ភ្នំពេញៈ លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិ បានសម្រេចបង្កើតគណបក្សនយោបាយថ្មីមួយឈ្មោះគណបក្ស «កែទម្រង់កម្ពុជា (គ.ក.ក)» ជាភាសាអង់គ្លេសថា Cambodia Reform Party (CRP) ដែលការសម្រេចចិត្តដាក់ឈ្មោះដូច្នេះ ដោយសារតែលោកយល់ថា គ្រប់ប្រទេសទាំងអស់ត្រូវតែមានការធ្វើកំណែទម្រង់។
លោក ច័ន្ទរ័ត្ន ថ្លែងប្រាប់ភ្នំពេញប៉ុស្តិ៍តាមទូរស័ព្ទយ៉ាងដូច្នេះថា៖ «ប្រទេសណាក៏ដោយកាលណាដឹកនាំយូរៗទៅ វាចៀសមិនរួចពីការកែទម្រង់ទេ ទាំងនយោបាយ ទាំងច្បាប់ត្រូវមានការផ្លាស់ប្ដូរ។ សង្គមមានការវិវត្តទៅមុខ ដូច្នេះឧបសគ្គនិងបញ្ហាកាន់តែច្រើន ហើយត្រូវមានការកែទម្រង់»។
លោកបន្តថា៖ «ស្ថានភាពបច្ចុប្បន្នជិតនេះ ៣០ ឆ្នាំ តាំងពីបោះឆ្នោតឆ្នាំ ១៩៩៣ មកដល់ពេលនេះ នៅមានបញ្ហា និងភាពអសកម្មជាច្រើន។ វាដល់ពេលដែលត្រូវកំណែទម្រង់ហើយទាំងវិស័យអប់រំ និងវិស័យយុត្តិធម៌ជាដើម»។
លោកបញ្ជាក់ថា នឹងមានមន្ត្រីពីអតីតគណបក្សសង្គ្រោះជាតិចូលរួមនៅពេលក្រោយនៅពេលពួកគាត់ទទួលបានសិទ្ធិធ្វើនយោបាយឡើងវិញ។ ទោះបីជាលោកជាអ្នកចេញមុខក្នុងការបង្កើតគណបក្សនេះក៏ដោយ លោកបញ្ជាក់ថា លោកមិនមែនជាប្រធានបក្សនេះទេ។ គណបក្សនេះក៏មិនមានវត្តមានលោក កឹម សុខា ជាស្ថាបនិកដែរ ប៉ុន្តែបើលោក កឹម សុខា ឬលោក សម រង្ស៊ី មានលទ្ធភាពចេញមកដឹកនាំនយោបាយវិញ លោកនឹងបញ្ឈប់សកម្មភាពបក្សថ្មីនេះ។
ក្នុងការបង្កើតបក្សថ្មីនេះលោក ច័ន្ទរ័ត្ន នឹងជួបជាមួយក្រុមយុវជនដែលចូលរួមដើម្បីប្រមូលឯកសារចាំបាច់ដើម្បីដាក់ជូនទៅក្រសួងមហាផ្ទៃក្នុងសប្ដាហ៍នេះ។ លោកថា ការបង្កើតបក្សនេះមិនមែនដើម្បីតំណែងអ្វីដូចជាតួនាទីនៅក្នុងឧត្តមក្រុមប្រឹក្សាពិគ្រោះយោបល់ជាដើមនោះទេ ហើយលោកក៏មិនចាប់អារម្មណ៍លើការរិះគន់នានានោះដែរ។
លោកថ្លែងដូច្នេះថា៖ «អ្វីដែលសំខាន់មែនទែនគឺជាតិរបស់យើង តើ ១០, ២០ ឬ ៣០ ឆ្នាំទៀត តើយើងធ្វើយ៉ាងម៉េចដើម្បីឱ្យអ្នកជំនាន់ក្រោយមានលទ្ធភាពគ្រប់គ្រាន់ដើម្បីគ្រប់គ្រងប្រទេសជាតិខ្លួនឯង»។
