.jpg)
កិច្ចពិភាក្សារបស់វេទិកាសម្ព័ន្ធសង្គមស៊ីវិលនៅទីស្ដីការគណៈរដ្ឋមន្ត្រីម្សិលមិញ។ ហេង ជីវ័ន
ភ្នំពេញៈ តំណាងអង្គការសង្គមស៊ីវិល សមាគម សហគមន៍ក្នុងស្រុកប្រមាណជាង ១០០ នាក់ រួមទាំងអង្គការមូលនិធិចិនសម្រាប់សន្តិភាព និងការអភិវឌ្ឍ និងមន្ត្រីរាជរដ្ឋាភិបាលបានជួបជុំគ្នានៅទីស្ដីការគណៈរដ្ឋមន្ត្រីកាលពីម្សិលមិញពិភាក្សាគ្នាលើការងារពង្រឹងកិច្ចសហប្រតិបត្តិការ និងរកដំណោះស្រាយលើបញ្ហាប្រឈមមួយចំនួនដូចជា ជំនួយលើវិស័យកសិកម្ម សុខាភិបាល អប់រំ។
កិច្ចពិភាក្សានេះត្រូវបានរៀបចំដោយ វេទិកាសម្ព័ន្ធសង្គមស៊ីវិល (វ.ស.ស) ដែលត្រូវបានបង្កើតដោយរាជរដ្ឋាភិបាលក្នុងឆ្នាំ ២០១៦ ក្នុងគោលបំណងប្រមូលផ្ដុំទស្សនៈយោបល់ពីក្រុមជំនាញផ្សេងៗគ្នា ដែលបម្រើឲ្យប្រយោជន៍សាធារណៈតាមគោលការណ៍ស្ម័គ្រចិត្ត និងដើម្បីចូលរួមចំណែកជាមួយរាជរដ្ឋាភិបាលក្នុងការកាត់បន្ថយភាពក្រីក្រ និងការលើកកម្ពស់ជីវភាពប្រជាពលរដ្ឋស្របតាមគោលនយោបាយរបស់រាជរដ្ឋាភិបាល ការពង្រឹងនីតិរដ្ឋ លទ្ធិប្រជាធិបតេយ្យ និងសេរីភាពបញ្ចេញមតិក្នុងក្របខ័ណ្ឌច្បាប់។
វេទិកាសន្ទនានេះបានដើរតួនាទីយ៉ាងសំខាន់ក្នុងការតភ្ជាប់ទំនាក់ទំនងរវាងអង្គការសង្គមស៊ីវិលទាំងអស់នៅកម្ពុជា ពិសេសជំរុញការសហការអនុវត្តគម្រោងអភិវឌ្ឍន៍រួមគ្នា ដើម្បីឆ្លើយតបទៅនឹងតម្រូវការពិតប្រាកដរបស់ប្រជាពលរដ្ឋ។ យោងតាមឯកសារសាវតាររបស់ វ.ស.ស។
លោក កឹមរ័ត្ន វិសិដ្ឋ រដ្ឋលេខាទីស្ដីការគណៈរដ្ឋមន្ដ្រី និងជាប្រធានក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិលបានថ្លែងប្រាប់អ្នកសារព័ត៌មានបន្ទាប់ពីកិច្ចជំនួបពិភាក្សាថា វេទិកាសម្ព័ន្ធសង្គមស៊ីវិលជាអង្គភាពមួយដែលរាជរដ្ឋាភិបាលបង្កើតឡើងជួយសម្របសម្រួល និងពង្រឹងទំនាក់ទំនងជាមួយអង្គការសង្គមស៊ីវិល និងស្ថាប័នរាជរដ្ឋាភិបាល ដើម្បីដោះស្រាយបញ្ហាប្រឈមផ្សេងៗរបស់អង្គការសង្គមស៊ីវិល សមាគម និងសហគមន៍។
លោកបានថ្លែងថា៖ «ការជួបជុំនៅថ្ងៃនេះគឺជាការជួបជុំរវាង វ.ស.ស ជាមួយដៃគូរបស់ខ្លួនដើម្បីនឹងពិនិត្យថា តើអ្វីជាបញ្ហាប្រឈមរបស់សមាជិករបស់ វ.ស.ស ហើយថាអ្វីខ្លះដែល វ.ស.ស អាចជួយក្នុងដំណើរការងារ ប្រតិបត្តិការរបស់អង្គការ និងសមាគម»។
