.jpg)
សកម្មភាពទាហានវៀតណាម រើតង់ចេញពីតំបន់ដែលគេបានសង់ជិតព្រំដែនខេត្តកណ្ដាល។ រូបថត FN
ភ្នំពេញ: ក្រុមទាហានវៀតណាមបានរុះរើតង់ចំនួន ២៦ កន្លែង ដែលបានសាងសង់ប៉ុន្មានខែមុនក្នុងទឹកដីខ្លួន នៅជិតតាមបណ្ដោយព្រំដែនខេត្តកណ្ដាល ដែលការរុះរើនេះបានធ្វើឡើង ១ ថ្ងៃ ក្រោយពីមានការសន្ទនាតាមប្រព័ន្ធវីដេអូរវាងលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងលោក ង្វៀន សួនហ៊្វុក នាយករដ្ឋមន្ត្រីនៃសាធារណរដ្ឋ សង្គមនិយមវៀតណាម។
លោក គង់ សោភ័ណ្ឌ អភិបាលខេត្តកណ្ដាលបានថ្លែងពីម្សិលមិញថា៖ «ទាហានវៀតណាមគាត់រុះរើតង់ទាំង ២៦ តង់ហ្នឹង គឺគាត់រើទាំងស្រុងតែម្ដង ដែលមានទាំងតង់ខ្ពស់ ទាំងតង់ទាប ឬសំណង់រឹងគ្រប់ប្រភេទតែម្ដង ប៉ុន្ដែមិនមានប្រទូសរ៉ាយគ្នាអ្វីទាំងអស់ គឺគាត់ឯកភាពរុះរើចេញទាំងញញឹមញញែមដាក់គ្នាទៅវិញទៅមក ព្រោះគាត់ថា ចប់បេសកកម្មកូវីដ១៩ នៅស្រុកគាត់ហើយ ឥឡូវគាត់យល់ព្រមរុះរើចេញគឺអត់មានទំនាស់អ្វីនឹងគ្នាទេ សន្ដិភាពល្អណាស់»។
រាជរដ្ឋាភិបាលកម្ពុជា និងរដ្ឋាភិបាលវៀតណាមនៅក្នុងកិច្ចសន្ទនាទ្វេភាគីតាមប្រព័ន្ធវីដេអូកាលពីថ្ងៃទី ២៤ ខែវិច្ឆិកា បានសម្ដែងនូវការពេញចិត្តលើការរីកចម្រើននៃកិច្ចសហប្រតិបតិ្តការគ្រប់ជ្រុងជ្រោយនាប៉ុន្មានឆ្នាំកន្លងមកនេះ ហើយបានឯកភាពគ្នាបន្តពង្រឹងកិច្ចសហប្រតិបត្តិការដែលមានស្រាប់គ្រប់ជ្រុងជ្រោយ និងស្ថិរភាព។
យោងតាមសេចក្ដីប្រកាសព័ត៌មានរបស់ក្រសួងការបរទេស និងកិច្ចសហប្រតិបត្តិការអន្តរជាតិដែល ភ្នំពេញ ប៉ុស្តិ៍ ទទួលបានកាលពីម្សិលមិញបានឱ្យដឹងថាកិច្ចសន្ទនានោះបានធ្វើឡើងរវាងលោក ហ៊ុន សែន និងលោក ង្វៀន សួនហ៊្វុក បានពិភាក្សាអំពីមធ្យោបាយ និងវិធានការនានាក្នុងការជំរុញបន្ថែមពីទំនាក់ទំនងទ្វេភាគី និងផ្លាស់ប្តូរទស្សនៈលើបញ្ហាតំបន់ និងពិភពលោកដែលជាក្តីកង្វល់ និងផលប្រយោជន៍រួមរាប់បញ្ចូលទាំងកិច្ចសហការក្នុងការប្រយុទ្ធប្រឆាំងជំងឺកូវីដ ១៩ ដែរ។ នាយករដ្ឋមន្ត្រីទាំង ២ ក៏បានពិភាក្សាគ្នាផងដែរពីសារៈសំខាន់ក្នុងការជំរុញពាណិជ្ជកម្ម និងវិនិយោគទ្វេទិសរវាងប្រទេសទាំង ២។
សេចក្ដីប្រកាសព័ត៌មាននេះបានឱ្យដឹងថា៖ «ក្នុងគោលបំណងនេះ ថ្នាក់ដឹកនាំទាំង ២ បានឯកភាពប្រគល់ភារកិច្ចដល់ក្រសួងស្ថាប័ននានា និងអាជ្ញាធរថ្នាក់ខេត្តនៃប្រទេសរៀងៗខ្លួនធ្វើការឱ្យបានជិតស្និទ្ធជាមួយគ្នា ដើម្បីសម្រួលដល់ការធ្វើដំណើររបស់ធុរជន ក៏ដូចជាលើកកម្ពស់ការអនុវត្តវិធានការបង្ការបញ្ហានានានៅតាមបណ្តោយព្រំដែននៃប្រទេសទាំងពីរដែលអាចកើតឡើងជាយថាហេតុឱ្យបានទាន់ពេលវេលា។ ថ្នាក់ដឹកនាំទាំង ២ ក៏បានអះអាងសាជាថ្មីនូវកិច្ចខិតខំប្រឹងប្រែងរួម ដើម្បីពង្រឹងកិច្ចសហប្រតិបត្តិការទ្វេភាគីលើវិស័យការពារជាតិ និងសន្តិសុខក្នុងទិសដៅធានាសន្តិសុខ និងសណ្តាប់ធ្នាប់នៅតំបន់ព្រំដែន»។
