.jpg)
គ្រូពេទ្យចាក់វ៉ាក់សាំងការពារជំងឺកូវីដ១៩ឱ្យប្រជាពលរដ្ឋនៅមន្ទីរពេទ្យបង្អែកដង្កោ កាលពីថ្ងៃទី ៣ ខែមីនា ឆ្នាំ ២០២១។ ហុង មិនា
ភ្នំពេញៈ ក្រសួងសុខាភិបាលនឹងចាប់ផ្តើមដំណើរការចាក់វ៉ាក់សាំងកូវីដ ១៩ COVISHIELD របស់ក្រុមហ៊ុន AstraZeneca ឡើងវិញ សម្រាប់ក្រុមមនុស្សអាយុចាប់ពី ៦០ ឆ្នាំឡើងទៅដោយមិនគិតថ្លៃចាប់ពីថ្ងៃទី ១០ ខែមីនា ឆ្នាំ ២០២១ នៅក្នុងរាជធានីភ្នំពេញ ខេត្តកណ្តាល និងខេត្តព្រះសីហនុ ដោយឈរលើគោលការណ៍ស្ម័គ្រចិត្ត ហើយអាជ្ញាធរថ្នាក់ក្រោមជាតិត្រូវសម្របសម្រួលឱ្យពលរដ្ឋមកចាក់វ៉ាក់សាំងនេះ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានចេញសេចក្តីប្រកាសព័ត៌មាននៅថ្ងៃទី ៦ ខែមីនាថា ដោយសង្កេតឃើញថា ប្រជាពលរដ្ឋដែលមានអាយុចាប់ពី ៦០ ឆ្នាំឡើងមានបំណងស្ម័គ្រចិត្តចាក់វ៉ាក់សាំងកូវីដ១៩ច្រើនហើយសម្រុកមកចាក់ដោយមានការកកស្ទះ និងរង់ចាំយូរនោះ ក្រសួងបានធ្វើការផ្អាកការចាក់វ៉ាក់សាំងរបស់ក្រុមហ៊ុន AstraZeneca ជាបណ្តោះអាសន្នសិន នៅថ្ងៃទី ៧ ខែមីនា ឆ្នាំ ២០២១។
លោកថា៖ «ក្រសួងនឹងចាប់ដំណើរការចាក់វ៉ាក់សាំងរបស់ក្រុមហ៊ុន AstraZeneca ឡើងវិញនៅថ្ងៃទី ១០ ខែមីនា ដើម្បីទុកពេលវេលាជូនអាជ្ញាធរថ្នាក់ក្រោមជាតិនៅរាជធានីភ្នំពេញ ខេត្តកណ្តាល និងខេត្តព្រះសីហនុ ធ្វើការសម្របសម្រួលរៀបចំក្រុមប្រជាជន ដែលនៅក្នុងក្រុមអាយុនេះ ដើម្បីមកចាក់ទៅតាមថ្ងៃនីមួយៗវិញ»។
បើតាមក្រសួងសុខាភិបាល អាជ្ញាធរមូលដ្ឋាន (ភូមិ/ឃុំ-សង្កាត់) នៃរាជធានី-ខេត្ត នឹងចុះស្រង់ស្ថិតិពលរដ្ឋ រួចជូនលិខិតអញ្ជើញដល់ប្រជាពលរដ្ឋដែលមានអាយុពី ៦០ ឆ្នាំឡើងទៅឱ្យទៅទទួលវ៉ាក់សាំងរៀងរាល់ម៉ោងធ្វើការ នៅតាមមន្ទីរពេទ្យបង្អែករាជធានី-ខេត្ត និងមន្ទីរពេទ្យបង្អែកស្រុកប្រតិបត្តិ ដែលស្ថិតនៅក្នុងមូលដ្ឋានរបស់ពួកគាត់ ដែលកំពុងរស់នៅ។
