ភ្នំពេញៈ សកម្មជនដីធ្លីនៅតាមសហគមន៍មួយចំនួននៅតែប្រកាន់ជំហរបន្តធ្វើយុទ្ធនាការស្លៀកពាក់ខ្មៅនៅថ្ងៃចន្ទដដែលដោយនៅព្រឹកថ្ងៃចន្ទនេះនឹងចាប់ផ្តើមដង្ហែក្បួនដោយជិះម៉ូតូកង់បីចេញពីច្រមុះជ្រូកចេនឡានៅក្បែរផ្សារដើមគឆ្ពោះទៅកាន់ពន្ធនាគារព្រៃស។
ការសម្រេចបន្តដង្ហែដោយស្លៀកពាក់ខ្មៅដើម្បីទាមទារឲ្យមានការដោះលែងមន្ត្រីសិទ្ធិមនុស្សអាដហុកចំនួន ៤ រូប និងមន្ត្រី គជប ១ រូបនេះបានធ្វើឡើងនៅក្នុងកិច្ចប្រជុំមួយរវាងសហគមន៍ដីធ្លីមួយចំនួនក្នុងរាជធានីភ្នំពេញកាលពីយប់មិញបន្ទាប់ពីពួកគេពិភាក្សាគ្នាទៅឃើញថាប្រសិនបើពួកគេបញ្ឈប់ការដង្ហែក្បួនដោយស្លៀកពាក់ខ្មៅនោះមានន័យថាពួកគេទទួលស្គាល់ការចោទប្រកាន់របស់លោកនាយករដ្ឋមន្ត្រី ហ៊ុន សែន ដែលថាពួកគេមានបំណងចង់ធ្វើបដិវត្តន៍ពណ៌។ «អ៊ីចឹងយើងស្លៀកពាក់ខ្មៅដង្ហែក្បួនទៀតដើម្បីបញ្ជាក់ថាពួកយើងមិនមានបំណងធ្វើបដិវត្តន៍ពណ៌អីដូចការចោទប្រកាន់របស់លោក ហ៊ុន សែននោះទេ»។ នេះបើតាមសកម្មជនម្នាក់ដែលសុំមិនបញ្ចេញឈ្មោះដែលបានទូរស័ព្ទប្រាប់ភ្នំពេញប៉ុស្តិ៍បន្ទាប់ពីបញ្ចប់កិច្ចប្រជុំកាលពីយប់មិញ។
យុទ្ធនាការស្លៀកពាក់ខ្មៅរៀងរាល់ថ្ងៃចន្ទត្រូវបានអ្នករងគ្រោះដីធ្លី និងមន្ត្រីសង្គមស៊ីវិលចាប់ផ្តើមធ្វើកាលពីថ្ងៃចន្ទសប្តាហ៍មុនដើម្បីបង្ហាញពីការខកចិត្តបន្ទាប់ពីតុលាការឃុំខ្លួនមន្ត្រីសិទ្ធិមនុស្ស និងមន្ត្រី គជប ចំនួន ៥ នាក់ដោយចាត់ទុកថាការឃុំខ្លួននេះធ្វើឡើងដោយអយុត្តិធម៌បំផុត។ ប៉ុន្តែការដង្ហែក្បួននៅថ្ងៃនេះនឹងពុំមានការចូលរួមពីមន្ត្រីអង្គការសង្គមស៊ីវិលទេគឺមានតែក្រុមសកម្មជនដីធ្លីប្រមាណតែ ២០ នាក់ប៉ុណ្ណោះ។
កាលពីថ្ងៃចន្ទទី ៩ ខែឧសភាសប្តាហ៍មុនសកម្មជនដីធ្លី និងមន្ត្រីអង្គការសង្គមស៊ីវិលបានស្លៀកពាក់ខ្មៅទៅពន្ធនាគារព្រៃសដើម្បីទាមទារឱ្យដោះលែងមន្ត្រីទាំងនេះតែត្រូវបានសមត្ថកិច្ចចាប់ឃាត់ខ្លួនអ្នកស្លៀកពាក់ខ្មៅ ៨ នាក់ដើម្បីសាកសួរចាប់ពីម៉ោងប្រមាណ ៩ ព្រឹក និងដោះលែងវិញនៅមុនម៉ោង ៧ យប់នាថ្ងៃដដែល។
