ភ្នំពេញៈ ឯកអគ្គរដ្ឋទូតសហរដ្ឋអាមេរិកប្រចាំកម្ពុជាលោក Patrick Murphy កាលពីម្សិលមិញបានជួបសម្តែងការគួរសមជាមួយលោក ហេង សំរិន ប្រធានរដ្ឋសភា និងលោក ឃួងស្រេង អភិបាលរាជធានីភ្នំពេញដោយបានពិភាក្សាពីការរឹតចំណងទំនាក់ទំនង និងកិច្ចសហប្រតិបត្តិការរវាងប្រទេសទាំង ២ និងលើកពីបញ្ហានយោបាយ និងសេដ្ឋកិច្ចផងដែរ។
តាមគេហទំព័ររបស់រដ្ឋសភាកម្ពុជាបានឲ្យដឹងថា ការជួបសម្តែងការគួរសមរវាងលោក Patrick Murphy និងលោក ហេង សំរិន បានធ្វើឡើងនៅវិមានរដ្ឋសភានាព្រឹកថ្ងៃទី ៤ ខែកុម្ភៈ ដើម្បីពង្រឹងពង្រីកកិច្ចសហប្រតិបត្តិការប្រទេសទាំង ២ ឲ្យកាន់តែរឹងមាំថែមទៀត។
តាមគេហទំព័រដដែលបានបន្តថា លោក Murphy បានវាយតម្លៃខ្ពស់ដល់ស្ថាប័នរដ្ឋសភា ដែលជាស្ថាប័នកំពូល និងជាតំណាងឲ្យប្រជាពលរដ្ឋ ខណៈលោកលើកឡើងថាកម្ពុជា និងសហរដ្ឋអាមេរិកមានចំណុចជាច្រើនក្នុងប្រព័ន្ធដឹកនាំរដ្ឋដូចគ្នាក្នុងនោះដូចជាការចែងអំពីលទ្ធិប្រជាធិបតេយ្យនៅក្នុងរដ្ឋធម្មនុញ្ញ ហើយអំណាចដឹកនាំរដ្ឋទាំង ៣ ចែកដាច់ពីគ្នា។
លោក Murphy បានលើកឡើងបន្តថាកម្ពុជា និងសហរដ្ឋអាមេរិកបានកសាងសមិទ្ធផលជាច្រើនជាមួយគ្នារួចមកហើយ។ នៅឆ្នាំ ២០២០ នេះគឺជាឱកាសកាន់តែសំខាន់ទៀតដែលប្រទេសទាំង ២ មានលទ្ធភាពនៅក្នុងការពង្រឹងកិច្ចសហប្រតិបត្តិការជាមួយគ្នា ស្របពេលដែលឆ្នាំនេះជាខួប ៧០ ឆ្នាំនៃទំនាក់ទំនងការទូតប្រទេសទាំង ២។
លោក Patrick Murphy បានសរសេរបង្ហោះនៅលើទំព័រ twitter របស់លោក បន្ទាប់ពីបញ្ចប់ជំនួបជាមួយលោក ហេង សំរិន ថា៖ «(ខ្ញុំ) បានជួបជាមួយប្រធានរដ្ឋសភា លោក ហេង សំរិន ដើម្បីពិភាក្សាជុំវិញទំនាក់ទំនង និងកិច្ចខិតខំប្រឹងប្រែងក្នុងការបង្កើតទំនាក់ទំនាក់ជាមួយគ្នា។ ជាមួយគ្នានោះក៏បានបង្ហាញពីការតាំងចិត្តរបស់ស្ថាប័នទាំង ២ ក្នុងការរក្សាប្រព័ន្ធពហុបក្ស និងសារប្រយោជន៍នៃការត្រួតពិនិត្យ និងតុល្យភាពនៃលទ្ធិប្រជាធិបតេយ្យ»។
លោក ហេង សំរិន បានចាត់ទុកបេសកកម្មការទូតរបស់លោក Murphy ថា មានសារៈសំខាន់ខ្លាំងដល់ការបន្តថែរក្សា និងលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យរវាងប្រទេសកម្ពុជា និងសហរដ្ឋអាមេរិកឱ្យកាន់តែរឹងមាំ និងរីកចម្រើនខ្លាំងក្លាថែមទៀត។
លោក ហេង សំរិន បញ្ជាក់ថា៖ «(យើង) បានអបអរសាទរចំពោះវឌ្ឍនភាពទាំងឡាយដែលប្រសូតចេញពីកិច្ចខិតខំប្រឹងប្រែង ពង្រឹង និងពង្រីកកិច្ចសហប្រតិបត្តិការរវាងរដ្ឋាភិបាលនៃប្រទេសទាំង ២ ជាបន្តបន្ទាប់មកនេះ បាននាំមកនូវផលប្រយោជន៍យ៉ាងធំធេងដល់ប្រជាជាតិទាំងសងខាង។ រដ្ឋសភាកម្ពុជាសូមអបអរសាទរចំពោះការផ្លាស់ប្តូរសារលិខិតដ៏មានតម្លៃ និងមានអត្ថន័យដ៏ជ្រាលជ្រៅរវាងលោកប្រធានាធិបតីអាមេរិក និងសម្តេចតេជោ ប្រមុខរាជរដ្ឋាភិបាលកម្ពុជានាពេលថ្មីៗនេះ»។
ក្រៅពីជំនួបនេះលោក Patrick Murphy ក៏បានជួបសម្ដែងការគួរសមជាមួយលោក ឃួង ស្រេង អភិបាលនៃគណៈអភិបាលរាជធានីភ្នំពេញនារសៀលថ្ងៃដដែលផងដែរ។ ទំព័រហ្វេសប៊ុករបស់រដ្ឋបាលរាជធានី-ភ្នំពេញបានឲ្យដឹងថា លោក ឃួង ស្រេង និង Patrick Murphy បានពិភាក្សាការងារពាក់ព័ន្ធក្នុងវិស័យសេដ្ឋកិច្ច ពាណិជ្ជកម្ម វិនិយោគទេសចរណ៍ និងវប្បធម៌។ និយាយដោយឡែកក្នុងរាជធានីភ្នំពេញគឺបានពិភាក្សាគ្នាដោយធ្វើយ៉ាងណាដើម្បីទាក់ទាញពាណិជ្ជករមកវិនិយោគ និងភ្ញៀវទេសចរមកទស្សនាកម្សាន្តឱ្យកាន់តែច្រើន ខណៈរដ្ឋបាលរាជធានីភ្នំពេញបង្ហាញការគាំទ្ររាល់គម្រោងវិនិយោគិនជាតិ និងអន្តរជាតិដែលបានធ្វើការវិនិយោគក្នុងរាជធានី។
លោក Murphy ថ្លែងថា៖ «ខ្ញុំរីករាយនឹងជួបពិភាក្សាជាមួយលោក ឃួង ស្រេង ម្តងទៀតក្នុងការប្រារព្ធពិធីខួបលើក ៧០ ឆ្នាំរវាងប្រទេសទាំង ២ នៅខែក្រោយ។ សង្ឃឹមថានឹងទទួលបានការភ្ជាប់ទំនាក់ទំនងជាមួយក្រុមហ៊ុនរបស់អាមេរិកនៅក្នុងគម្រោង “Smart Cities” ខណៈវាកំពុងជម្នះជាមួយបញ្ហា»៕