.jpg)
អ្នកគ្រូម្នាក់កំពុងបង្រៀនសិស្សនៅសាលាបឋមសិក្សាមួយនៅស្រុកឧត្តុងខេត្តកំពង់ស្ពឺ។ ផា លីណា
ភ្នំពេញៈ ការចាប់ផ្តើមគោលនយោបាយសាលាកុមារមេត្រីជាតិក្នុងរយៈកាលមួយទសវត្សរ៍បានធ្វើដំណើរឆ្ពោះទៅរកការធ្វើឲ្យមានសុខដុមនីយកម្មចំពោះកម្មវិធីអប់រំរបស់កម្ពុជាដោយនាំឲ្យមានភាពស៊ីគ្នាចំពោះកម្មវិធីសិក្សាដែលកាលពីមុនមិនសូវមានលក្ខណៈស៊ីគ្នា។
លោក ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡាបានសើរើទាំងស្រុងចំពោះស្តង់ដារប្រឡងរបស់សិស្សថ្នាក់អនុវិទ្យាល័យ និងវិទ្យាល័យដែលមានន័យថាសញ្ញាបត្រនាពេលឥឡូវនេះបង្ហាញពីការខិតខំរៀនពិតប្រាកដជាជាងគ្រាន់តែមានតែវត្តមាន។
ជាជាងការតម្រូវឲ្យមានអគារសាលាថ្មីកម្មវិធីសាលាកុមារមេត្រី ពិនិត្យមើលទៅលើថាតើសាលាដំណើរការ និងតម្រូវឲ្យមានការអនុវត្តដូចម្តេចចំពោះស្តង់ដារ និងគំនិតដែលនាំមកនូវភាពផ្លាស់ប្តូរ។
លោក ចាន់ សុភា លេខារងនៃក្រុមប្រឹក្សាកម្ពុជាដើម្បីការអភិវឌ្ឍយុវជន និងជាប្រធាននាយកដ្ឋានសាលាបឋមសិក្សាថ្លែងថាដើម្បីបំពេញបានទៅតាមកម្មវិធីសាលាកុមារមេត្រីសាលាត្រូវមានធាតុផ្សំចំនួន ៦។
ទី ១ គឺត្រូវផ្តល់ឱកាសសិក្សាដល់ក្មេងទាំងអស់ដោយមិនគិតពីមធ្យោបាយ និងកន្លែងនៅក្នុងសាលា។ ទី ២ សាលាគួរកែលម្អគុណភាពនៃការរៀន និងការបង្រៀន និងធ្វើអ្វីគ្រប់យ៉ាងដើម្បីជួយឲ្យសិស្សរៀនទាន់នៅក្នុងការសិក្សារបស់ខ្លួន។ បើតាមតួលេខចុងក្រោយបំផុតដែលទទួលបានពីក្រសួងអប់រំក្មេងប្រហែល ៩៧ ភាគរយបច្ចុប្បន្ននេះបានចុះឈ្មោះចូលរៀន។ ទី ៣ គឺពាក់ព័ន្ធនឹងសិទ្ធិកុមារ និងបរិយាកាសសាលារៀន។
លោក សុភា បានថ្លែងថា៖ «យើងចង់ឲ្យមានការបង្រៀនដោយមិនមានការប្រើហិង្សាដូចជាការវាយ ឬដាក់ទណ្ឌកម្មសិស្ស»។ «បរិយាកាសសាលារៀនក៏សំខាន់ខ្លាំងផងដែរដោយសារយើងត្រូវតែធ្វើឲ្យថ្នាក់រៀនស្អាត និងមានរបៀបដើម្បីឲ្យសិស្សចង់មករៀន និងបន្តចាប់អារម្មណ៍ចំពោះការសិក្សា»។
ទី ៤ គឺមិនគួរមានការរើសអើងផ្អែកលើយេនឌ័រទេ។
លោក សុភា បន្តថា៖ «ការគោរពយេនឌ័រមានន័យថាជាការលើកកម្ពស់សេរីភាពរបស់សិស្សទាំងសិស្សប្រុស និងសិស្សស្រីដើម្បីទទួលបានឱកាសស្មើភាពគ្នាចំពោះការអប់រំ»។
ទី ៥ គឺតម្រូវឲ្យមានការចូលរួមពីគ្រួសារ និងសហគមន៍ទាំងមូលនៅក្នុងការអប់រំ និងអនុញ្ញាតឲ្យមានការស្តាប់ពីសិស្សផងដែរ។
លោក សុភា ថ្លែងថា៖ «នេះគឺជាអ្វីមួយដែលឪពុកម្តាយ និងអាណាព្យាបាលទាំងអស់ត្រូវយល់ និងជាមូលហេតុដែលយើងបានបង្កើតក្រុមប្រឹក្សាកុមារនៅតាមសាលា»។
លោកបញ្ជាក់ថា៖ «នៅពេលណាក៏ដោយដែលសាលា ឬសហគមន៍មួយប្រជុំដើម្បីសម្រេចលើអ្វីមួយក្រុមប្រឹក្សាកុមារនឹងចូលរួមផងដែរ ដើម្បីផ្តល់មតិយោបល់។ ទោះយ៉ាងណាក្តីអ្នកវ័យក្មេងត្រូវតែគោរពអ្នកវ័យចាស់ផងដែរ។ បើតាមទំនៀមទម្លាប់កម្ពុជាអ្នកវ័យក្មេងមិនគួរលូកមាត់និយាយកាត់ទេនៅពេលមនុស្សចាស់ជាងកំពុងនិយាយគ្នា។
ទី ៦ គឺការអំពាវនាវឲ្យមានការគាំទ្រពីរដ្ឋាភិបាលទាំងភ័ស្តុភារ និងហិរញ្ញវត្ថុសម្រាប់សាលាទាំងអស់នៅក្នុងប្រទេសកម្ពុជា។
លោក សុភា ថ្លែងបន្តថា៖ «ការគាំទ្រជាប្រព័ន្ធមានន័យថាក្រសួងអប់រំ យុវជន និងកីឡានឹងបញ្ជូនប្រតិភូ និងថវិកាទៅតាមតម្រូវការរបស់សាលានីមួយៗ»។ លោកបានបន្ថែមថាតួលេខរបស់ក្រសួងបង្ហាញថា កម្ពុជាមានសាលាប្រមាណ ៧១៨៩ ដែលបង្រៀនពីថ្នាក់ទី ១ ដល់ថ្នាក់ទី ៦។
លោក សុភា បន្តថា៖ «នៅក្នុងខេត្តក្រុងចំនួន ១២ ក្នុងប្រទេសកម្ពុជា រដ្ឋាភិបាលបានផ្គត់ផ្គង់អង្ករ ២ តោន និងអាហារដទៃៗទៀតជាប្រចាំឆ្នាំទៅដល់កម្មវិធីមួយដែលផ្តល់អាហារមួយពេលក្នុងមួយថ្ងៃដល់សិស្សទាំងអស់»។
លោកបានឲ្យដឹងថា៖ «ជាងនេះទៅទៀតមានសិស្សក្រីក្រប្រហែល ៩ ម៉ឺននាក់ទទួលបានការជួយផ្នែកហិរញ្ញវត្ថុចំនួន ២៤ ម៉ឺនរៀល (៦០ ដុល្លារ) ក្នុង ១ ឆ្នាំ»៕ PS
