កណ្តាលៈ យោធាវៀតណាមកំពុងប្រែក្លាយតង់បណ្ដោះអាសន្ន ដែលខ្លួនអះអាងថា ធ្វើឡើងដើម្បីទប់ស្កាត់ការឆ្លងដែនខុសច្បាប់ក្នុងពេលមានជំងឺកូវីដ១៩នោះ ទៅជាជម្រករឹងមាំនៅក្បែរភូមិក្អមសំណក្រោម ឃុំក្អមសំណ ខេត្តកណ្ដាល ដោយអះអាងថា ការសង់ជម្រករឹងមាំនេះធ្វើឡើងដោយសារទីតាំងនោះលិចទឹក។ នេះបើតាមការបញ្ជាក់របស់សមត្ថកិច្ច។
បើតាមលិខិតចុះថ្ងៃទី ២៦ សីហា របស់លោក ឈឿន សុចិត្រ ស្នងការនគរបាលខេត្តកណ្ដាលឲ្យដឹងថា កម្លាំងប៉ុស្តិ៍នគរបាលការពារព្រំដែនក្អមសំណចំនួន ៨ រូបបានសហការជាមួយកម្លាំងយោធាព្រំដែន ៦០១ ចំនួន ៧ រូប រួមទាំងនាយប៉ុស្តិ៍ក្អមសំណកាលពីថ្ងៃទី ២៥ សីហាបានចុះទៅពិនិត្យចំណុចតង់ចាស់របស់យោធាការពារព្រំដែនវៀតណាម គឺប៉ុស្តិ៍ ៩២៥ វិញសឿងនៅភូមិភូវី ឃុំកូឡុក ស្រុកទិនចូវ ខេត្តអានយ៉ាង។
ទីតាំងនេះទល់នឹងភូមិក្អមសំណក្រោម ឃុំក្អមសំណ ស្រុកលើកដែក ខេត្តកណ្ដាល។
លោក ឈឿន សុចិត្រ បញ្ជាក់ថា នៅពេលចុះទៅដល់ទីតាំងនេះ សមត្ថកិច្ចបានជួបជាមួយភាគីវៀតណាមដែលកំពុងសាងសង់តង់ថ្មីដែលជាជម្រករឹងមាំ សាងសង់ពីឈើ សសរថ្ម កម្ពស់ ៣ ម៉ែត្រ និងមានទំហំ ៥ គុណនឹង ៤ ម៉ែត្រ ដោយមានដំបូលប្រក់ស័ង្កសី ស្ថិតនៅឃ្លាតពីខ្សែបន្ទាត់ព្រំដែនដែលកម្ពុជាគ្រប់គ្រងបច្ចុប្បន្នចម្ងាយប្រមាណ ១២០ ម៉ែត្រ។
លិខិតរបស់លោក សុចិត្រ បន្តថា៖ «ទន្ទឹមនោះកម្លាំងពី ៣ អង្គភាពបានទៅជួបប្រធានប៉ុស្តិ៍ ៩២៥ វិញសឿង ដើម្បីទាមទារឲ្យភាគីវៀតណាមបញ្ឈប់សកម្មភាពសាងសង់តង់ថ្មីខាងលើនេះ។ ប៉ុន្តែភាគីវៀតណាមបានបញ្ជាក់ថា គេធ្វើតាមបញ្ជាថ្នាក់លើរបស់គេ ហើយថ្នាក់លើរបស់គេមានគម្រោងសាងសង់តង់ថ្មីជាជម្រករឹងមាំចំនួន ៤ គោលដៅលើ ១០ គោលដៅចាស់ដែលមានស្រាប់»។
កាលពីថ្ងៃពុធ អភិបាលស្រុកលើកដែក និងកម្លាំងពាក់ព័ន្ធបានចុះទៅត្រួតពិនិត្យទីតាំងខាងលើម្ដងទៀត និងបានសំណូមពរឲ្យភាគីវៀតណាមបញ្ឈប់ការសាងសង់ជាបន្ទាន់។ ប៉ុន្តែភាគីវៀតណាម មិនឯកភាពបញ្ឈប់ការសាងសង់នោះឡើយ។ នេះបើតាមលិខិតរបស់លោកស្នងការខេត្តកណ្ដាលដដែល។
សមត្ថកិច្ចមូលដ្ឋានម្នាក់ដែលថ្លែងក្នុងលក្ខខណ្ឌមិនបញ្ចេញឈ្មោះឲ្យដឹងថា ចាប់តាំងពីបញ្ហាកូវីដកើតឡើង វៀតណាមបានបោះតង់នៅក្បែរព្រំដែនកម្ពុជាក្នុងស្រុកលើកដែកចំនួន ១០ ទីតាំងប៉ុន្តែមិនស្ថិតនៅលើព្រំដែនទេ គឺនៅក្នុងទឹកដីវៀតណាមប្រមាណជាង ១០០ ម៉ែត្រពីព្រំដែន។ រហូតមកទល់ពេលនេះ ទីតាំងទាំង ១០ នេះមិនត្រូវបានរុះរើនៅឡើយ។
វៀតណាមនិយាយថា គេសាងសង់សំណង់ខ្ពស់ ដោយសារនៅទីតាំងនោះមានទឹកលិចនៅរដូវវស្សា។ ដូច្នេះគេបានប្ដូរពីតង់ទៅជាសំណង់មានសសរខ្ពស់ ប្រក់ស័ង្កសី។
លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែនថ្លែងប្រាប់អ្នកសារព័ត៌មាននៅទីស្ដីការគណៈរដ្ឋមន្ត្រីកាលពីម្សិលមិញថា លោកបានឃើញព័ត៌មានអំពីការសាងសង់ជម្រកថ្មីរបស់វៀតណាម ប៉ុន្តែលោកមិនទាន់បានទទួលរបាយការណ៍ពីអាជ្ញាធរខេត្តនៅឡើយ។
លោកបញ្ជាក់ថា តំបន់ថ្ម ៣ ដុំ ជាចំណុចមួយដែលភាគីទាំង ២ មិនទាន់ឯកភាពគ្នា។
លោកថ្លែងថា៖ «យើងអត់ទាន់ឯកភាពគ្នា យើងទុក និងស្នើឲ្យខាងបារាំង នាយករដ្ឋមន្ត្រីទាំង ២ បានស្នើឲ្យប្រធានាធិបតីបារាំងជួយលើតំបន់ដែលនៅសេសសល់ ១៦ ភាគរយនោះ ដើម្បីឲ្យគាត់បង្រៀនយើងក្នុងការចម្លងពីផែនទីបោន ១ លើ ១០០ ពាន់ មក ១ លើ ៥០ ពាន់។ សំណើនេះមិនទាន់ចេញជាលទ្ធផលដុំកំភួននៅឡើយដោយសារយើងមិនឯកភាពគ្នាជាបែបបទបច្ចេកទេស»។
លោក គង់ សុភ័ណ្ឌ អភិបាលខេត្តកណ្ដាល និងលោក កុយ គួង អ្នកនាំពាក្យក្រសួងការបរទេស មិនអាចសុំការបញ្ជាក់ពីជំហររបស់កម្ពុជាលើការប្រែក្លាយពីការបោះតង់ទៅជាការសាងសង់ជម្រកថ្មីរឹងមាំរបស់វៀតណាមនេះបានទេ។ ប៉ុន្តែក្រសួងការបរទេសធ្លាប់បានផ្ញើកំណត់ទូតម្ដងហើយ ទៅវៀតណាមពាក់ព័ន្ធនឹងការបោះតង់នៅព្រំដែនមិនទាន់ឯកភាព។
លោក គង់ សុភ័ណ្ឌ បានថ្លែងប្រាប់វិទ្យុបារាំងអន្តរជាតិថា កម្ពុជាមិនអាចចុះទៅបង្ខំឲ្យវៀតណាម ឈប់សាងសង់បានទេ ព្រោះការសាងសង់នោះធ្វើឡើងនៅលើទឹកដីវៀតណាម។
លោក សុខ ទូច ប្រធានរាជបណ្ឌិត្យសភាដែលធ្លាប់បានចុះទៅស្រាវជ្រាវនៅតាមព្រំដែនថ្លែងពីម្សិលមិញថា ព្រំដែនពីក្អមសំណដល់ជ្រៃធំក្នុងខេត្តកណ្ដាល មានចំណុចដែលត្រូវបានបោះបង្គោលព្រំដែនរួចហើយ ហើយក៏មានចំណុចមិនទាន់ឯកភាពគ្នា។ ប៉ុន្តែនៅព្រំដែនចំណុចនេះសុទ្ធតែមានបង្គោលព្រំដែនដែលបន្សល់ទុកពីសម័យបារាំង។
លោកបន្តថា បើតាមការព្រមព្រៀងភាគីទាំង ២ អាចសាងសង់ផ្លូវបាននៅក្បែរព្រំដែន។ ចំពោះចំណុចខ្លះដែលមានការលំបាក ផ្លូវនោះអាចសាងសង់នៅប្រមាណ ១០ ម៉ែត្រពីព្រំដែន។ ក៏ប៉ុន្តែសំណង់ជាអគារដូចនៅក្នុងខេត្តកណ្ដាលនេះមិនអាចសាងសង់បានទេ។
លោកថា៖ «បើវៀតណាមមិនមានដំណោះស្រាយយើងអាចមានវិធានការ ៤ ដំណាក់កាល ទី ១ គឺផ្ញើកំណត់ទូត ទី ២ ហៅគណៈកម្មការកិច្ចការព្រំដែន (ទាំងសងខាង) មកសួរបញ្ជាក់ថា តើយើងបានគោរពកិច្ចព្រមព្រៀងហើយឬនៅ? ទី ៣ យើងអាចសាងសង់វិញនៅចម្ងាយដូចគ្នា ព្រោះគេមិនគោរព យើងក៏អាចមិនគោរពដែរ។ ទី ៤ យើងអាចប្រើប្រាស់កម្លាំងទៅវាយចោល ប៉ុន្តែវាយចោល វារំលោភលើអធិបតេយ្យភាពប្រទេសគេ ព្រោះគេធ្វើនៅប្រទេសគេ។ តែយើងក៏អាចធ្វើនៅលើដីយើង ដែលធ្វើឲ្យយើងមិនគោរពគ្នាទៅវិញទៅមក។ តែអ្នកណាជាអ្នកជាន់ឈ្លីសន្ធិសញ្ញាមុនគេ គឺវៀតណាម»៕