មណ្ឌលគិរីៈ មន្ត្រីបរិស្ថានបានលើកឡើងថា វត្ថុតាងដែលគេដឹងថា មានឡានរាប់រយគ្រឿង ម៉ូតូរាប់ពាន់គ្រឿង និងម៉ាស៊ីនអារឈើជាច្រើនផ្សេងទៀត ដែលកំពុងរក្សាទុកក្នុងស្នាក់ការកណ្ដាលដែនជម្រកសត្វព្រៃកែវសីមា ក្នុងខេត្តមណ្ឌលគិរី ស្ថិតក្រោមការគ្រប់គ្រងរបស់រដ្ឋបាលព្រៃឈើនៅឡើយ ថ្វីដ្បិតតែរាជរដ្ឋាភិបាលបានផ្ទេរដែនជម្រកសត្វព្រៃ ពីក្រសួងកសិកម្មមកឱ្យក្រសួងបរិស្ថានគ្រប់គ្រងអស់រយៈពេល ២ ឆ្នាំហើយក្ដី។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានប្រាប់កាសែតភ្នំពេញប៉ុស្ដិ៍ នៅពេលថ្មីៗនេះថា រាជរដ្ឋាភិបាលបានសម្រេចឱ្យផ្ទេរវត្ថុតាងដែលបង្ក្រាបបានពីតំបន់ដែនសត្វព្រៃកែវសីមាពីរដ្ឋបាលព្រៃឈើមកឱ្យមន្ទីរបរិស្ថានគ្រប់គ្រងជំនួសក្ដី ប៉ុន្តែមកដល់ពេលនេះ ពុំទាន់មានការផ្ទេរជាផ្លូវការនៅឡើយ ហើយកិច្ចការនេះ កំពុងស្ថិតក្នុងការពិភាក្សាគ្នារវាងក្រសួងបរិស្ថាន និងក្រសួងកសិកម្ម។
លោក សុភគ៌ ថ្លែងថា លោកចង់ឱ្យមានការផ្ទេរវត្ថុតាងទាំងនោះឱ្យមន្ទីរបរិស្ថាន ព្រោះបច្ចុប្បន្ន វត្ថុតាងមានដូចជាឡាន និងម៉ូតូ ដែលបង្ក្រាបពីក្រុមជនល្មើសជាបន្តបន្ទាប់ ត្រូវបានគេយកទៅរក្សាទុករាយប៉ាយនៅក្នុងស្នាក់ការកណ្ដាលដែនជម្រកសត្វព្រៃកែវសីមា និងកំពុងធ្វើឱ្យកកស្ទះការងាររបស់មន្ទីរបរិស្ថាន។
លោកបានថ្លែងថា៖ «ពិបាកទាំងខ្ញុំពិបាកទាំងខាងគាត់ (រដ្ឋបាលព្រៃឈើ)។ ខាងគាត់នោះត្រូវប្រើបុគ្គលិកមកយាម ហើយខាងខ្ញុំនេះ ក៏មិនដឹងត្រូវចាត់ចែងយ៉ាងម៉េច ព្រោះទីតាំងកែវសីមា ខ្ញុំត្រូវការប្រើប្រាស់ទីតាំងដើម្បីជាទីលានបណ្ដុះបណ្ដាលដល់ពេលអ៊ីចឹង វាស្ទះការងារខាងមន្ទីរខ្ញុំដែរ។ បើគេយកចេញស្រួលដែរ បើគេប្រគល់ឱ្យ ខ្ញុំប្រមូលអាឡានហ្នឹងដាក់គរម៉ាដុំលើគ្នាអ៊ីចឹងទៅកុំឱ្យវានៅរាយប៉ាយ»។
លោក កែវ សុភគ៌ បានអះអាងថាការពិភាក្សាគ្នានៅថ្នាក់ជាតិកន្លងមករវាងក្រសួងកសិកម្ម និងក្រសួងបរិស្ថាន គឺក្រសួងកសិកម្មធ្លាប់ចង់ដឹកជញ្ជូនឈើជាវត្ថុតាងចេញពីស្នាក់ការកណ្ដាលដែនជម្រកសត្វព្រៃកែវសីមា និងទុកវត្ថុតាងផ្សេងទៀត ដូចជាឡាន និងម៉ូតូដើម្បីផ្ទេរមកឱ្យក្រសួងបរិស្ថាន។
