ភ្នំពេញៈ រដ្ឋមន្ត្រីក្រសួងយុត្តិធម៌ លោក កើត រិទ្ធ មានគោលបំណងរៀបចំវគ្គបណ្តុះបណ្តាលជំនាញវិជ្ជាជីវៈជូនដល់ទណ្ឌិត ដែលកំពុងជាប់ពន្ធនាគារនៅក្នុងប្រទេសកម្ពុជា ដើម្បីឱ្យពួកគេមានជំនាញច្បាស់លាស់មួយដែលអាចបង្កើតមុខរបរ សម្រាប់ចិញ្ចឹមជីវិត បន្ទាប់ពីពួកគេចេញពីពន្ធនាគារ។ គម្រោងនេះត្រូវបានបង្ហាញដល់អង្គការសហប្រជាជាតិ (UN) រួចរាល់ហើយ។
លោក គឹម សន្តិភាព អ្នកនាំពាក្យក្រសួងយុត្តិធម៌ប្រាប់ភ្នំពេញប៉ុស្តិ៍ពីម្សិលមិញថា អ្វីដែលលោករដ្ឋមន្ត្រី កើត រិទ្ធ ចង់បង្កើតឱ្យមានការបណ្តុះបណ្តាលវិជ្ជាជីវៈជូនទណ្ឌិតដែលកំពុងទទួលរងនូវការអនុវត្តទោសនៅក្នុងពន្ធនាគារ ដើម្បីឱ្យពួកគេមានអាជីពមួយដែលអាចប្រកបមុខរបរ ក្រោយពីពួកគេចេញពីពន្ធនាគារវិញ។ ទោះយ៉ាងណា លោកមិនទាន់បញ្ជាក់ពីពេលវេលានៃការបង្កើតវគ្គបណ្តុះបណ្តាលនេះទេ ដោយថានឹងត្រូវរង់ចាំពិភាក្សាជាមួយស្ថាប័នពាក់ព័ន្ធឱ្យរួចរាល់សិន។
បើតាមលោក គឹម សន្តិភាព មូលហេតុដែលចង់ឱ្យមានការបណ្តុះបណ្តាលវិជ្ជាជីវៈនៅក្នុងពន្ធនាគារនេះគឺដើម្បីកុំឱ្យទណ្ឌិតទាំងនោះ ពេលសមាហរណកម្មចូលទៅក្នុងសង្គមជាតិវិញគាត់ប្រព្រឹត្តបទល្មើសឡើងវិញ ខណៈដែលពួកគេពុំមានលទ្ធភាព និងអាជីព ឬមុខរបរផ្សេងៗដើម្បីរកប្រាក់ចំណូលចិញ្ចឹមជីវិត។ ផែនការនេះត្រូវបានបង្ហាញដល់អង្គការសហប្រជាជាតិ ដើម្បីសហការជាមួយក្រសួងយុត្តិធម៌ អគ្គនាយកដ្ឋានពន្ធនាគារ និងក្រសួងការងារ និងបណ្តុះបណ្តាលវិជ្ជាជីវៈដែលអាចបើកវគ្គបណ្តុះបណ្តាលមួយនៅក្នុងពន្ធនាគារ។
លោក គឹម សន្តិភាព ថ្លែងថា៖ «នៅពេលដែលពួកគេមានមុខរបរចិញ្ចឹមជីវិត និងទទួលប្រាក់ចំណូលឱកាសនៃការប្រព្រឹត្តបទល្មើល គឺមិនមាននោះទេ និងជាវិធានការថ្មីមួយក្នុងការទប់ស្កាត់ ស្របពេលដែលយើងធ្វើសមាហរណកម្មទណ្ឌិតចូលទៅក្នុងសង្គម គឺធ្វើយ៉ាងណាឱ្យគាត់មានអាជីពវិជ្ជាជីវៈមួយត្រឹមត្រូវ»។
ប្រធានរាជបណ្ឌិត្យសភាកម្ពុជាលោក សុខ ទូច ថ្លែងថា ការបណ្តុះបណ្តាលវិជ្ជាជីវៈជូនដល់ទណ្ឌិតដែលកំពុងជាប់ឃុំនៅក្នុងពន្ធនាគារ គឺជារឿងចាំបាច់ដែលត្រូវតែធ្វើ ព្រោះបើមិនធ្វើទេ នៅពេលដែលពួកគេចេញមកវិញ គ្មានជំនាញនឹងធ្វើឱ្យគេប្រព្រឹត្តបទល្មើសឡើងវិញ ដែលប៉ះពាល់ដល់សន្តិសុខ សណ្តាប់ធ្នាប់សង្គមកាន់តែខ្លាំង។
លោក សុខ ទូច បញ្ជាក់ថា ទណ្ឌិតដែលជាប់ទោសក្នុងរយៈពេលខ្លី គួរតែបណ្តុះបណ្តាលទៅលើការដាំបន្លែបង្ការ ហើយចំពោះទណ្ឌិតដែលជាប់ក្នុងរយៈពេលយូរ គឺគួរតែបណ្តុះបណ្តាលវិជ្ជាជីវៈផ្សេងៗដើម្បីឱ្យពួកគេមានជំនាញ និងអាចប្រកបរបរបាន។ នៅពេលដែលទទួលផលចំណេញ គាត់នឹងទុកថវិកានោះសម្រាប់គាត់ពេលចេញវិញ គឺមានដើមទុនក្នុងការបង្កើតមុខរបរបាន។