អ្នកស្រី បូ សោភា សកម្មជនដីធ្លីនៅតំបន់បឹងកក់បានប្រាប់ភ្នំពេញប៉ុស្តិ៍នៅមុនកិច្ចប្រជុំថាពួកគាត់នៅតែរក្សាជំហរស្លៀកពាក់ខ្មៅដើម្បីបង្ហាញពីការមិនពេញចិត្តចំពោះរដ្ឋាភិបាល។
អ្នកស្រីថា៖ «យើងស្លៀកខ្មៅនៅតាមសហគមន៍ដើម្បីសម្តែងការមិនពេញចិត្តពីការឃុំខ្លួនមន្ត្រីសិទ្ធិមនុស្ស និងមួយវិញទៀតការស្លៀកខ្មៅនេះគឺផ្ញើសារដល់អ្នកជាប់ឃុំថាពួកគេមិនឯកោទេ»។
យ៉ាងនេះក្តីអ្នកស្រីបញ្ជាក់ថាអាវខ្មៅដែលគាត់ពាក់រាល់ដងជាអាវរបស់ខ្លួនមិនមានអង្គការណាឧបត្ថម្ភឱ្យទេ។ ស្ត្រីរូបនេះបានគូសបញ្ជាក់ទៀតថាការស្លៀកពាក់ខ្មៅដើម្បីបង្ហាញការមិនពេញចិត្តចំពោះចំណាត់ការរបស់រដ្ឋាភិបាលមិនមែនជាការធ្វើបដិវត្តន៍ដូចការចោទរបស់លោកនាយករដ្ឋមន្ត្រីនោះទេ។
អ្នកស្រីបញ្ជាក់ថា៖ «សម្រាប់រូបភាពដែលរដ្ឋាភិបាលចោទពួកខ្ញុំថាធ្វើបដិវត្តពណ៌គឺជាការលាបពណ៌អ្វីដែលខ្ញុំខ្លាចបច្ចុប្បន្នមិនមែនខ្លាចគេចាប់ដាក់គុកទេអ្វីដែលខ្លាចគឺខ្លាចការលាបពណ៌របស់មន្ត្រីរដ្ឋាភិបាលមួយចំនួនចង់បំបាក់ស្មារតីប្រជាពលរដ្ឋ»។
ចំណែកអ្នករងគ្រោះដីធ្លីម្នាក់ទៀតនៅសហគមន៍ SOS អ្នកស្រី ច្រាយ នីម ថ្លែងថាអ្នកស្រីនៅតែបន្តស្លៀកខ្មៅនៅរៀងរាល់ថ្ងៃចន្ទដដែលដើម្បីបង្ហាញពីការកាន់ទុក្ខដល់មន្ត្រីសិទ្ធិមនុស្សដែលត្រូវបានគេចាប់ឃុំខ្លួន។
អ្នកស្រីថ្លែងថា៖ «បើខ្ញុំគ្រាន់តែស្លៀកខ្មៅនៅផ្ទះទៅធ្វើការហើយគេថាខុសច្បាប់ឱ្យគេធ្វើទៅការស្លៀកពាក់ខ្មៅជាសិទ្ធិសេរីភាពរបស់ខ្ញុំសិទ្ធិក្នុងការស្លៀកពាក់ដែលខ្លួនឯងចូលចិត្តពណ៌អីក៏បានតែបើគេថាពាក់ខ្មៅខុសច្បាប់យកច្បាប់ហ្នឹងមកបង្ហាញមកមុននឹងចាប់ពួកខ្ញុំ»។
កូនស្រីរបស់លោក យី សុខសាន កញ្ញា សាន វឌ្ឍនៈវត្តី ថ្លែងថានៅថ្ងៃចន្ទនេះនាងនឹងទៅសួរសុខទុក្ខប៉ារបស់នាងតែការស្លៀកខ្មៅអាស្រ័យលើមន្ត្រីពន្ធនាគារអនុញ្ញាតឱ្យស្លៀកឬក៏អត់។ យ៉ាងនេះក្តី វត្តី ផ្ញើសារថ្លែងអំណរគុណដល់លោកនាយករដ្ឋមន្ត្រីដែលបានផ្តាំផ្ញើសារឱ្យគ្រួសាររកមេធាវីពូកែការពារក្តីនេះ។
កញ្ញាថា៖ «អរគុណប្រសាសន៍សម្តេចដែលគាត់បានបារម្ភ និងផ្តល់ដំបូន្មានឱ្យរកមេធាវីល្អៗអ៊ីចឹងបានន័យថាគាត់ផ្តល់ឱកាសជាការលើកទឹកចិត្តឱ្យយើងអ៊ីចឹងខ្ញុំសង្ឃឹមថាប៉ារបស់ខ្ញុំនឹងត្រូវបានដោះលែងថ្ងៃខាងមុខឆាប់ៗ»។