អ្នកវិភាគមួយចំនួនកាលពីកន្លងទៅបានថ្លែងថា អតីតមន្ត្រីនៃអតីតគណបក្សប្រឆាំងមួយចំនួនបានបង្កើតគណបក្សរៀងៗខ្លួន ប៉ុន្តែគណបក្សទាំងនោះ ប្រហែលជាមិនមានជោគជ័យ ឬការគាំទ្រទេ។ ប៉ុន្តែលោក អ៊ូ ច័ន្ទរ័ត្ន ថ្លែងថា មានតែអ្នកបោះឆ្នោតទេ ដែលនឹងបង្ហាញការពិតអំពីការគាំទ្ររបស់ពួកគេ។
នៅពេលសួរថាតើ «គណបក្សកែទម្រង់កម្ពុជា» នឹងចូលរួមការបោះឆ្នោតឃុំ-សង្កាត់នៅឆ្នាំ ២០២២ និងបោះឆ្នោតជាតិនៅឆ្នាំ ២០២៣ ដែរឬទេ លោក ច័ន្ទរ័ត្ន ថ្លែងដូច្នេះថា៖ «ប្រាកដណាស់! យើងរៀបចំ និងត្រៀមដើម្បីប្រកួតប្រជែងយ៉ាងម៉ឺងម៉ាត់ និងស្វិតស្វាញមែនទែនហើយទៅអនាគត យើងសង្ឃឹមថា អាចក្លាយជាគណបក្សមួយដែលប្រកួតប្រជែងយ៉ាងតឹងរ៉ឹងជាមួយគណបក្សកាន់អំណាច»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថាឈ្មោះ «គណបក្សកែទម្រង់» នេះបង្ហាញពីភាពកណ្ដាលនិយមមួយ ដែលមិនមានលក្ខណៈវាយប្រហារ។ លោកថា កម្ពុជានៅមានរឿងជាច្រើនដែលត្រូវកែទម្រង់ ហើយគណបក្សនេះអាចជាគណក្សប្រឆាំងសំខាន់បើធ្វើបានល្អ។
យ៉ាងណាក្តី លោកថ្លែងថា៖ «វាលឿនពេកក្នុងការវាយតម្លៃ ថាតើគណបក្សនេះនឹងមានជោគជ័យឬអត់? ប៉ុន្តែវាជាជំហានល្អដែលលោក (ច័ន្ទរ័ត្ន) អាចបង្កើតទីលានមួយ សម្រាប់ធ្វើនយោបាយផ្ទាល់ខ្លួន។ វាក៏បង្ហាញពីលម្ហនយោបាយកម្ពុជាផងដែរ»។
ប៉ុន្តែអ្នកវិភាគនយោបាយលោក ឡៅ ម៉ុងហៃ ថ្លែងថាពាក្យ «កែទម្រង់» បច្ចុប្បន្ននេះមើលទៅហាក់ដូចជាមានភាពអវិជ្ជមាន ហើយទំនងជាមិនជំរុញទឹកចិត្តឱ្យមានការជឿទុកចិត្តច្រើនទេ នៅពេលដែលកំណែទម្រង់ជាបន្តបន្ទាប់របស់រដ្ឋាភិបាលរហូតមកដល់ពេលនេះមិនមានអ្វីដែលសម្បើមអស្ចារ្យ។
លោកមានប្រសាសន៍ដូច្នេះថា៖ «ថ្នាក់ដឹកនាំគណបក្សថ្មីនេះនឹងមានភារកិច្ចយ៉ាងលំបាកក្នុងការធ្វើឱ្យប្រជាពលរដ្ឋជឿថា ពួកគាត់ដែលប្រជាពលរដ្ឋនឹងបានស្គាល់ទៅថ្ងៃមុខ ទោះជាអាចអាក្រក់ក៏ដោយ ក៏ច្បាស់ជាគ្រាន់បើជាងពួកមនុស្សអាក្រក់ដែរ»៕
វីដេអូ៖