.jpg)
អគារត្រូវបានវាយកម្ទេចចោល ដោយថាសង់គ្មានច្បាប់។ រូបថត ហ្វេសប៊ុក
អគារសំណាកដ៏ធំមួយ ស្ថិតនៅរង្វង់មូលច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ ត្រូវបានវាយកម្ទេចចោល បន្ទាប់ពីក្រសួងមហាផ្ទៃ បញ្ជាឲ្យរុះរើចេញដោយចាត់ទុកថា សំណង់នេះសាងសង់គ្មានច្បាប់ និងខុសលក្ខណៈបច្ចេកទេសដែលសង់លើផ្លូវសួនច្បារសាធារណៈ។
តាមគេហទំព័ររបស់ក្រសួងសាធារណការ និងដឹកជញ្ចូន បានឲ្យដឹងកាលពីថ្ងៃទី ១៤ តុលា ថា សំណង់អគារនៅរង្វង់មូលក្រុងប៉ោយប៉ែត មានរចនាប្រាសាទកំពូល ៣ ដែលផ្តួចផ្តើមសាងសង់ដោយ លោក សាន ស៊ានហូ អតីតអភិបាលក្រុងប៉ោយប៉ែត ត្រូវបានវាយកម្ទេចចោលវិញហើយ ចាប់តាំងពីថ្ងៃទី ១២ ខែតុលា មក។
គេហទំព័រដដែលបញ្ជាក់ថា៖ «គម្រោងសង់រង្វង់មូលឋានសួគ៌ប្រាសាទកំពូល ៣ នេះ បានបញ្ចុះបឋមសិលាកាលពីឆ្នាំ ២០១៨ ដោយមានគណអធិបតីសំខាន់ៗជាច្រើននាក់ ព្រមទាំងមានការចូលរួមពីប្រជាពលរដ្ឋ សិស្សានុសិស្សរាប់ពាន់នាក់។ តាមគ្រោងការសាងសង់រង្វង់មូលនេះ មានតម្លៃជាង ៥០ ម៉ឺនដុល្លារ មានកម្ពស់ ២៣ ម៉ែត្រ និងទំហំ ៤១ ម៉ែត្រ»។
លោក អ៊ុំ រាត្រី អភិបាលខេត្តបន្ទាយមានជ័យ និងលោក គាត ហ៊ុល អភិបាលក្រុងប៉ោយប៉ែត ពីម្សិលមិញមិនអាចសុំអត្ថាធិប្បាយជុំវិញពីការវាយកម្ទេចអគារនោះបានទេ ដោយពួកលោកអះអាងថា កំពុងជាប់រវល់។
យោងតាមលិខិតមួយច្បាប់ចុះថ្ងៃទី ៣០ ខែ កក្កដា ឆ្នាំ ២០២០ ដែលបានផ្ញើមកកាន់លោក អ៊ុំ រាត្រី អភិបាលខេត្តបន្ទាយមានជ័យ និងទើបត្រូវបានផ្សព្វផ្សាយកាលពីថ្មីៗនេះ បានសរសេរថា គម្រោងសាងសង់សំណាកប្រាសាទកំពូល ៣ (ប្រាសាទឋានសួគ៌) ស្ថិតនៅរង្វង់មូលក្រុងប៉ោយប៉ែត គឺក្រសួងមហាផ្ទៃ ពិនិត្យឃើញថា ដោយសារសំណង់អគារច្រកទ្វារព្រំដែនអន្តរជាតិប៉ោយប៉ែត មានរូបប្រាសាទកំពូល ៣ និងមានរចនាប័ទ្មជាខ្មែររួចហើយ ហេតុនេះពុំចាំបាច់សាងសង់ទៀតឡើយ។