ភរិយារបស់លោក នី ចរិយា មន្ត្រី គជប ថ្លែងថាអ្នកស្រីមិនមានគម្រោងស្លៀកពាក់ខ្មៅទៅហែក្បួននោះទេខណៈកូនរបស់អ្នកស្រីស្ថិតក្នុងមន្ទីរពេទ្យព្យាបាលជំងឺ។
លោកស្រីថា៖ «ខ្ញុំគ្មានគម្រោងស្លៀកខ្មៅទេកូនខ្ញុំកំពុងនៅពេទ្យខ្ញុំរវល់មើលថែកូនខ្ញុំតែបើរើខោអាវឃើញមានអាវ ឬខោខ្មៅខ្ញុំនឹងស្លៀកតែវាមិនទៀងបើមានក៏ស្លៀកទៅមិនមានក៏អត់ទៅព្រោះរវល់មើលកូន»។
អភិបាលរងរាជធានីភ្នំពេញលោក ឃួង ស្រេង បានប្រាប់ភ្នំពេញប៉ុស្តិ៍ថាការឃាត់ខ្លួន ឬមិនឃាត់ខ្លួនអាស្រ័យទៅលើពួកគាត់ស្លៀកពាក់ថាជាចេតនាប្រមូលផ្តុំដែលធ្វើឱ្យប៉ះពាល់សណ្តាប់ធ្នាប់សាធារណៈ ឬស្លៀកពាក់ធម្មតា។
លោកថា៖ «ការឃាត់ខ្លួន ឬមិនឃាត់ខ្លួនអាស្រ័យលើការប្រមូលផ្តុំ ឬហែក្បួនដោយខុសច្បាប់ដែលនាំឱ្យបង្កដល់សណ្តាប់ធ្នាប់សាធារណៈទើបយើងឃាត់ខ្លួនតែបើគាត់ពាក់អាវអីអាវទៅតាមទំនើងចិត្តរបស់គាត់ពាក់អាវទៅធ្វើការ ឬពាក់នៅផ្ទះក៏ពាក់ទៅគ្មានអ្នកណាហាមទេតែធ្វើម៉េចកុំឱ្យខុសច្បាប់»។
កាលពីថ្ងៃពុធសប្តាហ៍មុនលោកនាកយករដ្ឋមន្ត្រី ហ៊ុន សែន បានដាក់បញ្ជាដល់អាជ្ញាធរគ្រប់ជាន់ថ្នាក់ឲ្យត្រៀមបង្ក្រាបចំពោះអ្វីដែលលោកហៅថាក្រុមអ្នកដែលមានបំណងចង់ធ្វើបដិវត្តន៍ ឬធ្វើយុទ្ធនាការស្លៀកពាក់ខ្មៅជាយុទ្ធនាការមួយដែលត្រូវបានក្រុមអង្គការសង្គមស៊ីវិលពន្យល់ថាជាការតស៊ូមតិមួយដោយសន្តិវិធីអហិង្សាដើម្បីបង្ហាញពីការខកចិត្តចំពោះប្រព័ន្ធយុត្តិធម៌នៅកម្ពុជាក្នុងការចាប់ឃុំខ្លួនមន្ត្រីសិទ្ធិមនុស្សអាដហុក ៤ រូប និងមន្ត្រី គជប ១ រូបក្នុងសំណុំរឿងស្រីមុំដែលត្រូវគេអះអាងថាជាស្រីកំណាន់លោក កឹម សុខា ប្រធានស្តីទីគណបក្សសង្គ្រោះជាតិ។
លោក ហ៊ុន សែន ថ្លែងថា៖ «ខ្ញុំបានប្រាប់ទៅសម្តេច ស ខេង ប្រាប់ទៅថ្នាក់ដឹកនាំដទៃទៀតកុំខ្វល់ពីរឿងពណ៌ហ្អែងចង់ពណ៌អីក៏ដោយឲ្យតែធ្វើខុសច្បាប់ដាក់ទាំងអស់ហ្នឹងអត់មានរញ៉េរញ៉ៃទេហើយអ្នកដែលបំផុសឱ្យមានចលនាធ្វើយុទ្ធនាការ (ថ្ងៃចន្ទពណ៌ខ្មៅ) ត្រូវប្រយ័ត្ននាំទៅដល់នីតិបុគ្គលខ្ញុំគ្រាន់តែផ្តាំផ្ញើទេ»៕
