.jpg)
ធនាគារឯកទេស វីង បរិច្ចាគថវិកាជួយដល់មន្ទីរពេទ្យកុមារអង្គរ។
ធនាគារឯកទេស វីង បានចូលរួមប្រារព្ធពិធី «បុណ្យផ្កាប្រាក់មហាសាមគ្គីឆ្នាំទី ៧» ដើម្បីជួយដល់មន្ទីរពេទ្យកុមារអង្គរ
កាលពីពេលថ្មីៗនេះធនាគារឯកទេស វីង រួមជាមួយដៃគូសហការគ្រួសាររ៉ូយ៉ាល់គ្រុប ភ្នាក់ងារវីង អតិថិជន និងដៃគូជាច្រើនបានបង្ហាញពីការតាំងចិត្តជួយដល់មន្ទីរពេទ្យកុមារអង្គរដែលជាមជ្ឈមណ្ឌលសុខភាពកុមារឈានមុខគេនៅកម្ពុជា។
ជារៀងរាល់ថ្ងៃមានកុមារយ៉ាងតិច ៤០០ នាក់បានទទួលការព្យាបាលដោយឥតគិតថ្លៃពីមន្ទីរពេទ្យកុមារអង្គរ ហើយក្នុង ១ ឆ្នាំៗ មន្ទីរពេទ្យមួយនេះបានចំណាយថវិកាប្រមាណ ៧ លានដុល្លារលើប្រតិបត្តិការ និងសេវាព្យាបាល។ ដោយសារវិបត្តិសង្គមក៏ដូចបញ្ហាសេដ្ឋកិច្ចធ្លាក់ចុះដោយសារជំងឺកូវីដ-១៩ អ្នកជំងឺមួយចំនួនត្រូវប្រឈមឧបសគ្គក្នុងការទទួលបានសេវាព្យាបាលដោយឥតគិតថ្លៃទាំងនេះ។
ដោយមើលឃើញពីសារៈសំខាន់នៃតម្រូវការរបស់អ្នកជំងឺកាលពីថ្ងៃទី ៣០ ខែសីហាកន្លងទៅនេះ គណៈគ្រប់គ្រងនៃធនាគារឯកទេស វីង បានចូលរួមគាំទ្រពិធី «បុណ្យផ្កាប្រាក់មហាសាមគ្គីឆ្នាំទី ៧» ដើម្បីជួយដល់មន្ទីរពេទ្យឲ្យបន្តកិច្ចការទៀត។ លោកជំទាវ ម៉ៅ ចំណាន អគ្គនាយិកាប្រតិបត្តិការនៃធនាគារឯកទេស វីង បានយល់យ៉ាងច្បាស់ពីអារម្មណ៍ដែលគ្រួសារនីមួយៗត្រូវការអ្នកមើលថែរក្សា។
លោកជំទាវបានមានប្រសាសន៍ថា៖ «ក្នុងនាមជាម្តាយ ១ រូបខ្ញុំដឹងថា នៅពេលដែលកូនឈឺម្តងៗ ម្តាយរបស់ពួកគេតែងតែកើតក្តីបារម្ភគ្រប់ពេលវេលា ជាពិសេសនៅពេលដែលពួកគាត់មិនអាចរកកន្លែងដែលទុកចិត្តដើម្បីព្យាបាលកូនៗរបស់ពួកគាត់បាន»។
ចាប់តាំងពីឆ្នាំ ១៩៩៩ មន្ទីរពេទ្យកុមារអង្គរបានផ្តល់សេវាព្យាបាលប្រកបដោយគុណភាពខ្ពស់ជាមួយការមើលថែយ៉ាងយកចិត្តទុកដាក់លើកុមារមកពីគ្រប់ខេត្តដោយមិនគិតពីគ្រួសារដែលមាន ឬមិនមានសមត្ថភាពក្នុងការបង់ថ្លៃសេវា។ លោកជំទាវ ម៉ៅ ចំណាន បានបន្តថា វីង មានមោទនភាពក្នុងការជួយគាំទ្រមន្ទីរពេទ្យដើម្បីបន្តដំណើរការ និងបេសកកម្មក្នុងការផ្តល់សេវាព្យាបាលដោយឥតគិតថ្លៃប្រកបដោយការយកចិត្តទុកដាក់ និងមានគុណភាពដល់កុមារកម្ពុជា។