ក្នុងកិច្ចពិភាក្សាដដែលនោះដែរនាយករដ្ឋមន្ត្រីនៃប្រទេសទាំង ២ បានអបអរសាទរចំពោះការផ្តល់សច្ចាប័នលើសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ ១៩៨៥ និងសន្ធិសញ្ញាបំពេញបន្ថែមឆ្នាំ ២០០៥ រវាងកម្ពុជា និងវៀតណាមព្រមទាំងលើពិធីសារទទួលស្គាល់ ការខណ្ឌសីមា និងបោះបង្គោលព្រំដែនគោករវាងកម្ពុជា និង វៀតណាមនៅឆ្នាំ ២០១៩។
យោងតាមសេចក្ដីប្រកាសព័ត៌មានដដែលនេះបានឱ្យដឹងថា នាយករដ្ឋមន្ត្រីទាំង ២ ក៏បានគូសបញ្ជាក់ពីសារៈសំខាន់នៃការផ្លាស់ប្តូរផែនទីឋានលេខាព្រំដែនរវាងកម្ពុជា-វៀតណាម។
សេចក្ដីប្រកាសព័ត៌មាននេះថ្លែងថា៖ «ភាគីទាំង ២ បានឯកភាពពន្លឿននីតិវិធីដើម្បីផ្លាស់ប្តូរលិខិតូបករណ៍នៃការផ្តល់សច្ចាប័នលើសន្ធិសញ្ញាបំពេញបន្ថែម និងពិធីសារឆ្នាំ ២០១៩ ឱ្យបានឆាប់តាមដែលអាចធ្វើទៅបាន។ ថ្នាក់ដឹកនាំទាំង ២ ក៏បានប្តេជ្ញាចិត្តយ៉ាងមោះមុត ដើម្បីដោះស្រាយកំណាត់ខ្សែព្រំដែនដែលនៅសេសសល់ចំនួន ១៦ ភាគរយ ក្នុងគោលបំណងប្រែក្លាយព្រំដែនកម្ពុជា និងវៀតណាមជាព្រំដែនសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍ»។
លោក វ៉ា គឹមហុង ទេសរដ្ឋមន្ត្រី និងជាប្រធានគណៈកម្មាធិការចម្រុះខណ្ឌសីមា និងបោះបង្គោលព្រំដែនកម្ពុជា-វៀតណាម បានថ្លែងពីម្សិលមិញថា ប្រមុខរាជរដ្ឋាភិបាលកម្ពុជាតែងតែប្រគល់ការទុកចិត្តមកលើគណៈកម្មាធិការកិច្ចការព្រំដែនដែលធ្លាប់ទទួលបានជោគជ័យលើកិច្ចការជាច្រើនពាក់ព័ន្ធការងារព្រំដែនកម្ពុជា-វៀតណាម។
លោកបញ្ជាក់ថា៖ «យើងជាប្រទេសមានឯករាជ្យពេញទី យើងមានចុះហត្ថលេខាសន្ធិសញ្ញាជាមួយប្រទេសជិតខាងយើងនេះគឺជាកិត្តិយសមួយសម្រាប់កម្ពុជាយើង ហើយជាមរតកប្រវត្តិសាស្ត្រទុកឱ្យកូនចៅយើងជំនាន់ក្រោយដឹងឮផង។ ចំណែកកិច្ចការដែលនៅសេសសល់ចំនួន ១៦ ភាគរយទៀត យើងនឹងខិតខំបន្ថែមទៀត ដើម្បីដោះស្រាយបញ្ហាបញ្ចប់ឱ្យបានឆាប់តាមដែលអាចធ្វើទៅបាន»។
លោក វ៉ា គឹមហុង បញ្ជាក់ថានាយករដ្ឋមន្ត្រីទាំង ២ បានដាក់សំណើ ១ ទៅរដ្ឋាភិបាលប្រទេសបារាំងកាលពីពេលថ្មីៗនេះ ដើម្បីស្នើសុំអ្នកជំនាញការបារាំងមកជួយបង្ហាត់បង្រៀនអ្នកបច្ចេកទេសកម្ពុជា និងវៀតណាមឱ្យចេះបំប្លែងផែនទីពី ១០០ ពាន់ទៅផែនទី ៥០ ពាន់ ហើយរដ្ឋាភិបាលបារាំងបានយល់ព្រមនឹងបញ្ជូនអ្នកជំនាញការខ្លួនមកជួយបង្រៀនអ្នកបច្ចេកទេសប្រទេសទាំង ២។
លោក ឡៅ ម៉ុងហៃ អ្នកវិភាគបញ្ហាសង្គម និងនយោបាយពីម្សិលមិញបានកត់សម្គាល់ឃើញថា ការប្ដេជ្ញាចិត្តរបស់នាយករដ្ឋមន្ត្រីប្រទេសទាំង ២ នេះ មិនមានអ្វីថ្មី ហើយប្លែកបន្ថែមទៀតទេ ដោយគ្រាន់តែចង់រំឭកពីកិច្ចព្រមព្រៀងដែលភាគីទាំង ២ បានចុះហត្ថលេខាជាមួយគ្នាកន្លងមកប៉ុណ្ណោះ។
លោកបញ្ជាក់ថា៖ «ប្រសិនបើភាគីទាំង ២ ជាប់គាំងអត់ព្រមព្រៀងគ្នាបានលើចំណុច ឬបន្ទាត់ព្រំដែនជាក់លាក់ហើយ គឺភាគីទាំង ២ គួរតែព្រមព្រៀងគ្នាទៅរកភាគីទី ៣ ដែលស្គាល់ព្រំដែនខ្មែរ-វៀតណាមច្បាស់ជាងគេ គឺប្រទេសបារាំងឱ្យជួយដោះស្រាយទៅ»៕
វីដេអូ៖
