The Phnom Penh Post Search

Search form




Logo of Phnom Penh Post newspaper Phnom Penh Post - វប្បធម៌​និទ្ទណ្ឌ​ភាព​នៅ​តែ​បន្ត​ញាំ​ញី​សង្គម​កម្ពុជា




វប្បធម៌​និទ្ទណ្ឌ​ភាព​នៅ​តែ​បន្ត​ញាំ​ញី​សង្គម​កម្ពុជា

ប៉ូលិស​បាញ់​ទៅ​លើ​កម្មករ​តវ៉ា​នៅ​មុខ វត្ត​ស្ទឹង​មាន​ជ័យ កាល​ពី​ថ្ងៃ ទី១២ វិច្ឆិកា ឆ្នាំ​មុន។
ប៉ូលិស​បាញ់​ទៅ​លើ​កម្មករ​តវ៉ា​នៅ​មុខ វត្ត​ស្ទឹង​មាន​ជ័យ កាល​ពី​ថ្ងៃ ទី១២ វិច្ឆិកា ឆ្នាំ​មុន។ ភ្នំពេញ ប៉ុស្តិ៍

វប្បធម៌​និទ្ទណ្ឌ​ភាព​នៅ​តែ​បន្ត​ញាំ​ញី​សង្គម​កម្ពុជា

ភ្នំពេញៈ កាល​ពី​ថ្ងៃ​ពុធ​គឺជា​ខួប​គម្រប់​មួយ​ឆ្នាំ​ចាប់​តាំង​ពី​ប្រពន្ធ​លោក ង៉ែត វង្ស អ្នក​លក់​ចំណី​អាហារ​បាន​ស្លាប់ ប៉ុន្តែ ខណៈ​ដែល​ទុក្ខ​សោក​របស់​បុរស​ពោះ​ម៉ាយ​រូប​នេះ​ពុំ​បាត់​ទៅ​ណា​នោះ ការ​គាំពារ​បាន​ថយ​ចុះ។

ខណៈ​ដែល​លោក​កំពុង​លក់​ម្ហូប​អាហារ​នៅ​ហាង​គ្រួសារ​មួយ ដែល​ប្រពន្ធ​របស់​លោក​ត្រូវ​គេ​បាញ់​សម្លាប់​កាល​ពី​មួយ​ឆ្នាំ​មុន លោក វង្ស បាន​ថ្លែង​កាល​ពី​ថ្ងៃ​ពុធ​ថា៖ «បន្ទាប់​ពី​កើត​ហេតុ​ការណ៍​នោះ អាជ្ញាធរ​មក​មើល​យើង​ជា​ប្រចាំ។ ឥឡូវ​នេះ គេ​មិន​ដែល​មក​ទេ»។

អ្នក​ស្រី អេង សុខុម ប្រពន្ធ​លោក វង្ស ត្រូវ​បាន​សម្លាប់​ដោយ​គ្រាប់​កាំភ្លើង​របស់​នគរបាល​ក្នុង​អំឡុង​ការ​ប៉ះ​ទង្គិច​គ្នា​រវាង​កង​កម្លាំង​ប្រដាប់​អាវុធ​របស់​រដ្ឋាភិបាល​និង​ក្រុម​កម្មករ​កាត់​ដេរ​ដែល​ធ្វើ​កូដកម្ម និង​យុវជន​គប់​ដុំ​ថ្ម នៅ ខណ្ឌ​មាន​ជ័យ រាជធានី​ភ្នំពេញ។

លោក វង្ស បាន​រំឭក​ថា៖ «យើង​នៅ​ជាមួយ​គ្នា​ពេល​កើត​ហេតុ​ការណ៍​នោះ។ នគរបាល​ព្រៃផ្សៃ​ណាស់។ គេ​បាញ់​កាំភ្លើង​ហើយ​វាយ​ដំ​មក​លើ​មនុស្ស»។

អ្នក​ស្រី សុខុម ដែល​មាន​អាយុ ៤៩​ឆ្នាំ ពេល​នោះ ត្រូវ​គ្រាប់​ចំ​ដើម​ទ្រូង។ នៅ​ពេល​អ្នក​ស្រី​ត្រូវ​គ្រាប់​ក្រុម​គ្រួសារ​បាន​ដឹក​ទៅ​សង្គ្រោះ​នៅ​មន្ទីរពេទ្យ ប៉ុន្តែ​វា​យឺត​ពេល​ទៅ​ហើយ។

មួយ​ឆ្នាំ​ក្រោយ​មក លោក វង្ស និង​កូន​ស្រី​បាន​ថ្លែង​ថា ពួក​គេ​គ្មាន​ទទួល​បាន​សំណង​អ្វី​ទេ ក្រៅ​ពី​ថ្លៃ​ធ្វើ​បុណ្យ​សព។ លោក​បន្ថែម​ថា៖ «យើង​ពិបាក​រក​ស៊ី​ណាស់ ឥឡូវ​នេះ ព្រោះ​យើង​មាន​តែ​ពីរ​នាក់។ ឥឡូវ​នេះ យើង​មាន​បញ្ហា​ជាមួយ​នឹង​ធនាគារ ហើយ​យើង​ត្រូវ​បង់​សង​ប្រាក់​កម្ចី»។ ប៉ុន្តែ ក្រៅ​ពី​សំណង​ហិរញ្ញវត្ថុ ប្តី និង​កូន​ស្រី​របស់​អ្នក​ស្រី សុខុម បាន​ថ្លែង​ថា ពួក​គេ​គ្រាន់​តែ​ចង់​បាន​យុតិ្តធម៌។

