ភ្នំពេញៈ សាលាដំបូងរាជធានីភ្នំពេញ កាលពីម្សិលមិញ បានប្រកាសសាលក្រមដោយផ្តន្ទាទោសលើក្រុមគ្រួសារសកម្មជនដីធ្លីនៅតំបន់បឹងកក់ចំនួន ៤ នាក់ ក្នុងម្នាក់ៗឲ្យជាប់ពន្ធនាគារ ១ ឆ្នាំ និងពិន័យជាប្រាក់ចំនួន ២ លានរៀល ទាក់ទងនឹងបទចោទហិង្សាដោយចេតនា ជាបទចោទដែលសកម្មជនដីធ្លីទាំងនោះ ចាត់ទុកតាំងពីដើមទីមកថា គឺជារឿងអយុត្តិធម៌ និងមានចេតនាគាបសង្កត់។
លោក រស់ សាម៉ីឌី ចៅក្រមជម្រះបានប្រកាសផ្តន្ទាទោសអ្នកស្រី ង៉ែត ឃុន ហៅយាយម៉ាំមី អ្នកស្រី អេង ហួយ អ្នកស្រី អេង ស្រីហ៊ាង និង អ្នកស្រី អេង សុខា ឲ្យជាប់ពន្ធនាគារម្នាក់ៗ ១ ឆ្នាំ និងពិន័យជាប្រាក់ ២ លានរៀន។ សាលក្រមនេះ នឹងត្រូវបិទប្រកាសជាសាធារណៈ ក្នុងរយៈពេល ១ សប្តាហ៍ ដើម្បីឲ្យភាគីពាក់ព័ន្ធប្តឹងទាស់ មុនសាលក្រមចូលជាធរមាន ហើយបើមិនមានការប្តឹងទាស់ទេ ជនជាប់ចោទទាំង ៤ នាក់នឹងត្រូវចាប់ឃុំនៅពន្ធនាគារ តាមអំណាចរបស់សាលក្រម។
អ្នកស្រី អេង សុខា កូនស្រីយាយ ង៉ែត ឃុន ប្រាប់ភ្នំពេញប៉ុស្តិ៍ក្រោយប្រកាសសាលក្រមថា តុលាការបានចោទប្រកាន់មកលើពួកខ្លួនទាំងអយុត្តិធម៌ ហើយកាលពីក្នុងសវនាការកន្លងទៅតុលាការបានបំផ្លើសពាក្យពេចន៍នានា ដែលមានចេតនា ដាក់បន្ទុកលើគ្រួសារខ្លួនខណៈដែលតាំងពីចាប់ផ្តើមនីតិវិធី រហូតដល់ប្រកាសសាលក្រមនេះ គឺគ្មានការចូលរួមពីដើមបណ្តឹងទេដោយតុលាការ មានតែការដាក់បន្ទុក។ «តុលាការហ្នឹង អត់មានភាពឯករាជ្យទេ គាត់អត់មានផ្តល់យុត្តិធម៌សម្រាប់ពួកខ្ញុំជាជនរងគ្រោះទេ ព្រោះឲ្យតែពួកយើងជាជនរងគ្រោះសកម្មជនដីធ្លី គឺគាត់កាត់ទោសលើពួកខ្ញុំរហូត។ ដូចជាក្នុងហេតុការណ៍ហ្នឹងអ៊ីចឹង បងស្រីខ្ញុំទាំង ២ គ្មាននៅក្នុងហេតុការណ៍ហ្នឹងទេហើយក្នុងសវនាការសួរដេញដោល បងស្រីខ្ញុំ ក៏បានបញ្ជាក់ច្បាស់ដែរ តែតុលាការនៅតែដាក់ទោសគាត់»។
បើតាមអ្នកស្រី សុខា ពួកខ្លួននឹងដាក់ពាក្យបណ្តឹងទៅសាលាឧទ្ធរណ៍ដើម្បីប្តឹងទាស់នឹងសេចក្តីសម្រេចនេះ ហើយក៏សូមស្នើឲ្យក្រុមមេធាវីលោកនាយករដ្ឋមន្ត្រី ជួយការពារក្តីពួកខ្លួនផងដោយលើកឡើងថា ពួកខ្លួនដែលសុទ្ធតែជាស្ត្រីក្រីក្រទន់ខ្សោយ ពុំមានលទ្ធភាពក្នុងការស្វែងរកមេធាវីនោះទេ។
