.jpg)
លោកគ្រូកំពុងបង្រៀនកូនសិស្សនៅតាមផ្ទះនៅខេត្តកំពង់ឆ្នាំង អំឡុងពេលមានការរីករាលដាលនៃជំងឺកូវីដ ១៩។ រូបថត ក្រសួងអប់រំ
ភ្នំពេញៈ វិបត្ដិជំងឺកូវីដ ១៩ បានបង្កឱ្យមានផលប៉ះពាល់ និងការលំបាកដល់គ្រូបង្រៀន និងបុគ្គលិកសិក្សាជាង ២០ ម៉ឺននាក់នៅកម្ពុជា ដោយគ្រូបង្រៀនត្រូវផ្លាស់ប្តូរឥរិយាបថក្នុងការបង្រៀនដោយត្រូវសម្របខ្លួនទៅលើការបង្រៀនបែបថ្មី (ឌីជីថល) ដើម្បីដើរឱ្យទាន់សភាពការណ៍វិវត្តន៍។
សេចក្ដីណែនាំព័ត៌មានរបស់អង្គការ UNESCO សម្រាប់ការប្រារព្ធទិវាគ្រូបង្រៀនពិភពលោកនៅថ្ងៃទី ៥ ខែ តុលា ឆ្នាំ ២០២០ នេះក្រោមប្រធានបទ «គ្រូបង្រៀនឆ្លាតវៃ ដើម្បីការអប់រំឌីជីថល» (Smart Teachers for Digital Education) បានបង្ហាញថា ជំងឺកូវីដ ១៩ បានបង្កផលប៉ះពាល់ដល់អ្នកសិក្សាជិត ១,៦ ពាន់លាននាក់នៅគ្រប់កម្រិតសិក្សាទាំងអស់ហើយ ៦៣ លាននាក់ទៀត នៅកម្រិតបឋមសិក្សា និងអនុវិទ្យាល័យនៃប្រទេសចំនួន ១៩០ ទូទាំងពិភពលោក។ ចំណែកនៅក្នុងប្រទេសកម្ពុជា បុគ្គលិកសិក្សាប្រមាណ ១១៣ ០០០ នាក់ និងគ្រូបង្រៀន ៩៣ ២២៥ នាក់ បានរងផលប៉ះពាល់ពីវិបត្ដិកូវីដ ១៩ នេះផងដែរ។
អង្គការ UNESCO បង្ហាញថា៖ «ស្របតាមការអនុវត្ដរបស់ក្រសួងអប់រំដោយបានបិទសាលារៀនទាំងអស់កាលពីថ្ងៃទី ១៦ ខែ មីនា ឆ្នាំ ២០២០ ក្រសួងអប់រំកម្ពុជាបានបន្តកម្មវិធីសិក្សាក្នុងនោះគ្រូបង្រៀនជាច្រើនបានផ្លាស់ប្ដូរឥរិយាបថនៃការបង្រៀនរបស់ខ្លួនដើម្បីដើរឱ្យទាន់សភាពការវិវឌ្ឍ។ តាមរយៈពេលវេលាដ៏ខ្លីគ្រូបង្រៀន គឺជាអ្នកនៅជួរមុខចំពោះវិស័យអប់រំគឺត្រូវបានសម្របខ្លួនទៅលើការបង្រៀនបែបថ្មី (ឌីជីថល)»។
អង្គការ UNESCO បន្ដថា ចំពោះការផ្លាស់ប្ដូរនៃការបង្រៀន និងការរៀន ដូចជាការបង្រៀន និងការរៀនពីចម្ងាយ គ្រូបង្រៀនត្រូវបានរៀនសូត្រពីរបៀបទាំងនេះក្នុងនោះគ្រូបង្រៀនក៏ត្រូវចុះតាមដានការសិក្សារបស់សិស្សដោយផ្ទាល់ដល់ផ្ទះរបស់ពួកគេ ដើម្បីឱ្យប្រាកដថា សិស្សគឺនៅបន្តការសិក្សា។