លោក សក់ សេដ្ឋា រដ្ឋលេខាធិការក្រសួងមហាផ្ទៃ លើកឡើងក្នុងលិខិតនោះថា ដើម្បីចៀសវាងផលប៉ះពាល់ដល់ប្រព័ន្ធការពារសុវត្ថិភាពនៃរនាំងបាំងផ្លូវរថភ្លើងឆ្លងកាត់ផ្លូវជាតិ និងកិច្ចព្រមព្រៀងដឹកជញ្ជូនផ្លូវដែកនៃព្រះរាជាណាចក្រកម្ពុជា និងព្រះរាជាណាចក្រថៃ រដ្ឋបាលខេត្តបន្ទាយមានជ័យ ត្រូវបញ្ឈប់ការសាងសង់ និងធ្វើការរុះរើសំណង់នេះចេញ ដោយត្រូវត្រួតពិនិត្យលក្ខណៈបច្ចេកទេសឱ្យបានហ្មត់ចត់ ដើម្បីបង្ការហានិភ័យជាយថាហេតុ។
លោកបញ្ជាក់ក្នុងលិខិតថា៖ «គួរត្រួតពិនិត្យរៀបចំជាសួនច្បារដើម្បីលើកកម្ពស់សោភ័ណភាពក្រុងប៉ោយប៉ែតឲ្យកាន់តែប្រសើរបន្ថែមទៀត»។
លោក ស៊ុំ ចន្ទគា មន្ត្រីសម្របសម្រួលសមាគម (Adhoc) ប្រចាំខេត្តបន្ទាយមានជ័យលើកឡើងថា គម្រោងមួយចំនួនរបស់អាជ្ញាធរ គឺតែងតែធ្វើតាមការនឹកឃើញរបស់ខ្លួន ដោយគ្មានគម្រោង និងផែនការច្បាស់លាស់នោះទេ។
ដូចជាក្នុងករណីនេះអ៊ីចឹង ការសាងសង់អគារសំណាកនេះឡើង ក៏ធ្វើទៅតាមការនឹកឃើញ និងអារម្មណ៍របស់មនុស្ស ដោយគ្មានការសិក្សានោះដែរ។
លោកបញ្ជាក់ថា៖ «ការសាងសង់ និងវាយកម្ទេច វាគ្មានអ្វីប្លែក គេចង់ធ្វើ ក៏ធ្វើទៅ។ ដល់គេថា កន្លែងហ្នឹងមិនសមអ៊ីចេះមិនសមអ៊ីចុះ ក៏កម្ទេចចោលវិញទៅ។ ដូច្នេះ គ្មានអ្វីអស្ចារ្យ បំផ្លាញតែថវិការដ្ឋឥតប្រយោជន៍។ គ្មានយុទ្ធសាស្ត្រ គ្មានទស្សនៈវែងឆ្ងាយ ដែលហៅជាគោលការណ៍មួយច្បាស់លាស់ទេ។ ចំពោះខ្ញុំវិញ មុននឹងធ្វើអ្វីមួយត្រូវពិនិត្យមើលនិរន្តរភាពឲ្យបានវែងឆ្ងាយ ថា កន្លែងហ្នឹង គួរធ្វើ ឬអត់។ បើធ្វើប៉ះពាល់អ្វី តើវាសមអត់ សម្រាប់ប្រទេសជាតិ»។
គិតត្រឹមថ្ងៃ ១៥ តុលា នេះ ការវាយកម្ទេចអគារសំណាករង្វង់មូលប៉ោយប៉ែតមួយនេះ គឺនៅសល់ប្រមាណជា ៤០ ភាគរយទៀតប៉ុណ្ណោះ បន្ទាប់អាជ្ញាធរបានផ្តើមវាយកម្ទេចផ្នែកលើៗ និងផ្នែកខ្លះ ដោយហ៊ុមព័ទ្ធជារបងព័ទ្ធជុំវិញតាំងពីថ្ងៃ ១២ តុលា មក។ នេះបើតាមលោក ស៊ុំ ចន្ទគា ដែលបានចុះទៅដល់ទីតាំងនេះផ្ទាល់៕