អ្នកស្រីបន្តថា៖ «បើពួកយើងរកព្រឹកខ្វះល្ងាច រកល្ងាចខ្វះព្រឹកហ្នឹង មានលុយណា ជួលមេធាវី មានតែបន្តស្វែងរកអន្តរាគមន៍ពីមេធាវីរបស់លោកនាយករដ្ឋមន្ត្រីឲ្យជួយ ហើយបើនៅតែមិនបានក៏ពួកខ្ញុំ ដាក់ពាក្យបណ្តឹងទៅដែរ»។
កាលពីខែមិថុនាឆ្នាំ ២០១៧ អ្នកស្រី សាត ផា ដែលជាដើមបណ្តឹងនៃរឿងក្តីហិង្សានេះបានដាក់ពាក្យបណ្តឹងនៅប៉ុស្តិ៍សង្កាត់ស្រះចកដើម្បីស្វែងរកយុត្តិធម៌ ពីការបាត់បង់ទ្រព្យសម្បត្តិដែលខ្លួនមានក្នុងជម្លោះហិង្សាមួយ នៅចំណុចមុខវិហារអ៊ិស្លាម។
តែក្រោយពីការដាក់ពាក្យប្តឹងនេះ តុលាការបានកោះហៅក្រុមគ្រួសារលោកយាយម៉ាំមី ចូលសវនាការជាបន្តបន្ទាប់ តែអ្នកស្រី សាត ផា អះអាងថា ខ្លួនមិនធ្លាប់ត្រូវបានតុលាការកោះហៅក្នុងនាមជាដើមបណ្តឹងម្តងណាឡើយ។
លោក ស៊ិង សែនករុណា អ្នកនាំពាក្យសមាគមសិទ្ធិមនុស្សអាដហុក និយាយថា បើទោះជាករណីនេះស្ថិតក្នុងវិវាទរវាងគូភាគី ដែលសមាគម មិនបានតាមដានក្តីប៉ុន្តែលោកយល់ថា តុលាការសម្រេចសេចក្តីក្នុងវិវាទនេះ គឺមិនត្រឹមត្រូវនោះទេ ព្រោះជាទូទៅដើម្បីភាពត្រឹមត្រូវតាមផ្លូវច្បាប់ គឺភាគីពាក់ព័ន្ធ ជាពិសេសដើមបណ្តឹងដែលបានប្តឹង ត្រូតែចូលខ្លួនទៅបំភ្លឺ តែក្នុងសំណុំរឿងនេះ វាហាក់ចម្លែក ដែលដើមបណ្តឹង មិនដែលទទួលការកោះហៅពីតុលាការ។ «តើសវនាការ ធ្វើឡើងរបៀបម៉េច បើមិនដែលកោះហៅដើមបណ្តឹងឲ្យចូលខ្លួនឆ្លើយតបក្នុងរឿងហ្នឹង! អ៊ីចឹងតុលាការ ធ្វើការលើរឿងហ្នឹង មិនបានយកចិត្តទុកដាក់ ទៅលើសំនុំរឿងហ្នឹងឲ្យបានត្រឹមត្រូវ តាមនីតិវិធីច្បាប់ទេ»។
លោកថា ស្ត្រីទាំងនេះគឺជាសកម្មជនការពារសិទ្ធិដីធ្លី និងចូលរួមសកម្មពីបញ្ហាទាមទារយុត្តិធម៌សង្គមដូច្នេះបើការផ្តន្ទាទោសធ្វើឲ្យគេមើលឃើញមិនមានភាពត្រឹមត្រូវ នោះច្បាស់ណាស់មតិមួយចំនួននឹងរិះគន់ថា នេះគឺជាការគាបសង្កត់មកលើពួកគាត់៕