ភ្នំពេញ៖ វ៉ាក់សាំងស៊ីណូវ៉ាក់ (Sinovac) របស់ចិន ដែលជាការបញ្ជាទិញជំហានទី២ របស់រាជរដ្ឋាភិបាលកម្ពុជាចំនួន ៥០ ម៉ឺនដូស នឹងដឹកជញ្ជូនមកដល់អាកាសយានដ្ឋានអន្តរជាតិ រាជធានីភ្នំពេញ នាថ្ងៃទី ១៧ ខែមេសាស្អែក។ នេះបើតាមការបញ្ជាក់របស់ស្ថានទូតចិនប្រចាំនៅកម្ពុជានាព្រឹកនេះ។
ស្ថានទូតចិនបានសរសេរថា ទោះបីជាប្រទេសចិន ស្ថិតក្នុងស្ថានភាពដែលមានតម្រូវការវ៉ាក់សាំងក៏ដោយ ក៏នៅតែបន្តផ្តល់ទៅតាមតម្រូវការបញ្ជាទិញរបស់ភាគីកម្ពុជាដែរ។
ស្ថានទូតចិនបញ្ជាក់ថា៖ «នេះបានបង្ហាញយ៉ាងច្បាស់អំពីចំណងមិត្តភាពដែកថែបប្រៀបដូចបងប្អូនរវាងប្រទេសទាំងពីរ។ សង្ឃឹមថា វ៉ាក់សាំងចិនអាចរួមចំណែកយ៉ាងសកម្មជូនដល់ប្រជាជនកម្ពុជាក្នុងកិច្ចការប្រយុទ្ធប្រឆាំងជំងឺវីរុសកូវីដ ១៩»។
លោកនាយករដ្ឋមន្ត្រី ហ៊ុន សែន កាលពីរំលងអធ្រាត្រឈានចូលថ្ងៃ ១២ មេសា បានចេញសារបន្ទាន់មួយដោយបានអំពាវនាវកុំឱ្យពលរដ្ឋនាំគ្នាទៅដណ្តើមចាក់វ៉ាក់សាំង ខណៈចំនួនវ៉ាក់សាំងនៅមានកំណត់ ដែលនាំឱ្យប៉ះពាល់ដល់ផែនការមេនៃការចាក់វ៉ាក់សាំង ស្របពេលដែលរាជរដ្ឋាភិបាលកំពុងប្រឹងរកវ៉ាក់សាំងមកចាក់ជូនពលរដ្ឋទៅតាមលំដាប់លំដោយ។
លោកនាយករដ្ឋមន្រ្ដីបានថ្លែងថា រាជរដ្ឋាភិបាលគ្រោងចាក់វ៉ាក់សាំងការពារជំងឺកូវីដដល់ប្រជាជនជាង ១០ លាននាក់យ៉ាងតិច ដែលត្រូវការវ៉ាក់សាំងប្រមាណ ២០ លានដូស។ ខណៈនៅក្នុងខែឧសភា វ៉ាក់សាំងនឹងមកដល់ចំនួន ១,៥ លានដូស ខែមិថុនានឹងមកដល់ចំនួន ៣ លានដូស ខែកក្កដា នឹងមកដល់ចំនួន ២ លានដូស និងខែសីហាមកដល់ចំនួន ១ លានដូសទៀត។
លោកបានប្រាប់ថា៖ «ក្នុងឆ្នាំនេះ បើវ៉ាក់សាំងមកតាមផែនការនេះ គម្រោងរបស់យើងមាន ២០ លានដូស តែនឹងមកដល់ក្នុងឆ្នាំនេះជាង ១១ លានដូស ដែលយើងអាចដំណើរការចាក់ ដែលពេលនេះយើងមានចំនួនជាង ២ លានហើយ ហើយនៅថ្ងៃទី ១៧ នេះ វ៉ាក់សាំងនឹងមកដល់កន្លះលានដូសទៀត»៕