមិញថា ដោយមិនទាន់រាប់បញ្ចូលគណបក្សរបស់លោក អ៊ូ ច័ន្ទរ័ត្ន បច្ចុប្បន្ននេះមានគណបក្សនយោបាយចំនួន ៤៧ ដែលបានបង្កើត។ ប៉ុន្តែថ្មីៗនេះមានគណបក្សនយោបាយមួយបានសុំលុបឈ្មោះវិញ។
ចំពោះការស្នើសុំបង្កើតគណបក្សកែទម្រង់កម្ពុជាលោកថ្លែងថា ក្រសួងមហាផ្ទៃបានទទួលពាក្យស្នើសុំបង្កើតបក្សហើយ ប៉ុន្តែលោក អ៊ូ ច័ន្ទរ័ត្ន មិនទាន់បានបំពេញគ្រប់លក្ខខណ្ឌដូចមានចែងក្នុងមាត្រា ៩ នៃច្បាប់ស្ដីពីគណបក្សនយោបាយ។
លោក ឈឹម កាន ថ្លែងដូច្នេះថា៖ «ឯកសារនោះបានមកដល់អង្គភាពជំនាញហើយ តែជានីតិវិធី អង្គភាពជំនាញចាត់ការអត់ទាន់កើតទេ ដោយសារតែគាត់មិនទាន់បានបំពេញលក្ខខណ្ឌស្របតាមមាត្រា ៩ នៃច្បាប់ស្ដីពីគណបក្សនយោបាយ។ ឥឡូវគាត់ទៅបំពេញឯកសារជូនក្រសួងឡើងវិញ។ គាត់នៅខ្វះស្នាមមេដៃប្រជាពលរដ្ឋចំនួន ៨០ នាក់។ តាមមាត្រា ៩ គាត់ត្រូវមានស្នាមមេដៃប្រជាពលរដ្ឋខ្មែរដែលមានលំនៅអចិន្រៃ្តយ៍ក្នុងព្រះរាជាណាចក្រកម្ពុជាចំនួន ៨០ នាក់។ ឥឡូវគាត់ស្នើទៅបំពេញបន្ថែម»។
លោក ឡៅ ម៉ុងហៃ អ្នកវិភាគនយោបាយថ្លែងថា ការអះអាងរបស់លោក អ៊ូ ច័ន្ទរ័ត្ន ដែលថាគណបក្សនេះមិនមែនជាផ្កាលម្អប្រជាធិបតេយ្យនោះ មិនមានន័យគ្រប់គ្រាន់ទេ ដរាបណាស្ថាបនិកបក្សនេះមិនទាន់បានបង្ហាញច្បាស់លាស់នូវទស្សនវិស័យរបស់ខ្លួន បូករួមនឹងយុទ្ធសាស្ត្រច្បាស់លាស់ដើម្បីឱ្យទស្សនវិស័យនេះក្លាយជាការពិតដែលអាចឱ្យពលរដ្ឋជឿជាក់ផ្ដល់អំណាចឱ្យបក្សនេះដឹកនាំប្រទេស។
នៅពេលសួរថា តើការបង្កើតបក្សថ្មីនេះជាការក្បត់ស្មារតីអតីតគណក្សប្រឆាំងដែរឬយ៉ាងណានោះ លោកថ្លែងដូច្នេះថា៖ «មនុស្សដែលមានសេរីភាព គួរតែ គាំទ្រដល់សិទ្ធិស្របតាមរដ្ឋធម្មនុញ្ញក្នុងការបង្កើតគណបក្សនយោបាយថ្មីមួយ ហើយខ្ញុំនឹងគាំទ្រដល់សិទ្ធិមួយនេះ»៕
វីដេអូ៖