វីងលើកទឹកចិត្តភ្នាក់ងារ និងសហគមន៍របស់ខ្លួនឱ្យប្រកាន់ខ្ជាប់នូវការប្រុងប្រយ័ត្នចំពោះកូវីដ ១៩ ដើម្បីសុវត្ថិភាពរបស់ពួកគេ!
នៅពេលដែលប្រទេសកម្ពុជាកំពុងបន្តប្រឈមនឹងបញ្ហាដែលបណ្តាលមកពីជំងឺរាតត្បាតកូវីដ ១៩ ធនាគារឯកទេសវីង (ខេមបូឌា) លីមីតធីត បានបង្កើនវិធានការប្រុងប្រយ័ត្ននៅតាមភ្នាក់ងារវីងទូទាំងប្រទេស។
លោក ម៉ានូ រ៉ាចាន់ អគ្គនាយកនៃធនាគារឯកទេស វីង បានមានប្រសាសន៍ថា៖ «យើងបានធ្វើការយ៉ាងជិតស្និទ្ធជាមួយភ្នាក់ងាររបស់យើងនៅទូទាំងប្រទេស ដើម្បីធានាថាពួកគេអនុវត្តវិធានការដើម្បីការពារពីការឆ្លងជំងឺនេះ។ ឥឡូវនេះយើងក៏បានសម្រេចចិត្តចាត់វិធានការផ្សេងបន្ថែមទៀតដើម្បីធានាសុវត្ថិភាពដល់ភ្នាក់ងារ និងសហគមន៍របស់យើង»។
អតិថិជនរបស់វីងនឹងឃើញនូវសញ្ញាដើម្បីធានាបាននូវគម្លាតសុវត្ថិភាពនៅពេលរង់ចាំ មានអាល់កុល ឬជែលលាងដៃ និងបណ្ណព័ត៌មានដែលជំរុញឱ្យសាធារណជនធ្វើតាមវិធីបង្ការកូវីដ ១៩ រួមមាន៖ ការពាក់ម៉ាស់ និងទៅពិនិត្យសុខភាពប្រសិនបើពួកគេមានរោគសញ្ញានៃជំងឺនេះ។ ភ្នាក់ងារវីងក៏តម្រូវឱ្យពាក់ម៉ាស់ និងផ្តល់ជូនអតិថិជននូវអាល់កុល ឬជែលលាងដៃផងដែរ។
លោកស្រី វឿន ម៉ារីណា ភ្នាក់ងារវីងនៅខេត្តកណ្តាលបានមានប្រសាសន៍ថា៖ «ខ្ញុំត្រូវពាក់ម៉ាស់ និងប្រកាន់យកការរក្សាគម្លាតសង្គមប្រកបដោយសុវត្ថិភាពនៅទីតាំងរបស់ខ្ញុំ។ នៅពេលមានអតិថិជនច្រើននៅទីនេះ ខ្ញុំលើកទឹកចិត្តពួកគឱ្យតម្រង់ជួរ និងធ្វើតាមស្លាកសុវត្ថិភាព។ ខ្ញុំក៏រក្សាទីតាំងរបស់ខ្ញុំឱ្យស្អាត និងផ្តល់ឱ្យអតិថិជននូវអាល់កុលលាងដៃផងដែរ»។
វីងបានខិតខំប្រឹងប្រែងជាច្រើនចាប់តាំងពីខែមីនា ឆ្នាំ ២០២០ ដើម្បីជំរុញការយល់ដឹងអំពីកូវីដ ១៩។ ទាំងនេះរួមបញ្ចូលការផ្សព្វផ្សាយអំពីការយល់ដឹងនៃគម្លាតសុវត្ថិភាព និងវិធានការផ្សេងៗទៀតក្នុងពេលមានជំងឺរាតត្បាត។
ក្រុមហ៊ុនក៏បានបើកកម្មវិធីជជែកនៅលើទំព័រហ្វេសប៊ុក ដើម្បីចែករំលែកព័ត៌មានឥតគិតថ្លៃ និងគួរឱ្យទុកចិត្តដល់សាធារណជន។