លោក ទិន ឆៃស្រេង គ្រូបង្រៀននៅសាលាបឋមសិក្សាគោកបញ្ជាន់ស្ថិតក្នុងសង្កាត់ចោមចៅ ខណ្ឌពោធិ៍សែនជ័យបានលើកឡើងថា ក្នុងពេលវិបត្ដិកូវីដ ១៩ ក្រសួងអប់រំបានបិទសាលារៀន។ ការរៀន និងការបង្រៀនគឺមានការផ្លាស់ប្ដូរទៅតាមការណែនាំថ្មីរបស់ក្រសួងអបរំក្នុងនោះគឺសាលារៀនត្រូវយកឯកសារដែលក្រសួងផ្ដល់ឱ្យយកទៅចែកដល់សិស្សសម្រាប់សិក្សាដោយខ្លួនឯងនៅឯផ្ទះជារៀងរាល់សប្ដាហ៍។ ចំណែកគ្រូបង្រៀនវិញគឺធ្វើការតាមដានការរៀនរបស់សិស្សលើកិច្ចការងារសិក្សានៅផ្ទះនោះ។
លោកបន្ដថា៖ «យើងឱ្យសិស្សមកយកឯកសារទៅសិក្សានៅផ្ទះជារៀងរាល់ថ្ងៃសៅរ៍នៅរៀងរាល់សប្ដាហ៍ក្នុងនោះយើងក៏ទទួលយកកិច្ចការងារចាស់ដែលបានឱ្យទៅកាលពីថ្ងៃសៅរ៍កន្លងមកវិញដើម្បីពិនិត្យដែរ។ យើងមិនបានបង្រៀនដោយផ្ទាល់ដល់សិស្សទេ ដូច្នេះសិស្សក៏មានការលំបាកក្នុងការសិក្សាដែរ»។
លោក ឆៃស្រេង បានបញ្ជាក់ថា ការបើកប្រាក់បៀវត្សរ៍គោលសម្រាប់គ្រូបង្រៀនក្នុងពេលវិបត្ដិកូវីដ១៩នេះ គឺមិនមានការអាក់ខានទេ គឺនៅតែបន្តបើកដោយធម្មតា។
ក្រសួងអប់រំកាលពីថ្ងៃទី ៣០ ខែកញ្ញា បានប្រកាសរៀបចំប្រារព្ធពិធីអបអរសាទរទិវាគ្រូបង្រៀន ៥ តុលា ឆ្នាំ ២០២០ ក្រោមប្រធានបទ «គ្រូបង្រៀនឆ្លាតវៃ ដើម្បីការអប់រំឌីជីថល» នៅវិទ្យាស្ថានជាតិអប់រំរយៈពេល ១ ថ្ងៃ ដោយមានការចូលរួមពីលោកគ្រូ អ្នកគ្រូ បុគ្គលិកអប់រំ សមាគមបុគ្គលិកសិក្សាខ្មែរ សមាគមគ្រឹះស្ថានឧត្ដមសិក្សា និងតំណាងដៃគូអភិវឌ្ឍន៍ពាក់ព័ន្ធ។
លោក រស់ សុវាចា អ្នកនាំពាក្យក្រសួងអប់រំបានប្រាប់ពីម្សិលមិញថា គ្រូបង្រៀនគ្រប់កម្រិតទូទាំងប្រទេសមានចំនួនប្រមាណ ១២ ម៉ឺននាក់។ ក្រសួងអប់រំផ្តោតលើការលើកកម្ពស់គុណវុឌ្ឍិ និងជីវភាពរបស់គ្រូបង្រៀន សម្រាប់ចូលរួមចំណែកលើកកម្ពស់គុណភាពអប់រំដូចមានចែងនៅក្នុងផែនការយុទ្ធសាស្ត្រវិស័យអប់រំឆ្នាំ ២០១៩-២០២៣ ដែលមានបំណងចូលរួមជាមួយរាជរដ្ឋាភិបាលក្នុងការអភិវឌ្ឍមូលធនមនុស្សសម្រាប់ប្រែក្លាយសេដ្ឋកិច្ចកម្ពុជាឱ្យមានចំណូលមធ្យមកម្រិតខ្ពស់ក្នុងឆ្នាំ ២០៣០ និងក្លាយជាប្រទេសអភិវឌ្ឍន៍នៅឆ្នាំ ២០៥០។