លោកថា៖ «តាមគំនិតខ្ញុំ ខ្ញុំចង់តែដាក់ដេញថ្លៃឱ្យអស់ទៅ កុំទុកវា ទុកយូរៗទៅគុណភាពវាកាន់តែខូច ទុកយូរកាន់ច្រែះប្រើការលែងកើត បើយើងចាត់ការអំឡុងពេលហ្នឹងទៅ វាអាចទៅកែកុនបានតិចតួច»។
កាលពីឆ្នាំ ២០១៦ ដែនជម្រកសត្វព្រៃកែវសីមាដែលមានផ្ទៃក្រឡាជិត ៣ សែនហិកតា ត្រូវបានរាជរដ្ឋាភិបាលសម្រេចផ្ទេរការគ្រប់គ្រងពីក្រសួងកសិកម្ម រុក្ខាប្រមាញ់ និងនេសាទ មកឱ្យក្រសួងបរិស្ថានជំនួសវិញ។
លោក នេត ភក្ត្រា អ្នកនាំពាក្យក្រសួងបរិស្ថានបានបញ្ជាក់ថា ទោះបីមានការផ្ទេរដីអភិរក្ស និងស្នាក់ការរដ្ឋបាលព្រៃឈើរបស់ក្រសួងកសិកម្ម មកឱ្យក្រសួងបរិស្ថានក៏ដោយ ប៉ុន្តែវត្ថុតាងដែលរដ្ឋបាលព្រៃឈើបង្ក្រាបបានគឺស្ថិតក្នុងការគ្រប់គ្រងរបស់រដ្ឋបាលព្រៃឈើដដែល។
លោកថា៖ «មិនទាន់មានការផ្ទេរឱ្យមកស្ថិតក្រោមការគ្រប់គ្រងរបស់ក្រសួងបរិស្ថាននៅឡើយទេ ព្រោះភាគច្រើននៃភ័ស្ដុតាងទាំងនេះ ស្ថិតនៅក្នុងសំណុំរឿងដែលកំពុងតែដំណើរការនៅចំពោះមុខតុលាការ ហើយរដ្ឋបាលព្រៃឈើជាម្ចាស់បណ្ដឹងដែលត្រូវបន្តដោះស្រាយ។ ការចាត់ចែងបន្តលើភ័ស្ដុតាងជាឈើ រថយន្ត ឬម៉ូតូដែលចាប់បានទាំងនោះគឺរង់ចាំការដោះស្រាយរួចរាល់ពីសំណាក់តុលាការជាមុនសិន»។
លោក អ៊ុំ វណ្ណសុភ័គ ប្រធានរដ្ឋបាលព្រៃឈើខេត្តមណ្ឌលគិរីបញ្ជាក់ដែរថា កន្លងមក រាល់វត្ថុតាងទាំងនោះ ត្រូវក្រសួងកសិកម្ម និងក្រសួងសេដ្ឋកិច្ចសម្រេចដាក់ដេញថ្លៃហើយ។
លោកថា៖ «កន្លងមកបានសិក្សាវាយតម្លៃគុណភាពហើយ។ ពុំបានដឹងអំពីចំនួនវត្ថុតាងនោះទេ»។
លោកមេធាវី សុក សំអឿន ថ្លែងថា តាមផ្លូវច្បាប់ វត្ថុតាងដែលបង្ក្រាបបាន គឺរដ្ឋត្រូវរក្សាទុកឱ្យបានត្រឹមត្រូវ ដើម្បីកុំឱ្យរបស់ទាំងនោះរងការខូចខាត ព្រោះប្រសិនបើតុលាការរកឃើញថា វត្ថុតាងខ្លះមិនជាប់ពាក់ព័ន្ធនឹងបទល្មើស គឺត្រូវប្រគល់ទៅឱ្យម្ចាស់ដើមប្រើប្រាស់វិញប៉ុន្តែវត្ថុដែលជាប់ពាក់ព័ន្ធនឹងបទល្មើស ឬការប្រព្រឹត្តខុសច្បាប់ គឺរដ្ឋមានសិទ្ធិរឹបអូសដើម្បីបម្រើដល់ប្រយោជន៍សាធារណៈ។
លោកថា៖ «ការដេញថ្លៃដើម្បីលក់យកថវិកាចូលរដ្ឋឬប្រើសម្រាប់ផលប្រយោជន៍របស់រដ្ឋអ៊ីចឹងទៅ ហើយបើរបស់ហ្នឹងទៅបំផ្លាញសុខភាពពលរដ្ឋ អាហ្នឹងអាចដុតបំផ្លាញចោល»៕