លោក ស្រ៊ុន ឈាងស្រេង នាយកគ្រប់គ្រងអាជីវកម្មទីផ្សារអតិថិជននៃធនាគារឯកទេស វីង មានប្រសាសន៍ថា៖ «សុវត្ថិភាពរបស់ភ្នាក់ងារ អតិថិជន និងសហគមន៍គឺជាអាទិភាពចម្បងរបស់យើង។ យើងតែងតែផ្តល់ព័ត៌មានថ្មីៗអំពីកូវីដ១៩ដល់ភ្នាក់ងាររបស់យើង ហើយទៅជួបពួកគេជាទៀងទាត់ ដើម្បីធានាថាពួកគេកំពុងអនុវត្ត វិធានការសុវត្ថិភាពនានា។ បុគ្គលិកវីងទាំងអស់ក៏តម្រូវឱ្យពាក់ម៉ាស់ របាំងមុខ ស្រោមដៃ លាងដៃនឹងអាកុល ព្រមទាំងរក្សាគម្លាតសុវត្ថិភាពនៅពេលទៅជួបភ្នាក់ងារផងដែរ»។
លោក សរ សាន្តភិរម្យ ដែលជាអតិថិជនវីងម្នាក់នៅខេត្តតាកែវបានឱ្យដឹងថា គាត់ពិតជាកោតសរសើរការប្តេជ្ញាចិត្តរបស់វីងចំពោះសុវត្ថិភាពអតិថិជនតាមរយៈការបង្កើតនូវការណែនាំនានា។
«ខ្ញុំមានអារម្មណ៍ថា មានសុវត្ថិភាពពេលទៅភ្នាក់ងារវីង ព្រោះវាមានទីតាំងនៅក្បែរផ្ទះរបស់ខ្ញុំ។ ខ្ញុំបានកត់សម្គាល់ឃើញថា ក្រុមហ៊ុនបានគូសខ្សែបន្ទាត់នៅលើដីហើយពួកគេស្នើសុំឱ្យអតិថិជនតម្រង់ជួរស្របគ្នា និងរក្សាចន្លោះ ១,៥ ម៉ែត្ររវាងគ្នាទៅវិញទៅមក។
ភ្នាក់ងារក៏រំឭកពួកយើងឱ្យពាក់ម៉ាស់ និងសម្អាតដៃរបស់យើងជាមួយអាល់កុលមុន និងក្រោយពេលប្រើសេវាកម្មរបស់ពួកគេផងដែរ។ ខ្ញុំមានអារម្មណ៍ជឿជាក់ និងពេញចិត្តចំពោះកម្រិតសុវត្ថិភាពនេះណាស់»។
នៅទីស្នាក់ការកណ្តាលរបស់វីងនៅទីក្រុងភ្នំពេញ អតិថិជនទាំងអស់តម្រូវឱ្យពាក់ម៉ាស លាងដៃជាមួយអាល់កុល និងត្រួតពិនិត្យសីតុណ្ហភាពរបស់ពួកគេ។ មានភ្នាក់ងារវីងជិត ៩ ០០០ កន្លែង នៅទូទាំងប្រទេសទាំងរាជធានីភ្នំពេញទៅខេត្តដាច់ស្រយាលផ្សេងៗ។
វីង បានធ្វើការដោយមិនខ្លាចនឿយហត់ដើម្បីធានាថា ភ្នាក់ងាររបស់ខ្លួនអាចបន្តប្រតិបត្តិការអាជីវកម្មដោយគ្មានការរំខានណាមួយ ដើម្បីឱ្យអតិថិជនអាចបន្តប្រើប្រាស់សេវាកម្មរបស់ខ្លួនផ្ញើប្រាក់ទៅមនុស្សជាទីស្រឡាញ់ក៏ដូចជាធ្វើប្រតិបត្តិការអាជីវកម្មផ្សេងៗ។
វីងក៏ផ្តួចផ្តើមសកម្មភាពជាច្រើនដើម្បីគាំទ្រសហគមន៍ដែលរងផលប៉ះពាល់ក្នុងអំឡុងពេលរាតត្បាតនៃជំងឺកូវីដ១៩នេះ។ ថ្មីៗនេះវីងបានប្រកាសធ្វើយុទ្ធនាការដើម្បីប្រមូលថវិកាគាំទ្រដល់រាជរដ្ឋាភិបាលកម្ពុជាក្នុងការទិញវ៉ាក់សាំងកូវីដ ១៩ ផងដែរ៕