ភ្នំពេញៈ មន្ត្រីក្រសួងសុខាភិបាលបានឲ្យដឹងកាលពីម្សិលមិញថាករណីឆ្លងវីរុសផ្តាសាយថ្មី H1N1 ឬគេហៅថាផ្តាសាយជ្រូកត្រូវបានរកឃើញនៅក្នុងប្រទេសកម្ពុជានាប៉ុន្មានសប្តាហ៍ថ្មីៗនេះ ប៉ុន្តែទោះបីជាយ៉ាងណានៅមិនទាន់មានរបាយការណ៍អំពីកណីផ្ទុះជំងឺនេះនៅឡើយទេ។
លោកវេជ្ជបណ្ឌិត លី សូវ៉ាន់ អ្នកនាំពាក្យ ក្រសួងសុខាភិបាល និងជាប្រធាននាយកដ្ឋានប្រយុទ្ធនឹងជំងឺឆ្លងបានថ្លែងថាមានករណីនេះពី ៣ ទៅ ៥ ករណីត្រូវបានរកឃើញក្នុងរយៈពេលពីរបីសប្តាហ៍ចុងក្រោយនេះនៅក្នុងទីតាំងតាមដានចំនួន ៧ កន្លែងដែលកំពុងឃ្លាំមើលស្ថានភាពជំងឺផ្តាសាយឆ្លងនេះ។
លោកបន្តថា៖ «រហូតមកដល់ពេលនេះយើងមិនទាន់បានរកឃើញករណីផ្ទុះជំងឺនេះនៅឡើយទេ»។
លោកបន្ថែមថា ក្រុមមន្ត្រីកំពុងជំរុញឱ្យប្រជាពលរដ្ឋមានការប្រុងប្រយ័ត្នចំពោះជំងឺនេះហើយបើសង្ស័យមានជំងឺនេះត្រូវជូនដំណឹងទៅក្រសួង ហើយប្រសិនបើប្រជាពលរដ្ឋរកឃើញថាមានអ្នកណាមានជំងឺគ្រុនក្តៅ ឬគ្រុនផ្តាសាយនៅក្នុងភូមិ សាលារៀន ឬកន្លែងធ្វើការដែលសង្ស័យពីជំងឺនេះគឺក្រសួងជំរុញពួកគាត់ឱ្យទូរស័ព្ទទៅកាន់លេខទូរស័ព្ទ (hotline) របស់ក្រសួងសុខាភិបាល «១១៥»។ «យើងមានថ្នាំ និងបរិក្ខារពេទ្យផ្សេងៗទៀតដើម្បីឆ្លើយតបនឹងការផ្ទុះឡើងនៃជំងឺនេះ»។
លោកវេជ្ជបណ្ឌិត សូវ៉ាន់ បន្តថាចំនួននៃករណីជំងឺនេះគឺស្ថិតនៅក្រោមកម្រិតឲ្យ «ប្រុងជើងការ» នៅឡើយទេ។
កាលពីដើមឆ្នាំមុនបុរសជនជាតិខ្មែរដែលមានអាយុ ២៩ ឆ្នាំម្នាក់បានស្លាប់ដោយសារជំងឺផ្តាសាយជ្រូក។ គាត់ជាមនុស្សដំបូងគេដែលបានស្លាប់ដោយសារវីរុស H1N1 នេះចាប់តាំងពីពេលដែលវាផ្ទុះឡើងកាលពីឆ្នាំ ២០០៩ និង ២០១០៕ NS