លោកថ្លែងថា៖ «ក្នុងបរិការណ៍នេះ គ្រូបង្រៀនដើរតួនាទីសំខាន់មួយក្នុងការលើកកម្ពស់គុណភាពរៀន និងបង្រៀន ជាពិសេសក្នុងបរិបទកូវីដ ១៩ ដោយអនុវត្តវិធីសាស្ត្របង្រៀន និងរៀនបែបចម្រុះ និងឆ្លាស់វេនគ្នាគឺក្នុងថ្នាក់រៀនផង តាមអនឡាញផង និងអមដោយការប្រើប្រាស់ក្រដាសកិច្ចការជំនួយ និងសៀវភៅសិក្សាគោល»។
លោក សុវាចា បានឱ្យដឹងថា ប្រាក់ខែគ្រូបង្រៀននៅឆ្នាំ ២០១៥ គឺចន្លោះជាង ៥ សែនរៀល ដល់ ១ លាន ២ សែនរៀល។ ចំណែកប្រាក់ខែគ្រូបង្រៀននៅឆ្នាំ ២០២០ គឺចន្លោះ ១ លាន ២ សែនរៀល ដល់ ២ លាន ១ សែនរៀល។
លោកបន្តថា៖ «ក្រសួងអប់រំ សូមគោរពថ្លែងអំណរគុណចំពោះលោកគ្រូ អ្នកគ្រូ សាស្ត្រាចារ្យ បុគ្គលិកអប់រំគ្រប់លំដាប់ថ្នាក់ និងគ្រប់ភាគីពាក់ព័ន្ធដែលបានខិតខំប្រឹងប្រែងបំពេញកម្រងភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ និងមនសិការស្នេហាជាតិ។ ឧបការគុណនេះជាការចូលរួមចំណែកដ៏សំខាន់ក្នុងការលើកកម្ពស់គុណភាពមូលធនមនុស្សកម្ពុជា»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យបានបន្តអំពាវនាវដល់រាជរដ្ឋាភិបាល និងក្រសួងអប់រំឱ្យយកចិត្ដទុកដាក់ដល់ជីវភាព និងការរស់នៅរបស់គ្រូបង្រៀនដោយកុំបណ្ដោយឱ្យគ្រូបង្រៀនទៅបង្កើតមុខរបរថ្មីក្នុងពេលមានអាជីពជាគ្រូបង្រៀន។
លោកស្រីបន្តថា៖ «រដ្ឋាភិបាលគួរគិតគូរធ្វើយ៉ាងណាបន្តដំឡើងប្រាក់បៀវត្សរ៍ដល់គ្រូបង្រៀនឱ្យបានចំនួន ២ លានរៀលដូចគ្នា ព្រោះបច្ចុប្បន្នគ្រូបង្រៀនខ្លះមិនទាន់បានប្រាក់ខែដល់ ២ លានរៀលទេ។ យើងក៏ចង់ឱ្យក្រសួងអប់រំ យុវជន និងកីឡាបើកទូលាយថែមទៀតចំពោះការបង្រៀនរបស់គ្រូ កុំឱ្យមានការរឹតត្បិត ពិសេសចំពោះការបង្រៀនផ្នែកប្រវត្ដិសាស្ដ្ររបស់ខ្មែរ ដើម្បីអាចឱ្យសិស្សបានស្គាល់ពីប្រវត្ដិរបស់ខ្លួន»៕
វីដេអូ៖
