The Phnom Penh Post Search

Search form




Logo of Phnom Penh Post newspaper Phnom Penh Post - វៀតណាម​ ៣៩ ​នាក់​ត្រូវ​បាន​ចាប់​នៅ​ កោះកុង

វៀតណាម​ ៣៩ ​នាក់​ត្រូវ​បាន​ចាប់​នៅ​ កោះកុង

Content image - Phnom Penh Post
ជន​ជាតិ​វៀតណាម​​ ត្រូវ​បាន​សមត្ថកិច្ច ចាប់ដាក់ឡាន​នៅ​កោះ​ពេជ្រ​ នា​ពេលកន្លងមក។ រូបថត សហ​ការី

វៀតណាម​ ៣៩ ​នាក់​ត្រូវ​បាន​ចាប់​នៅ​ កោះកុង

កោះកុងៈ អាជ្ញាធរ បាន​ឃាត់​ខ្លួន​ជនជាតិ​វៀតណាម​សរុប ៣៩ នាក់ និង​ទូក​នេសាទ ១១ គ្រឿង ដែល​ឆ្លងដែន​ចូល​នេសាទ​ខុស​ច្បាប់ នៅ​តំបន់​កោះ​ស្តេច​ ស្រុក​គិរីសាគរ ខេត្ត​កោះកុង ហើយ​គ្រោង​នឹង​បណ្តេញ​ចេញទៅ​ប្រទេស​វិញ នៅ​ថ្ងៃ​ចន្ទ​នេះ។

លោក ញ៉ែម តារា ស្នងការ​រង​នគរបាល​ខេត្ត​កោះ​កុង ទទួល​បន្ទុក​ការងារ​ជន​អន្តោ​ប្រវេសន៍ បាន​ឲ្យ​ដឹងថា ជនជាតិ​វៀត​ណាម​ទាំង ៣៩ នាក់​នេះ ត្រូវ​បាន​សមត្ថកិច្ច​ឃាត់​ខ្លួន​បាន​កាល​ពី​ថ្ងៃទី ១៣ ខែ​កក្កដា ចំនួន ១៣ នាក់​និង​​ថ្ងៃទី ១៤ ចំនួន ២៦​ នាក់ នៅ​ក្នុង​ឃុំបាក់​ខ្លង និង​ឃុំ​កោះស្តេច ខណៈ​ដែល​ទូក​នេសាទ​ចូល​ចត​នៅក្បែរ​ច្រាំង ព្រោះ​អាកាស​ធាតុ ប៉ុន្មាន​ថ្ងៃ​ចុងក្រោយ​នេះ មាន​ខ្យល់​ខ្លាំង​ពេក។

លោក ញ៉ែម តារា បាន​បន្ត​ថា៖ «ពួកគេ បាន​រត់​ចូល​ចត​នៅ​ច្រាំង ហើយ​សមត្ថកិច្ច ក៏​បាន​ឃាត់​ខ្លួន​នៅលើ​ទូក​នេសាទ​ទាំង​នោះ​តែ​ម្តង។ យើង​មិនអាច​ដឹង​ទេ​ថា មាន​វៀតណាម​ប៉ុន្មាន​នាក់ ដែល​កំពុង​តែ​នេ​សាទ​ខុស​ច្បាប់ នៅលើ​សមុទ្រ​ខេត្ត​នេះ ដោយសារ​តែ​កម្លាំង​សមត្ថកិច្ច​យើង មាន​តិច ហើយ​មធ្យោបាយ​ធ្វើ​ដំណើរ​មិន​គ្រប់​គ្រាន់ ប៉ុន្តែ​នេះ ជា​ករណី​ទី១ សម្រាប់​ឆ្នាំ​ ២០១៥ នេះ»។

លោកស្នង​ការ​រង​នគរបាល​រូប​នេះ បាន​ឲ្យ​ដឹង​ទៀត​ថា ជនជាតិ​វៀតណាម​ទាំង ៣៩ នាក់​នោះ ត្រូវ​បាន​សមត្ថកិច្ច រកឃើញថា បាន​ឆ្លង​ដែន​មក​នេសាទ​ដោយ​ខុស​ច្បាប់​ និង​មិន​មាន​លិខិត​ឆ្លងដែន​ឡើយ។