សេចក្តីប្រកាសបញ្ជាក់ថា៖ «ចំពោះយុទ្ធនាការចាក់វ៉ាក់សាំងកូវីដ១៩ AstraZeneca នឹងត្រូវផ្តល់ជូនក្រុមមនុស្សដែលងាយរងគ្រោះនឹងជំងឺកូវីដ១៩ ដែលមានអាយុចាប់ពី ៦០ ឆ្នាំឡើងទៅ ក្នុងមូលដ្ឋានរាជធានីភ្នំពេញ ខេត្តកណ្ដាល និងខេត្តព្រះសីហនុតែប៉ុណ្ណោះ»។
ជាមួយគ្នានេះចំពោះវ៉ាក់សាំងកូវីដ១៩ស៊ីណូហ្វាមដែលជាជំនួយរបស់សាធារណរដ្ឋប្រជាមានិតចិននៅតែបន្តចាក់ជូនប្រជាពលរដ្ឋដែលមានអាយុចាប់ពី ១៨ ឆ្នាំដល់ ៥៩ ឆ្នាំ ហើយត្រូវបានកំណត់ផ្ដល់ជូនក្រុមមនុស្សអាទិភាពដូចជា បុគ្គលិកសុខាភិបាល កងកម្លាំងនគរបាលជាតិ ចំណុះស្នងការដ្ឋានរាជធានី-ខេត្ត មន្ត្រីរាជការស៊ីវិលជួរមុខ និងមន្ត្រីមជ្ឈមណ្ឌលសកម្មភាពកំចាត់មីនកម្ពុជា អាជ្ញាធរមូលដ្ឋាន កម្មករ-កម្មការិនីប្រមូលសំរាមជាដើម។
ក្រសួងសុខាភិបាលលើកឡើងថា សម្រាប់មន្ត្រីការទូត មន្ត្រីអង្គការសហប្រជាជាតិ តំណាងស្ថាប័នហិរញ្ញវត្ថុអន្តរជាតិ អង្គការអន្តរជាតិ និងអង្គការក្រៅរដ្ឋាភិបាលអន្តរជាតិ ស្នើសុំឱ្យមានការរៀបចំជាក្រុមៗ និងមានបញ្ជីឈ្មោះត្រឹមត្រូវដែលសម្របសម្រួលដោយក្រសួងការបរទេស និងសហប្រតិបត្តិការអន្តរជាតិ។ មន្ទីរពេទ្យកាល់ម៉ែត គឺជាទីកន្លែងដែលអនុញ្ញាតឱ្យចាក់វ៉ាក់សាំង សម្រាប់ឥស្សរជនជាន់ខ្ពស់ដែលមានតួនាទីចាប់ពីថ្នាក់រដ្ឋលេខាធិការឡើងទៅ និងមន្ត្រីការទូត មន្ត្រីអង្គការសហប្រជាជាតិ តំណាងស្ថាប័នហិរញ្ញវត្ថុអន្តរជាតិ អង្គការអន្តរជាតិ និងអង្គការក្រៅរដ្ឋាភិបាលអន្តរជាតិ។
លោក គួច ចំរើន អភិបាលខេត្តព្រះសីហនុបានសម្រេចយកសាលាបឋមអនុវិទ្យាល័យតេជោសែនកម្មករ ដើម្បីប្រើប្រាស់ធ្វើជាទីកន្លែងរៀបចំសម្រាប់ការចាក់វ៉ាក់សាំងកូវីដ១៩ទាំង ២ ប្រភេទនេះ ជូនដល់ប្រជាពលរដ្ឋដែលមានហានិភ័យខ្ពស់ចាប់ ពីថ្ងៃទី ៧ ខែមីនាតទៅ។
គ្រូពេទ្យកំពុងចាក់វ៉ាក់សាំងកូវីដ១៩ ដល់ស្ត្រីម្នាក់នៅមន្ទីរពេទ្យក្នុងខណ្ឌដង្កោពីថ្ងៃទី ៣ មីនា។ហុង មិនា