នៅក្នុងពិធី «បុណ្យផ្កាប្រាក់មហាសាមគ្គី» នេះធនាគារឯកទេស វីង បានប្រមូលថវិកាបរិច្ចាគសរុបប្រមាណ ៤៨.៥៦៤.៨០០ រៀលដល់មន្ទីរពេទ្យ ដែលក្នុងនោះរួមបញ្ចូលទឹកប្រាក់មួយចំនួនរបស់លោកជំទាវ ម៉ៅ ចំណាន ដោយផ្ទាល់។ ជាមួយគ្នានេះដែរលោក ឧកញ៉ា លី ហួរ លោកជំទាវ នួន ពេជ្រសុផល ព្រមទាំងស្វាមី និងកញ្ញា ទូច សុជាតិតា ក៏បានចូលរួមឧបត្ថមផងដែរ។ ទឹកប្រាក់មួយចំនួនផ្សេងទៀត វីង ក៏បានទទួលពីគ្រួសាររ៉ូយ៉ាល់គ្រុប បុគ្គលិក វីង ភ្នាក់ងារ វីង អតិថិជននៅទូទាំងប្រទេសដែលបានបរិច្ចាគតាមរយៈវីង។
លោកវេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរបានថ្លែងអំណរគុណដល់ធនាគារឯកទេស វីង ព្រមទាំងអ្នកតំណាងធនាគារសម្រាប់ការចូលរួមបរិច្ចាគនៅក្នុងពិធីថា៖ «ការបរិច្ចាគថវិកានៅក្នុងថ្ងៃនេះជាទឹកចិត្តសប្បុរសដ៏ធំធេងសម្រាប់មន្ទីរពេទ្យកុមារអង្គរដែលកំពុងជួបប្រទះការខ្វះខាត»។ លោកវេជ្ជបណ្ឌិតបានបន្តថា៖ «ថវិកាបរិច្ចាគទាំងនេះនឹងជួយផ្តល់នូវការថែទាំប្រកបដោយគុណភាពសម្រាប់កុមារដែលមកសម្រាកព្យាបាលនៅក្នុងមន្ទីរពេទ្យ ហើយក៏ជាផ្នែកមួយក្នុងការលើកកម្ពស់វិស័យសុខាភិបាលនៅក្នុងប្រទេសកម្ពុជា ព្រមទាំងរួមចំណែកដើម្បីធានាថាគ្មានកុមារណាម្នាក់ត្រូវបានទុកចោល»។
បង្កើតឡើងនាឆ្នាំ ២០០៩ វីង បានប្តេជ្ញាធ្វើប្រតិបត្តិការស្របតាមគោលការណ៍អភិវឌ្ឍន៍ប្រកបដោយចីរភាព។ សព្វថ្ងៃ វីង បានអនុវត្តគោលការណ៍នៅក្នុងកាតព្វកិច្ចជួយសង្គមប្រកបដោយក្រមសីលធម៌ និងក្នុងនាមជាសាជីវកម្មពលរដ្ឋរបស់ប្រទេសកម្ពុជា។
លោក ម៉ានូ រ៉ាចាន់ អគ្គនាយកនៃធនាគារឯកទេស វីង បានកោតសរសើរចំពោះការងារជួយសង្រោះជីវិតរបស់មន្ទីរពេទ្យកុមារអង្គរដល់ពលរដ្ឋកម្ពុជា។ លោកក៏បានថ្លែងអំណរគុណដល់ម្ចាស់ជំនួយទាំងឡាយដែលបានបរិច្ចាគផងដែរ។
លោកបានមានប្រសាសន៍ថា៖ « កុមាររាប់ពាន់នាក់បានឈឺជារៀងរាល់ថ្ងៃ ហើយមន្ទីរពេទ្យមួយនេះគឺជាក្តីសង្ឃឹមទី ១ សម្រាប់ការព្យាបាលរបស់ពួកគេ។ ការបរិច្ចាគរបស់យើងមានន័យថា យើងកំពុងជួយដល់កុមារដែលកំពុងខ្វះខាត ពួកគេអាចទទួលសេវាថែទាំសុខភាពបានដោយស្មើភាព។ ការបរិច្ចាគថវិកាផ្ទាល់ខ្លួនរបស់អ្នកពិតជាមានតម្លៃណាស់ក្នុងការជួយសង្គ្រោះជីវិតកុមារដែលខ្វះខាតក្នុងគ្រាដ៏លំបាកនេះ»។
លោកអ្នកនៅតែអាចចូលរួមវិភាគទានដល់មន្ទីរពេទ្យកុមារអង្គរជារៀងរាល់ថ្ងៃតាមរយៈភ្នាក់ងារវីងច្រើនជាង ៨ ០០០ កន្លែងនៅទូទាំងប្រទេស និងតាមរយៈកម្មវិធីស្មាតហ្វូនវីង៖៩ ១២២ (រៀល) និង ៨ ១២២ (ដុល្លារ)៕