លោក​ថា៖ «ក្រោយ​ការពិនិត្យ យើង​ឃើញថា ពួកគេ​ទាំង​នោះ មិនមាន​ឯកសារ​ឆ្លងដែន​នោះ​ទេ អ៊ីចឹង​ហើយ តាម​នីតិវិធី​ច្បាប់ គឺ​មាន​តែ​បណ្តេញ​ចេញ ហើយ​ខាង​ខេត្ត ក៏បាន​រៀប​ចំ​ឯកសារ​រួច​រាល់ សម្រាប់​បណ្តេញ​ចេញ​ដែរ​ហើយ​រង់​ចាំ​តែ​ការ​ឆ្លើយតប​ពី​ខាង​នាយកដ្ឋាន​អន្តោប្រវេសន៍​ក្រសួង​មហា​ផ្ទៃ​តែ​ប៉ុណ្ណោះ»។

បើ​តាម​ប្រធាន​នាយក​ដ្ឋាន​ស៊ើបអង្កេត និង​អនុវត្ត​នីតិវិធី​នៃ​អគ្គនាយកដ្ឋាន​អន្តោ​ប្រវេសន៍​ក្រសួង​មហាផ្ទៃ លោក អ៊ុក ហៃ​សីលា ករណី​ជន​ជាតិ​វៀតណាម​ទាំង ៣៩ នាក់​នេះ គឺ​មន្ត្រី​ជំនាញ បាន​កំពុង​រៀបចំ​ឯកសារ និង​រំពឹង​ថា នឹង​រួចរាល់ ដើម្បី​បញ្ជូន​ត្រឡប់​ទៅ​វិញ​នៅ​ថ្ងៃ​ចន្ទ​នេះ។

មន្ត្រី​សម្រប​សម្រួល​សមាគម​ការពារ​សិទ្ធិ​មនុស្ស​លីកាដូ ប្រចាំ​ខេត្ត​កោះកុង លោក អ៊ិន គង់​ជិត សាទរ​ចំណាត់ការ​របស់​សមត្ថកិច្ច ចំពោះ​រឿង​នេះ ប៉ុន្តែ​លោក នៅ​តែ​មាន​ក្តីបារម្ភ​ចំពោះ​លំហូរ​ចូល​របស់​ជនជាតិ​វៀតណាម មក​ក្នុង​ខេត្ត​នេះ ក្រោម​ការ​ឃុប​ឃិត​ជា​មួយ​មន្ត្រី​មួយ​ចំនួន ក្នុង​រូបភាព​ប្រក​បរបរ រហូត​ឈានដល់​ការ​តាំង​លំនៅ និង​ចូល​សញ្ជាតិ​ខ្មែរ​​ក្នុង​រយៈ​ខ្លី ដោយ​អំពាវ​នាវ​ដល់​អាជ្ញាធរ ពង្រឹង​ការ​ធ្វើ​ជំរឿន​​ជន​អន្តោប្រវេសន៍​ប្រកប​ដោយ​តម្លាភាព។

លោក​ថា៖«លំហូរ​របស់​ជនជាតិ​វៀត​ណាម គឺ​ចូល​មក​តាម​គ្នីគ្នា ដែល​បាន​មក​តាំង​លំនៅ​រួច​ហើយ​ក្នុង​តំបន់​នេះ ពួកគេ ចូល​មក​ដំបូង​ដោយ​ខុស​ច្បាប់​ ដោយ​មានការ​សូកប៉ាន់​ទៅ​មន្ត្រី ដើម្បី​ប្រក​បរបរ រហូត​ធ្វើ​អត្តសញ្ញាណ​ប័ណ្ណ​ខ្មែរ​រស់នៅ​តែម្តង»។

ក្នុង​កិច្ច​ប្រជុំ​ផ្សព្វ​ផ្សាយ​ផែន​ការ​អនុវត្ត​ការ​គ្រប់​គ្រង​ទៅលើ​ជន​អន្តោប្រវេសន៍ ដែល​ប្រព្រឹត្ត​ធ្វើ​ឡើង​នៅ​ទីស្តីការ​ក្រសួង​មហា​ផ្ទៃ កាល​ពី​ថ្ងៃទី​ ០១ ខែ​កក្កដា ឆ្នាំ​២០១៥ អគ្គ​នាយក​ដ្ឋាន​ជន​អន្តោ​ប្រវេសន៍​ក្រសួង​មហា​ផ្ទៃ បាន​ឲ្យ​ដឹង​ថា ក្នុង​រយៈពេល ៦ ខែ​ដើម​ឆ្នាំ​ ២០១៥ ​នេះ ជន​អន្តោ​ប្រវេសន៍​ខុសច្បាប់ ១២០០ នាក់ ត្រូវ​បាន​បណ្តេញ​ចេញ​ពី​កម្ពុជា ក្នុង​នោះ ៩៨ ភាគរយ​ ជា​ជនជាតិ​វៀត​ណាម៕

អត្ថបទគួរចាប់អារម្មណ៍