លោក វង្ស បន្ថែម​ថា៖ «រដ្ឋាភិបាល​គួរ​ទទួល​ខុស​ត្រូវ​ចំពោះ​អ្វី​ដែល​បាន​កើត​ឡើង»។

នៅ​ពេល​អ្នក​ស្រី សុខុម ស្លាប់ គណៈកម្មាធិការ​ប្រព្រឹត្តិកម្ម​នៃ​អង្គ​ការ​សមាគម​ការពារ​សិទិ្ធ​មនុស្ស​កម្ពុជា (CHRAC) បាន​ថ្លែង​ថា៖ «មាន​ភ័ស្តុតាង​វីដេអូ​ច្បាស់​ដែល​បង្ហាញ​ថា លោក​ឧត្តម​សេនីយ៍ ជួន សុវណ្ណ ស្នងការ​នគរបាល​រាជធានី​បាន​បញ្ជា​នគរបាល​បង្ក្រាប​កុបកម្ម​ប្រើ​អំពើ​ហិង្សា​លើ​បាតុករ»។

CHRAC បាន​អំពាវនាវ​ឲ្យ​មាន​ការ​ស៊ើប​អង្កេត​ត្រឹម​ត្រូវ និង​ពេញ​លេញ​ក្នុង​ករណី​អ្នក​ស្រី សុខុម ស្លាប់ ហើយ​បាន​ថ្លែង​ថា លោក សុវណ្ណ «ត្រូវ​តែ​ទទួល​ខុស​ត្រូវ​ដក​ចេញ​ពី​តំណែង​និង​ទទួល​ខុស​ត្រូវ​ផ្លូវ​ច្បាប់»។ ប៉ុន្តែ​មួយ​ឆ្នាំ​ក្រោយ​មក លោក សុវណ្ណ នៅ​តែ​កាន់​តំណែង​ស្នងការ​ដដែល។

លោក សុវណ្ណ មិន​អាច​ទាក់​ទង​បាន​ទេ កាល​ពី​ថ្ងៃ​ពុធ។

លោក Neil Loughlin ទីប្រឹក្សា​បច្ចេក​ទេស​នៃ​សមាគម​អាដហុក ដែល​ជា​សមាជិក​មួយ​របស់ CHRAC បាន​ថ្លែង​ថា៖ «កង្វះ​នៃ​ចំណាត់ការ​ផ្លូវ​ច្បាប់​ជា​ថ្មី​ម្តង​ទៀត​បង្ហាញ​ថា និទ្ទណ្ឌ​ភាព​នៅ​មាន កង​សន្តិសុខ​អាច​សម្លាប់​ពលរដ្ឋ ហើយ​បាញ់​កាំភ្លើង​មិន​រើស​មុខ​លើ​បាតុករ​ហើយ​គ្មាន​ទោស»។

លោក គៀត ច័ន្ទថារិទ្ធ អ្នក​នាំ​ពាក្យ​នគរបាល​ជាតិ និង​មន្រ្តី​ក្រសួង​មហាផ្ទៃ​មួយ​ចំនួន​មិន​អាច​ទាក់​ទង​បាន​ទេ។

នៅ​ពេល​សួរ​អំពី​ការ​ស៊ើប​អង្កេត​ក្នុង​ករណី​អ្នក​ស្រី សុខុម ស្លាប់ លោក ផៃ ស៊ីផាន អ្នក​នាំ​ពាក្យ​រដ្ឋាភិបាល​បាន​ថ្លែង​ថា៖ «យើង​នឹង​រង់​ចាំ​មើល​ថា តើ​មាន​អ្វី​កើត​ឡើង​ជាមួយ​នឹង​តុលាការ»។

ប៉ុន្តែ ក្នុង​វេទិកា​កាល​ពី​ថ្ងៃ​ពុធ​ស្តីពី «ការ​បញ្ចប់​និទ្ទណ្ឌ​ភាព​នៅ​កម្ពុជា» អង្គការ​មិន​មែន​រដ្ឋាភិបាល​បាន​កំណត់​ថា តុលាការ​គឺជា​អ្នក​ជំរុញ​ឲ្យ​មាន​វប្បធម៌​និទ្ទណ្ឌ​ភាព។

លោក ព្រាប កុល នាយក​ប្រតិបតិ្ត​នៃ​អង្គការ​តម្លាភាព​អន្តរជាតិ ថ្លែង​ថា៖ «ស្ថាប័ន​តុលាការ គឺជា​ស្ថាប័ន​ពុក​រលួយ​បំផុត ដែល​មាន​សេចក្តី​សុចរិត​ទន់​ខ្សោយ»។ លោក​បន្ថែម​ថា៖ «និទ្ទណ្ឌ​ភាព​មាន​យ៉ាង​ងាយ​ដោយ​សារ​មន្រ្តី​ពុក​រលួយ ឬ​ជន​ល្មើស​អាច​ចៀស​វាង​ប្រព័ន្ធ​តុលាការ ដោយ​ប្រើ​ប្រាស់​ឥទិ្ធពល​នយោបាយ ប្រាក់ អំណាច និង​ទំនាក់​ទំនង​ប្រឆាំង​នឹង​អ្នក​ទន់​ខ្សោយ»។

លោក នី ចរិយា នៃ​សមាគម​អាដហុក ថ្លែង​ថា និទ្ទណ្ឌភាព​នៅ​តុលាការ​កើត​មាន ១០០ ភាគរយ៕

រាយការណ៍​បន្ថែម​ដោយ ប៉ិច សុធារី

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។