លោកបានប្រាប់ថា រដ្ឋបាលខេត្តព្រះសីហនុបានខិតខំចាក់វ៉ាក់សាំងការពារជំងឺកូវីដ១៩ ជូនដល់មន្ត្រីរាជការ កងកម្លាំងប្រដាប់អាវុធ ដែលនៅជួរមុខ នៅក្នុងមន្ទីរពេទ្យ តាមមណ្ឌលធ្វើចត្តាឡីស័ក និងកន្លែងដែលមានការពាក់ព័ន្ធរួចរាល់។ ដោយឡែកសម្រាប់ប្រជាពលរដ្ឋដែលស្ម័គ្រចិត្តចាក់វ៉ាក់សាំងនេះលោក គួច ចំរើន បានរៀបចំទីតាំងក្នុងបរិវេណសាលាបឋមអនុវិទ្យាល័យតេជោសែនកម្មករ សម្រាប់ការចាក់វ៉ាក់សាំងដែលមាន ២ ប្រភេទគឺស៊ីណូហ្វាម សម្រាប់មនុស្សអាយុពី ១៨ ឆ្នាំដល់ ៥៩ ឆ្នាំ និង AstraZeneca ចាប់ពីអាយុ ៦០ ឆ្នាំឡើងទៅ។
លោកបញ្ជាក់ថា៖ «យើងនៅតែបន្តការចាក់តាមការរៀបចំ ដោយសារបងប្អូនយើង ដែលមិនទាន់បានកំណត់មុខសញ្ញាដែលត្រូវចាក់បាននាំគ្នាមកប្រជ្រៀតគ្នា ដណ្តើមគ្នាចាក់នៅតាមមន្ទីរពេទ្យ ដែលធ្វើឱ្យមានការពិបាកក្នុងការគ្រប់គ្រង និងមិនបានគោរពតាមវិធានសុខាភិបាលឡើយដែលអាចប្រឈមនឹងការឆ្លងជំងឺនេះផងដែរ»។
ទន្ទឹមនឹងនេះដែរ លោក ម៉ម ប៊ុនហេង បានយល់ព្រមលើសំណើផ្តល់អាទិភាពចាក់វ៉ាក់សាំងកូវីដ-១៩ទៅដល់មន្ត្រីរាជការ និងបុគ្គលិកដែលពាក់ព័ន្ធផ្តល់សេវាកម្មដឹកជញ្ជូន តាមផ្លូវអាកាសចាប់ពីថ្ងៃទី ៩ ខែមីនាតទៅ។
យោងតាមក្រសួងសុខាភិបាលគិតចាប់ពីថ្ងៃទី ១០ ខែកុម្ភៈ ដល់ថ្ងៃទី ៦ ខែមីនា ឆ្នាំ ២០២១ មានអ្នកបានចាក់វ៉ាក់សាំងចំនួន ៧៨ ៨២៥ នាក់ ចំណែកខាងក្រសួងការពារជាតិមានចំនួន ៩៦ ០៨០ នាក់ គិតត្រឹមរយៈពេលដូចគ្នា។
គួរបញ្ជាក់ផងដែរថា វ៉ាក់សាំងក្រុមហ៊ុន AstraZeneca ចំនួន ៣២៤ ០០០ ដូស បានដឹកមកដល់ប្រទេសកម្ពុជាកាលពីយប់ថ្ងៃទី ២ ខែមីនា ឆ្នាំ ២០២១ ដែលជាចំនួនដូសដំបូង ក្នុងចំណោមវ៉ាក់សាំងសរុបចំនួន ១,១ លានដូស ដែលយន្តការ COVAX នឹងផ្តល់ជូនប្រទេសកម្ពុជាជាដំណាក់កាលៗនៅត្រឹមដំណាច់ខែឧសភា ឆ្នាំ ២០២១ នេះ។
ចំណែក សាធារណរដ្ឋប្រជាមានិតចិនក៏បានផ្តល់វ៉ាក់សាំងកូវីដ១៩ ស៊ីណូហ្វាមចំនួន ១ លានដូសមកដល់កម្ពុជាផងដែរ ដោយវ៉ាក់សាំងចំនួន ៦០ ម៉ឺនដូសដំបូងត្រូវបានដឹកមកដល់កម្ពុជាកាលពីថ្ងៃទី ៧ ខែកុម្ភៈ ចំណែកវ៉ាក់សាំងចំនួន ៤០ ម៉ឺនដូសនឹងអាចដឹកមកដល់មុនពិធីបុណ្យចូលឆ្នាំប្រពៃណីខ្មែរខាងមុខ៕