លោក វិស័ដ្ឋ ថ្លែងថា៖ «ឆ្លងកាត់បទពិភាក្សា និងការសន្ទនា យើងឃើញថាគ្មានភាពតានតឹងហើយបរិយាកាសនៃការសន្ទនាគឺមានលក្ខណៈធូរស្រាលជាងមុន ស្និទ្ធស្នាលជាងមុនរវាងអាជ្ញាធរថ្នាក់ក្រោមជាតិជាមួយបណ្តាអង្គការនានា ហើយពិសេសពេលយើងចុះតាមខេត្តឆ្ងាយមានការចូលរួមពីសហគមន៍ច្រើន។ គឺជាអ្វីដែលរាជរដ្ឋាភិបាលចង់បានគឺភាពស្និទ្ធស្នាល និងបរិយាកាសការងារមួយដែលល្អប្រសើររវាងវិស័យសង្គមស៊ីវិលជាមួយរាជរដ្ឋាភិបាល ហើយយើងបានលើកទឹកចិត្តឲ្យអាជ្ញាធរថ្នាក់ក្រោមជាតិបង្កើតបរិយាកាសល្អ និងសហការល្អជាមួយអង្គការសង្គមស៊ីវិលហើយតាមរយៈនេះយើងឃើញថាវិស័យសង្គមស៊ីវិលនៅកម្ពុជាកំពុងតែប្រព្រឹត្តទៅដោយសេរី គ្មានការរារាំង គ្មានការគាបសង្កត់ពីខាងណានោះទេ»។
លោកបានឲ្យដឹងថារហូតមកទល់ពេលបច្ចុប្បន្ននេះមានអង្គការ សមាគម និងសហជីពចំនួន ១៨៥ បានមកដាក់ពាក្យស្នើសុំធ្វើជាដៃគូក្នុងនោះចំនួន ១២៩ បានបំពេញឯកសាររួចរាល់។
លោក សោម អូន ប្រធានសភាសម្ព័ន្ធសហជីពជាតិកម្ពុជា NACC និងអនុប្រធានក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិលដែលបានចូលរួមក្នុងវេទិកាសម្ព័ន្ធសង្គមស៊ីវិលនេះបានថ្លែងប្រាប់កាសែតភ្នំពេញប៉ុស្តិ៍កាលពីថ្ងៃចន្ទថា វេទិកាសម្ព័ន្ធសង្គមស៊ីវិលបានជួយដោះស្រាយបញ្ហាប្រឈមរបស់អង្គការ សមាគម និងសហគមន៍ដោយស្វះស្វែងរកដៃគូអភិឌ្ឍន៍។
លោក សា ម៉េត ប្រធានអង្គការអប់រំផ្នែកសុខភាពក្នុងខេត្តកំពតបានស្នើសុំអង្គការមូលនិធិចិនជួយដោះស្រាយបញ្ហាសុខភាពដែលកំពុងកើតមានដែលប្រជាពលរដ្ឋជាច្រើនកំពុងព្រួយបារម្ភ។
លោក សោម អូន បានថ្លែងថាប្រធានក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិលទទួលយកនូវការស្នើសុំរបស់អង្គការ សមាគម និងសហគមន៍ ហើយថា ម្ចាស់គម្រោងដែលជាអង្គការចិននឹងយកទៅពិភាក្សាផ្ទៃក្នុងដោះស្រាយ។
លោក Zhang Yaowu ប្រធានអង្គការមូលនិធិចិនសម្រាប់សន្តិភាព និងការអភិវឌ្ឍថាអង្គការក្រៅរដ្ឋាភិបាលមិនមែនជាសត្រូវរបស់រាជរដ្ឋាភិបាលទេ តែជាមិត្ត និងដៃគូរបស់រាជរដ្ឋាភិបាលក្នុងការអភិវឌ្ឍ។ បើទោះបីជាអង្គការក្រៅរដ្ឋាភិបាលមានទស្សនៈខុសគ្នាជុំវិញនយោបាយ ក៏ប៉ុន្តែធ្វើការដើម្បីផលប្រយោជន៍ក្នុងសហគមន៍ទាំងអស់៕