លោក សុខ ទូច ថ្លែងថា៖ «នៅក្នុងគុកហ្នឹងត្រូវរៀបចំឱ្យគាត់រៀនដាំបន្លែ និងបណ្តុះបណ្តាលវិជ្ជាជីវៈជូនគាត់មិនមែនគាត់ជាប់គុកហើយគាត់ដេកគងអន្ទាក់ខ្លានោះទេ និងគុកនីមួយៗគួរតែធ្វើឱ្យធំ ព្រោះស្រុកយើងសម្បូរដីណាស់ ដែលអាចមានលទ្ធភាពក្នុងការរៀបចំជាកន្លែងដាំបន្លែឱ្យបានច្រើន ដើម្បីលក់ចេញបាន និងរៀបឱ្យមានកន្លែងបណ្តុះបណ្តាលដូចជាត្បាញ ឆ្លាក់ និងធ្វើម្ហូបជាដើម»។
ថ្លែងក្នុងកិច្ចប្រជុំស្តីពីការផ្សព្វផ្សាយព្រះរាជក្រឹត្យបន្ធូរបន្ថយទោស លើកលែងទោស និងការពង្រឹងការងារស្នើសុំអនុគ្រោះទោសកាលពីថ្ងៃទី ១៧ កុម្ភៈ ឆ្នាំ ២០២១ លោក កើត រិទ្ធ បញ្ជាក់ថា ពន្ធនាគារគឺជាកន្លែងមួយសម្រាប់អប់រំកែប្រែមនុស្សឱ្យមានការរាងចាល និងលែងប្រព្រឹត្តបទល្មើសបន្តទៀត។ ប៉ុន្តែទន្ទឹមគ្នានេះត្រូវមានការបណ្តុះបណ្តាលវិជ្ជាជីវៈមួយដល់ពួកគេ ព្រោះកម្ពុជាមិនមានច្បាប់ប្រហារជីវិតនោះទេ។
លោកថ្លែងថា៖ «ខ្ញុំបានជជែកជាមួយនឹង UN រួចហើយ។ ពន្ធនាគារ គឺជាកន្លែងដែលត្រូវរៀបចំឱ្យមានវគ្គបណ្តុះបណ្តាលវិជ្ជាជីវៈសម្រាប់គាត់ មានមុខរបរមួយ ហើយកន្លែងនេះ ខ្ញុំនឹងជជែកបន្ថែមទៀតជាមួយនឹងមន្ត្រីជំនាញរបស់ក្រសួងមហាផ្ទៃ»។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ បានឱ្យដឹងដែរថា កម្មវិធីបណ្តុះបណ្តាលវិជ្ជាជីវៈជូនដល់ទណ្ឌិតមាននៅក្នុងគ្រប់ពន្ធនាគារទាំងអស់នៅប្រទេសកម្ពុជា ប៉ុន្តែវាអាស្រ័យទៅលើពន្ធនាគារនោះតូច ឬធំ។
ដោយឡែកចំពោះពន្ធនាគារត្រពាំងផ្លុងក្នុងខេត្តត្បូងឃ្មុំ កម្មវិធីស្ដារនីតិសម្បទាមានរោងសិប្បកម្មផលិតទឹកសុទ្ធ សិប្បកម្មកែច្នៃគ្រឿងសង្ហារិមពីឈើ និងដែកនិងជំនាញបច្ចេកទេសនៃការដាំដុះបន្លែ បង្ការ និងការចិញ្ចឹមសត្វ។ នេះជាការឱ្យដឹងពីលោក នុត សវនា។
លោក សវនា បានបញ្ជាក់ថា៖ «ជាផែនការយុទ្ធសាស្ត្រ យើងចាំបាច់បង្កើតឱ្យមានកម្មវិធីទាំងនេះ នៅគ្រប់ពន្ធនាគារទាំងអស់អាស្រ័យទៅលើទំហំនៃទីតាំងពន្ធនាគារនីមួយៗ»។
លោក ស៊ឹង សែនករុណា មន្ត្រីអង្កេតជាន់ខ្ពស់ផ្នែកសិទ្ធិមនុស្សនៃសមាគម (ADHOC) ស្វាគមន៍នូវគំនិតផ្តួចផ្តើមឱ្យមានវគ្គបណ្តុះបណ្តាលវិជ្ជាជីវៈដល់ទណ្ឌិតដែលកំពុងជាប់ពន្ធនាគារ។ លោកជំរុញឱ្យឆាប់ចាប់ផ្តើមពិភាក្សាពីផែនការនេះ និងស្វែងរកជំនួយពីស្ថាប័នពាក់ព័ន្ធយកមកអនុវត្តឱ្យបានលឿន ដើម្បីឱ្យទណ្ឌិត ឬពិរុទ្ធជនទាំងនោះមានជំនាញវិជ្ជាជីវៈអាចប្រកបមុខរបរបានពេលចេញមកវិញ។
លោកថ្លែងថា៖ «វាជារឿងល្អ ខ្ញុំឃើញពន្ធនាគារមួយចំនួនមានវគ្គបណ្តុះបណ្តាលរួចហើយ ប៉ុន្តែមួយចំនួនទៀតមិនមាននោះទេ។ ខ្ញុំមិនដឹងថាមានមូលហេតុអ្វីទេ បញ្ហាថវិកា ឬក៏បញ្ហាអ្វីទេក្នុងការបង្កើតវគ្គបណ្តុះបណ្តាលនេះបានធ្វើឱ្យមានការខ្វះចន្លោះក្នុងការផ្តល់ជំនាញវិជ្ជាជីវៈជូនគាត់»៕